Luk 9

Yeso tɔm bɔ bɛɛrɛ abwa wum ǹchwɔ̀ fyee

(Mat 10:5-15; Mak 6:7-13)

1Yeso à zɔʼ bɔ bɛɛrɛ abwa wum ǹchwɔ̀ fyee ese afwɔbi è ndɛ̀ʼ ekama mane afwɔ ebe angɔ é fli ezhwɛɛrɛ bɔɔbɔɔ gɛ̀rɛ̀ gli eŋwan. 2Éngɛ, engɔ à saa angɔ ese é ngo sɛ̀ɛrɛ̀ ebwa m̀fɔ̀ Ngwe gɛ̀rɛ̀ gli bɔ aŋwan. 3È ga ebe angɔ kpe, “Mbɔn ke nu ala deʼ é ngɔ̀ɔ nè angɔ bo, ka ma atam, ka ma achwɔ̀, ka ma ende, ka ma ekɛb, ka de ma ǹdi tsɛrɛ, mbɔn ka nu. 4Afwɔ yɛ e chɛdɛ angɔn ngɛ, mbɔn tsɔmɔ efwɔ e ndɔ yɛ bwɛn anji yɛ mbɔn ma nyɛ̀rɛ̀ efwɔ afwɔ yɛ ngɛ. 5Afwɔ yɛ e ne chɛdɛ angɔn bo ngɛ, mbɔn gli efwɔ abɛ yɛ mbɔn kuru ebun elo mbɔn é tee kpe angɔ tye nè epan amɔ.” 6Bɔ bɛɛrɛ abwa â nyɛrɛ gɛ̀rɛ̀ zhiri fɔɔ efwɔ ebɛ gimkpaʼ, zhìn à sɛ̀ɛrɛ̀ ekɔn ǹchwɔ̀ gɛ̀rɛ̀ gli bɔ akwâ gimkpaʼ.

Ato Hɛrɔd buguru

(Mat 14:1-12; Mak 6:14-29)

7Èndzobo chɛ Hɛrɔd, ato a Galilii à zo mbɔʼ abwa zɔnɔ gimkpaʼ yɛ â ma gli ngɛ, ato ngɔ sam efwɔ, mbɔʼnga abɔ deʼ â na ga kpe Eyɔɔ Andɛʼndim à shi wu zhwɛm. 8Adeʼ ma ga kpe Elayja shi zhwɛm, adeʼ gɛrɛ ma ga kpe Àmɛnɛkɔn sam bi shi wu zhwɛm. 9Hɛrɔd gâ kpe, “Mmɛ à ndɛʼ etsɛrɛ e tsɛd ato Eyɔɔ, egho wunɔ mmɛ shi ma zo abwa zɔnɔ mbɔʼ engɔ ngɛ na awɛ?” È gɛrɛ shi sa tsɔmɔ zɛʼɛ aghɛʼ é zɔ Yeso.

Yeso ndee bɔ ètɔɔshin tan

(Mat 14:13-21; Mak 6:30-44; Eyɔ 6:1-14)

