Jɔn 14

Yeso loʼ jìi ni ndòw n səə Bày

1Yeso n ndow n sə kə, dza tə̀ ngəd tə̀ wi tə nə̀, “Kə fə̀ŋ tə nə baŋanə ghaa. Keeli na bəghəm i fə̀ŋ zə n kow Zə̀ kə, ghaa keeli soʼo n kow mə. 2N dza bə tə̀ ghaa nə̀, dzuu a ndaw a loʼ n ndaw Bày wuŋ n ndəm, abə a mə way sey, tə n mə ka dza bə dzə tə̀ ghaa nə̀ n sa ndow ni ndow bayyə naŋa tsu təluʼu tə̀ ghaa. 3Abə n ndòw faalə naŋa tsunə luʼu tə tə̀ ghaa, mə i kəm bə dzəŋŋə, n bə ney ghaa tə̀ saa i loʼ adzəm, sey nə̀, luʼu key n loʼnə tii, ghaa i loʼ soʼo fu ghi mə. 4Ghaa khənu luʼu key n ndownə tii, ghaa a khə soʼo jìi tii.”

5Tɔmɔs n bəb ndòw tə̀ Yeso nə̀, “Mûkəbii, ghey khə way luʼu key wə ndownə tii, ghey i bəghə fu nə ghey tsəghə ghee jìi?”

6Yeso n beeli ndow wi nə̀, “N loʼ jii, isəŋə nsə muu zə. Wù way dzə ni bə n səə Bày nə̀ a ka ney ndòw mə wi n səə wi. 7Abə ghaa mə ndzəm khənə mə, tə ghaa mə khə soʼo Bày wuŋ. Nya, ghaa n wi koʼ, ndzɔʼ khə soʼo wi.”

8Filip n dza tə̀ wi nə̀, “Mûkəbii, dii bə ghey n Bày tə̀ i may ghey n fə̀ŋ.”

9Yeso n beeli ndow wi nə̀, “I sey dii nə̀ wɔɔ kə tìi tìi key n doʼo kəŋə bənə fa ghi ghaa a Filip, wə nam məʼlə kə wù wey n loʼnə ghii wə ə? Wù wey tə loʼ nə̀ tə n mə koʼ, tə n koʼ soʼo Bày. À loʼ kee ghaa sə nam dza kə nə̀, ‘Dii bə ghey n Bày ə?’ 10Nə̀ ma a Filip, wə kam bəghəm tə way nə̀ n loʼ nə kəfə kəmɔʼ ghi Bày, Bày u loʼnə nə kəfə kəmɔʼ ghi mə ə? Ghɔɔmə zən n ghɔɔmə bənə tə̀ wɔ, n ghɔɔmə dzə way n ngəŋ zuŋ, à loʼ Bày wən tə loʼnə nə kəfə kəmɔʼ ghi mə, tə fuunə mə n daʼa kə ni fwaʼ fwaʼ kə wi. 11Bəghəm kɔʼ na nghee n dza tə̀ ghaa nə̀ n loʼ nə kəfə kəmɔʼ ghi Bày, Bày u loʼ nə kəfə kəmɔʼ ghi mə. Abə ghaa ləghə way ni bəghəm bòʼ i zən, kee bəghəm kɔʼ tə̀ mə bòʼ fwaʼ kən ghaa koʼnə nə̀ mə n fwaʼ. 12N dza bə isəŋə tə̀ ghaa nə̀, wù wey tə bəghəm fuunə tə̀ mə, tə i fwaʼa soʼonu ndzoʼo fwaʼ key n fwaʼanə ghii kə, tə i buʼ fwaʼ tsəghəshi tə mə â fwaʼnə, n təŋkey, n nya sa ndow n səə Bày. 13Abə ghaa nɔɔ kənə kee kə n zəd zuŋ, mə i fuunu tə̀ ghaa, sey nə̀ Bày loʼ ni keeli nkɔʼlə bòʼ Waa. 14Abə ghaa nɔɔ kə nə kee kə n zəd zuŋ, mə i fuunu.”

Yeso təb naŋa nə̀ tə i tûm bənu Zay kə Zow kə

15Yeso n nam dza ndow tə̀ ngəd tə wi tə nə̀, “Abə ghaa ləghənə mə, ghaa khə ni naŋŋə laŋ wuŋ wə. 16Mə i gɔŋŋə ndow tə Bày, tə i tûm bə ghaa n Wù wey tə tsə̀ənə ghə̂ ghə, tə i bə doʼo tən bə ghi ghaa tə̀ mbi nə bə may. 17Wù wən n dzanə loʼ Zay kə Zow kə. A loʼ wi tə i bə chiə diinə isəŋə kùm Kəzə̀. Ghə̂ a mbi a way dzə ni kpiney wi, n təŋkey, ghə khə way wi, ghə koʼo keeli soʼo way wi. Abə ghaa, ghaa khənu wi, n təŋkey, tə loʼ ghi ghaa, tə i muulə soʼo n fə̀ŋ tə ghaa.

