Mak 10

Yeso tee mbɔʼ ebwa sɛ̀ʼrɛ elô

(Mat 19:1-12; Luk 16:18)

1Éngɛ Yeso nyɛn afwɔ yɛ è ngɔɔ abɛɛ abɛ Judeya, kpɛ̀n ngɔɔ eji Joodan. Anɔrɔ bɔ tsɛrɛ gɛrɛ zeʼe ebe engɔ na aŋu à shi ma atiʼi ngɔ ngɛ, engɔ tee angɔ. 2Bɔ Farisii deʼ zeʼe é kpèrè engɔ è sa biiri ebe engɔ kpe, “Etsɛrɛ ye tee kpe anɔm we né sɛ̀ʼrɛ̀ elô nè eye mɔ?” 3Yeso gíì ebe angɔ kpe, “Mose à tsɛrɛ endɔn kpe ayɛ?” 4Angɔ ga kpe, Mose à ga kpe, “Gho sa tɔrɔ aye, engɔ ŋwɛʼrɛ aŋwɛʼrɛ sɛ̀ʼrɛ elô, dye shi sàa aye wɛ è ngɔɔ.” 5Éngɛ Yeso gíì ebe angɔ kpe, “Na mbɔʼnga ńtara ntsɔn à me kama, ne ǹji yɛ Mose à ŋwɛʼrɛ etsɛrɛ zɔnɔ endɔn ngɛ.” 6Èndzobo chɛ, Ngwe à ndèerè ese ngɛ, à ndèerè anɔm mane aye. 7Ne ǹji yɛ anɔm ma sàarà àtɛ mɔ mane áʼɔ̧̀ mɔ, è bumu amɔ nè eye mɔ, 8éngɛ èfyee bɔnɔ ba ngo mwɔ ma gôb ekwa ŋwaʼ, nyɛrɛ éngɛ angɔ ke bli bɔ fyee bo, e shi ma gho ŋwaʼ. 9Éngɛ gho deʼ ke sɛʼrɛ ala yɛ Ngwe shi buumu afwɔbi ngɛ bo. 10Bɔ bɛɛrɛ abwa wu biiri ebe Yeso ekyɛ tsɛrɛ mbɔʼ ebwa tɔrɔ aye, èndzobo chɛ angɔ à me efwɔ ndɔ ngɛ. 11Engɔ gíì kpe, “Egho wɛ tɔrɔ eye mɔ è nu-aye tsɛrɛ ngɛ, è shi le andɔb ekwa ngɔ. 12Enyɛrɛ éngɛ, aye wɛ tɔrɔ enɔm mɔ è ngɔɔ nu anɔm tsɛrɛ, engɔ gɛrɛ shi le andɔb.”

Yeso ndɛʼ m̀bɔ̀nɔ ebe adɔ̀kpara

(Mat 19:13-15; Luk 18:15-17)

13Bɔ à na bwɛ adɔ̀kpara zeʼe ebe Yeso kpe è mɔmɔ gɛ̀rɛ̀ ndɛ̀ʼ m̀bɔ̀nɔ ebe angɔ, éngɛ bɔ bɛɛrɛ abwa ma bwe ebe angɔ. 14Èndzobo chɛ, Yeso à zo ebwa wunɔ ngɛ, engɔ à bɔɔ etaa, è ga ebe angɔ kpe, “Mbɔn saara shi adɔ̀kpara zeʼe ena, mbɔn ke kɔrɔ angɔ bo, mbɔʼnga ebwa m̀fɔ̀ Ngwe ne ebe m̀pèrè bɔ tsɔnɔ. 15Mmɛ na gà éŋwaʼa é ndɔn, egho wɛ è ne ma ngo nu ebwa m̀fɔ̀ Ngwe na adɔ̀kpara nɔ bo, è ke ne yà nyii efwɔ bo.” 16Éngɛ, engɔ beʼ adɔ̀ byɛ ambɔ̀ʼ mɔ, tɛʼɛ ebwo mɔ ena angɔ, ndɛ̀ʼ m̀bɔ̀nɔ ebe angɔ.

