Jɔn 17

Yeso gɔŋŋə nə̀ ngəd tə wi tə i loʼ nə kəfə kəmɔʼ

1Ambə Yeso ghɔɔmə may tsu ghəə ghən, tə n bwùm laalə kɔʼ ndow kədəŋ, kaʼ ndow ni gɔŋŋə nə̀, “Bày, nəŋə zə n kpi nya tə̀ wɔ ni ghəŋə nə̀ ghə̂ a koʼ kɔʼlə mey waa wə khənə, tə̀ tə ney bə wɔ n kɔʼlə mə a Bày. 2Bày, wə n fuu wi n daʼa kə nə̀ tə i saʼa ghə̂ ghə adzəm, sey nə̀ tə loʼ ni fuu muu zə itsali tə̀ ghə̂ ghey wə fuu naŋanə tə̀ wi. 3Muu zə itsali zən loʼ tə̀ ghə ni khə wɔ, nə̀ a may kə wɔ wə ndzəm loʼnə Zə̀ kə, nsə ni keeli soʼo Yeso Klisto wən wə â tûm bənə fa n mbi. 4Mə n ghəŋə nə̀ wə keeli nkɔʼlə fa n mbi, n təŋkey, mə n mayyə fwaʼ key wə â fuu nə̀ n fwaʼ fa n ghəlikətsə. 5Bày, ney naŋa mə n səə wɔ tə̀ mə i khə kɔʼlə mə, kɔʼlə n mɔʼɔ mey ghi wɔ â khə tsə tə mbi a nə zey tsu.

6Mə n chi dii wù wey wə loʼ ghii wə tə̀ ghə̂ ghey wə â say shi bənə fa n mbi, fu bə tə̀ mə. Ghə â khə loʼ tsə ghə̂ ghə, wə n say shi bə ghə, fuu bə ghə tə̀ mə, ghə a naŋŋə ghɔɔmə zə zə̀. 7Ghə n keeli nya nə̀ fə wən udzəm n khənə, a fuu wɔ tə̀ mə a Bày. 8Mə n naʼa tûm zə zey wə â tûm nə̀ n naʼa tə̀ ghə, ghə n zow, bəghəm fu soʼo. Ghə a ndzəm khə soʼo nə̀ n kùm nuu bə n səə wɔ, ghə u bəghəmnə nə̀ a loʼ wɔ wə tûmnə mə.

9N gɔŋŋə n tow u ghə, n gɔŋŋə dzə way n tow kə ghə̂ a mbi adzəm. Gɔŋŋə zuŋ i kee loʼ kə tə ghə̂ ghey wə â sày fuu bənə tə̀ mə, n təŋkey, à loʼ ghə̂ ghə. 10Fə wuŋ udzəm u loʼ u wə wə̀ tə fə wə udzəm u loʼnə u wuŋ wə. À loʼ ghə, ghə ghəŋŋə nə̀ n keeli nkɔʼlə. 11N nya zəghə taʼa tsuu ghə fa n mbi, mə n nuulə bə n səə wɔ. Bày wuŋ u zow wə, tsəd naŋa tsu ghə n daʼa key kə loʼnə n zəd zə, zəd zey wə â fuunə tə̀ mə, tə ghə doʼo nə kəfə kəmɔʼ ighələ tə̀ n loʼnə ghi wɔ nə kəfə kəmɔʼ. 12Nəŋə zey mə â loʼ ghi ghə, mə â tsəd naŋa ghə n daʼa key kə loʼnə n zəd zey wə â fuu tə̀ mə. Mə n keyyə ghə, wù ghə umɔʼ ka nay shi tii a may kə wù wey tə â khə ni teeli nay, ni luulə ghɔɔmə zey i tɔ̀ɔ doʼo n màʼlə K-a-zə̀.”

