Mak 12

Nklama timi mbɔʼ gho afwɛʼ ǹchù

(Mat 21:33-46; Luk 20:9-19)

1Éngɛ engɔ klada sa gà ebe angɔ ene nklama timi kpe, “Gho deʼ à ne le ekwa me kɔrɔ ezɔd byɛ à ma chi mɔm anyi ngɛ. Engɔ me ndo ǹkɛmɛ kɛɛrɛ, è tɔ ebla ene afwɔ yɛ à ma chi mɔm ngɛ gɛ̀rɛ̀ byɛ antsɛn kɔʼ akwâ. Éngɛ engɔ ndɛʼɛ ekwa zɔnɔ ebe bafwɛʼ àsɔmɔ deʼ kpe angɔ sa nɛ̀rɛ̀ angbe, nyɛrɛ ngɔɔ eghɛb. 2À sa bwɛn endzobo dza, engɔ saa gho afwɛʼ mɔ ebe abɔ afwɛʼ bɔnɔ kpe, e ngɔɔ bwe enta azɔd deʼ ebe angɔ ekwa nu zeʼe. 3Bɛʼngɛ, angɔ bere engɔ, sɔm engɔ saa engɔ achim nè ebwo kɛɛ. 4Éngɛ, egho wunɔ saa gho afwɛʼ tsɛrɛ, abɔ bɔnɔ wuru engɔ edɔm ato, è nyíì engɔ ene aghɛʼnji ju deʼ. 5Egho wunɔ gɛrɛ wu saa gho afwɛʼ tsɛrɛ, angɔ zhudu engɔ wɛ. È gɛrɛ wu saa abɔ afwɛʼ tsɛrɛ akɛkɛ angɔ sɔm adeʼ gɛ̀rɛ̀ zhudu adeʼ. 6Engɔ a ne le gho ŋwaʼ é tɔm, ma ŋwɔanɔm etaa ngɔ. È saa engɔ ngùdu gà kpe, ‘Angɔ ba ngo ndɛ̀ʼ eghɔ ebe engɔ mbɔʼnga engɔ ma ŋwɔanɔm ngbe’. 7Bɛʼngɛ, abɔ afwɛʼ byɛ ga àmɔ̀ àmɔ̀ kpe ‘Ewùnɔ na ànde etiʼi, mbɔn zeʼe ntsɔ zhudu engɔ, shi etiʼi wɛ e nɔ ebe bɔ.’ 8Éngɛ, angɔ nu engɔ, zhudu engɔ ndwa eba ǹtsà yɛ ese.” 9Yeso biiri ebe angɔ kpe, “Éngɛ, egho ǹtsà wɛ me le ekwa zɔnɔ ngɛ è wa ngo le ene? È wa zeʼe zhudu abɔ afwɛʼ bɔnɔ, nu ekwa ndɛ̀ʼ ebe abɔ tsɛrɛ. 10Mbɔn ke shi zɔʼrɔ antiri aŋwɛʼrɛ Ngwe yɛ à ma gà kpe, etye yɛ àbyɛndɔrɔ ma bɛ̀ʼrɛ̀ à waʼa ngɛ ne engɔ shi wu shi etye ndɔʼndɔ. 11Masakɛ à shi fwɛʼ de ntsɔ sa kede e shi nara ene aghɔɔ bo.” 12Éngɛ, angɔ sa zɛ̀ʼ aghɛʼnji é bere engɔ mbɔʼnga â shi nɛɛ kpe engɔ à na gà nklama timi fɔnɔ mbɔʼ mbɔɔ. Bɛʼngɛ angɔ ma bumu enɔrɔ bɔ wɛ â ma aŋu ngɛ, éngɛ angɔ nyɛrɛ abwaʼ engɔ e ngɔɔ àmɔ̀.

Ebiiri mbɔʼ enɛrɛ

(Mat 22:15-22; Luk 20:20-26)

13À shi endzobo tsɛrɛ angɔ saa bɔ Farisii deʼ mane bɔ Hɛrɔd ebe Yeso kpe e ngɔɔ bèrè engɔ ene aga engɔ. 14Éngɛ angɔ zeʼe dù ga ebe engɔ kpe, “Àtee abwa mbyɛɛ be nɛɛ kpe ngwo wa ga éŋwaʼa ne ma zhuru abwa yɛ bɔ ma ga ngɛ bo, mbɔʼnga ngwo ke le endzobo ene m̀pèrè bɔ chɛ angɔ mwɔ ngɛ bo. Bɛʼngɛ, ngwo na tee aghɛʼnji Ngwe ene éŋwaʼa. Etsɛrɛ ye tee kpe e we koʼro é nɛ̀rɛ̀ aŋwɛ ebe Kaasa kà keʼ? 15Mbyɛɛ nɛrɛ kà mbyɛɛ ka nɛrɛ?” Bɛʼngɛ, Yeso à shi nɛɛ andooro aghɔɔ angɔ. Engɔ biiri kpe, “Mbɔn na ke é zhweʼre é bere angu kpe ayɛ? Mbɔn nu ekɛb atɔrɔ deʼ ndɛ̀ʼ ena shi mmɛ kede.” 16Angɔ nu ekɛb wɛ zeʼe, éngɛ engɔ biiri ebe angɔ kpe, “Ezɔnɔ ne efaara wɛ? Gɛrɛ na abwo aŋwɛʼrɛ wɛ zɔnɔ?” Angɔ gíì kpe na angɔ “Kaasa.” 17Éngɛ, Yeso gà ebe angɔ kpe, “Ndɛʼɛ ala yɛ mwɔ angɔ Kaasa ngɛ, ebe Kaasa gɛ̀rɛ̀ ndɛʼ angɔ Ngwe ebe Ngwe.” Éngɛ angɔ kɔ̂n ene engɔ.

