Luk 10

Yeso tɔm bɔ èsama tɛd tɛʼ wum ǹchwɔ̀ fyee

1Èndzobo chɛ abwa zɔnɔ â fɔɔ ngɛ Masakɛ wu pwɔ̀nɔ̀ bɔ bɛɛrɛ abwa mɔ èsama tɛd tɛʼ wum ǹchwɔ̀ fyee è saa angɔ èfyee fyee embè engɔ efwɔ entiri akwâ byɛ engɔ mɔmbwo a ma ke é ngɔ̀ɔ aŋu ngɛ. 2Engɔ ga ebe angɔ kpe, “Ela be fara ekwâ eghɛʼɛ, bɔ afwɛʼ me kpɛɛ. Éngɛ mbɔn tsàʼrà Ngwe kpe egho wɛ è me le ekwa ngɛ saa bɔ afwɛʼ shi e zeʼe dzà ela. 3Mbɔn ngɔɔ shi nɛɛ kpe mmɛ na sàa angɔn na ǹglɔ̀rɔ̀ abwaʼ ekùru nɔ. 4Mbɔn ke nu ǹtɛʼ ekɛb kà achwɔ̀ tsɛrɛ bo, kà ebla bo. Mbɔn gɛrɛ ke da tam sa gamma ne gho deʼ a njikɛ̀ bo. 5Èndzobo chɛ mbɔn nyii efwɔ ndɔ deʼ ngɛ, mbɔn dye ga kpe m̀bwarambwad mwɔ efwɔ endɔ zɔnɔ. 6Mala gho deʼ è ma aŋu ma doʼo m̀bwarambwad, mbɔn shi m̀bwarambwad ndzɔn è tye nè angɔ. È shi me tsɛʼ bo, m̀bwarambwad ndzɔn e yà ngo é nɔ ekwa ngɔn. 7Mala mbɔn nyii efwɔ ndɔ deʼ, mbɔn tsɔmɔ aŋu sa nde gɛ̀rɛ̀ ŋwɔ ala yɛ e ma ndɛʼ endɔn ngɛ mbɔʼnga gho afwɛʼ we koʼro é le enɛrɛ mɔ. Mbɔn ke sa yɛrɛ zhiri efwɔ ndɔrɔ ndɔ bo. 8Èndzobo chɛ mbɔn nyii efwɔ abɛ deʼ bɔ chɛdɛ angɔ ngɛ, mbɔn nde ala yɛ e ma ndɛʼ endɔn ngɛ. 9Mbɔn gli abɔ aŋwan byɛ e ma aŋu ngɛ, è toʼro ebe angɔ kpe Ebwa m̀fɔ̀ Ngwe shi zeʼe ebara mfɔn. 10Bɛʼngɛ mala mbɔn nyii efwɔ abɛ deʼ, bɔ ne chɛdɛ angɔn bo, mbɔn ngɔɔ esɔŋɔ ǹjì gɛ̀rɛ̀ ga kpe 11‘Mbyɛɛ kuru ebun elo mbyɛɛ abɛ ndzɔn é shi epan ngɔn tye endɔn. Bɛʼngɛ mbɔn gɛrɛ zhuŋu kpe ebwa m̀fɔ̀ Ngwe shi ebara mfɔn.’ 12Mmɛ ga éŋwaʼa endɔn kpe anji tsɛrɛ esɛʼ, Ngwe yà le eklasɔn ene Sodɔm fɔɔ abɔ byɛ efwɔ abɛ yɛ ngɛ.”

Epan ebe abɛ byɛ e ne saara abwa bɔɔbɔɔ amɔ bo ngɛ

(Mat 11:20-24)