10Bèmpwɔnɔntɔm ghɛ́ɛbɛ zeʼe achim gɛ̀rɛ̀ tòʼrò abwa gimkpaʼ yɛ angɔ à fwɛʼ ngɛ ebe Yeso. Engɔ nu angɔ e ngɔɔ eghɔ afwɔ deʼ â ma zɔʼrɔ kpe Bɛtsayda. 11Èndzobo chɛ ebaŋabɔ à zo ngɛ, angɔ kiri engɔ. Engɔ à chɛdɛ angɔ è ga ebe angɔ mbɔʼ ebwa m̀fɔ̀ Ngwe gɛ̀rɛ̀ gli abɔ byɛ â ma ke kpe è gli angɔɔ ngɛ. 12Èndzobo chɛ etaranchwe à sa turu ngɛ, bɔ bɛɛrɛ abwa wum ǹchwɔ̀ fyee zeʼe ebe engɔ è ga kpe, “Saa bɔ shi e ngɔɔ efwɔ ebe mane asɔmɔ yɛ ebara anɔ ngɛ mbɔʼtye e zɛʼɛ ende mane akwâ kodo mbɔʼnga afwɔ ko mane ende me tsɛʼ bo.” 13Bɛʼngɛ Yeso gâ ebe angɔ kpe, “Mbɔn mbwo ndɛʼ ala deʼ shi angɔ nde.” Angɔ gii kpe, “Ala yɛ mbyɛɛ me le ngɛ tye ebɔʼ ǹgoŋ tan mane Shuuru fyee. Ngwo ne ke kpe mbyɛɛ ngɔɔ zɔn ende ebe ebaŋagho wunɔ gimkpaʼ!” 14Bɔ â na aŋu e bwɛrɛ ne ètɔɔshin tan nɔ. Yeso gâ ebe bɔ bɛɛrɛ abwa mɔ kpe, “Mbɔn le bɔ tsɔmɔ a chwâ ene ǹtìmìri ǹtìmìri, eŋwàʼaŋwàʼ mwɔ bɔ èsama fyee tɛʼ wum.” 15Aŋu bɔ bɛɛrɛ abwa â fwɛʼ éngɛ ngɛ, 16Yeso nu ebɔʼ ǹgoŋ tan mane Shuuru fyee chɛ kɔʼ ekere ndɛʼ ebɛrɛ ebe Ngwe anyi è bɔʼrɔ ndɛʼ ebe bɔ bɛɛrɛ abwa kpe e gɛbbɛ ndɛʼ ebe bɔ. 17Angɔ bɔ gimkpaʼ â nde è zo. Bɔ bɛɛrɛ abwa shunu etseʼre yɛ â me tye ngɛ e shwe ènkàm wum ǹchwɔ̀ fyee.

Petoro toʼro m̀pè gho yɛ Yeso à mwɔ ngɛ

(Mat 16:13-19; Mak 8:27-29)

18Anji deʼ, èndzobo chɛ Yeso à ma tsàʼrà Ngwe gho zhiʼ ngɛ, bɔ bɛɛrɛ abwa ngɔ mwɔ nè engɔ. Bɔ bɛɛrɛ abwa â zeʼe ebe engɔ, Yeso biiri ebe angɔ kpe, “Bɔ na ga kpe mmɛ na awɛ?” 19Angɔ gíì kpe, “Abɔ deʼ ga kpe ngwo ne Eyɔɔ Andɛʼndim, abɔ deʼ kpe ngwo ne Elayja, adeʼ ga kpe ngwo na Àmɛnɛkɔn Ngwe sam deʼ wɛ è shi wu zhwɛm ene ewu ngɛ.” 20Yeso biiri ebe angɔ kpe, “Mbɔn mɔmbwo ne ga kpe mmɛ na awɛ?” Petoro gii kpe, “Ngwo na Ǹtɔmzhwaʼa Ngwe.”

Yeso gà mbɔʼ enyii mane ewu mɔ

(Mat 16:20-28; Mak 8:3–9:1)

