Luk 8

Aye byɛ â kiri Yeso ngɛ

1Èndzobo chɛ enji deʼ â shi fɔɔ ngɛ, Yeso à zhiri fɔɔ efwɔ ebɛ nè ebɛ ma zhiri à sɛ̀ɛrɛ̀ ekɔn ǹchwɔ̀ mbɔʼ ebwa m̀fɔ̀ Ngwe. Engɔ à ngɔɔ nè bɔ bɛɛrɛ abwa mɔ wum ǹchwɔ̀ fyee 2mane âye deʼ byɛ engɔ à shi fli ezhwɛɛrɛ bɔɔbɔɔ efwɔ akwâ angɔ gɛ̀rɛ̀ gli eŋwan angɔ ngɛ. Âye bɔnɔ adeʼ â na Meri wɛ â ma zɔʼrɔ kpe Magdalɛn ngɛ, wɛ à fli ezhwɛɛrɛ bɔɔbɔɔ sàambyɛ efwɔ ekwa engɔ ngɛ, 3Juana eye Chuza, Chuza à na ato ebe bɔ afwɛʼ efwɔ ndɔ Hɛrɔd, Susana mane âye tsɛrɛ akɛkɛ byɛ â bwɛ ela àmɔ̀ è kpèdè Yeso nè bɔ bɛɛrɛ abwa mɔ anyi ngɛ.

Nklama timi mbɔʼ àkɔn elankɔn

(Mat 13:1-9; Mak 4:1-9)

4Bɔ â fɔɔ embè ma zeʼe ebe Yeso nyɛ̀rɛ̀ zèʼe efwɔ ebɛ nè ebɛ. Èndzobo chɛ enɔrɔ bɔ â shi sɔŋɔ ngɛ, Yeso sɛɛrɛ nklama timi fɔnɔ kpe, 5“À shi anji deʼ, àkiri àsɔmɔ deʼ ngɔɔ é kɔn elankɔn efwɔ esɔmɔ mɔ. Aŋu à mii elankɔn efwɔ esɔmɔ ngɛ, adeʼ turu a njikɛ̀, abɔ byɛ â ma fɔɔrɔ ngɛ da dzɛ̀ddɛ̀, ènɔ̀n ekere gɛrɛ bwɛ nde. 6Adeʼ turu ene ekob, aŋu â klada sa gli ngɛ ekwaʼa zɔm mbɔʼnga chwâ à ke me le ndim deʼ anyi bo. 7Elankɔn mɔmbwo adeʼ turu efwɔ ekôd. Ekôd tɛb è ghà ela bɔnɔ. 8Adeʼ turu afwɔ chwâ ǹchwɔ̀. Elankɔn bɔnɔ tɛb, gɛ̀rɛ̀ kla enta eghɛʼɛ, adeʼ enta ekobi.” Yeso ngùdu ga kpe, “Abɔ byɛ e me le ètimi ngɛ e zhuru.”

Enji ene nklama timi

(Mat 13:10-17; Mak 4:10-12)

9Bɔ bɛɛrɛ abwa ngɔ biiri ǹji ene nklama timi fɔnɔ ebe Yeso. 10Engɔ gɛrɛ gíì kpe, “Ngwe à shi ndɛʼ azɔm yɛ a me nɛŋɛ efwɔ ebwa m̀fɔ̀ Ngwe ngɛ endɔn. Bɛʼngɛ è na ga ebe abɔ abê ene nklama timi mbɔʼtye angɔ ma kede ne ma zɔ bo, gɛrɛ ma zhuru ne ma nɛɛ bo.

Yeso toʼro ǹji ene nklama timi àkɔn elankɔn

(Mat 13:18-23; Mak 4:13-20)

11Enji ene nklama timi fɔnɔ ne ga kpe, alankɔn ne ega Ngwe. 12Elankɔn byɛ â turu a njikɛ̀ ngɛ ne tama ene abɔ byɛ e ma zo ega Ngwe, a sa ndada afwɔ mpiʼ, asatan zeʼe è chi ebwa wɛ efwɔ ńtara angɔ, é le kpe angɔ ke le ebɛrɛtaa yà nde etyê bo. 13Elankɔn byɛ â turu edɔm ekob ngɛ na abɔ byɛ e ma zo ega wɛ, nu ene egɛnɛ ngɛ. E shi ke ma nyii efwɔ ńtara angɔ bo. E na bɛ̀rɛ tye me ne antiri endzobo. Èndzobo chɛ ekpere zeʼe ngɛ, angɔ godo mbɔʼnga è ke le agha bo. 14Elankɔn byɛ â turu efwɔ ekôd ngɛ ne abɔ byɛ e ma zo ega Ngwe, bɛʼngɛ àfɔ̀n efwɔ ese, edoʼ ene ela efwɔ ese mane abwa efwɔ ese koro ńtara angɔ, e ne me né kla enta ǹchwɔ̀ bo. 15Elankɔn byɛ â turu afwɔ chwâ ǹchwɔ̀ ngɛ, na abɔ byɛ e zo ega wɛ, e nu efwɔ ńtara amɔ gɛ̀rɛ̀ ma klini ńtara bwɛn èndzobo chɛ e ma kla enta ngɛ.