Ebiiri mbɔʼ é zhwɛm ene ewu

(Mat 22:23-33; Luk 20:27-40)

18Éngɛ bɔ Sadusii byɛ e ma ga kpe ebwa é zhwɛm ene ewu ne tsɛʼ bo ngɛ, zeʼe ebe engɔ nè ebiiri deʼ. 19Angɔ gà kpe, “Àtee abwa, Mose à ŋwɛʼrɛ etsɛrɛ deʼ endyɛɛ kpe, mala ghongwaanɔm gho deʼ ku, me shi aye, aye wunɔ ne shi be ŋwɔ deʼ nè ngɔ bo. Gho wunɔ wu nu eyeti wɛ è be bwɔ nè engɔ shi ene ekumu ghongwa mɔ. 20Enjitsɔ, bwɔngwaanɔm deʼ à na aŋu sàambyɛ, embèmbè ngɛ nu aye è ku ne shi le bwɔ deʼ nè aye wɛ bo. 21Engɔ wɛ à me tɛʼ amɔ achim engɔ ngɛ, nu aye wɛ, bɛʼngɛ è gɛrɛ ku mɔ, ne shi le ŋwɔ deʼ nè aye wunɔ bo. E gɛrɛ mwɔ éngɛ ene gho ngɔ wɛ à me bwɛrɛ tɛd ngɛ. 22Éŋwaʼa, tsɛʼ gho deʼ abwa bwɔngwa sàambyɛ bɔnɔ à be ŋwɔ deʼ nè aye wunɔ bo. Aye wunɔ gɛrɛ ngùdu mɔ è ku. 23Anji é zhwɛm ene ewu yɛ de bwɛrɛ, aye wunɔ è wa ngo mwɔ me eye wɛ, na aŋu engɔ à me nu anɔm sàambyɛ bɔnɔ ngɛ?” 24Éngɛ Yeso gíì kpe, “Mbɔn ke nɛɛ kpe mbɔn be nyim ebwa mbɔʼnga mbɔn ne me nɛɛ aŋwɛʼrɛ Ngwe ka ekama Ngwe ngɛ bo? 25Èndzobo chɛ bɔ kudu ma yà zhwɛm ene ewu ngɛ, angɔ ke ma wu nu aye kà nu anɔm kà angɔ ma wu nyii efwɔ ebwa elô bo. Angɔ ba yà mwɔ ne engere ekere ezob nɔ. 26Enjitsɔ ene ebwa mbɔʼ bɔ kudu aŋu e ma yà zhwɛm ene ewu ngɛ, mbɔn ke shi zɔʼrɔ efwɔ aŋwɛʼrɛ Mose ene afwɔ ǹgɛ̀ yɛ à ma fe ngɛ bo, aŋu Ngwe à ma gà ebe engɔ kpe ‘Mmɛ na Ngwe Abraham, Ngwe Ayzik, mane Ngwe Yakɔb ngɛ bo?’ 27Engɔ ke mwɔ Ngwe bɔ kudu bo, na Ngwe bɔ kɔʼɔ. Mbɔn be le enyimebwa ghɛʼ.”

Etsɛrɛ kɛ́

(Mat 22:34-40; Luk 10:25-28)

