Mak 11

Yeso nyii a Jerusalɛm na m̀fɔ̀ nɔ

(Mat 21:1-11; Luk 19:28-40; Eyɔ 12:12-19)

1Aŋu angɔ à bwɛn a Jerusalɛm gɛ̀rɛ̀ nyii a Bɛtfagɛ mane Bɛtani, edɔm egu Olifs ngɛ, Yeso saa bɔ bɛɛrɛ abwa mɔ fyee, 2mà gà ebe angɔ kpe, “Mbɔn ngɔɔ efwɔ abɛ yɛ a mwɔ embè ndzɔn ngɛ, aŋu mbɔn gɛrɛ ma sa nyii nyii efwɔ ngɛ, mbɔn ba zɔ e me tyɛ ŋwɔ m̀pwɔ̀ bèʼebɔ deʼ wɛ gho deʼ ke shi kwaʼa ekyɛ deʼ bo ngɛ, mbɔn zɛ̀ɛ nu zeʼe anɔ. 3Mala gho deʼ biiri endɔn kpe ‘Mbɔn na le éngɛ kpe ayɛ?’ Ga ebe engɔ kpe ‘Masakɛ a na ke gɛ̀rɛ̀ ma wu saa achim anɔ afwɔ mpiʼ.’ ” 4Angɔ ngɔɔ gɛ̀rɛ̀ dù zɔ ŋwɔ m̀pwɔ̀ bèʼebɔ a njikɛ̀ e me tyɛ ese enduʼndɔ deʼ. Aŋu angɔ à zɛ̀ɛ m̀pwɔ̀ yɛ ngɛ, 5bɔ deʼ a me tamma aŋu biiri kpe, “Mbɔn na fwɛʼ ayɛ, mbɔn na zɛ̀ɛ ŋwɔ m̀pwɔ̀ bèʼebɔ yɛngɛ?” 6Angɔ gíì aŋu Yeso à ga ebe angɔ ngɛ, abɔ byɛ gɛrɛ sàa angɔ e ngɔɔ. 7Èndzobo chɛ angɔ à nu ŋwɔ m̀pwɔ̀ bèʼebɔ wɛ ngɔɔ ebe Yeso gɛrɛ zèe ǹdiri àmɔ̀ edɔm ngɛ, engɔ kwaʼ edɔm. 8Bɔ akɛkɛ à zee ǹdiri àmɔ̀ a njikɛ̀, adeʼ ke atɔ azɔd efwɔ ǹgɛ̀ è zee. 9Abɔ à me tse embè mane angɔ à ma kìrì achim ngɛ sa flaba ndɛ̀ʼ ebɛrɛ ga kpe, “Hosana! M̀bɔ̀nɔ ye ebe engɔ wɛ è me zeʼe ene ekumu Masakɛ ngɛ. 10M̀bɔ̀nɔ ye ne ebwa m̀fɔ̀ àtɛ bɔ Devid wɛ è ma zeʼe ngɛ! Hosana ekere àkɛ!” 11Yeso nyii a Jerusalɛm, è ngɔɔ a ndɔngwe kɛ̀. Engɔ kede ela gimkpaʼ, na aŋu endzobo à shi fɔɔ ngɛ, è ngɔɔ a Bɛtani nè bɔ bɛɛrɛ abwa mɔ wum ǹchwɔ̀ fyee.

Yeso ndwaʼ azɔd akla

(Mat 21:18, 19)

12E ko enchwe, aŋu angɔ à sa nyɛ̀rɛ̀ a Bɛtani ngɛ, nchwɔrɔ Yeso ma gwɔ̀n. 13Engɔ tam e zɔ azɔd akla deʼ a me tsɔʼrɔ, engɔ ngɔɔ kɔʼrɔ ke è wa zɔ anta deʼ ekere. Èndzobo chɛ engɔ à bwɛn aŋu ngɛ è ne zɔ ala deʼ bo, à tye ma afu mbɔʼnga à ke me ejɛ akla ma kla bo. 14Éngɛ engɔ ga ebe azɔd yɛ kpe, “Tsɛ̀ʼ gho deʼ ŋwaʼ ma yà wu nde anta ene engwo bo bwɛrɛ endzobo kengudu.” Bɔ bɛɛrɛ abwa ngɔ zo aŋu engɔ à ga ngɛ.

Yeso ngɔɔ efwɔ ndɔngwe kɛ̀

(Mat 21:12-17; Luk 19:45-48; Eyɔ 2:13-22)

