Mak 15

E nu Yeso ngɔɔ efàarà Paylet

(Mat 27:1, 2, 11-14; Luk 23:1-5; Eyɔ 18:28-38)

1Â tam enchwenchwe twɛn m̀fɔ̀rɔ̀ zhiri, eto, bàtee atsɛrɛ mane bɔ m̀pàrà gimkpaʼ, angɔ nu etsɛrɛ. Angɔ à koro Yeso, nu engɔ ngɔɔ gè abwo Paylet. 2Éngɛ Paylet biiri ebe engɔ kpe, “Ngwo na m̀fɔ̀ ebe bɔ Juu?” Yeso gíì kpe, “Ɔ̧̀ɔɔ, e ne mwɔ na aŋu ngwo shi ga ngɛ.” 3Éngɛ, m̀fɔ̀rɔ̀ zhiri à gè abwa andɔɔ akɛkɛ enji engɔ. 4Éngɛ Paylet gɛrɛ wu biiri ebe engɔ kpe, “Ngwo ke ma gìi ega bo? Shi kede abwa akɛkɛ yɛ e ma ge enji njɛ ngɛ.” 5Bɛʼngɛ, Yeso à de ke gii ega deʼ bo. Éngɛ Paylet kɔn mbɔʼ engɔ.

E nu etsɛrɛ kpe e zhudu Yeso

(Mat 27:15-26; Luk 23:13-25; Eyɔ 18:39–19:16)

6Enjitsɔ â na le etsɛrɛ deʼ kpe endzobo antara fɔɔ ekere, e ba pwèerè ghodzɔm deʼ wɛ angɔ me doʼo ngɛ. 7Éngɛ gho de à na a dzɔm e ma zɔʼrɔ kpe Barabas, mane abɔ tsɛrɛ byɛ angɔ à me zhudu gho deʼ abɛɛ yɛ etaranchwe à ma gli ngɛ. 8Enɔrɔ bɔ à zeʼ ebe Paylet dù gà ebe ngɔ kpe ngà le ebwa wɛ ngwo ma doʼo à le ngɛ. 9Éngɛ Paylet biiri ebe angɔ kpe, “Mbɔn be ke kpe mmɛ pweere m̀fɔ̀ bɔ Juu saa?” 10Engɔ à na biiri éngɛ, me nɛɛ kpe, na aghɔʼ me le m̀fɔ̀rɔ̀ zhiri shi ge Yeso eblabwo ngɔ ngɛ. 11Bɛʼngɛ m̀fɔ̀rɔ̀ zhiri à twàʼrà enɔrɔ bɔ gimkpaʼ kpe, angɔ ga kpe shi Paylet pweere ma Barabas. 12Paylet biiri kpe, “Mmɛ wa ngo le ene nè egho engɔ wɛ mbɔn ma zɔʼrɔ kpe m̀fɔ̀ bɔ Juu ngɛ?” 13Angɔ flaba akwâ kpe, “Kɔmɔ engɔ.” 14Paylet biiri kpe, “Ene ebwa yɛ? Ne ebwa bɔɔbɔɔ we engɔ me le?” Bɛʼngɛ angɔ mɛ̀ɛ flaba akwâ akɛkɛ kpe, “Kɔmɔ engɔ.” 15Éngɛ na aŋu Paylet à ma ke le shi angɔ gɛnɛ àmɔ̀ ngɛ, engɔ pwèerè Barabas saa, è wuru Yeso anchwɔnchwɔ gɛ̀rɛ̀ gè engɔ ebla ebwo angɔ kpe e ngɔɔ kɔmmɔ engɔ.