21Éngɛ Yeso gbeʼre eto angɔ kpe e ke sɛɛrɛ ebwa wunɔ ebe gho deʼ bo. 22À gɛrɛ wu ga ebe angɔ kpe, “Ŋwɔ gho wara zɔ ǹgoʼ eghɛʼ efwɔ ndɔngwe, eto, m̀fɔ̀rɔ̀ zhiri mane bàtee atsɛrɛ ba ngo tɔn engɔ. E ba ngo zhudu engɔ, bɛʼngɛ enji sa fɔɔ tɛd e ba zhwɛɛmɛ engɔ.” 23È gɛrɛ ga ebe angɔ bɔ gimkpaʼ kpe, “Gho deʼ wɛ ma ke é kìrì angu ngɛ dzɛrɛ ekwa amɔ è beʼ azɔd baʼra amɔ enji gimkpaʼ è kìrì angu. 24Éngɛ egho wɛ e ma ke ngwe ato mɔ egha mɔ ngɛ wa ngo nyim, bɛʼngɛ engɔ wɛ è ma nyiimi ekwa mɔ mbɔʼ mmɛ ngɛ, è wa ngo nɔ ekɔʼɔ 25Bɔ yà le ǹtsara deʼ mala e le ela efwɔ ese gimkpaʼ shi nyim etyê amɔ? Kɛʼ nɔ! 26Mala bɔ ma bumu eju mbɔʼ mmɛ mane abwa yɛ mmɛ ma tee ngɛ, shi Ŋwɔ Gho wa ngo bumu eju mbɔʼ angɔ èndzobo chɛ engɔ ma zeʼe nè eghɔ mɔ mane eghɔ àtɛ mane engere pɛ ngɛ. 27Mmɛ na tòʼrò endɔn me éŋwaʼa kpe abɔ deʼ ba aŋu byɛ e yà ne ku bwɛn èndzobo chɛ angɔ ma yà zɔ ebwa m̀fɔ̀ Ngwe ngɛ.”

Aŋu ezɔɔrɔ Yeso à kobo ngɛ

(Mat 17:1-8; Mak 9:2-8)

28À sa bwɛn ǹkyɛ̀ bi, aŋu engɔ à shi ga abwa zɔnɔ ngɛ, Yeso nu Petoro, Eyɔɔ mane Jems ngɔ̀ɔ nè angɔ edɔm egu é tsàʼrà Ngwe. 29Aŋu engɔ à ma tsàʼrà Ngwe ngɛ, ezɔɔrɔ efàarà ngɔ kobo, ǹdiri ngɔ sa nɛŋɛrɛ. 30Sa zɔzɔ bɔ deʼ èfyee shi aŋu sa ga nè engɔ. Abɔ bɔnɔ â na Mose mane Elayja 31wɛ â bum nè eghɔ ekere sa ga nè Yeso mbɔʼ aŋu Yeso ma ngo le ebwa wɛ Ngwe à shi kɛʼɛ ngɛ e gli éŋwaʼa aŋu è ma ngo ku a Jerusalɛm ngɛ. 32Petoro mane azhɛmbyɛ mɔ â na fùumu m̀bwɛrɛ, bɛʼngɛ angɔ tamma ekere e zɔ enɛŋɛrɛkɛ Yeso mane abɔ fyee byɛ â me tamma nè engɔ ngɛ. 33Aŋu abɔ byɛ â sa nyɛ̀rɛ̀ abwaʼ Yeso ngɛ, Petoro gâ ebe engɔ kpe, “Masa, e we nara aŋu ntsɔ mwɔ anɔ nɔ! Mbyɛɛ ba byɛ enkpɛʼ tɛd, àbi engɛ̂, àbi ebe Mose êwè ebe Elayja” Engɔ à shi ke nɛɛ ebwa wɛ engɔ à ma ga ngɛ anchwɔnchwɔ bo. 34Aŋu Petoro à ma bli à ga ngɛ, m̀bɛ̀ʼ kla koo angɔ ene azhi mɔ. Bɔ bɛɛrɛ abwa sa bumu aŋu m̀bɛ̀ʼ a koo angɔ ngɛ. 35Etsoʼ deʼ gli efwɔ m̀bɛ̀ʼ è ga kpe, “Ewùnɔ na ŋwɔ ngu wɛ mmɛ me doʼo ngɛ, mbɔn zhuru ebe engɔ.” 36Èndzobo chɛ etsoʼ wɛ à ba ngɛ, Yeso tye aŋu gho zhiʼ. Bɔ bɛɛrɛ abwa â ba tuuu mbɔʼ abwa zɔnɔ a gimkpaʼ, gɛrɛ ne sɛɛrɛ ebwa deʼ wɛ angɔ à zɔ ngɛ ebe gho deʼ èndzobo chɛ bo.

