Mak 14

E nde akɔɔ ato Yeso

(Mat 26:1-5; Luk 22:1, 2; Eyɔ 11:45-53)

1Enjitsɔ enjí à ne tye èfyee é bwɛn ene anji antara fɔɔ ekere mane antara ǹgoŋ kè tsɛʼ àfòo, m̀fɔ̀rɔ̀ zhiri mane bàtee atsɛrɛ ma zɛ̀ʼ aghɛʼ é bere Yeso gɛ̀rɛ̀ zhudu engɔ. 2Angɔ shi wu gà àmɔ̀ àmɔ̀ kpe, “Bɛʼngɛ ne me endzobo antara bo, mbɔʼnga m̀bùʼ ye ne turu.”

E zhwaʼa Yeso a Bɛtani

(Mat 26:6-13; Eyɔ 12:1-8)

3Aŋu engɔ à mwɔ a Bɛtani ma nde edɔm echud a ndɔ gho deʼ wɛ ekumu ngɔ à ma Shimun gho akɔ̂m ngɛ, aye deʼ zeʼ nè ngud mbì kamakɛb deʼ efwɔ akɔʼ alabasta. Engɔ à zhu e ǹkpem yɛ gɛ̀rɛ̀ tù ngud mbì myɛ ato ngɔ. 4Abɔ deʼ byɛ à ma aŋu ngɛ sa gà àmɔ̀ àmɔ̀ ene abɔɔtaa kpe, “È na tsɔŋɔ a ngud mbì ǹchwɔ̀ mɔnɔ kpe ayɛ? 5A ne né fɛ̀n a ngud mbì mɔnɔ ene ekɛb akɛkɛ tye e nɛrɛ bɔ afwɛʼ anyi efwɔ anɔ̂m gɛ̀rɛ̀ gɛ̀bbɛ̀ ndɛʼ ebe bɔ ndzaŋa.” Angɔ gɛrɛ bwe ebe engɔ. 6Yeso gâ kpe, “Mbɔn saara engɔ gho zhiʼ, mbɔn na ndɛ̀ʼ ǹgoʼ ebe engɔ kpe ayɛ? Engɔ shi le ebwa ǹchwɔ̀ ekwa ngu. 7Mbɔn ba ngo ma bwò à mwɔ nè bɔ ndzaŋa abwaʼ ndzɔn ma kpèdè angɔ endzobo mbɔn ma ke ngɛ. Bɛʼngɛ mbɔn ke ma ngo ma bwò a mwɔ nè mmɛ bo. 8Engɔ à le ebwa wɛ engɔ me né le ngɛ. Engɔ shi tu ngud mbì ekwa ngu é ndèerè sa kɔʼɔ èndzobo chɛ e ma ngo kpa angu ngɛ. 9Mmɛ na gà endɔn me éŋwaʼa, ka de mwɔ awe efwɔ ese, wɛ e ma sɛ̀ɛrɛ̀ ekɔn ǹchwɔ̀ mbɔʼ Yeso ngɛ, e gɛrɛ ba ngo sɛ̀ɛrɛ̀ ebwa wɛ engɔ shi le ngɛ sa zhuŋu engɔ.”

Judas bɛ̀rɛ é fɛ̀n enji Yeso

(Mat 26:14-16; Luk 22:3-6)

10Éngɛ Judas Iskariyɔd, gho bi abwaʼ bɔ bɛɛrɛ abwa wum ǹchwɔ̀ fyee ngɔɔ ebe m̀fɔ̀rɔ̀ zhiri é fɛ̀n enji Yeso ebe angɔ. 11Angɔ à ne gɛnɛ amɔ é zɔ m̀pè ebwa zɔnɔ, angɔ tɔ̧ɔrɔ é ndɛ̀ʼ ekɛb ebe engɔ. Éngɛ engɔ sa zɛ̀ʼ aghɛʼ é ndɛʼ Yeso ebe angɔ.