Bɔ ebiri sere Yeso

(Mat 27:27-31; Eyɔ 19:2, 3)

16Éngɛ bɔ ebiri gbee Yeso ngɔɔ abɛ m̀fɔ̀ yɛ à mwɔ efwɔ etsam Praktoryum ngɛ, angɔ zɔʼ ǹtìmi bɔ ebiri gimkpaʼ afwɔbi. 17Angɔ ge ǹdi deʼ yɛ à ma ke ngɔɔ efan ngɛ ekwa ngɔ, éngɛ e nu etɔ ètwɔn è fudu na ǹtàm m̀fɔ̀ nɔ shi gè ato ngɔ. 18Éngɛ angɔ klada sa zɔʼrɔ engɔ kpe, “Mbɛ̀ɛ, m̀fɔ̀ bɔ Juu yaa tsɔmɔ efwɔ endzobo dɔɔdɔɔ!” 19Éngɛ akyɛ nè akyɛ angɔ à wuru ato engɔ ene atam gɛ̀rɛ̀ ma tù emɛn ekwa ngɔ. Angɔ sa godo a chwâ ene etongu àmɔ̀ sa ghɔ engɔ, ma sèrè sere. 20Éngɛ èndzobo chɛ â shi gbɛɛrɛ engɔ ngɛ, e chi ǹdi yɛ ekwa engɔ bwɛ ǹdiri ngɔ è ge ekwa ngɔ, éngɛ angɔ sa gbee engɔ à ngɔɔ ese é kɔ̀mmɔ̀.

E kɔmmɔ Yeso

(Mat 27:32-44; Luk 23:26-43; Eyɔ 19:17-27)

21Gho Sirɛn deʼ à na aŋu wɛ ekumu ngɔ à ma Shimun ngɛ. Engɔ à na àtɛ ebe Alɛkzanda mane Rufus, gho wunɔ à na fɔɔ ma ngɔɔ ene angɔ amɔ aghɛʼ efwɔ abɛ, éngɛ angɔ tiri engɔ kpe è beʼe azɔd baʼra yɛ. 22Éngɛ angɔ nu Yeso ngɔɔ afwɔ yɛ â ma zɔʼrɔ kpe Golgota, wɛ ǹji me ga kpe, afwɔ akɔʼato ngɛ. 23Éngɛ angɔ sa tiri engɔ à ndɛʼ mɔm myɛ à me blidi nè adwe mɛyɛ, bɛʼngɛ engɔ à ke ŋwɔ amɔ bo. 24Éngɛ angɔ kɔmmɔ engɔ, è gɛ̀bbɛ̀ ǹdiri ngɔ me ndwa ma antsántsá é zɔ afwɔ ǹdi yɛ gho ŋwaʼ ma nu ngɛ. 25Éngɛ â ngɔ̀ɔ kɔmmɔ engɔ ene enyɔ̀m kɔɔ enchwenchwe. 26Éngɛ â ne ŋwɛʼrɛ edɔ̀m apara aŋwɛʼrɛ yɛ â me ŋwɛʼrɛ mbɔʼ engɔ ngɛ kpe, “M̀FƆ̀ BƆ JUU.” 27Angɔ à kɔmmɔ àjii fyee mane ngɔ, gho bi abɛɛ abwo nde ngɔ, egho we abɛɛ abwo mɔ̀ ngɔ. 28Ene aghɛʼ zɔnɔ, ega Ngwe gli éŋwaʼa kpe, “Engɔ à zɔ ǹgoʼ nè bɔ bɔɔbɔɔ.” 29Abɔ byɛ à ma fɔɔrɔ aŋu ngɛ sa da ndwaʼa engɔ sa njiʼri eto àmɔ̀ sa ga kpe, “Éngɛ, ngwo wɛ ngwo ma ngɔ sɛ̀ʼ ndɔngwe kɛ̀ gɛ̀rɛ̀ wu byɛ efwɔ enji tɛd ngɛ. 30Ngà kla edɔ̀m azɔd baʼra yɛngɛ zeʼ a chwâ è pwèerè ekwa ngwɛ!” 31Ena aghɛʼnji ŋwaʼ yɛ m̀fɔ̀rɔ̀ zhiri mane bàtee atsɛrɛ sa sèrè engɔ àmɔ̀ àmɔ̀, angɔ sa ga kpe, “Engɔ wa pwèerè abɔ tsɛrɛ, bɛʼngɛ è ke né pwèerè ekwa mɔ bo. 32Shi Kristo wunɔ m̀fɔ̀ ebe bɔ Israel nɔ kla edɔ̀m azɔd baʼra shi ntsɔ zɔ gɛ̀rɛ̀ bɛ̀rɛ.” Abɔ byɛ â me kɔmmɔ nè engɔ ngɛ gɛrɛ sa sèrè engɔ.

