Jɔn 15

Yeso loʼ tə a loʼ fəkaʼ

1Yeso n dza kpiʼi ndow tə̀ ngəd tə wi tə nə̀, “N ndzəm loʼ tə a loʼ fəkaʼ fə nyîmmə nə usum, Bày wuŋ u loʼ muu sum u tii wə. 2Abə kpìi kə loʼ kə məə way tam wə, tə n khəə maʼa i tsu, u wey u məənə tam wə, tə n faalə kad naŋa kɔʼ nə̀ wə i ngii məə tsu. 3Mə n ghəŋə ghaa nə̀ ghaa i zow n ghɔɔmə zuŋ zən n ghɔɔmə bənə tə̀ ghaa. 4Ghaa khə ni doʼo bə ghi mə nə kəfə kəmɔʼ, n doʼo bə soʼo ghi ghaa nə kəfə kəmɔʼ. Kpìi kə way ni mə̂ utam n nəŋə ghii kə nə̀ kə ka zuŋ doʼo nə fəkaʼ, a loʼ soʼo ighələ tə̀ ghaa way ni ghəŋə ghə i loʼ zə nə̀ saa dzəŋi way nə kəfə kəmɔʼ.

5N loʼ fəkaʼ, ghaa a loʼ kpìi tə tii tə. Wù wey tə loʼ ghi mə nə kəfə kəmɔʼ, mə n loʼ soʼo nə kəfə kəmɔʼ ghi wi, a loʼ wi tə loʼ ni ngii mə̂ utam. I loʼ sey n təŋkey, abə a bow tə mə, ghaa way ni ghəŋə ghə i loʼ zə. 6Wù wey tə way ghi mə nə kəfə kəmɔʼ, a khəə maʼa shiə ndow wi tə a loʼ kpìi kə fəkaʼ kə bəbə kə, kə n fɔbi zum kɔʼ, ghə n kuumə kpəghə ndow nə uvəllə, kə n fə fu. 7Abə saa loʼnə nə kəfə kəmɔʼ ghi mə, ghaa a khə soʼonə ghɔɔmə zuŋ zə n fə̀ŋ tə ghaa, ghaa loʼ ni nɔɔ fə key ghaa ləghənə ni keeli, Zə̀ kə i fu tə ghaa. 8Bày wuŋ keeli nkɔʼlə abə ghaa ngii məənə tam wə. Tam wən ghaa məənə, dii tsuu nə̀ ghaa ndzəm loʼ ngəd tuŋ. 9N ləghə ghaa n jìi zey Bày wuŋ ləghənə mə tii. Sey, bɔɔmə doʼo tsu kə na nə kəfə kəmɔʼ ghi mə tə̀ mə i ləghə ghaa. 10Abə ghaa naŋŋə laŋ wuŋ wə, mə i ləghə ghaa, ighələ tə̀ n naŋŋənə laŋ u Bày wuŋ wə, tə u ləghənə mə. 11N ghəə ghən dza bə tə ghaa ni ghəŋə nə̀ ghaa duʼlə ighələ tə̀ n duʼlənə nsə nə̀ ghaa loʼ ni duʼlə naʼ idzəm. 12Laŋ kuŋ key n fuu bənə tə ghaa loʼ nə̀ ghaa i ləghə wû i ghaa zə ighələ tə̀ n ləghənə ghaa. 13Ləghə i loʼ i way i tsəghəshinə ndzoʼo ləghə i zən, nə̀ wù bəghəm ni kpu n tow kə fə̂ a wi. 14Ghaa loʼ fə̂ ghuŋ abə ghaa bɔɔmə ghəŋŋə ndownə ghəə ghey n dza bənə tə̀ ghaa. 15Ni kaʼ tsu na ndow n sə kə, n kəm way ni tɔŋɔ ghaa nə̀ a loʼ ghə̂ a kəfwaʼ, n təŋkey, wù kəfwaʼ khə way fə key mûkəbii ə wi fwaʼanə. N kee tɔŋŋə ghaa nya nə̀ a loʼ fə̂ ghuŋ, n təŋkey, mə n chi dii may ghəə ghey mə â zoʼlə ney bənə n wɔ Bày wuŋ tə̀ ghaa. 16A way dzə ghaa, ghaa â sày bə mə, a loʼ mə, mə â saynə ghaa, fu tsu ghaa n daʼa kə nə̀ ghaa i məə tam u dzuŋu wə, ndzoʼo tam wey u doʼo tən nə, sey nə̀, wù ghaa nɔɔ kə kee tə Bày n zəd zuŋ, Bày i fu fə kə tii kə tə̀ wi. 17Laŋ key n fuunə tə̀ ghaa loʼ kə nə̀ ghaa i ləghə wû i ghaa zə.”