Yeso nde ende antara fɔɔ ekere nè bɔ bɛɛrɛ abwa mɔ

(Mat 26:17-25; Luk 22:7-14, 21-23; Eyɔ 13:21-30)

12Efwɔ anji mbèmbè ene Antara ǹgoŋ ketsɛʼ àfòo, aŋu à ma atiʼi é ndɛ̀ʼ ǹglɔ̀ ene ala etɔ̧ɔrɔ ene antara fɔɔ ekere ngɛ, bɔ bɛɛrɛ abwa Yeso biiri ebe engɔ kpe, “Ngwo na ke kpe mbyɛɛ ngɔɔ ndèerè afwɔ awe shi ngwo nde ende antara fɔɔ ekere aŋu?” 13Éngɛ engɔ saa bɔ bɛɛrɛ abwa mɔ fyee, ma ga ebe angɔ kpe, “Mbɔn ngɔɔ efwɔ abɛ, gho deʼ wa kla angɔn anji me beʼe shuʼndim, mbɔn kiri engɔ. 14Mbɔn ga ebe egho wɛ me le ndɔ yɛ engɔ ma nyii efwɔ ngɛ kpe, ‘Àtee abwa biiri kpe, atwɔndɔ àgɔn ndza yɛ mmɛ ma ngo nde ende antara fɔɔ ekere efwɔ nè bɔ bɛɛrɛ abwa mbu ngɛ a ze?’ 15Engɔ wa tee angwa atwɔndɔ deʼ endɔn ekere nè ela efwɔ byɛ e gɛrɛ shi koʼo ngɛ. Ndeere akwâ mane ela ebe bɔ aŋu.” 16Abɔ bɛɛrɛ abwa byɛ nyɛrɛ ngɔɔ efwɔ abɛ gɛ̀rɛ̀ dù zɔ abwa a mwɔ nkirinkin aŋu Yeso à shi ga ebe angɔ ngɛ. Éngɛ angɔ ndèerè ende antara fɔɔ ekere. 17À sa bwɛn endzobo etiʼdi, Yeso bwɛn nè bɔ bɛɛrɛ abwa mɔ wum ǹchwɔ̀ fyee. 18Aŋu angɔ à me tsɔmɔ edɔm echud mà nde ngɛ, Yeso gâ kpe, “Mmɛ na gà endɔn me éŋwaʼa, gho bi abwaʼ ndzɔn wa ngo fɛ̀n enji ndza, engɔ we è ma nde nè mmɛ ngɛ.” 19Angɔ kwaʼ è jù, gɛ̀rɛ̀ sa biiri ebe engɔ gho ŋwàʼaŋwàʼ kpe, “Mmɛ we zhuŋu kpe ke ma mmɛ bo?” 20Engɔ gíì kpe, “Na egho bi abwaʼ wum ǹchwɔ̀ fyee. Engɔ wɛ ma firi ǹgoŋ efwɔ ekuʼ ekyɛ ŋwaʼ nè mmɛ ngɛ. 21Ŋwɔ gho wa ngo ku nkirinkin aŋu â shi ŋwɛʼrɛ mbɔʼ engɔ ngɛ. Bɛʼngɛ enɔgho ebe gho wɛ à fɛrɛ enji Ŋwɔ Gho ngɛ! A na ngo me nara fɔɔ ebe engɔ mala â ne be engɔ bo.”

Yeso ndɛ̂ʼ etara ebe bɔ bɛɛrɛ abwa mɔ

(Mat 26:26-30; Luk 22:14-20; 1Kɔ 11:23-25)

22Aŋu angɔ à ma nde ngɛ, Yeso nu ǹgoŋ tsàʼrà Ngwe, bɔʼrɔ gɛ̀rɛ̀ ndɛ̀ʼ ebe bɔ bɛɛrɛ abwa mɔ sa gà kpe, “Mbɔn kwo, ewunɔ ne ekwa ngu” 23Éngɛ engɔ nu ǹtoʼ, tsàʼrà Ngwe gɛ̀rɛ̀ ndɛ̀ʼ ebe angɔ bɔ gimkpaʼ e ŋwɔ efwɔ 24Yeso gâ ebe angɔ kpe, “Azɔnɔ na anɔm ndza ene etsɛrɛ yɛ a me tu a chwâ ebe bɔ akɛkɛ ngɛ. 25Mmɛ ga endɔn me éŋwaʼa kpe, mmɛ ke ma wu ŋwɔ amɔm mɔnɔ bo, bwɛn anji yɛ mmɛ ma ŋwɔ a fe efwɔ ebwa m̀fɔ̀ Ngwe ngɛ.” 26Èndzobo chɛ angɔ à kwɔrɔ etsa ngɛ angɔ nyɛn ngɔɔ edɔm egu olifs.