18N way ni naŋa taʼa ghaa tə̀ a loʼ waa a chi. Mə i bəghə dzəŋŋənu n səə ghaa. 19Fəkəmə, ghə̂ a mbi ghə i kəm way ni koʼ mə, abə ghaa, ghaa i kee koʼonu mə. Ghaa i muu, n təŋkey, n loʼ utaw. 20A i loʼ n nəŋə i tii zə, ghaa i keeli tsuu nə̀ n loʼ nə kəfə kəmɔʼ ghi Bày, Bày u loʼ nə kəfə kəmɔʼ ghi mə, ighələ tə̀ ghaa loʼnə nə kəfə kəmɔʼ ghi mə, mə n loʼnə nə kəfə kəmɔʼ ghi ghaa.

21Wù wey tə zow laŋ wuŋ wə, bɔɔmə bwey ndow tii, a wey loʼ wù wey tə baa ləghənə mə. Wù wey tə ləghənə mə, Bày wuŋ i ləghənu wi, mə i ləghə soʼo wi, n dii bə soʼo wû wuŋ tə wù tii.”

22Judas (à way dzə tə wey ghə â tɔŋŋə nə̀ a loʼ Judas Iskaliɔt.) Tə n bəb ndow tə Yeso nə̀, “Mûkəbii, a loʼ kee wə ləghənə ni dii bə ndzoʼo wù wey wə loʼnə ghii wə tə̀ ghey ngəd tə, kee ləghə way ni dii tə̀ ghə̂ a mbi ghə ə?”

23Yeso n beeli ndow wi nə̀, “Abə wù ləghənə mə, tə khə ni naŋŋə ghɔɔmə zuŋ zə, Bày wuŋ i ləghə soʼo wi, mə ghi Bày wuŋ i bə muu dzəŋi bə ghi wi. 24Wù wey tə ləghə way mə, tə naŋŋə way ghɔɔmə zuŋ zə. Ghɔɔmə zey ghaa zownə n dzuu zuŋ, way dzə ghɔɔmə zuŋ i ngəŋ zə, a loʼ ghɔɔmə i Bày wuŋ wən tə tûmnə mə.

25N ghəə ghən dza bə tə̀ ghaa nya n təŋkey n nam loʼ fa ghi ghaa. 26A kee loʼ nə̀ Bày wuŋ i tûm bə ghaa n Zay kə Zow kə n zəd zuŋ tɔŋŋə wù wey tə tsə̀ənə ghə̂ ghə. À loʼ wi tə i diinə ghaa n ghəə ghə adzəm, tə i zə̀ŋŋə bə soʼo ghaa n ghəə ghən adzəm mə â dza naŋanə tə̀ ghaa.

27N fuu naŋŋə ghaa n buulə zə. À loʼ buulə zuŋ n fuu bənə tə̀ ghaa. Buulə zən n fuu bənə tə̀ ghaa way dzə ndzoʼo buulə zey ghə̂ a mbi a fuunə. Kə̂ fə̀ŋ tə nə̂ baŋanə ghaa, kə̂ ghaa nə tsəŋə soʼonə. 28Ghaa mâ zow nghee mə â dzanə tə̀ ghaa nə̀, ‘N nuulə ndownu, a kee loʼ nə̀ mə i kəm bəghə dzəŋŋənu n səə ghaa.’ Abə ghaa mə ləghənə mə, ghaa mə khə ni duʼlə nə̀ n ndow n səə Bày, n təŋkey, Bày tsəghəshi mə. 29N sa dza naŋa zey bə ghəə ghən tə̀ ghaa nə̀ ghəə a tii a ka kam ney bənə kə, sey nə̀ abə ghə i bə shi kɔʼnə, ghaa i loʼ ni bəghəm fu n nəŋə i tii zə nə̀ mə â ndzəmə dza isəŋə. 30N kəm khə way ndəmə aghəə ni dza tə̀ ghaa, boʼ nə̀ də̀ŋ kə mbi kən nya bəghənu. Tə khə way daʼa kə loʼ kə n kow mə. 31N kee fwaʼa kə tə̀ Bày dzanə, sey nə̀, ghə̂ a mbi a keeli nə̀ n ləghənu Bày.

Nuu kɔʼ n na tə saa nuu tsu fa.”

Currently Selected:

Jɔn 14: WEH

Highlight

Copy