Gho àfɔ̀n

(Mat 19:16-30; Luk 18:18-30)

17Èndzobo chɛ Yeso à nyɛn sa ngɔɔ amɔ ngɛ, Gho deʼ dɔrɔ zeʼ gò ene etongu mɔ efàarà ngɔ, gà ebe engɔ kpe, “Àtee abwa nchwɔnchwɔ, mmɛ we né le ene é yà nde etyê kengudu?” 18Éngɛ Yeso gíì ebe engɔ kpe, ngwo zɔʼrɔ angu kpe gho nchwɔnchwɔ kpe ayɛ, “Tsɛ̀ʼ gho deʼ me nara bo, a tye Ngwe gho zhiʼ.” 19Yeso fɔɔ embè è ga ebe engɔ kpe, “Ka ngwo we nɛɛ etsɛrɛ, etsɛrɛ ye ga kpe, ke zhudu gho bo, ke ese énde, ke ji bo, ke bɛrɛ antsɛ andɔɔ bo, ke nu ala gho deʼ ene andɔɔ bo, ghɔ àtɛ ngwɛ mane áʼɔ̧̀ ngwɛ.” 20Egho wunɔ gâ ebe engɔ apɛpɛ kpe, “Àtee abwa, mmɛ à shi shi atsɛrɛ zɔnɔ nyɛ̀rɛ̀ zèʼe efwɔ èndzobo chɛ mmɛ à bli eghobo ngɛ.” 21Éngɛ Yeso kede engɔ gɛ̀rɛ̀ doʼo engɔ, è ga ebe engɔ kpe, “Ebwa deʼ we nɔ eŋwàʼ wɛ ngwo ne shi le bo ngɛ. Ngɔɔ fɛ̀nnɛ̀ ela mbyɛ gimkpaʼ, ndɛ̀ʼ ekɛb ebe bɔ ndzaŋa, éngɛ ngwo wa ngo le àfɔ̀n ngwɛ ekere ezob, nyɛrɛ éngɛ ngwo shi zeʼe è kìrì angu.” 22Aŋu Yeso à ga éngɛ ngɛ, eju bere egho wɛ, è nyɛrɛ sa ngɔɔ ene eju mbɔʼnga engɔ à ne le àfɔ̀n ghɛʼ. 23Éngɛ Yeso ghɛɛbɛ amɔ gà ebe bɔ bɛɛrɛ abwa mɔ kpe, “E wa ngo kɔ̀n ghɛʼ ebe abɔ byɛ e me le ekɛb ngɛ é nyii efwɔ ebwa m̀fɔ̀ Ngwe.” 24Abɔ bɛɛrɛ abwa byɛ gɛnɛ àmɔ̀ ene ega ngɔ bɛʼngɛ, Yeso wu ga kpe, “Bwɔ mbu, e wa ngo kɔ̂n é nyii efwɔ ebwa m̀fɔ̀ Ngwe. 25E we zamma ebe m̀pwɔ̀ eguńked é fɔɔ anji ǹtsɛʼ ghɔ ǹdi, fɔɔ ebe gho àfɔ̀n é nyii efwɔ ebwa m̀fɔ̀ Ngwe.” 26Abɔ bɛɛrɛ abwa byɛ wu gɛ̀nɛ̀ àmɔ̀ fɔɔ aŋu a me dye ma gɛnɛ àmɔ̀ ngɛ, sa ga àmɔ̀ àmɔ̀ kpe, “Egho wɛ é ma ngo pwèerè engɔ ngɛ de na wɛ ngà?” 27Yeso kede angɔ è ga kpe, ene egha gho e we kɔrɔ, bɛʼngɛ tsɛʼ ebwa deʼ e me kɔrɔ ebe Ngwe bo. Abwa gimkpaʼ ye zamma ebe Ngwe. 28Petoro gâ ebe engɔ kpe, “Mbyɛɛ be saara ela gimkpaʼ è kìrì awɛ!” 29Éngɛ, Yeso gíì ebe angɔ kpe, mmɛ na ga éŋwaʼa endɔn, tsɛʼ gho deʼ wɛ shi saara ndɔ, kà bwɔngwaanɔm, kà bwɔngwaaye, kà áʼɔ̧̀, kà àtɛ, kà bwɔ, ke me ekwa mɔ mbɔʼ mmɛ, kà mbɔʼ ekɔn ǹchwɔ̀ 30è ma ngo tyè edɔm ese ne le ndɔ, mane bwɔngwaanɔm, nè bwɔngwaaye, áʼɔ̧̀ mane ètɛ, bwɔ mane asɔmɔ ene ekyɛ ekobi è fɔɔ, efwɔ èndzobo chɛ éngɛ èkwà̧ʼrà gɛrɛ ba ngo zeʼe abwaʼ. À sa bwɛn efwɔ endzobo ngùdu, engɔ ma ngo nde etyê kengudu. 31Bɛʼngɛ akɛkɛ byɛ e me tse embè enjitsɔ ngɛ, e yà ngùdu, angɔ byɛ e me ngùdu ngɛ yà fɔɔ shi embè.

