Luk 11

Yeso tee mbɔʼ atsaʼra Ngwe

(Mat 6:9-13; 7:7-11)

1Anji deʼ Yeso à na tsàʼrà Ngwe afwɔ deʼ. Èndzobo chɛ engɔ à shi mɛ̀ɛrɛ ngɛ, gho bɛ̀ɛrɛ abwa ngɔ ebi ga ebe engɔ kpe “Masakɛ tee endyɛɛ aŋu e ma tsàʼrà Ngwe ngɛ na aŋu Eyɔɔ à gɛrɛ tee bɔ bɛɛrɛ abwa mɔ ngɛ.” 2Yeso gâ ebe angɔ kpe “Èndzobo chɛ mbɔn ma tsàʼrà Ngwe ngɛ mbɔn ga kpe ‘Àtɛ, eghɔ mwɔ ene ekumu ngwɛ, ebwa m̀fɔ̀ ngwɛ zeʼe. 3Ndɛʼɛ ende wɛ e me koʼro endyɛɛ ànchwɔ̀ ngɛ. 4Dzɛrɛ abwa bɔɔbɔɔ njɛɛ na aŋu mbyɛɛ ma dzɛrɛ abwa bɔɔbɔɔ yɛ abɔ tsɛrɛ ma le akwa njɛɛ ngɛ, ke gbee angbɛɛ sàa efwɔ akwa̧ʼra bo.’ ” 5Éngɛ Yeso ga kpe ebe angɔ “Ma ngwo me le esɔrɔ ngwɛ, è ngɔɔ ebe engɔ aghɛɛghɛɛ ǹklì ga ebe engɔ kpe ‘Aghoo, fla ebɔʼ ǹgoŋ tɛd ndɛ̀ʼ ena, 6esɔrɔ deʼ ngu we zeʼe ezhin dɔɔdɔɔ mmɛ ke le ala nde deʼ é ndɛ̀ʼ ebe engɔ bo.’ 7Mala esɔrɔ ngwɛ gii efwɔ ndɔ kpe ‘Ka angu nyii mbyɛɛ shi gwɔbɔ enduʼndɔ bwɛnɛ ne bwɔ mbu, mmɛ ke né tam é ndɛ̀ʼ ala deʼ engɛ̂ bo.’ 8Shi mmɛ toʼro endɔn, mala engɔ ne ma tama é ndɛʼ ǹgoŋ engɛ̂ ne esɔrɔ nɔ bo, è wa ngo tam è ndɛʼ enga ngwo ma gbɛɛrɛ engɔ. 9Éngɛ mmɛ na ga endɔn kpe biiri Ngwe ya ndɛʼ engɛ̂, zɛʼɛ Ngwe ya le ngwo zɔ, gbeʼre Ngwe ya fuʼu atɛʼrɛ ndɔ engɛ̂. 10Egho wɛ è biiri ngɛ è wa le, egho wɛ è gɛrɛ zɛʼɛ ngɛ è wa zɔ, engɔ wɛ è gbeʼre ngɛ e ba fuʼu enduʼndɔ ebe engɔ. 11Awɛ abwaʼ ndzɔn na àtɛ nɔ me né ndɛʼ jwe ebe ŋwɔ mɔ wɛ è ma biiri ma shuu ngɛ. 12Ka è biiri akɔrɔkwaʼ ngwo ndɛʼ ebe engɔ ma anglamfoʼ? 13Aŋu mbɔn me bɔɔ ngɛ, mbɔn me né ndɛʼ ela ǹchwɔ̀ ebe bwɔ mbɔn, Àtɛ ngɔn ekere shi ndɛʼɛ Azhwɛɛrɛ pɛ ebe abɔ byɛ e ma biiri ebe engɔ ngɛ ngɔɔ bwɛrɛ awe?”

Yeso mane Bɛlzɛbul

(Mat 12:22-30; Mak 3:20-27)