Yeso toʼro ebe Petoro kpe engɔ wa ngo tɔn angbe

(Mat 26:31-35; Luk 22:31-34; Eyɔ 13:36-38)

27Éngɛ Yeso gâ ebe angɔ kpe, “Mbɔn ba ngo gòdò mbɔʼnga e be ŋwɛʼrɛ kpe, ‘Mmɛ wa ngo wuru àkɔʼ ǹglɔ̀rɔ̀, éngɛ ǹglɔ̀rɔ̀ tsa ngo sam.’ 28Bɛʼngɛ, èndzobo chɛ mmɛ ma de zhwɛm ngɛ, mmɛ wa ngo ngɔɔ embè ndzɔn anji a Galilii.” 29Éngɛ, Petoro gà apɛpɛ kpe, “Ka bɔ gimkpaʼ ma dɔrɔ, mmɛ wa ka dɔrɔ.” 30Yeso gíì kpe, “Mmɛ na gà éŋwaʼa endɔn, ǹklì ànchwɔ̀, èkoʼo fa sa tsoʼo akyɛ fyee nɔ, ngwo mɔmbwo wa ngo tɔn angu akyɛ tɛd.” 31Bɛʼngɛ Petoro twaʼra amɔ gii kpe, “Ka mmɛ ma ngo ku nè ngwo, mmɛ yà ne tɔn awɛ bo.” Éngɛ abɔ abê gimkpaʼ gɛrɛ ga éngɛ.

Yeso tsàʼrà Ngwe a Gethsemane

(Mat 26:36-46; Luk 22:39-46)

32Angɔ à ngɔɔ ene afwɔ deʼ yɛ â ma zɔʼrɔ kpe Gethsemane, éngɛ Yeso gâ ebe bɔ bɛɛrɛ abwa mɔ kpe, “Mbɔn tsɔmɔ anɔ shi mmɛ sa tsàʼrà Ngwe.” 33Engɔ nu Petoro, Jems mane Eyɔɔ sa ngɔɔ nè angɔ. Éngɛ etaa ngɔ klada sa diri, ekwa ngɔ sa fe ene ǹgoʼ yɛ engɔ ma ngo zɔ ngɛ. 34Engɔ gâ ebe angɔ kpe, “Etaa mfu fe diri ene aghɛʼ yɛ mmɛ ma ke ku ngɛ. Mbɔn tsɔmɔ anɔ sa kɔ̀ʼɔ akwâ.” 35Engɔ tini ngɔɔ mpiʼ, è gò a chwâ sa tsàʼrà Ngwe ga kpe, “Mala mwɔ eshi njɛ, ngwo chi ediri zɔnɔ ekwa ngu.” 36Engɔ gâ kpe, “Aba ka Àtɛ! Abwa gimkpaʼ ye zamma engɛ̂, ngà nu ǹtoʼ zɔnɔ ena. Shi ne mwɔ aŋu mmɛ ma ke ngɛ bo. Bɛʼngɛ e mwɔ me eshi njɛ.” 37Éngɛ, engɔ wu ghɛ̀ɛbɛ zeʼe achim abwaʼ bɔ bɛɛrɛ abwa mɔ dù zɔ angɔ ma bwɛnɛ, engɔ gâ ebe Petoro kpe, “Shimun, Ngwo na bwɛrɛ de? Ngwo ke me né tsɔmɔ kɔʼɔ akwâ ene enyɔ̀m ŋwaʼ bo? 38Mbɔn kɔʼɔ akwâ gɛ̀rɛ̀ tsàʼrà Ngwe mbɔʼtye mbɔn ne nyii efwɔ akwa̧ʼra bo. Azhwɛɛrɛ ya ke é fwɛ̀ʼ, bɛʼngɛ gôb ekwa shi me la.” 39Engɔ wu nyɛrɛ ekyɛ tsɛrɛ è ngɔɔ é tsàʼrà Ngwe, à ma ga me ebwa ŋwaʼ wɛ. 40Endzobo yɛ engɔ a zeʼe achim ngɛ, engɔ gɛrɛ wu zɔ angɔ ma bwɛnɛ mbɔʼnga aghɔɔ angɔ a ne diri. Angɔ ne me nɛɛ ebwa tye e ga ebe engɔ ngɛ bo. 41Engɔ gɛrɛ sa wa ghɛ̀ɛbɛ zeʼe akyɛ yɛ a me bwɛrɛ atɛd ngɛ, engɔ ga ebe angɔ kpe, “Mbɔn ba bli à bwɛnɛ ma ku̧ru andzɔn? E koʼo! Endzobo shi zeʼe! Mbɔn kɔʼɔ, e be fɛrɛ Ŋwɔ Gho ebla ebwo bɔ abwa bɔɔbɔɔ. 42Mbɔn tamma ekere! Ntsɔ ngɔɔ! Ne egho wɛ è me fɛrɛ angu ngɛ è wu è ma zeʼe.”