Yeso gli aŋwɔanɔm deʼ wɛ à me le azhwɛɛrɛ bɔɔbɔɔ ngɛ

(Mat 17:14-18; Mak 9:14-27)

37À tam enchwe, Yeso mane bɔ bɛɛrɛ abwa tɛd kla edɔm egu, ebaŋabɔ gɛrɛ zeʼe è kla Yeso. 38Gho deʼ efwɔ ebaŋabɔ tsɛɛ gà kpe, “Àtee abwa! Mmɛ buʼ ebwo engɛ̂, kede ŋwɔanɔm ngu, ŋwɔanɔm chwɛ̀ʼ ngu! 39Azhwɛɛrɛ bɔɔbɔɔ deʼ ya doʼo bere engɔ, è ndada è tsɛɛ, a gɛrɛ le engɔ go na gho ekli nɔ, ena aghɛʼ yɛ efuu sa gli eklo ngɔ, a ya ndɛ̀ʼ ǹgoʼ ebe engɔ gɛrɛ ne ma zamma sàarà engɔ bo. 40Mmɛ bii bɔ bɛɛrɛ abwa mbyɛ kpe e fli sàa ese, bɛʼngɛ angɔ mo tsɛ̀ʼ.” 41Yeso gíì kpe, “Oh! Mbɔn ekyɛ zɔnɔ na bɔ ke le ebɛrɛ, abwa gɛrɛ ne me tam bo! Mmɛ wa ngo tsɔmɔ nè mbɔn efwɔ endzobo ene? Mmɛ wa ngo nu endzobo ene é twàʼrà angɔn é sàa ekere?” È shi gà ebe anɔm wɛ kpe, “Nu ŋwɔanɔm ngwɛ zeʼe anɔ.” 42Aŋu eŋwɔanɔm wɛ à ma zeʼe ngɛ, azhwɛɛrɛ bɔɔbɔɔ yɛ wuru engɔ ndwa a chwâ è sa njiʼ amɔ na ekli nɔ. Yeso ndɛʼ etsɛrɛ ebe azhwɛɛrɛ bɔɔbɔɔ yɛ à gli ekwa ŋwɔanɔm wɛ, gɛ̀rɛ̀ ndɛʼ engɔ achim ebe àtɛ mɔ. 43Bɔ gimkpaʼ â kɔn ene Angwanìm kama Ngwe. Bɔ â na ngla kaŋa amɔ ene abwa gimkpaʼ yɛ Yeso à ma fwɛʼ ngɛ, ne èndzobo chɛ engɔ à ga ebe bɔ bɛɛrɛ abwa mɔ kpe 44“Mbɔn ke dzɛrɛ ebwa wɛ mmɛ ma ke é ga endɔn ngɛ bo! E ba ngo gɛ Ŋwɔ Gho eblabwo bɔ.” 45Bɛʼngɛ bɔ bɛɛrɛ abwa â ke nɛɛ ǹji anyi bo. Â ne nɛŋɛ ebe angɔ mbɔʼtye e ne nɛɛ. Angɔ gɛrɛ ma bumu é biiri ebe engɔ mbɔʼ ebwa mɔmbwo.

Awɛ ma gho kɛ̀

(Mat 18:1-5; Mak 9:33-37)

46Efɛɛrɛ â gli abwaʼ bɔ bɛɛrɛ abwa ene egho wɛ ma gho kɛ́ abwaʼ angɔ ngɛ. 47Yeso à nɛɛ ebwa wɛ angɔ à ma zhuŋu ngɛ, engɔ nu adɔ̀kpara, è naa ebara mɔ, 48è ga ebe angɔ kpe, “Egho wɛ ma chɛdɛ eŋwɔ wunɔ ene ekumu ngu ngɛ, shi chɛdɛ angu, egho wɛ gɛrɛ ma chɛdɛ angu ngɛ gɛrɛ na chɛdɛ engɔ wɛ à tɔm angu ngɛ, mbɔʼnga engɔ wɛ me tɛŋɛ kpɛɛ abwaʼ ndzɔn ngɛ na gho kɛ́.”