14Anji deʼ, Yeso à na fli azhwɛɛrɛ bɔɔbɔɔ efwɔ ekwa gho deʼ wɛ azhwɛɛrɛ mɔmbwo a me le è ne ma ga bo ngɛ. Èndzobo chɛ Azhwɛɛrɛ bɔɔbɔɔ zɔnɔ à gli ngɛ, egho wɛ klada sa gà, ebaŋabɔ wɛ â mwɔ aŋu ngɛ â kɔn. 15Bɛʼngɛ bɔ deʼ kpe na Bɛlzɛbul, m̀fɔ̀ ezhwɛɛrɛ bɔɔbɔɔ è me ndɛʼɛ ekama ebe engɔ é fli ezhwɛɛrɛ bɔɔbɔɔ. 16Abɔ deʼ â na ke kpère Yeso, è gà ebe Yeso kpe, “Le anɛ̂ ebwa deʼ yɛ a me nyɛrɛ zeʼ ekere ngɛ é tee kpe Ngwe ye bɛrɛ abwa yɛ ngwo ma le ngɛ?” 17Yeso à ne nɛɛ ebwa wɛ angɔ à ma zhuŋu ngɛ, è ga ebe angɔ kpe “Abɛ yɛ a me gɛ̀bbɛ amɔ ene ǹtìmìri ma ngwe àmɔ̀ àmɔ̀ ngɛ ya ka tam. Ekla me gɛ̀bbɛ amɔ, ekla bɔɔ. 18Éngɛ mala ebwa m̀fɔ̀ asatan me le ǹtìmìri ma ngwe àmɔ̀ àmɔ̀, e ba ngo tam ene? Mbɔn ga kpe mmɛ na fli ezhwɛɛrɛ bɔɔbɔɔ mbɔʼnga bɛlzɛbul ma ndɛʼɛ ekama ena é le engɛ̂. 19Mala mmɛ ma fli ezhwɛɛrɛ bɔɔbɔɔ bɔnɔ engɛ̂, abɔ byɛ e ma kìrì angɔn ngɛ na fli ene? Abɔ byɛ e ma kìrì angɔn ngɛ be tee kpe mbɔn be go esɛʼ. 20Keʼ aŋu mmɛ ma fli ezhwɛɛrɛ bɔɔbɔɔ bɔnɔ ene ekama Ngwe ngɛ, e we tee kpe ebwa m̀fɔ̀ Ngwe shi zeʼe abwaʼ ndzɔn. 21Èndzobo chɛ gho kamakam me le ela ebiri mɔ ma kɔ̀ʼ abɛ mɔ ngɛ, ndɔ ngɔ mane ela ngɔ gimkpaʼ ba ngo mwɔ ene ǹchwɔ̀. 22Bɛʼngɛ èndzobo chɛ gho kamakam tsɛrɛ ti ebiri nè engɔ gɛrɛ fɔɔ engɔ ngɛ, è wa ngo beʼ ela ebiri byɛ engɔ à me shi etaa mɔ anyi ngɛ gimkpaʼ è ngɔɔ gɛ̀bbɛ̀ ela byɛ è me fee ngɛ. 23Éngɛ egho wɛ è ne mwɔ nè mmɛ bo ngɛ na gho m̀pɛ̀ʼ ngu. Engɔ wɛ è ne ma shùnu nè mmɛ bo ngɛ, è na sɛ̀ʼ sɛʼɛ.”

Èndzobo chɛ azhwɛɛrɛ bɔɔbɔɔ ma we ghɛɛbɛ ngɛ

(Mat 12:43-45)

24Mala azhwɛɛrɛ bɔɔbɔɔ gli ekwa gho deʼ è ngɔɔ zhiri à kɛrɛ zɛʼɛ afwɔ zɔmɔ é kuru. Mala a ne zɔ bo, a ga efwɔ ebûm mɔ kpe, “Mmɛ wa ghɛ̀ɛbɛ é ngɔ̀ɔ efwɔ ndɔ ndza ngɛ.” 25Èndzobo chɛ a ghɛɛbɛ è zɔ kpe â shi zɔɔ ndɔ è ndèerè ela efwɔ ngɛ, 26a ya ngo zɔʼ ezhwɛɛrɛ bɔɔbɔɔ tsɛrɛ sàambyɛ byɛ e me kama fɔɔ engɔ ngɛ è nyii efwɔ sa tsɔmɔ aŋu. Éngɛ egho wɛ shi mɛ̀ɛ bɔɔ fɔɔ aŋu à dye mwɔ ngɛ. 27Èndzobo chɛ Yeso â ma ga abwa zɔnɔ ngɛ, aye deʼ efwɔ ebaŋagho wɛ â mwɔ nè Yeso ngɛ flaba kpe, “M̀bwarambwad ebe aye wɛ à be gɛ̀rɛ̀ kpee awɛ ngɛ.” 28Yeso gɛrɛ gii kpe, “M̀bwarambwad ba mwɔ ebe egho wɛ è ma zo ega Ngwe ma le ngɛ.”

