Luk 12

E gbeʼre eto bɔ mbɔʼ endooro aghɔɔ

(Mat 10:26, 27)

1Aŋu ebaŋabɔ à sa shùnu amɔ afwɔbi ene ezɔɔrɔ yɛ abɔ deʼ â sa dzɛ̀ddɛ̀ adeʼ ngɛ, Yeso gâ ebe bɔ bɛɛrɛ abwa mɔ kpe, “Mbɔn nu azɔm ene andooro aghɔɔ bɔ Farisii mbɔʼnga angɔ ne mwɔ na àfòo nɔ. 2Tsɛ̀ʼ ala deʼ yɛ e ma kooro yɛ e ne ma wu fuʼ ngɛ bo, abwa nɛŋɛ ya ngɔɔ gli apɛpɛ. 3Éngɛ, ka me ebwa wɛ ngwo ma ga adi̧iri, e yà zo nchinchwe, éngɛ ebwa wɛ ngwo ga akwâ di ngɛ, e yà zo akwâ pɛpɛ. Ǹtsèbè efwɔ atwɔndɔ, e ba ngo tam edɔm ndɔ e ga.”

Egho wɛ è me koʼro é bumu engɔ ngɛ

(Mat 10:28-31)

4Asɔrɔ ndza, mmɛ ga endɔn kpe mbɔn ke sa bumu abɔ byɛ e ma zhudu akwa bɛʼngɛ shi ne me né le ebwa tsɛrɛ bo ngɛ. 5Mmɛ wa tòʼrò egho wɛ mbɔn me né bumu ngɛ endɔn. Bumu Ngwe yɛ ma dè zhudu è me le ekama é ndwa efwɔ edzɔwu asatan ngɛ. Mbɔn bɛrɛ abwa yɛ mmɛ ma ga ngɛ, à tye engɔ mbɔn me né sa bumu. 6E ke ma fɛ̀n ènɔ̀n tan ene èkapɛ fyee bo? Éngɛ Ngwe ke me dzɛrɛ enɔ̀rɔ deʼ èŋwaʼ bo. 7Ngwe gɛrɛ ye nɛɛ nuru nyɔrɔ ato njɛɛ gimkpaʼ. Éngɛ ke sa bumu bo mbɔʼnga ngwo we fɔɔ enɔrɔ ènɔ̀n akɛkɛ.

Aŋu abɔ deʼ ma bɛ̀rɛ Kristo, adeʼ gɛrɛ ma tɔrɔ engɔ ngɛ

(Mat 10:32, 33; 12:32; 10:19, 20)

8Mmɛ ga éŋwaʼa endɔn kpe, abɔ byɛ e ma ga apɛpɛ kpe mbɔɔ be mwɔ nè mmɛ ngɛ, Ŋwɔ Gho wa ngo bɛrɛ angɔ nkirinkin efàarà engere Ngwe. 9Bɛʼngɛ abɔ byɛ e ma bɛ̀ʼrɛ̀ angu apɛpɛ ngɛ, Ŋwɔ Gho gɛrɛ wa ngo bɛ̀ʼrɛ̀ angɔ efàarà engere Ngwe. 10Egho wɛ ma ga abwa bɔɔbɔɔ mbɔʼ Ŋwɔ Gho ngɛ e be né dzɛ̀d abwa bɔɔbɔɔ engɔ, bɛʼngɛ egho shi ma ga abwa bɔɔbɔɔ mbɔʼ azhwɛɛrɛ pɛ ngɛ, e ke né dzɛ̀d abwa bɔɔbɔɔ ngɔ bo. 11Èndzobo chɛ e nu awɛ zeʼe é sɛʼ efwɔ ndɔ tsàʼrà Ngwe, efàarà bɔ kɛ́ mane eto ngɛ, ke sa fe ekwa ene ebwa ngwo ma ngo ga ngɛ bo. 12Azhwɛɛrɛ pɛ ya ngɔɔ tee ebwa ngwo ma ga èndzobo chɛ ngɛ.