Gho wɛ ne ma gho m̀pɛ̀ʼ ngwɛ bo ngɛ ne esɔrɔ ngwɛ

(Mak 9:38-40)

49Eyɔɔ gâ kpe, “Masa, mbyɛɛ à zɔ gho deʼ è ma fli ezhwɛɛrɛ bɔɔbɔɔ ene ekumu ngwɛ, mbyɛɛ kɔn engɔ mbɔʼnga engɔ ke ma gho bi efwɔ ǹtìmi bɔ bo.” 50Yeso gâ ebe engɔ mane abɔ bɛɛrɛ abwa abê kpe, “Mbɔn ke zhweʼre é kɔn engɔ bo. Egho wɛ ne ma gwe awɛ bo ngɛ wu doʼo awɛ.” 51Aŋu endzobo à sa zamma koʼ é nu Yeso é ngɔ̀ɔ ezob ngɛ, engɔ ndèerè etaa mɔ, gɛ̀rɛ̀ klada sa ngɔɔ a Jerusalɛm. 52Engɔ a saa bɔntɔm embè mɔ byɛ â ngɔɔ efwɔ abɛ deʼ a Samariya é ndèerè ela gimkpaʼ ebe engɔ ngɛ. 53Bɛʼngɛ abɔ byɛ aŋu ngɛ ba ke engɔ nu mbɔʼnga â ne tee apɛpɛ kpe engɔ à na ngɔ̀ɔ a Jerusalɛm. 54Èndzobo chɛ bɔ bɛɛrɛ abwa Jems mane Eyɔɔ â zɔ ebwa wunɔ ngɛ, angɔ ga kpe, “Masakɛ, ngwo we ke kpe ntsɔ zɔʼ éwu ekla ezob è tsɔŋɔ angɔ?” 55Yeso ghɛɛbɛ amɔ è bwe ebe angɔ. 56Éngɛ Yeso mane bɔ bɛɛrɛ abwa mɔ fɔɔ embè è ngɔɔ efwɔ abɛ tsɛrɛ.

Abɔ byɛ e ma yà kiri Yeso ngɛ

(Mat 8:19-22)

57Aŋu angɔ à ma zhiri à ngɔɔ ngɛ, anɔm deʼ ga ebe Yeso kpe, “Mmɛ wa kìrì awɛ afwɔ yɛ ngwo ngɔɔ ngɛ.” 58Yeso gâ ebe engɔ kpe, “Ǹdɔmɔrɔ tse le eblara, ènɔ̀n ekere gɛrɛ me le ndɔrɔ, bɛʼngɛ, Ŋwɔ Gho ke le afwɔ deʼ é naa ato mɔ aŋu é ku̧ru bo.” 59Engɔ gâ ebe egho tsɛrɛ kpe, “Kiri angu.” Bɛʼngɛ, egho wɛ ga kpe, “Masa, dye sàa angu mmɛ ngɔɔ achim gɛ̀rɛ̀ kpa àtɛ ngu.” 60Yeso gíì kpe, “Shi bɔ kudu kpa bɔ kudu amɔ. Ewu koʼro kpe ngwo ngɔɔ zhiri à sɛ̀ɛrɛ̀ ebwa m̀fɔ̀ Ngwe.” 61Egho tsɛrɛ ga kpe, “Mmɛ wa kìrì awɛ, Masa, bɛʼngɛ shi mmɛ dye ngɔ̀ɔ gamma ebe ekla ngu.” 62Yeso ga ebe engɔ kpe, “Egho wɛ ma klini ahla gɛ̀rɛ̀ sa wa kɔʼɔ achim ngɛ ke le ebwa deʼ é fwɛʼ efwɔ ebwa m̀fɔ̀ Ngwe bo.”

Currently Selected:

Luk 9: nbt

Highlight

Copy