E bere Yeso

(Mat 26:47-56; Luk 22:47-53; Eyɔ 18:3-12)

43Na aŋu engɔ à ma gà ngɛ, Judas egho bi abwaʼ bɔ bɛɛrɛ abwa wum ǹchwɔ̀ fyee byɛ, bwɛn, engɔ à ne zeʼe nè enɔrɔ bɔ wɛ a me ndeere amɔ me beʼre abyeŋwɔ mane entiritam, wɛ à me saa angɔ ma m̀fɔ̀rɔ̀ zhiri, bàtee atsɛrɛ mane eto efwɔ ndɔngwe ngɛ. 44Enjitsɔ, egho wɛ à me fɛrɛ enji Yeso ngɛ à shi ndeere shi tee anɛ̂ ebe angɔ kpe, “Egho ŋwaʼ wɛ mmɛ ma bàa engɔ ngɛ, na gho mɔmbwo wɛ, mbɔn bere engɔ shi àkɔʼ akwâ gbèe engɔ nu ngɔɔ.” 45Éngɛ Judas dara ngɔ̀ɔ abwaʼ Yeso ekyɛ ŋwaʼ, è ga ebe engɔ kpe, “Àtee abwa” gɛrɛ bàa engɔ. 46Éngɛ anɔm byɛ bere Yeso è shwɔrɔ engɔ. 47Éngɛ gho bi abwaʼ abɔ byɛ â me tamma ebara afwɔ yɛ ngɛ, è chwaʼ ebyeŋwɔ̀ mɔ wuru gho afwɛʼ Angwa zhiri è tsɛd àtimi ngɔ è chi. 48Éngɛ Yeso gà kpe, “Mmɛ na gbèe ma bɔ kèzobwa, wɛ Mbɔn me zeʼe nè ŋwɔ mane entiritam é bere angu anyi? 49Enji gimkpaʼ mmɛ à na mwɔ nè mbɔn, ma tee abwa emwɔ ndɔngwe kɛ̀ mbɔn ke bere angu bo. Bɛʼngɛ ebwa wɛ aŋwɛʼrɛ Ngwe shi ga ngɛ, e wa gli aŋu a shi ga ngɛ.” 50Éngɛ bɔ gimkpaʼ waʼa engɔ è dɔrɔ. 51Éngɛ eghobo deʼ à na aŋu ma kìrì Yeso me ge ma abwondi, me tsɛʼ ala tsɛrɛ ekwa ngɔ bo, e kpe e bere engɔ, 52eghobo wunɔ pwèere ǹdi sàa, dɔrɔ ngɔɔ nè ekwa kɛɛ.

E nu Yeso ngɔɔ efàarà m̀pàrà

(Mat 26:57-68; Luk 22:54, 55, 63-71; Eyɔ 18:13, 14, 19-24)

