Mak 13

Yeso ga aŋu e ma ngo sɛ̀ʼ ndɔngwe kɛ̀ ngɛ

(Mat 24:1, 2; Luk 21:5, 6)

1Aŋu Yeso à sa gli efwɔ ndɔngwe kɛ̀ ngɛ, gho bɛ̀ɛrɛ abwa ngɔ ebi kpe be engɔ “Àtee abwa! Kɔʼ ngɛ! Èngwara klɔ atye deʼ! M̀pèrè nara ndɔrɔ deʼ!” 2Yeso gíì ebe angɔ kpe, “Mbɔn zɔ e ndɔrɔ kɛkɛ tsɔnɔ gimkpaʼ nɔ? Tsɛ̀ʼ etye deʼ eŋwàʼ e ma ngo me tye edɔm edeʼ bo, àgimkpaʼ ba ngo mù sɛ̀ʼ tu a chwâ.”

Ǹgoʼ mane enyii

(Mat 24:3-14; Luk 21:7-19)

3Aŋu Yeso à me tsɔmɔ edɔm egu Olifs efàarà ndɔngwe kɛ̀ ngɛ, Petoro, Jems, Eyɔɔ mane Andere biiri ebe engɔ achimchim kpe, 4“Toʼro endyɛɛ, abwa zɔnɔ gimkpaʼ ya ngo gli endzobo tse? Anɛ̂ ebwa yɛ a ma ngɔɔ tee kpe ebwa wunɔ wa ngo zamma gli ngɛ na ayɛ?” 5Yeso gâ ebe angɔ kpe, “Mbɔn zɔmmɔ angɔn kpe gho deʼ ka angɔn ndooro. 6Bɔ akɛkɛ ba ngo zeʼe ene ekumu ngu, è ma fɛ nyɛbid kpe, ‘Mmɛ ne engɔ,’ éngɛ, e ba ngo ndooro bɔ akɛkɛ. 7Engwo klada sa zo mbɔʼ ebiri mane enkpee mbɔʼ ebiri, ka kɔ̀n. Abwa yɛ ngɛ yàrà gli, bɛʼngɛ engudu bli ke zeʼe. 8Abɛ zɔ̂ ya sa ngwè azɔ̂, m̀fɔ̀ zɔ̀ sa ngwè m̀fɔ̀ zè, agu kɛkɛ ya sa njiʼ, nchwɔrɔ gɛrɛ mwɔ akwâ akɛkɛ. Azɔnɔ ne eklada ene enyii kamakam. 9Ngwo a dà nu azɔm. E ba ngo ge awɛ eblabwo m̀pàrà abɛ, e gɛrɛ wuru awɛ efwɔ ndɔrɔ tsaʼra Ngwe. Mbɔn ba ngo tamma efàarà abɔ e ma klini abɛ ngɛ mane m̀fɔ̀rɔ̀ ma sɛ̀ɛrɛ̀ ebwa m̀fɔ̀ Ngwe ebe angɔ mbɔʼ mmɛ. 10Éngɛ, à da dye sɛ̀ɛrɛ̀ ekɔn ǹchwɔ̀ efwɔ ebɛ gimkpaʼ. 11Ke e zeʼe bere awɛ me endzobo tse é ngo sɛʼ awɛ, ke sa zhu ekwa ngwɛ kpe mbè wa shi ngɔɔ ga kpe ayɛ bo. Nyɛɛmɛ ga engɔ wɛ e zeʼe engɛ̂ èndzobo chɛ ngɛ, mbɔʼnga ke ma ngwo ma ga bo, bɛʼngɛ na Azhwɛɛrɛ Pɛ. 12Ghongwaanɔm wa ngo fɛ̀n enji ghongwaanɔm mɔ kaka è ku, àtɛ gɛrɛ fɛ̀n enji ŋwɔ, bwɔ ba ngo sa ngwè ètɛ amɔ kaka sa zhudu angɔ. 13Bɔ gimkpaʼ ba ngo gwe angɔn mbɔʼ ekumu ngu, bɛʼngɛ egho wɛ è klini etaa ngɔɔ bwɛn ene ngùdu ngɛ wa ngo pwèerè é gli.”

Ambokɔʼ Angumu

(Mat 24:15-28; Luk 21:20-24)