13E yà me ngoʼo endɔn bɔ Chorazin! E yà me ngoʼo endɔn bɔ Bɛtsayda mbɔʼnga mala abwa zodo zodo yɛ Ngwe à tee efwɔ abɛ ndzɔn ngɛ a mwɔ efwɔ abɛ Taya nè Sidɔn shi angɔ à shi kobo ńtara amɔ efwɔ endzobo dɔɔdɔɔ ma tsɔmɔ ene ǹdiri ku nè ebun akwâ amɔ, é tee kpe mbɔn shi kobo ene abwa bɔɔbɔɔ. 14Bɛʼngɛ, mmɛ wa ngo me le eklasɔn ebe bɔ Taya nè bɔ Sidɔn endzobo tsɛrɛ esɛʼ fɔɔ angɔn. 15Mbɔn gɛrɛ, bɔ Kapɛnaum, mbɔn be zhuŋu kpe mbɔn shi ezob? Bɛʼngɛ mbɔn ba ngo ngɔɔ a chwâ efwɔ edzɔwu asatan. 16Abɔ byɛ e ma zhuru endɔn ngɛ e na zhuru ena! Bɛʼngɛ, abɔ byɛ e ma bɛ̀ʼrɛ̀ angɔn ngɛ e na bɛ̀ʼrɛ̀ angu gɛrɛ. Egho wɛ è gɛrɛ ma bɛ̀ʼrɛ̀ angu ngɛ, e na bɛ̀ʼrɛ̀ egho wɛ è me saa angu ngɛ. 17Bɔ bɛɛrɛ abwa èsama tɛd tɛʼ wum ǹchwɔ̀ fyee byɛ â ghɛɛbɛ zeʼe nè egɛnɛ kɛ́. Angɔ ga kpe, “Masakɛ, ezhwɛɛrɛ bɔɔbɔɔ gɛrɛ bwaara amɔ èndzobo chɛ mbyɛɛ à zɔʼrɔ ekumu Ngwe ngɛ.” 18Yeso gíì ebe angɔ kpe, “Mmɛ zɔ asatan turu a chwâ zeʼe ekere na m̀bò ma ghɔbɔ à kla zeʼe ekere nɔ. 19Mmɛ shi ndɛʼɛ ekama endɔn é dzɛ̀ddɛ̀ jwere mane englamfoʼ, gɛrɛ fɔɔ ekama asatan gimkpaʼ mane bɔ m̀pɛ̀ʼ mbɔn, me tsɛʼ ala deʼ a ma ngo le angɔn bo. 20Éngɛ mbɔn ke gɛnɛ angɔn kpe ezhwɛɛrɛ bɔɔbɔɔ à zo angɔn bo, bɛʼngɛ mbɔn gɛnɛ angɔn kpe e be ŋwɛʼrɛ akumu ndzɔn efwɔ aŋwɛʼrɛ Ngwe ekere.”

Yeso gɛnɛ amɔ

(Mat 11:25-27; 13:16, 17)

21Egha ŋwaʼ azhwɛɛrɛ pɛ le Yeso shwe ene gɛnɛ kɛ́ è ga kpe, “Mmɛ è bɛ̀rɛ awɛ baba, Masakɛ ekere mane a chwâ, mbɔʼnga ngwo shi nɛŋɛ ela bɔnɔ ebe bɔ azɔm mane abɔ byɛ e me nɛɛ ebwa ngɛ, gɛ̀rɛ̀ tòʼrò abwa ebe bwɔ adɔ̀, ɔ̧̀ɔɔ, Àtɛ, ebwa wunɔ ne engɔ wɛ a me nara awɛ é le ngɛ. 22Àtɛ ngu shi ndɛʼɛ ela gimkpaʼ abwo ndza, gho deʼ ke nɛɛ angu anchwɔnchwɔ bo a tye ma àtɛ ngu. Gho deʼ gɛrɛ ke nɛɛ gho wɛ àtɛ mwɔ ngɛ anchwɔnchwɔ bo a tye ma ŋwɔ ngɔ mane angɔ byɛ ŋwɔanɔm ngɔ me pwɔ̀nɔ é tee engɔ ebe angɔ ngɛ.” 23Éngɛ, engɔ ghɛɛbɛ amɔ ga ebe bɔ bɛɛrɛ abwa mɔ achimchim kpe, “M̀bɔ̀nɔ ye endɔn aŋu mbɔn ma zɔ ela byɛ mbɔn ma zɔ ngɛ. 24Mmɛ toʼro endɔn kpe bàmɛnɛkɔn Ngwe akɛkɛ mane m̀fɔ̀rɔ̀ â na ke zɔ ebwa mbɔn ma zɔ nɔ, bɛʼngɛ â mo tsɛ̀ʼ, gɛrɛ ma ke zo ebwa mbɔn ma zo nɔ gɛ̀rɛ̀ mò tsɛ̀ʼ.”