Anâm enji ekuʼ

(Mak 4:21-25)

16Bɔ ke ma chɛ anâm nu ekuʼ koo anyi bo, ka è ge enji etan bo. E na tɛ̀ʼɛ edɔm echud tɛʼ anâm mbɔʼtye bɔ sa zɔ ekɛʼ aŋu e ma nyii efwɔ ndɔ ngɛ. 17Ela gimkpaʼ byɛ e me nɛŋɛ ngɛ e yà zɔ. Abwa yɛ â gɛrɛ me nɛŋɛ ngɛ yà gli apɛpɛ. 18Éngɛ, mbɔn nu azɔm aŋu mbɔn ma zhuru ngɛ, mbɔʼnga abɔ byɛ e me le ala deʼ ngɛ, e ba ngo zhiiri, bɛʼngɛ angɔ byɛ e ne le ala deʼ bo ngɛ, e ba ngo nu âfwɔ ngɔ wɛ e me zhuŋu kpe mbɔɔ be le ngɛ.”

Áʼɔ̧̀ Yeso mane bwɔngwaanɔm ngɔ

(Mat 12:46-50; Mak 3:31-35)

19Áʼɔ̧̀ Yeso mane bwɔngwaanɔm ngɔ â zeʼe ebe Yeso shi sa zɛʼɛ aghɛʼ é ngɔ̀ɔ abwaʼ engɔ tsɛʼ mbɔʼ ebaŋabɔ. 20Gho deʼ gà ebe Yeso kpe, “Áʼɔ̧̀ ngwɛ mane bwɔngwaanɔm mbyɛ be tamma ese ma ke é zɔ awɛ.” 21Yeso gâ ebe angɔ kpe, “Áʼɔ̧̀ ngu mane bwɔngwaanɔm mbu na angɔ byɛ e ma zo ega Ngwe gɛ̀rɛ̀ ma fwɛʼ na aŋu ega Ngwe me ga ngɛ.”

Yeso bwaara efùu kɛ́

(Mat 8:23-27; Mak 4:35-41)

22Anji deʼ Yeso nyii efwɔ ekpe nè bɔ bɛɛrɛ abwa mɔ è ga ebe angɔ kpe, “Ntsɔ kpɛn è ngɔɔ anjid angli ze.” Angɔ klada sa ngɔɔ. 23Aŋu angɔ à ma zhiri à ngɔɔ ngɛ, m̀bwɛrɛ bere Yeso. Sa ndada afwɔ mpiʼ nɔ, efùu kamakam deʼ sa fùu edɔm angli. Ndim klada sa nyii efwɔ ekpe ene aghɛʼ yɛ abwa à shi bɔɔ ebe angɔ ngɛ. 24Bɔ bɛɛrɛ abwa ngɔɔ ebe Yeso, zɛɛmɛ engɔ ga kpe, “Masa! Masa! Ntsɔ kudu!” Yeso tam a m̀bwɛrɛ, è gà ebe efùu mane awawa wɛ efwɔ ndim ngɛ è ba. Akwa gɛrɛ ba tuuu. 25Yeso shi gà ebe bɔ bɛɛrɛ abwa mɔ kpe, “Ebɛrɛtaa ndzɔn eze?” Angɔ à kɔn ma bumu sa gà àmɔ̀ àmɔ̀ kpe, “Egho wunɔ shi na awɛ è ga ebe efùu mane awawa e zo engɔ?”

Yeso gli gho deʼ wɛ à me le ezhwɛɛrɛ bɔɔbɔɔ ngɛ

(Mat 8:28-34; Mak 5:1-20)