Nklama timi mbɔʼ gho àfɔ̀n atii

13Gho bi abwaʼ ebaŋabɔ wɛ gà ebe Yeso kpe, “Àtee abwa, ga ebe ghongwaanɔm ngu kpe engɔ gɛbbɛ etiʼi wɛ àtɛ ngbɛɛ à me shi endyɛɛ ngɛ.” 14Yeso gíì ebe engɔ kpe, “Esɔrɔ ngu, awɛ me ndɛʼ afwɔ ena é sɛʼ angɔn kà é gɛ̀bbɛ̀ etiʼi ngɔn?” 15Engɔ ngɔɔ embè gà ebe angɔ bɔ gimkpaʼ kpe, “Mbɔn nu azɔm gɛ̀rɛ̀ sa kɔʼ akwa ndzɔn ene m̀pèrè bɔ andɔŋɔ gimkpaʼ, mbɔʼnga e ke ma nɛɛ gho wɛ è ma ga éŋwaʼa ngɛ ene eleabwa engɔ bo, ke è me fɔ̧rɔ ngɔɔ bwɛrɛ awe.” 16Éngɛ Yeso sɛɛrɛ nklama timi fɔnɔ ebe angɔ kpe, “Gho àfɔ̀n deʼ à na aŋu wɛ à me le chwâ yɛ à ma nara ende anchwɔnchwɔ ngɛ. 17Engɔ klada sa zhuŋu mɔmbwo kpe ‘Mmɛ ke le afwɔ tsɛrɛ é shi ande ndza gimkpaʼ aŋu bo. Mmɛ wa le ene ngà?’ 18Engɔ zhuŋu mɔmbwo kpe ‘Mmɛ wa ngo le énde, mmɛ wa ngo sɛʼ etɛ mbu gimkpaʼ gɛ̀rɛ̀ byɛ etɛ tsɛrɛ akɛkɛ, aŋu mmɛ ma ngo shi àfɔ̀n mane ande ndza gimkpaʼ efwɔ ngɛ. 19Éngɛ mmɛ shi ga efwɔ etaa mfu kpe ànɔ̀m ato! Ngwo shi le ela nchwɔnchwɔ gimkpaʼ byɛ ngwo ma ke efwɔ enɔ̂m akɛkɛ ngɛ. Enjitsɔ, ku̧uru awɛ, nde, ŋwɔ gɛ̀rɛ̀ sa bɛŋɛrɛ awɛ!’ 20Bɛʼngɛ, Ngwe ga ebe engɔ kpe ‘Ngwo gho atii! Ǹklì ànchwɔ̀ nɔ, mmɛ wa ngo nu azhwɛɛrɛ njɛ ngɛ. Awɛ ma ngo nu ela bɔnɔ byɛ ngwo me shi egha njɛ ngɛ?’ ” 21Éngɛ Yeso ngùdu gii kpe, “Ne énde e mwɔ ebe abɔ byɛ e ma shùnu àfɔ̀n ebe ekwa amɔ shi ne ma fɔ̧rɔ efàarà Ngwe bo ngɛ.”

Le ebɛrɛ ene Ngwe

(Mat 6:25-34)