14“Èndzobo chɛ ngwo zɔ ambokɔʼ yɛ a ma ndɛʼ èklɔ̀ nè angumu me tamma afwɔ yɛ a ne me koʼro é mwɔ bo ngɛ, egho wɛ ma zɔʼrɔ ngɛ nɛɛ ǹji éngɛ, shi abɔ byɛ e ma Judeya ngɛ e dɔrɔ kwaʼ ngɔɔ edɔm agu kɛ́. 15Gho deʼ wɛ me edɔm ndɔ mɔ ngɛ ke kpe mbè kla zeʼe a chwâ kà kpe mbè nyii a ndɔ nu ala deʼ gli nè angɔ bo. 16Gho deʼ wɛ è me ekwa ngɛ ke kpe shi mbè ghɛɛbɛ zeʼe nu e ǹdi ndze bo. 17Ooh! E wa ngo me bɔɔ ghɛʼ ebe eye ebûm mane eye byɛ bwɔ angɔ ma bli à ŋwɔ eban ngɛ! 18Tsàʼrà Ngwe kpe abwa zɔnɔ ke gli me enimi m̀bò bo, 19mbɔʼnga mbɔn ba ngo mwɔ me enji ǹgoʼ yɛ gho deʼ ne shi zɔ ekyɛ deʼ bo ngɛ, enyɛrɛ èndzobo chɛ Ngwe à ndèerè ese ngɛ, bwɛrɛ ànchwɔ̀, gɛrɛ ne yaa wu mwɔ éngɛ ekyɛ tsɛrɛ bo. 20Mala Masakɛ Ngwe ne tsɛrɛ anji bɔnɔ tiimi bo, gho deʼ wa ke ekɔʼɔ tyɛ. Bɛʼngɛ ene egha bwɔ Ngwe, angɔ byɛ engɔ a shi chidi ngɛ, engɔ shi tiimi anji byɛ. 21Ene èndzobo chɛ, ma gho deʼ ga kpe kede, kɔʼ, na kristo wɛ wu! Kà kɔʼ ande engɔ we! Ka bɛ̀rɛ. 22Mbɔʼnga entsɛ andɔɔ kristo mane angɔ bàmɛnɛkɔn andɔɔ ba ngɔ gli gɛ̀rɛ̀ sa le anɛ̂ abwa zodo zodo mane akan é ndooro angɔ byɛ a shi chidi ngɛ, mala e me zamma. 23Éngɛ mbɔn tsɔmɔ ma kɔʼɔ, mmɛ shi tòʼro abwa gimkpaʼ endɔn dye endzobo yɛ sa zeʼe.”

Aŋu Ŋwɔ Gho ma ngo zeʼe ngɛ

(Mat 24:29-31; Luk 21:25-28)

24“Bɛʼngɛ efwɔ enji byɛ e ma kìrì ǹgoʼ yɛ ngɛ, etaranchwe fa ngɔ koo, eta ke ma ngo ndɛʼɛ ekɛʼ bo, 25ńtɔrɔta ma ngɔ turu zeʼe ezob, éngɛ ela efwɔ ezob ekere ba ngɔ njiʼri. 26Èndzobo chɛ, bɔ ba ngo zɔ Ŋwɔ Gho è ma zeʼe efwɔ m̀bɛ̀ʼ nè ekama kɛ́ mane enɛŋɛrɛkɛ. 27Engɔ wa ngɔ saa engere mɔ gɛ̀rɛ̀ shùnu angɔ byɛ à shi chidi efwɔ endɔʼrɔ ese kwɛ̀, e nyɛrɛ à zeʼe ene engudu chwâ ngɔɔ bwɛrɛ ene engudu ezob ekere.”

Ebwa é bɛɛrɛ nyɛ̀rɛ̀ zèʼe ene azɔd akla

(Mat 24:32-35; Luk 21:29-33)

28“Enjitsɔ, bɛɛrɛ azɔm ebe azɔd akla, aŋu atɔ ngɔ ma bwedde, afu ngɔ gli zeʼe ese ngɛ, ngwo nɛɛ kpe anɔm a sa ko. 29Éngɛ gɛrɛ, ngwo zɔ ela bɔnɔ e sa gli, ngwo nɛɛ kpe, endzobo a sa tini gɛrɛ sa zamma é klàda. 30Mmɛ ga éŋwaʼa, ekyɛ bɔ zɔnɔ e ke ma ngɔ fɔɔ wɛ abwa zɔnɔ ne shi gli ngɛ bo. 31Ezob mane chwâ yà fɔɔ, bɛʼngɛ aga ndza yà ka fɔɔ.”

Tsɛ̀ʼ gho deʼ me nɛɛ anji kà endzobo yɛ bo

(Mat 24:36-44)

32“Tsɛ̀ʼ gho ŋwaʼ deʼ è me nɛɛ anji yɛ kà endzobo yɛ bo, ka engere efwɔ ezob, kà ŋwɔanɔm, tye àtɛ. 33Tsɔmɔ sa kɔʼ! Ndeere awɛ! Ngwo ke nɛɛ endzobo yɛ è ma zeʼe ngɛ bo. 34Ene mwɔ na gho deʼ ma ngɔɔ eghɛb nɔ. Engɔ sa nyɛ̀rɛ̀ e shi bɔ afwɛʼ mɔ e sa kɔ̀ʼ ndɔ ngɔ, gho afwɛʼ ŋwàʼaŋwàʼ nè amɔ afwɛʼ, éngɛ engɔ tsɛrɛ ebe engɔ wɛ aghɔɔnduʼ ngɛ kpe kɔʼ akwâ. 35Éngɛ sa kɔʼ akwâ mbɔʼnga ngwo ke nɛɛ endzobo yɛ gho ndɔ ma zeʼe achim ngɛ bo, ka ne etiʼdi, kà na aghɛɛghɛɛ ǹklì, ka èndzobo chɛ èkoʼo ma tsoʼo ngɛ kà na angoʼse. 36Mala engɔ bum zeʼ ke le engɔ kla ngwo ma bwɛrɛ bo. 37Ebwa mmɛ ma ga engɛ̂ ngɛ mmɛ na ga ebe bɔ gimkpaʼ, mbɔn tsɔmɔ sa kɔʼɔ!”

Currently Selected:

Mak 13: nbt

Highlight

Copy