Yeso ga ekyɛ nùrù tɛd mbɔʼ ewu mɔ

(Mat 20:17-19; Luk 18:31-34)

32Angɔ à na anji ma kwaʼ ngɔɔ a Jerusalɛm, Yeso me tse embè, bɔ bɛɛrɛ abwa ngɔ me kɔrɔ, éngɛ abɔ à ma kìrì ngɛ ma bumu. Yeso wu zɔ̀ʼ bɔ bɛɛrɛ abwa, è gòrò amɔ abɛɛ bi, è tòʼrò abwa yɛ à ma ngo glì ekwa ngɔ ngɛ. 33È ga ebe angɔ kpe, “Kɔʼɔ anɔ, aŋu ntsɔ ma kwaʼ à ngɔɔ a Jerusalɛm nɔ, e ba ngo ndɛ̀ʼ Ŋwɔ Gho ebe m̀fɔ̀rɔ̀ zhiri mane bàtee atsɛrɛ aŋu. E ba ngo tsɛrɛ kpe engɔ ku, è ndɛ̀ʼ engɔ ebe ebɛbɔ. 34E ba ngo nyɛ̀ engɔ, tù emɛn ene engɔ, wuru engɔ gɛ̀rɛ̀ zhudu engɔ. Enji sa ngo fɔɔ tɛd, è zhwɛm.”

Jems mane Eyɔɔ biiri ebwa deʼ ebe Yeso

(Mat 20:20-28)