Anɛ̂ ebwa Yɔɔna

(Mat 12:38-42)

29Aŋu bɔ â shunu ebara Yeso ngɛ, Yeso fɔɔ embè gɛ̀rɛ̀ ga kpe, “Ekyɛ zɔnɔ ne ekyɛ bɔɔbɔɔ, e na biiri enɛ̂ abwa, shi me tsɛʼ adeʼ e ma ngo ndɛʼ ebe angɔ bo a tye anɛ̂ ebwa Yɔɔna. 30Aŋu Yɔɔna, àmɛnɛkɔn Ngwe à mwɔ anɛ̂ ebwa ebe bɔ Ninivɛh ngɛ, nkirinkin Ŋwɔ Gho wa ngo mwɔ anɛ̂ ebwa ebe ekyɛ zɔnɔ. 31Eye m̀fɔ̀ abɛ Sheba wa ngo zhwɛm anji tsɛrɛ esɛʼ Ngwe nè ekyɛ zɔnɔ. Engɔ wa ngo mwɔ antsɛ ato angɔ é le angɔ go esɛʼ mbɔʼnga engɔ à nyɛn zeʼe ene ezhin dɔɔdɔɔ abɛɛ ese tsɛrɛ é zeʼe é zhuru azɔm ebe m̀fɔ̀ Saramu, mmɛ shi ga endɔn kpe gho deʼ wa anɔ me fɔɔ m̀fɔ̀ Saramu. 32E yà shi anji tsɛrɛ esɛʼ Ngwe, bɔ Ninivɛh ba ngo zhwɛm ene ewu afwɔbi nè ekyɛ zɔnɔ mbɔʼnga angɔ à waʼ abwa bɔɔbɔɔ amɔ èndzobo chɛ Yɔɔna à sɛɛrɛ ega Ngwe ngɛ. Mmɛ ga endɔn, gho deʼ wa anɔ me fɔɔ Yɔɔna.”

Ekwa ngwɛ ne ekɛʼ

(Mat 5:15; 6:22, 23)

33Tsɛ̀ʼ gho deʼ ma chɛ anâm è ge afwɔ yɛ a me namma ngɛ bo, kà e koo enji ekuʼ bo. Ankɔmɔ éngɛ è wa tɛ̀ʼɛ edɔm echud tɛʼ anâm mbɔʼtye bɔ nyii efwɔ ndɔ e ma zɔ anâm. 34Aghɔɔ njɛ ne mwɔ na anâm ekwa ngwɛ nɔ, èndzobo chɛ aghɔɔ njɛ à mwɔ ànchwɔ̀ ngɛ, ekwa ngwɛ gimkpaʼ mwɔ ǹchwɔ̀. Bɛʼngɛ èndzobo chɛ aghɔɔ njɛ ne mwɔ ànchwɔ̀ bo ngɛ, ekwa ngwɛ me shwe ene adi̧iri. 35Éngɛ, enga le kpe ala yɛ a ma le ekɛʼ ma pɛ efwɔ ekwa ngwɛ ngɛ a ke wu firi shi adi̧iri bo. 36Mmɛ ngùdu ga kpe mala ekwa ngwɛ gimkpaʼ mwɔ na anâm nɔ, eklo deʼ ne ma tsɔmɔ efwɔ adi̧iri bo, e wa ngo me shwe ene ekɛʼ nkirinkin na aŋu ekɛʼ ma pɛ ekwa ngwɛ ngɛ.

Yeso gà mbɔʼ bɔ Farisii mane bàtee atsɛrɛ

(Mat 23:1-36; Mak 12:38-40)