Nklama timi mbɔʼ gho Samariya

25Enjitsɔ, àtee atsɛrɛ deʼ zeʼe é kpèrè Yeso è ga kpe, “Àtee abwa, mmɛ le ene é nde etyê kemyɛ?” 26Yeso gíì ebe engɔ kpe, “Aŋwɛʼrɛ Ngwe ne ga kpe ayɛ? Mbɔn ne zɔʼrɔ efwɔ aŋu kpe ayɛ?” 27Egho wɛ gii kpe, “Doʼo Masakɛ Ngwe njɛ ene etaa mfyɛ gimkpaʼ, nè azhwɛɛrɛ njɛ gimkpaʼ nè ekama njɛ gimkpaʼ, nè ezhuŋu njɛ gimkpaʼ gɛ̀rɛ̀ doʼo ghongwa ngwɛ ne ekwa ngwɛ nɔ.” 28Yeso gíì kpe, “Egiiga njɛ ye koʼo mala ngwo le éngɛ ngwo yà nde etyê kemyɛ.” 29Aŋu àtee atsɛrɛ à ma ke é tee kpe ebwa wɛ mbè ma ga ngɛ we koʼo ngɛ, è biiri ebe Yeso kpe, “Gho ebara mfu na awɛ?” 30Yeso gíì kpe, “Gho deʼ à nyɛrɛ a Jerusalɛm ma kla ngɔɔ a Jeriko, àjii bere engɔ anji chidi ǹdiri engɔ, zhu engɔ, è kɔrɔ ene anduʼ, waʼ engɔ gho zhiʼ a njikɛ̀ è sa ke kuku. 31Àtɛ zhiri deʼ ma kla ene ǹjì yɛ gɛrɛ. Èndzobo chɛ à zɔ gho wɛ ngɛ, è sa pɛpɛ. 32Gho ekla Lɛvi gɛrɛ zeʼe ngɔɔ zɔ egho wɛ, gɛ̀rɛ̀ fɔɔ amɔ ene abɛɛ ǹjì ze. 33Bɛʼngɛ gho Samariya wɛ à ma fɔɔ ene ǹjì yɛ gɛrɛ ngɛ, jɛ ene egho wɛ, èndzobo chɛ engɔ à zɔ engɔ ngɛ etaa ngɔ me shwe ene eklasɔn. 34È ngɔɔ ebara engɔ è tu ngud mane mɔm ene ebyɛ engɔ è kod ene aparandi. Éngɛ engɔ nu gho wɛ gɛ̀rɛ̀ beʼ edɔm akɔb m̀pwɔ̀ bèʼebɔ mɔ nu engɔ nyii efwɔ abɛ è ngɔɔ efwɔ ndɔ ku̧ru sa kamma engɔ. 35Ese à keʼ, e nu ètɔɔshin tan ndɛʼ ebe àkɔʼ ndɔ wɛ. È ga ebe engɔ kpe ‘Enga nu ala zɔnɔ sa kɔʼɔ engɔ anyi, mala e ne me koʼo bo, èndzobo chɛ mmɛ ghɛɛbɛ ngɛ mmɛ wa zhiiri ala yɛ ngwo me tsɔŋɔ ngɛ.’ ” 36Éngɛ Yeso biiri ebe egho wɛ kpe, “Ene ènjɛ̂ zhuŋu, abwaʼ abɔ tɛd bɔnɔ egho wɛ è me tee kpe è na gho bara ebe egho wɛ àjii â nyii ngɛ na awɛ?” 37Àtee atsɛrɛ gii kpe, “Engɔ wɛ â le eklasɔn ekwa engɔ ngɛ.” Yeso ngùdu gii kpe, “Enga ngɔɔ gɛ̀rɛ̀ fwɛʼ nkirinkin.”

Yeso ngɔɔ é gàmma ebe Mata mane Meri

38Aŋu Yeso mane bɔ bɛɛrɛ abwa mɔ â sa zhiri à ngɔɔ ngɛ, â ngɔɔ efwɔ abɛ deʼ wɛ aye deʼ ekumu ngɔ ma Mata ngɛ â chɛdɛ engɔ efwɔ ndɔ amɔ. 39Aye wunɔ a ne le ghongwaaye mɔ wɛ ekumu ngɔ â mwɔ Meri ngɛ. Meri â tsɔmɔ ebara Yeso gɛ̀rɛ̀ ma zhuru ega wɛ Yeso à ma tee ngɛ. 40Bɛʼngɛ ato Mata â ne buguru ene afwɛʼ yɛ à me le é fwɛʼ ngɛ, éngɛ è zeʼe è ga ebe Yeso kpe, “Masakɛ, ngwo ke ma zɔ kpe ghongwaaye ngu shi saara angu kpe mmɛ sa fwɛʼ afwɛʼ zɔnɔ gho zhiʼ bo? Ga ebe engɔ shi è zeʼe kpèdè angu!” 41Bɛʼngɛ Yeso gíì ebe engɔ kpe, “Mata, ngwo wa fe ekwa ma nyii awɛ ene abwa akɛkɛ. 42Bɛʼngɛ ebwa ŋwaʼ wa aŋu wɛ e me ǹchwɔ̀ ngɛ. Meri shi chi ebwa nchwɔnchwɔ wɛ e me nara ngɛ. Mmɛ ke né le kpe e nu ebwa ǹchwɔ̀ wunɔ ebe engɔ bo.”

Currently Selected:

Luk 10: nbt

Highlight

Copy