Yeso dza tə ngəd tə wi tə nə̀ ghə̂ a mbi ghə i bàa ghə

18Yeso n ndow n sə kə ni dza tə̀ ngəd tə wi tə nə̀, “Abə ghə̂ a mbi a bàanə ghaa, keeli tsu na nə̀ ghə n buʼ bàa dzə mə isə, tə̀ ghə ni bàa ghaa. 19Abə ghaa mə loʼ ghə̂ a mbi ghə, tə mbi mə ləghə ghaa. À sə fa loʼ kə nə̀ mə â sày nuu shi bə ghaa nə̀ ghaa ka kəm doʼo soʼo tə a loʼ ghə̂ a mbi. À wey loʼ ghə i tii zə ghə̂ a mbi a bàanə ghaa. 20Moʼlə tsu na nə n mâ buʼ dza tə̀ ghaa nə̀, ‘Wù kəfwaʼ tsəghəshiə tsə way mûkəbii ə wi.’ Abə ghə â loʼ ni chɔd mə, ghə i chɔdlɔ soʼonu ghaa. Abə ghə â naŋŋənə ghɔɔmə zuŋ zə, i sey diinə ghə i naŋŋə soʼonu ghɔɔmə i ghaa zə. 21Ghə̂ a mbi a nə ghəə ghən adzəm ghəŋŋə n kow ghaa bòʼ mə, n təŋkey, ghə khə way wù wey tə tûm bənə mə. 22Abə mə â ka bə ghɔɔmə aghəə tə̀ ghə, tə ghə mə khə way bəb i loʼ zə, a sə nya fa loʼ kə nə̀ ghə kəm way ni tuu nə̀ ghə ka bəb i loʼ i ghəŋə. 23Wù wey tə bàanə mə, tə sey baa soʼo Bày wuŋ. 24Abə a mə loʼ nə̀ ghə â ka koʼ fwaʼ key mə â fwaʼnə n fəŋŋə kə ghə nə̀ wù loʼ ka kam fwaʼ koʼ tsə, a mə loʼ nə̀ ghə ka kam ghəŋə bəəbə dzə ghə i loʼ zə. A sə fa loʼ kə nə̀ ghə n koʼ, ghə a nam ndow kə n sə kə ni bàa mə ghi Bày wuŋ. 25Ghəə ghən ghə ghəŋŋənə loʼ ni luulə tsu ghɔɔmə zey ghə â tɔ̀ɔ naŋanə n laŋ kə ghə nə̀, ‘Ghə bàa mə nə̀ n ka ghə n ghə i ghəŋə bəəbə.’

26Abə wù wey tə tsə̀ənə ghə̂ ghə i bənə, tə wey Mə i ney kɔʼɔ n wɔ Bày wuŋ, n tûm bə tə̀ ghaa, tɔŋŋə Zay kən kə dìi bənə isəŋə bòʼ Kəzə̀, à loʼ wi tə i tiilə dza bənə ndzoʼo wù wey n loʼnə ghii wə. 27Wû i ghaa, ghaa khə ni tiilə dza soʼo, bòʼ nə̀, ghaa â dzəŋi loʼ ghi mə nghee mə â kaʼ tsunə fwaʼ kuŋ kə.”

Currently Selected:

Jɔn 15: WEH

Highlight

Copy