Aŋu Yeso à ku ngɛ

(Mat 27:45-56; Luk 23:44-49; Eyɔ 19:28-30)

33À sa bwɛ̀n enyɔ̀m wum ǹchwɔ̀ fyee, akwâ kwaʼ di koo abɛ gimkpaʼ ngɔɔ bwɛn ene enyɔ̀m tɛd. 34Ene enyɔ̀m tɛd Yeso flàbà akwâ kù̧u ene angwa etsoʼ kɛkɛ kpe, “Eli, Eli, Lama Sabaktani?” Wɛ e me ga kpe, “Ngwe ndza, Ngwe ndza, ngwo shi ne waʼ angu kpe ayɛ?” 35Èndzobo chɛ abɔ deʼ byɛ â me tamma ebara â zo aŋu engɔ à ku̧u ngɛ, angɔ gà kpe, “Zhuru, engɔ wa zɔʼ Elayja.” 36Anɔm deʼ dɔrɔ ngɔ̀ɔ tuʼu èzɛ̀ʼ efwɔ atwa mɔm, gè ato atam, gɛ̀rɛ̀ ndɛ̀ʼ ebe Yeso kpe engɔ ŋwɔ ma ga kpe, “Sàara engɔ gho zhiʼ ntsɔ zɔ ka Elayja wa zeʼe nu engɔ e sàa a chwâ ngà” 37Yeso kù̧u eghɛʼ, gɛ̀rɛ̀ ku amɔ. 38Engwa aparandi wɛ à mwɔ efwɔ ndɔngwe kɛ̀ ngɛ pan enyɛrɛ zeʼe ekere kla bwɛ̀n a chwâ. 39Èndzobo chɛ ato ebe bɔ ebiri wɛ à me tama efàarà Yeso à zo eku̧u ngɔ gɛ̀rɛ̀ zɔ aŋu engɔ à ku̧u ngɛ, engɔ ga kpe, “Éŋwaʼaŋwâʼ egho wunɔ na ŋwɔ Ngwe!” 40Aye deʼ a na kɔ̀ʼ ezhin dɔɔdɔɔ. Abwaʼ angɔ à na Meri Magdalɛn, Meri áʼɔ̧̀ Jems eghobo mane Yɔsɛf, mane Salomɛ. 41Angɔ à na kìrì engɔ a Galilii gɛ̀rɛ̀ ma kpèdè engɔ. Âye tsɛrɛ akɛkɛ byɛ â me zeʼe a Jerusalɛm ngɛ â gɛrɛ na aŋu.

Aŋu â kpa Yeso ngɛ

(Mat 27:57-61; Luk 23:50-56; Eyɔ 19:38-42)

42À na etiʼdi anji yɛ ese à ma kèʼ ma anji ghɔ Ngwe ngɛ, 43Yɔsɛf gho Arimatya, wɛ à ma gho kɛ́ efwɔ ndɔ m̀pàrà, gɛrɛ ma kɔʼɔ ebwa m̀fɔ̀ Ngwe ngɛ klini etaa ngɔɔ biiri akudugho Yeso ebe Paylet. 44Paylet à kɔ̂n é zo kpe engɔ a shi ku. Engɔ à zɔʼ gho ebiri biiri ka Yeso a shi ku? 45Èndzobo chɛ engɔ à zo ebe gho ebiri kpe ne éngɛ ngɛ, engɔ ndɛ̂ʼ akudugho Yeso ebe Yɔsɛf. 46Yɔsɛf zɔn aparandi deʼ nu akudugho Yeso è furu efwɔ gɛ̀rɛ̀ ngɔ̀ɔ gè engɔ efwɔ ebla yɛ â me twe efwɔ ekob ngɛ. Éngɛ engɔ tiri etye koo ebla yɛ anyi. 47Meri Magdalɛn mane Meri áʼɔ̧̀ Yɔsɛf â zɔ́ afwɔ yɛ â kpa engɔ ngɛ.

Currently Selected:

Mak 15: nbt

Highlight

Copy