15Aŋu angɔ à bwɛn a Jerusalɛm ngɛ, Yeso nyii efwɔ ndɔngwe kɛ̀ gɛ̀rɛ̀ klada sa fli abɔ byɛ â ma zɔnɔ gɛ̀rɛ̀ ma fɛ̀nnɛ̀ ela aŋu ngɛ. Engɔ ghɛɛbɛ achud ekara yɛ abɔ byɛ â ma kobo akɛb â ma glì ngɛ kubu a chwâ mane etan byɛ â ma fɛ̀nnɛ̀ mblɔ̂m edɔm ngɛ, 16gɛ̀rɛ̀ ne ma bɛ̀rɛ kpe abɔ à ma fɛ̀nnɛ ela ngɛ edeʼ fɔɔ emwɔ ndɔngwe kɛ̀ bo. 17Aŋu à ma tee angɔ ngɛ, è ga kpe, “E ke me ŋwɛʼrɛ kpe e yà sa zɔʼrɔ ndɔ ndza kpe ndɔ tsàʼrà Ngwe ebe ebɛ gimkpaʼ bo? Mbɔn shi le è shi me eblá àjii.” 18M̀fɔ̀rɔ̀ zhiri mane bàtee atsɛrɛ zo gɛ̀rɛ̀ klada sa zɛ̀ʼ aghɛʼ é zhudu engɔ. Angɔ à na bumu engɔ mbɔʼnga enɔrɔ bɔ gimkpaʼ â kɔ̂n ma gɛnɛ àmɔ̀ ene abwa yɛ engɔ à ma tee ngɛ. 19À shi endzobo etiʼdi angɔ nyɛnnɛ efwɔ abɛ.

Ebwa é bɛɛrɛ ene azɔd akla

(Mat 21:20-22)

20Aŋu angɔ à sa zhiri à ngɔɔ enchwenchwe ngɛ, angɔ zɔ azɔd akla yɛ a shi ku, e klada ene egha mɔ. 21Petoro zhuŋu gɛ̀rɛ̀ gà ebe Yeso kpe, “Àtee abwa, kede! Azɔd akla yɛ ngwo à ndwaʼ ngɛ shi ku!” 22Yeso gíì kpe, “Le ebɛrɛtaa ene Ngwe. 23Mmɛ na gà endɔn me éŋwaʼa, mala gho deʼ ga ebe egu wunɔ kpe, ‘Chwaʼ tù efwɔ ebɔrɔndim’ gɛ̀rɛ̀ ne me le edi deʼ efwɔ etaa mɔ bo, bɛʼngɛ me bɛrɛ kpe ebwa wɛ mbè ga ngɛ wa gli, e wa ngo fwɛʼ ebe engɔ. 24Enyɛrɛ éngɛ, mmɛ na gà endɔn kpe ka de mwɔ ebwa yɛ ngwo ma tsàʼrà Ngwe ma bii ebe Ngwe me le ebɛrɛ kpe ngwo shi nu, a ya ngɔɔ mwɔ anjɛ. 25Endzobo ngwo gɛrɛ tam sa tsàʼrà Ngwe ngɛ, mala ngwo me le ebɔɔtaa ene ebwa mbɔʼ gho deʼ, dzɛrɛ anyimabwa ngɔ mbɔʼtye àtɛ ngwɛ ekere ezob me né dzɛ̀d anjɛ anyimabwa. 26Mala ngwo ne dzɛrɛ anyimabwa ghongwa ngwɛ bo, shi Ngwe gɛrɛ ke ma ngo dzɛrɛ anjɛ abwa bɔɔbɔɔ bo.”

Ebiiri mbɔʼ afwɔ yɛ ekama Yeso me zeʼ aŋu ngɛ

(Mat 21:23-27; Luk 20:1-8)

27Angɔ à bwɛn a Jerusalɛm ekyɛ tsɛrɛ. Aŋu Yeso à sa zhinni emwɔ ndɔngwe kɛ̀ ngɛ, m̀fɔ̀rɔ̀ zhiri, bàtee atsɛrɛ mane eto efwɔ ndɔngwe zeʼe ebe engɔ. 28Angɔ biiri kpe, “Ngwo na fwɛʼ abwa zɔnɔ ngɛ me ne ekama ze? Awɛ me ndɛʼ afwɔ engɛ̂ é le énde?” 29Yeso gíì kpe, “Mmɛ wa biiri ebiiri ŋwaʼ deʼ endɔn, ma mbɔn gii ega ena, shi mmɛ wa tòʼrò m̀pè ekama yɛ mmɛ ma fwɛʼ abwa gimkpaʼ anyi ngɛ endɔn. 30Andim myɛ Eyɔɔ à ma ndɛ̀ʼ ngɛ à zeʼe ebe Ngwe ekere ezob kà ebe gho? Mbɔn toʼro ena.” 31Angɔ sɛɛrɛ àmɔ̀ àmɔ̀ gɛ̀rɛ̀ kpe, “Mala ntsɔ ga kpe ‘à zeʼe ekere ezob,’ engɔ wa biiri kpe, ‘Ayɛ gɛ le mbɔn ne bɛrɛ ene engɔ bo.’ 32Bɛʼngɛ mala ntsɔ gɛrɛ ga kpe, ebe gho.” Angɔ à na bumu bɔ mbɔʼnga bɔ gimkpaʼ à ne bɛrɛ kpe Eyɔɔ à na Àmɛnɛkɔn Ngwe. 33Éngɛ, angɔ gíì ebe Yeso kpe, “Mbyɛɛ ke nɛɛ bo.” Yeso gà kpe, “Mmɛ gɛrɛ ke ma tòʼrò ekama yɛ mmɛ ma fwɛʼ abwa zɔnɔ anyi ngɛ bo.”

Currently Selected:

Mak 11: nbt

Highlight

Copy