Mak 16

Yeso zhwɛm ene ewu

(Mat 28:1-8; Luk 24:1-12; Eyɔ 20:1-10)

1Èndzobo chɛ anji ku̧ru bɔ Juu à shi fɔɔ ngɛ, Meri Magdalɛn, Meri áʼɔ̧̀ Jems mane Salomɛ zɔn enklila mbɔʼtye ngɛ mbɔɔ me né ngɔ̀ɔ é zhwaʼ akudugho Yeso. 2À ne enchwenchwe endzobo etaranchwe à shi gli ngɛ efwɔ anji mbèmbè efwɔ ǹkyɛ̀, angɔ shi anji sa ngɔɔ atoshe. 3E sa biiri àmɔ̀ àmɔ̀ kpe, “Awɛ ma ngo biiŋi etye zénde chi enduʼeshe?” 4Bɛʼngɛ èndzobo chɛ angɔ à kɔʼ ekere ngɛ, e zɔ kpe etye yɛ à me klɔ ghɛʼ ngɛ a shi chi bìiŋi. 5Aŋu angɔ à nyii efwɔ eshe ngɛ, angɔ zɔ eghobo deʼ me tsɔmɔ abwo nde me ge ǹdi bla, èklɔ̀ bere angɔ. 6Eghobo wɛ gâ ebe angɔ kpe, “Mbɔn ka bum, mbɔn na zɛ̀ʼ Yeso wɛ ma gho Nazarɛd we â me kɔmmɔ engɔ edɔm azɔd baʼra ngɛ. A shi zhwɛɛmɛ engɔ! È ne tsɛʼ anɔ bo. Shi kɔʼ afwɔ yɛ â me naa engɔ ngɛ. 7Bɛʼngɛ, mbɔn ngɔɔ tòʼrò ebe bɔ bɛɛrɛ abwa mane Petoro, engɔ wa ngɔɔ embè ndzɔn efwɔ abɛ Galilii. Mbɔn ba ngo zɔ engɔ aŋu na aŋu engɔ à ga endɔn ngɛ.” 8Âye byɛ à gli eshe dɔrɔ ene èklɔ̀. Gho deʼ ne gɛʼɛ eklo ebe gho we bo mbɔʼnga â ma bumu.

Yeso bum efàarà Meri Magdalɛn

(Mat 28:9, 10; Eyɔ 20:11-18)

9Èndzobo chɛ, Yeso à zhwɛm angoʼse anji mbèmbè efwɔ ǹkyɛ̀ ngɛ, à dye tee amɔ ebe Meri Magdalɛn wɛ engɔ à fli ezhwɛɛrɛ bɔɔbɔɔ sàambyɛ ekwa ngɔ ngɛ. 10Meri Magdalɛn à ngɔɔ gɛ̀rɛ̀ tòʼrò ebe abɔ byɛ â shi mwɔ nè engɔ ngɛ wɛ â me tsɔmɔ ma dè eku gɛ̀rɛ̀ ma ku̧u ngɛ. 11Èndzobo chɛ angɔ à zo kpe Yeso bli ekɔʼɔ gɛ̀rɛ̀ zo ga kpe Meri Magdalɛn shi zɔ engɔ ngɛ, â ke bɛrɛ abwa anyi bo.

Yeso bum efàarà bɔ bɛɛrɛ abwa mɔ fyee

(Luk 24:13-35)

12Enyɛrɛ éngɛ, Yeso tee amɔ ene aghɛʼ tsɛrɛ ebe angɔ bɔ fyee deʼ byɛ â ma zhiri efwɔ abɛ ngɛ. 13Abɔ fyee bɔnɔ ghɛɛbɛ zeʼe tòʼrò ebe abɔ abê, bɛʼngɛ â gɛrɛ ke bɛrɛ bo.

Yeso bum efàarà bɔ bɛɛrɛ abwa wum ǹchwɔ̀ ŋwaʼ

(Mat 28:16-20; Luk 24:36-49; Eyɔ 20:19-23; Ele 1:6-8)

14Endzobo à sa koʼ, Yeso tee amɔ ebe bɔ bɛɛrɛ abwa abê wum ǹchwɔ̀ ŋwaʼ èndzobo chɛ â ma nde ngɛ. Engɔ bwe ebe angɔ gà kpe angɔ ke me le ebɛrɛtaa bo, è gɛrɛ bwe ebe angɔ ene kèzobwa angɔ wɛ â ma tɔrɔ é bɛrɛ ebe abɔ angɔ byɛ â shi zɔ engɔ na aŋu à shi zhwɛm ngɛ. 15Engɔ ga ebe angɔ kpe, “Ngɔɔ edɔm ese gimkpaʼ, è sɛ̀ɛrɛ̀ ekɔn ǹchwɔ̀ ebe ela gimkpaʼ byɛ Ngwe me ndeere ngɛ. 16Egho wɛ ma bɛ̀rɛ gɛ̀rɛ̀ nu ndim ngɛ e ba ngo pwèerè engɔ, bɛʼngɛ, egho ngɔ wɛ ne bɛrɛ bo ngɛ wa ngo nyim. 17Éngɛ anɛ̂ abwa zɔnɔ ya ngo mwɔ nè angɔ byɛ e bɛrɛ ngɛ, ene ekumu ngu angɔ ba ngo fli ezhwɛɛrɛ bɔɔbɔɔ saa ese, angɔ ba ngo ga ene atsoʼ fe. 18Angɔ ba ngo bere jwere ekere ene ebwo amɔ, e gɛrɛ mwɔ kpe ka angɔ ŋwɔ me m̀pè ntsɔ kamakam ze, è ke ma ngo fwɛʼ ebwa deʼ ekwa angɔ bo, angɔ gɛrɛ ba ngo tɛʼ ebwo àmɔ̀ ato bɔ aŋwan, bɔ aŋwan bwada.”

E nu Yeso ngɔɔ ekere

(Luk 24:50-53; Ele 1:9-11)

19Aŋu Masakɛ Yeso à ga ebe angɔ ngɛ, e nu engɔ ngɔɔ ekere ezob, engɔ tsɔmɔ ene abwo nde Ngwe. 20Éngɛ bɔ bɛɛrɛ abwa gli ngɔɔ sɛ̀ɛrɛ̀ akwâ gimkpaʼ, éngɛ Masakɛ fwɛʼ nè angɔ gɛ̀rɛ̀ le kpe ega ngɔ mwɔ éŋwaʼa da zeʼe ene anɛ̂ abwa yɛ â ma gli ngɛ.

Currently Selected:

Mak 16: nbt

Highlight

Copy