26Yeso mane bɔ bɛɛrɛ abwa mɔ â kpɛn ndim è ngɔɔ efwɔ Gɛrasa wɛ à ma anjid angli ze a Galilii ngɛ. 27Aŋu Yeso à tɛʼɛ alo mɔ eba eji ngɛ, gho deʼ wɛ à me zeʼe efwɔ abɛ me le ezhwɛɛrɛ bɔɔbɔɔ ngɛ kla engɔ. Egho wunɔ à shi tsɔmɔ efwɔ endzobo dɔɔdɔɔ ma yɛrɛ zhiri ne ma ge ǹdi bo gɛ̀rɛ̀ ne ma tsɔmɔ a ndɔ bo. Â na tsɔmɔ ma akwâ yɛ etoshe â mwɔ ngɛ. 28Èndzobo chɛ egho wɛ à zɔ Yeso ngɛ, è tsɛɛ ku̧u go a chwâ ene elo Yeso, flaba gà kpe, “Yeso, ŋwɔ Ngwe yɛ è mwɔ ekere ngɛ! Ngwo na ke yɛ ena? Mmɛ buʼ ebwo engɛ̂, ngà ke enyii ekwa ngu ge.” 29Engɔ à ga énde mbɔʼnga Yeso à shi ga kpe azhwɛɛrɛ bɔɔbɔɔ yɛ a gli efwɔ ekwa engɔ. Bɔ shi bere engɔ akyɛ akɛkɛ koro na ghodzɔm nɔ, è ge dzɔmɔrɔ ebwo mane elo ngɔ, è ma tsɛddɛ. Azhwɛɛrɛ bɔɔbɔɔ yɛ a fli engɔ sàa efwɔ akwâ ńked. 30Yeso biiri ebe engɔ kpe, “Ekumu ngwɛ na awɛ?” Engɔ gii kpe, “Ekumu ngu na ǹglibi bɔ” mbɔʼnga ezhwɛɛrɛ bɔɔbɔɔ à shi nyii efwɔ ekwa engɔ. 31Ezhwɛɛrɛ bɔɔbɔɔ byɛ buʼ ebwo ebe Yeso kpe è ke saa angɔɔ efwɔ dzɔm ngɔmɔchwa bo. 32Kurunyɛm deʼ à ne shwe ebara aŋu ma nde eba egu. Ezhwɛɛrɛ bɔɔbɔɔ byɛ buʼ ebwo ebe Yeso kpe è saa angɔɔ shi mbɔɔ nyii efwɔ kurunyɛm chɛ. Engɔ gɛrɛ saara angɔ. 33Ezhwɛɛrɛ bɔɔbɔɔ byɛ gli ekwa gho wɛ nyii ekwa kurunyɛm chɛ, e gɛrɛ nyɛrɛ eba egu mɔmbwo ene enɔrɔ amɔ gimkpaʼ ngɔɔ nyii nyim efwɔ eji. 34Abɔ byɛ â ma kɔʼɔ kurunyɛm chɛ ngɛ zɔ ebwa wɛ â gli ngɛ gɛ̀rɛ̀ dɔrɔ ngɔɔ sɛ̀ɛrɛ̀ ekɔn mɔmbwo efwɔ abɛ mane ekwa. 35Bɔ nyɛrɛ ngɔɔ e zɔ ebwa wɛ à me gli ngɛ. Aŋu angɔ à kla Yeso ngɛ, angɔ zɔ egho wɛ ezhwɛɛrɛ bɔɔbɔɔ byɛ â gli ekwa ngɔ ngɛ e me tsɔmɔ ebara Yeso, me ge ǹdiri, azɔm engɔ gɛrɛ shi pɛ. Èklɔ̀ à bere angɔ bɔ gimkpaʼ. 36Abɔ byɛ â zɔ ebwa wɛ ngɛ â toʼro ebe abɔ abê aŋu Yeso à gli egho wɛ ngɛ. 37Éngɛ bɔ gimkpaʼ efwɔ abɛ Gɛrasa gà kpe Yeso ngɔɔ, mbɔʼnga angumu kɛ́ â bere angɔ. Éngɛ Yeso nyii efwɔ ekpe gɛ̀rɛ̀ nyɛrɛ amɔ. 38Egho wɛ ezhwɛɛrɛ bɔɔbɔɔ à shi gli ekwa engɔ ngɛ buʼ ebwo ebe Yeso kpe, “Shi mmɛ ngɔɔ nè ngwo.” Bɛʼngɛ, Yeso à tɔn, è ga ebe engɔ kpe 39“Ngɔɔ achim enduʼndɔ gɛ̀rɛ̀ tòʼrò ebwa kɛ́ wɛ Ngwe shi fwɛʼ engɛ̂ ngɛ.” Egho wɛ ngɔɔ efwɔ ebɛ zhiri a sɛ̀ɛrɛ̀ ebwa wɛ Yeso shi fwɛʼ ebe engɔ ngɛ.