28Àtee atsɛrɛ deʼ à zeʼe zo na aŋu angɔ ma fɛ̀ɛrɛ ngɛ. Èndzobo chɛ engɔ à zɔ kpe Yeso a shi gii ega nchwɔnchwɔ ebe angɔ ngɛ, è biiri kpe abwaʼ atsɛrɛ gimkpaʼ, etsɛrɛ ze me tɛŋɛ kam? 29Yeso gíì kpe, “Ooh bɔ Israel, mbɔn zhuru. Àsaase Ngwe bɔ ne ŋwàʼ. 30Ngà doʼo Àsaase Ngwe njɛ ene etaa mfyɛ gimkpaʼ mane azhwɛɛrɛ njɛ gimkpaʼ mane ezhuŋu njɛ gimkpaʼ gɛrɛ mane ekama njɛ gimkpaʼ. 31Engɔ yɛ me kiri achim ngɛ ne ga kpe. Engwo doʼo egho we me ebara mfyɛ ngɛ na aŋu ngwo me doʼo ekwa ngwɛ ngɛ. Ne tsɛʼ atsɛrɛ deʼ a me fɔɔ azɔnɔ bo.” 32Àtee atsɛrɛ we kpe, “Àtee abwa, ngwo shi ga éŋwaʼa kpe Ngwe tye eŋwàʼ, tsɛʼ etsɛrɛ bo, tyè engɔ. 33Doʼo Ngwe ene etaa mfyɛ gimkpaʼ, nè ezhuŋu njɛ gimkpaʼ mane ekama njɛ gɛ̀rɛ̀ edoʼ gho we mwɔ ebara mfyɛ ngɛ na ngwo me doʼo ekwa ngwɛ ngɛ, e we koʼro fɔɔ ala etɔ̧ɔrɔ yɛ e ma twɔ̀n ngɛ.” 34Èndzobo chɛ Yeso à zɔ kpe engɔ à gii anchwɔnchwɔ ene azɔm ngɛ, è ga ebe engɔ kpe, “Ezhin ke wu dɔɔ engɛ̂ é nyii efwɔ ebwa m̀fɔ̀ Ngwe bo.” Enyɛrɛ éngɛ, sa ngɔɔ mbè, gho deʼ ke wu zhweʼre kpe mbè biiri ebwa tsɛrɛ ebe engɔ bo.

Ebiiri mbɔʼ Ǹtɔmzhwaʼa

(Mat 22:41-46; Luk 20:41-44)

35Aŋu Yeso à ma tee abwa efwɔ emwɔ ndɔngwe kɛ̀ ngɛ è biiri kpe, “Ayɛ me le bàtee atsɛrɛ ma ga kpe Kristo Àsaase wa ngo mwɔ gho ekla Devid? 36Devid mɔmbwo à na ga ena nyɛ̀rɛ̀ zèʼe ene azhwɛɛrɛ pɛ kpe Masakɛ à ga ebe Masakɛ ngu kpe tsɔmɔ ene abwo nde ndza bwɛn èndzobo chɛ mmɛ ma gè bɔ m̀pɛ̀ʼ mbyɛ enji bla njɛ ngɛ.”

Yeso gbeʼre eto bɔ mbɔʼ bàtee atsɛrɛ

(Mat 23:1-36; Luk 20:45-47)

Ebaŋagho we ma zhuru engɔ ene gɛrɛ. 37Devid mɔmbwo à zɔʼrɔ engɔ kpe Masakɛ. E shi da gà ene kpe Yeso na ŋwɔ ngɔ? 38Na aŋu engɔ à ma tee ngɛ, Yeso ga ebe angɔ kpe, “Mbɔn nu azɔm nè bàtee atsɛrɛ. E be doʼo yɛrɛ zhiri nè èngwara ǹdiri gɛ̀rɛ̀ me doʼo kpe bɔ ma gamma ebe angɔ ati ewu̧. 39Angɔ gɛrɛ me doʼo etan bɔ kɛ́ efwɔ ndɔ bɛ̀ɛrɛ atsɛrɛ bɔ Israel mane akwâ ye e me kɛʼɛ abwa ngɛ. 40Angɔ ba ndooro ayeti ma tsɔŋɔ ndɔrɔ angɔ gɛ̀rɛ̀ ma tsàʼrà Ngwe me dɔɔ mbɔʼtye bɔ zɔ. Enyii m̀pèrè bɔ tsɔnɔ ya ngo me ndeʼe.”

Etɔ̧ɔrɔ eyeti

(Luk 21:1-4)

41Yeso tsɔmɔ a chwâ embè sa kede na aŋu enɔrɔ bɔ ma ge ekɛb efwɔ ànkàm tɔ̧ɔrɔ Ngwe efwɔ ndɔngwe kɛ̀ ngɛ. Bɔ kɛb akɛkɛ à ge ekɛb akɛkɛ. 42Bɛʼngɛ, eyeti ndzaŋa deʼ zeʼe ge ebɛɛ èkapɛ fyee wɛ à ne me koʼo ala deʼ bo ngɛ. 43Yeso zɔʼ bɔ bɛɛrɛ abwa mɔ gà ebe angɔ kpe, “Mmɛ ga éŋwaʼa endɔn ga kpe eyeti wunɔ shi ge ekɛb efwɔ ànkàm tɔ̧ɔrɔ Ngwe fɔɔ abɔ abê gimkpaʼ. 44Abɔ abê ne ndɛʼɛ à zeʼ ene àfɔ̀n àmɔ̀, bɛʼngɛ engɔ efwɔ ndzaŋa mɔ, è ge ela ngɔ gimkpaʼ byɛ â me tye ebe engɔ é ma nde anyi ngɛ.”

Currently Selected:

Mak 12: nbt

Highlight

Copy