35Éngɛ, Jems mane Eyɔɔ bwɔ Zɛbɛdii zeʼ ebe Yeso gà kpe, “Àtee abwa, mbyɛɛ ba ke kpe ngwo le ebwa mbyɛɛ ma ngo biiri ngɛ.” 36Engɔ biiri kpe, “Mbɔn na ke kpe mmɛ le ene endɔn?” 37E gíì kpe, “Shi egho bi abwaʼ njɛɛ tsɔmɔ abɛɛ abwo nde njɛ, egho we tsɔmɔ abɛɛ abwo mɔ̀ njɛ èndzobo chɛ ngwo ma tsɔmɔ ene atan m̀fɔ̀ njɛ ene eghɔ ngɛ.” 38Yeso gíì kpe, “Mbɔn ke nɛɛ ala mbɔn ma biiri ngɛ bo, mbɔn be né fɔɔ efwɔ enyii kamakam yɛ mmɛ ma ngo fɔɔ ngɛ kà nu ndim ene aghɛʼ yɛ mmɛ ma ngo nu ndim ngɛ?” 39Angɔ gíì kpe, “Mbyɛɛ be ne le ngɛ” Yeso gâ ebe angɔ kpe, “Ɔ̧̀ɔɔ mbɔn ba ngo fɔɔ efwɔ enyii kamakam yɛ mmɛ ma fɔɔ ngɛ gɛ̀rɛ̀ nu ndim ene aghɛʼ yɛ mmɛ ma ngo nu ndim ngɛ, 40bɛʼngɛ é tsɔmɔ abwo nde kà abwo mɔ̀ ndza ke ma afwɔ ndza é ndɛ̀ʼ bo. Akwa zɔnɔ ne ebe abɔ byɛ Ngwe à shi chidi shi ngɛ.” 41Èndzobo chɛ abɔ bɛɛrɛ abwa abê wum â zo ebwa wunɔ ngɛ, â bɔɔ etaa ekwa Jems mane Eyɔɔ. 42Yeso buumu angɔ afwɔbi è gà kpe, “Mbɔn be nɛɛ kpe abɔ byɛ bɔ ma kede ne eto ebe ebɛbɔ ngɛ ba ngbèdè angɔ, bɔ kɛ angɔ ma tee ekama edɔm angɔ. 43Bɛʼngɛ, e ke ma ngo mwɔ éngɛ abwaʼ ndzɔn bo, ankɔmɔ éngɛ, egho wɛ è ma ke é mwɔ gho kɛ̀ abwaʼ ndzɔn ngɛ mwɔ gho afwɛʼ. 44Engɔ wɛ ma ke mwɔ gho mbèmbè abwaʼ ndzɔn ngɛ mwɔ gho afwɛʼ ebe bɔ gimkpaʼ. 45Mbɔʼnga ka de mwɔ Ŋwɔ Gho à ke me zeʼe kpe e fwɛʼ énde bo, à zeʼe é fwɛʼ ebe bɔ é ndɛ̀ʼ etyê mɔ é lɔɔ bɔ akɛkɛ.”

Yeso glì àfò aghɔɔ wɛ ekumu ngɔ à mwɔ Baatimaos ngɛ

(Mat 20:29-34; Luk 18:35-43)

46Angɔ à bwɛn a Jeriko. Aŋu Yeso, bɔ bɛɛrɛ abwa mɔ mane engwa enɔrɔ bɔ wɛ a sa gli efwɔ abɛ yɛ ngɛ, àfò aghɔɔ deʼ wɛ ekumu ngɔ à mwɔ Baatimaos ŋwɔ Timaos ngɛ, me tsɔmɔ eba ǹjì ma bii. 47Èndzobo chɛ à zo kpe na Yeso gho Nazarɛd ngɛ, è klada sa flàbà akwâ gà kpe, “Yeso ŋwɔ Devid, klasɔn ene mmɛ!” 48Bɔ akɛkɛ gba engɔ, ga kpe engɔ kubu eklo, bɛʼngɛ è mɛɛ flàbà akwâ akɛkɛ kpe, “ŋwɔ Devid klasɔn ene mmɛ!” 49Yeso tam ga kpe, “Zɔʼ engɔ” e zɔʼ àfò aghɔɔ wɛ kpe, “Gɛnɛ awɛ, tam ekere! È wa zɔ̀ʼ awɛ” 50È chi ǹdi ndwa a chwâ kùmù tam ekere zeʼe ebe Yeso. 51Yeso biiri ebe engɔ kpe, “Ngwo na ke kpe mmɛ le ene engɛ̂?” Àfò aghɔɔ wɛ ga kpe, “Àtee abwa, mmɛ wa ke é wu zɔ akwâ.” 52Yeso kpe, “Ngɔɔ, ebɛrɛtaa njɛ shi gli awɛ.” È sa mɛ̀ɛrɛ̀ eklo aghɔɔ ngɔ fuʼ, è sa zɔ akwâ, è nyɛrɛ kiri Yeso anji aŋu.

Currently Selected:

Mak 10: nbt

Highlight

Copy