Ŋwɔaye Jaryɔs mane aye wɛ à mɔmɔ ǹdi Yeso ngɛ

(Mat 9:18-26; Mak 5:21-43)

40Èndzobo chɛ Yeso à ghɛɛbɛ è ngɔɔ anjid angli zé ngɛ, abɔ byɛ â chɛdɛ engɔ mbɔʼnga angɔ bɔ gimkpaʼ â shi tsɔmɔ sa kɔʼɔ engɔ. 41Éngɛ, gho deʼ wɛ ekumu ngɔ à ma Jaryɔs ma gho kɛ̀ efwɔ ndɔ bɛ̀ɛrɛ atsɛrɛ ngɛ bwɛn. Engɔ ndwa amɔ a chwâ elo Yeso è buʼ ebwo ebe engɔ kpe è ngɔɔ a ndɔ mbe. 42Mbɔʼnga ŋwɔaye chwɛ̀ʼ ngɔ wɛ à shi enɔ̂m wum ǹchwɔ̀ fyee ngɛ a sa kuku. Aŋu Yeso à ma zhiri à ngɔ̀ɔ ngɛ, abɔ byɛ â ne kɛɛrɛ engɔ sɔ. 43Aye deʼ à na abwaʼ abɔ byɛ wɛ à shi zɔ ǹgoʼ ene anɔm yɛ a ma kla ekwa engɔ ngɛ efwɔ enɔ̂m wum ǹchwɔ̀ fyee. Engɔ à shi ndɛʼ ela mɔ gimkpaʼ ebe ǹgàrakyè shi me tsɛʼ edeʼ eŋwàʼ wɛ a me né gli engɔ bo. 44Aye wunɔ a kwaʼ è nyii efwɔ ebaŋabɔ ekuchim Yeso è mɔmɔ adzɔ ǹdi ngɔ. Anɔm yɛ tsɛrɛ ekyɛ ŋwaʼ. 45Yeso biiri kpe, “Awɛ mɔmɔ angu?” Bɔ gimkpaʼ â tɔn, Petoro gɛrɛ shi ga kpe, “Masa, bɔ be kɛɛrɛ awɛ sɔ gɛ̀rɛ̀ ma koʼo amɔ ekwa ngwɛ.” 46Bɛʼngɛ Yeso ga kpe, “Gho deʼ à mɔmɔ angu, mmɛ nɛɛ èndzobo chɛ ekama à gli ekwa ngu ngɛ.” 47Aye wɛ à zɔ kpe â shi nɛɛ angbe, éngɛ engɔ sa biri ekwa è ngɔɔ go elo Yeso. Aŋu, efàarà bɔ gimkpaʼ, engɔ toʼro ebe Yeso ǹji yɛ engɔ à mɔmɔ engɔ ngɛ gɛ̀rɛ̀ tòʼrò aŋu ekwa ngɔ à bwada ekyɛ ŋwaʼ ngɛ. 48Yeso ga ebe engɔ kpe, “Ŋwɔaye ngu, ebɛrɛtaa njɛ shi le ngwo bwada, ngɔɔ ene m̀bwarambwad.” 49Aŋu Yeso à ma bli à ga ngɛ, ghontɔm nyɛrɛ zeʼe enduʼndɔ gho kɛ̀ è ga ebe Jaryɔs kpe, “Ŋwɔaye ngwɛ shi ku, ke tsɔmɔ ndɛʼ ǹgoʼ ebe àtee abwa bo.” 50Bɛʼngɛ Yeso à zo gɛ̀rɛ̀ ga ebe Jaryɔs kpe, “Ka bum, ngà le me ebɛrɛtaa shi engɔ wa bwada.” 51Èndzobo chɛ engɔ à bwɛn enduʼndɔ aŋu ngɛ, à kɛ́ bɛrɛ kpe gho deʼ nyii efwɔ ndɔ nè engɔ bo, à tye ma Petoro, Eyɔɔ mane Jems mane àtɛ mane áʼɔ̧̀ eŋwɔ wɛ. 52Gho ŋwàʼaŋwàʼ wɛ à ma aŋu ngɛ à na ku̧u ma dè eŋwɔ wunɔ. Yeso ga kpe, “Mbɔn ka ku̧u, eŋwɔ wɛ ke shi ku bo, engɔ na bwɛrɛbwɛrɛ.” 53Angɔ bɔ gimkpaʼ â tsɔʼ Yeso, mbɔʼnga angɔ à ne nɛɛ kpe engɔ à shi ku. 54Bɛʼngɛ Yeso nu engɔ gɛ̀rɛ̀ klini ena abwo è ga kpe, “Ŋwɔ ngu tam ekere.” 55Engɔ à wu zhwɛm, azhwɛɛrɛ ngɔ wu zeʼe, engɔ tam ekere ekyɛ ŋwaʼ. Yeso gɛrɛ ga ebe angɔ kpe e ndɛʼ ala deʼ shi engɔ nde. 56Èngwa ngɔ à kɔ̂n bɛʼngɛ Yeso tsɛrɛ ebe angɔ kpe e ke le gho deʼ nɛɛ mbɔʼ ebwa wɛ â shi gli ngɛ bo.

Currently Selected:

Luk 8: nbt

Highlight

Copy