53Angɔ à nu Yeso ngɔɔ abɛ angwa zhiri Ngwe, aŋu ètɛ zhiri Ngwe, bɔ tɛbɛ mane bàtee atsɛrɛ â me sɔŋɔ ngɛ. 54Petoro à na kìrì engɔ ezhin dɔɔdɔɔ, engɔ nyii emwɔ m̀pàrà angwa zhiri Ngwe. Aŋu Petoro à tsɔmɔ mane àkɔʼ akwâ ma zhwa éwu. 55Angwa zhiri mane bɔ m̀pàrà gimkpaʼ ma zɛʼɛ aga deʼ yɛ a me né le angɔ zhu Yeso ngɛ, bɛʼngɛ angɔ à ke zɔ bo. 56Bɔ akɛkɛ à bɛrɛ entsɛ andɔɔ enji engɔ, bɛʼngɛ aga angɔ ne bɛrɛ ene ega ŋwaʼ bo. 57Éngɛ adeʼ tamma gà andɔɔ zɔnɔ mbɔʼ engɔ kpe, 58“Mbyɛɛ à zo engɔ ga kpe, ‘Mmɛ wa mùnù ndɔngwe kɛ̀ zɔnɔ yɛ à me byɛ ma gho ngɛ gɛ̀rɛ̀ wu byɛ etsɛrɛ efwɔ enji tɛd, yɛ à ne me byɛ ma gho bo ngɛ.’ ” 59Éngɛ aga angɔ a ke bɛrɛ bo. 60Angwa zhiri Ngwe tama ekere efàarà angɔ gɛ̀rɛ̀ biiri ebe Yeso kpe, “Ngwo ke le ebwa deʼ é gii ene abwa zɔnɔ e ma gà mbɔʼ ngwo nɔ bo?” 61Bɛʼngɛ Yeso ba tuuu, ne gii ega deʼ bo. Ekyɛ tsɛrɛ angwa zhiri Ngwe biiri ebe engɔ kpe, “Ngwo na Kristo, ŋwɔ M̀bɔ̀nɔ Ngwe?” 62Yeso gâ kpe, “Mmɛ ne engɔ, ngwo wa ngo zɔ Ŋwɔ Gho è me tsɔmɔ abwo anɔm Angwanìm nè ekama ma kla zeʼe efwɔ m̀bɛ̀ʼ ekere ezob.” 63Angwa zhiri panna ǹdiri mɔ gà kpe, “Ntsɔ na wa ke entsɛ tsɛrɛ ene yɛ? 64Mbɔn shi zo ega Ngwe andɔɔ wɛ. Mbɔn ne zhuŋu kpe ayɛ?” Angɔ bɔ gimkpaʼ à sɛʼ engɔ tsɛrɛ kpe e we koʼro é zhudu engɔ. 65Abɔ deʼ à klada sa tù emɛn ene engɔ sa koro aghɔɔ engɔ, wuru engɔ ene etam àmɔ̀ gɛ̀rɛ̀ sa ga kpe, “Toʼro egho a wuru awɛ ngɛ!” Éngɛ àkɔʼ akwâ nu engɔ sa wuru engɔ.

Petoro tɔn Yeso

(Mat 26:69-75; Luk 22:56-62; Eyɔ 18:15-18, 25-27)

66Aŋu Petoro à mwɔ emwɔ m̀pàrà ngɛ ŋwɔaye afwɛʼ angwa zhiri zeʼ ese ebara ngɔ. 67Aŋu engɔ à zɔ Petoro ma zhwa éwu ngɛ, e nɔm aghɔɔ ene engɔ gà ebe engɔ kpe, “Ngwo à gɛrɛ na abwaʼ Yeso, wɛ ma gho Nazarɛd ngɛ” 68Éngɛ engɔ tɔn, ga kpe, “Mmɛ ke nɛɛ ebwa wɛ ngwo ma ga mbɔʼ mmɛ ngɛ bo.” Éngɛ engɔ gli ngɔɔ aghɔɔnduʼ ese. Éngɛ èkoʼo tsoʼ 69Aŋu eŋwɔaye afwɛʼ wɛ à zɔ engɔ aŋu ngɛ, e gɛrɛ wu ga ebe angɔ byɛ â me tamma ebara ngɛ kpe, “Egho wunɔ ne egho ebi abwaʼ angɔ.” 70Engɔ gɛrɛ wu tɔn ekyɛ tsɛrɛ, afwɔ nɔ sa ndada nɔ, angɔ byɛ â me tamma ebara ngɛ gà ebe Petoro kpe, “Éŋwaʼaŋwâʼ ngwo ne egho ebi abwaʼ angɔ mbɔʼnga ngwo ma gho Galilii” 71Petoro klada sa kpe gô ato mɔ, éngɛ engɔ kanna abwa ebe angɔ kpe, “Mmɛ ke nɛɛ egho wunɔ mbɔn ma ga mbɔʼ engɔ nɔ bo.” 72Èndzobo chɛ èkoʼo tsoʼo efwɔ akyɛ fyee. Éngɛ Petoro zhuŋu abwa yɛ Yeso à shi ga ebe engɔ ngɛ, kpe, “Èkoʼo fa sa ngo tsoʼ efwɔ akyɛ fyee ngwo shi tɔrɔ angu akyɛ tɛd.” Éngɛ engɔ gô a chwâ sa ku̧u.

Currently Selected:

Mak 14: nbt

Highlight

Copy