13Yeso n ndow kə n gɔŋŋə zə, dza nə̀, “Bày, n nya tey n ji n bəghənə n səə wɔ. N ghəə ghən kee ghɔɔmə nə̀ n nam loʼ fa n mbi, sey nə̀, ngəd tuŋ tə loʼ ni keeli soʼo ndzoʼo duʼlə zən n khənə n fə̀ŋ tə ghə. 14N mâ ghɔɔmə zə i fuu tə̀ ghə, ghə̂ a mbi ghə a bàa ghə, n təŋkey, ghə way dzə tə a loʼ ghə̂ a mbi, ighələ tə̀ n nghee n way wù mbi. 15N gɔŋŋə dzə way nə wə ney nuu shi kɔʼ ghə n mbi, n kee gɔŋŋə nə̀ wə tsəd naŋa tsu ghə, kə̂ Satan nə mɔmnə ghə. 16Ghə way dzə tə̀ a loʼ ghə̂ a mbi, ighələ tə̀ nghee n way wù mbi. 17Sòw maʼa tsu ghə nə̀ ghə i zow nə isəŋə zey wə zoʼlə ghə tii, n təŋkey ghɔɔmə zə i loʼ isəŋə. 18Mə n tûm nyi ndow ghə n mbi, ighələ tə̀ wə â tûm nyi bə mə n mbi. 19Mə n ghəŋə wû wuŋ wə nə̀ wə i zow n sə̂ kə n tow u ghə, sey nə̀ ghə i loʼ soʼo ni ndzəmə zow.”

20Tə n dza kpiʼi tsu nə̀, “Bày, n gɔŋŋə kə way n tow u ghə̂ ghən, n gɔŋŋə soʼo n tow u ghə̂ ghey ghə nə bəghəm fuunə ghɔɔmə zuŋ zey ngəd tuŋ tə nə naʼlə ndownə tə̀ ghə. 21Bày, n gɔŋŋə nə̀ ghə mə loʼ nə kəfə kəmɔʼ n wû i ghə, nghee tə̀ ghi wɔ bɔɔmə loʼ soʼo nə kəfə kəmɔʼ. N gɔŋŋə soʼo nə̀ ghə i bɔɔmə loʼ ghi saa nə kəfə kəmɔʼ tə ghə̂ a mbi a bəghəm nə̀ a loʼ wɔ wə tûmnə mə. 22Kɔʼlə mey wə â fuunə tə̀ mə, mə n fu soʼo tə̀ ghə, nə ghə i loʼ nə kəfə kəmɔʼ ighələ tə̀ ghi wɔ loʼnə nə kəfə kəmɔʼ. 23Mə n gɔŋŋə nə̀ mə i loʼ nə kəfə kəmɔʼ ghi ghə nghee tə̀ wə loʼnə nə kəfə kəmɔʼ ghi mə, nə̀ ghə i tɔʼ tey tə a loʼ wù umɔʼ, tə ghə̂ a mbi ghə i keeli nə̀ a loʼ wɔ wə tûmnə mə, nsə nə̀ wə ləghə ghə ighələ tə̀ wə ləghənə mə.

24Bày, n ləghə nə̀ ghə̂ ghey wə â fuu tə̀ mə, ghə i loʼ ghi mə n luʼu key n loʼnə tii, tə̀ ghə loʼ ni mbɔŋ koʼ kɔʼlə muŋ, kɔʼlə mey wə â fuu tə̀ mə bòʼ ləghə zey wə khə n kow mə tə̀ mbi ni bə kaʼ. 25Bày wuŋ u dzuŋu wə, wə loʼ tsətsəghə. Nghee ghə̂ a mbi ghən buʼ khə kə way wɔ, n kee khənu wɔ, ngəd tuŋ tə u khə soʼo nə̀ a loʼ wɔ wə tûmnə mə. 26Mə n chi dii wù wey wə loʼnə ghii wə tə̀ ghə, mə i ndow kə n sə kə ni ghəŋə nə̀ ghə keeli wù wey wə loʼnə, sey nə̀, ləghə zə zey wə khənə n kow mə zə i loʼ n fə̀ŋ tə ghə, mə i loʼ soʼo nə kəfə kəmɔʼ ghi ghə.”

Currently Selected:

Jɔn 17: WEH

Highlight

Copy