37Èndzobo chɛ Yeso à shi mɛ̀ɛrɛ gà ngɛ, gho Farisii deʼ zɔʼ engɔ é nde nè engɔ efwɔ ndɔ mɔ. Éngɛ engɔ à ngɔɔ nyii è tsɔmɔ edɔm echud. 38Bɛʼngɛ, gho Farisii à kɔn èndzobo chɛ à zɔ kpe Yeso a ke so ebwo mɔ ene aghɛʼ yɛ angɔ à ma sò ngɛ bo. 39Éngɛ Masakɛ ga ebe engɔ kpe, “Enjitsɔ, mbɔn bɔ Farisii mbɔn ba sò achim ǹtoʼro mane eka mbɔn, bɛʼngɛ abwa bɔɔbɔɔ mane é tsamma ela me shwe efwɔ ńtara ntsɔn. 40Mbɔn bɔ atii, mbɔn ke nɛɛ kpe egho wɛ me ndeere efwɔ ngɛ ne engɔ a gɛrɛ me ndeere achim bo? 41Éngɛ enjitsɔ ebwa wɛ ngwo me nɛɛ ngɛ, enga fuʼu abwo ebe bɔ ndzaŋa shi abwa gimkpaʼ ya ngo me pɛ engɛ̂. 42Ànkwɔ̀nɔ̀ endɔn bɔ Farisii, mbɔn na dzà ela ne enklila, ela kɛɛ mane enam ngɔn ekwâ, è gɛ̀bbɛ̀ akyɛ wum, è ndɛʼ eklo ŋwaʼ ebe Ngwe à dama sèrè éŋwaʼa mane edoʼ Ngwe. Mbɔn be koʼro ma ndɛ̀ʼ ela ebe Ngwe gɛ̀rɛ̀ ma shi éŋwaʼa mane edoʼ ngɔ. 43Ànkwɔ̀nɔ̀ endɔn bɔ Farisii, mbɔn be doʼo afwɔ bɔ kɛ́ efwɔ ndɔ tsàʼrà Ngwe bɔ Juu, ma ke kpe e ma gamma endɔn nè eghɔ ati ewu̧. 44Ànkwɔ̀nɔ̀ endɔn mbɔn ne mwɔ ne etoshe byɛ â shi nɔɔrɔ, bɔ sa da dzɛ̀ddɛ̀ ne ma nɛɛ bo ngɛ.” 45Àtee atsɛrɛ bi gii kpe ebe engɔ “Àtee abwa, ngwo na ndwàʼ angbɛɛ gɛrɛ ene abwa yɛ ngwo ma ga ngɛ.” 46Yeso gɛrɛ ga ebe engɔ kpe “Éngɛ, ngwo gho wɛ me nɛɛ atsɛrɛ anchwɔnchwɔ ngɛ. Ànkwɔ̀nɔ̀ endɔn mbɔʼnga mbɔn ma ndɛ̀ʼ eku ebe bɔ byɛ e me diri fɔɔ angɔ ngɛ. Ngwo gɛrɛ ke saa abwo njɛ kpe ngwo kpede angɔ anyi bo. 47Ànkwɔ̀nɔ̀ endɔn mbɔʼnga mbɔn ma tɔ ashe bàmɛnɛkɔn Ngwe, angɔ byɛ ètɛ sam mbɔn à zhudu ngɛ. 48Éngɛ mbɔn bɛrɛ entsɛ ene abwa yɛ ètɛ sam mbɔn à fwɛʼ ngɛ, â zhudu bàmɛnɛkɔn Ngwe, mbɔn byɛ ashe angɔ. 49Enyɛrɛ zeʼe éngɛ Ngwe, ena azɔm mɔ ga kpe, ‘Mmɛ wa ngo saa bàmɛnɛkɔn Ngwe mane bèmpwɔnɔntɔm, e ba ngɔɔ zhudu adeʼ gɛ̀rɛ̀ nyii abê.’ 50É ngùdù, ekyɛ zɔnɔ ya ngɔɔ ndɛ̀ʼ egiiga ene anɔm bàmɛnɛkɔn Ngwe byɛ â shi kudu nyɛ̀rɛ̀ zèʼe endzobo chɛ ese â klada ngɛ. 51Enyɛrɛ zeʼe ene anɔm Abɛl ngɔɔ bwɛn ene anɔm Zakariya wɛ â zhudu angɔ aghɛɛghɛɛ echud ga ega Ngwe nè afwɔ pɛ ghɔ Ngwe ngɛ. Ɔ̧̀ɔɔ, ekyɛ zɔnɔ ya ngo gii ega ene angɔ bɔ gimkpaʼ. 52Ànkwɔ̀nɔ̀ endɔn, bàtee atsɛrɛ, mbɔn be shi atuuru ene ndɔ azɔm, mbɔn ke nyii efwɔ bo, mbɔn gɛrɛ kɔn abɔ byɛ e ma ke nyii é ngɔ̀ɔ efwɔ ngɛ.” 53Èndzobo chɛ Yeso à nyɛrɛ sa ke ngɔɔ ngɛ, bɔ Farisii mane bàtee atsɛrɛ klada sa ga mbɔʼ engɔ sa biiri abwa akɛkɛ ebe engɔ. Angɔ à na le engɛ̂ 54é ge etɛʼrɛ ma ke é kpèrè engɔ ke è wa ga ebwa deʼ wɛ e ne koʼo bo ngɛ.

Currently Selected:

Luk 11: nbt

Highlight

Copy