22Éngɛ Yeso gâ ebe bɔ bɛɛrɛ abwa mɔ kpe, “Mmɛ ga endɔn kpe mbɔn ke sa nyii akwa ndzɔn ene ende wɛ mbɔn ma ke nde é tsɔmɔ àkɔʼɔ ngɛ bo, kà ene ǹdiri chɛ mbɔn ma ke é gè akwa ndzɔn ngɛ bo. 23É tsɔmɔ ekɔʼɔ we nara fɔɔ ende, ekwa gɛrɛ me fɔɔ ǹdiri. 24Mbɔn kede edwaʼa, angɔ ke kɔrɔ elankɔn kà ma dzà eku bo, angɔ ke le etɛ ma shi ande bo, Ngwe à dama ndee angɔ! Mbɔn ke nɛɛ kpe mbɔn be fɔɔ ènɔ̀n gimkpaʼ bo? 25Awɛ abwaʼ ndzɔn wɛ è ma nyii ekwa mɔ ngɛ me né zhiiri antiri endzobo ene etsɔmɔ mɔ? 26Mala ngwo ne me né klini abwa kparakpara bo, ngwo sa nyii awɛ ene abwa ze ngɛ ene? 27Kede aŋu sɔʼrɔ egɛ ma tɛ̀bɛ efwɔ ǹgɛ̀, angɔ ke ma fwɛʼ afwɛʼ kamakam deʼ kà ma ndèerè ǹdiri egha amɔ bo. Mmɛ ga endɔn kpe, ka de ma m̀fɔ̀ Saramu mane àfɔ̀n mɔ, à ke ge ǹdiri chɛ â me nara na sɔʼrɔ gɛ tsɔnɔ ngɛ bo. 28Mala Ngwe ma ge ǹdiri ekwa egɛ, egɛ byɛ e mwɔ anɔ ànchwɔ̀ gɛ̀rɛ̀ ma fɔɔ enchwe, e sɔ̂ʼ angɔ edzɔwu ngɛ. Engɔ ke ma ngo fwɛʼ endɔn fɔɔ éngɛ bo? Ayɛ me le ebɛrɛtaa ndzɔn me kpɛɛ? 29Éngɛ mbɔn ke sa shi ńtara ntsɔn sa zɔŋɔrɔ, sa zhuŋu mbɔʼ ela byɛ mbɔn ma ngo nde kà ŋwɔ ngɛ bo. 30Mbɔʼnga ebɛbɔ efwɔ ese ne shi ńtara amɔ tye ene ela bɔnɔ. Àtɛ mɔmbwo we nɛɛ kpe mbɔn ba ke ela bɔnɔ gimkpaʼ. 31Enyɛrɛ éngɛ, mbɔn shi ńtara ntsɔn tye ene ebwa m̀fɔ̀ ngɔ, è wa ngo ndɛ̀ʼ ela bɔnɔ gimkpaʼ endɔn.”

Shi àfɔ̀n ngwɛ ezob

(Mat 6:19-21)

32Mbɔn ke sa bumu bo, mbɔn adɔ̀kpara, mbɔʼnga Àtɛ ngɔn è wa gɛnɛ amɔ é ndɛ̀ʼ ekama mane ebwa m̀fɔ̀ endɔn. 33Mbɔn fɛnnɛ eku mbɔn gimkpaʼ gɛ̀rɛ̀ ndɛ̀ʼ ekɛb wɛ ebe bɔ ndzaŋa. Mbɔn le echwɔ̀ ekɛb byɛ e ne ma nùrù bo ngɛ. Mbɔn sa shi àfɔ̀n ngɔn ekere afwɔ yɛ ebwa deʼ ne me né le bo ngɛ, mbɔʼnga ejii deʼ ke né nyii ji bo kà esɔʼ ke né tsɔŋɔ bo. 34Mbɔn be nɛɛ kpe etaa mfyɛ na mwɔ afwɔ yɛ àfɔ̀n ngwɛ mwɔ ngɛ.

Gho afwɛʼ ǹchwɔ̀

35Mbɔn ndeere akwa ndzɔn ene abwa yɛ a ma zeʼe ngɛ, mbɔn ge ǹdiri gɛ̀rɛ̀ chɛ enâm mbɔn. 36Mbɔn ndeere angɔn na bɔ afwɛʼ byɛ e ma kɔ̀ʼ gho kɛ̀ amɔ wɛ è ma ghɛ̀ɛbɛ zeʼe achim ene antara nu-aye nɔ. Mbɔʼtye engɔ zeʼ gbeʼre enduʼndɔ, e ngɔɔ fuʼ ndɔ ebe engɔ egha ŋwaʼ. 37Egɛnɛ ya ngɔɔ mwɔ ebe abɔ afwɛʼ byɛ gho kɛ̀ ma kla angɔ e me tsɔmɔ ekere gɛ̀rɛ̀ me ndeere amɔ èndzobo chɛ engɔ zeʼe achim ngɛ! Mmɛ ga éŋwaʼa endɔn, engɔ wa ngo chidi ǹdiri mɔ è ga ebe angɔ è tsɔmɔ a chwâ gɛ̀rɛ̀ sa kɔʼ angɔ. 38Egɛnɛ ya ngɔɔ mwɔ mala engɔ zeʼe kla angɔ me ndeere amɔ sa kɔʼ engɔ ka de ma aghɛɛghɛɛ ǹklì ka angoʼse. 39Éŋwaʼaŋwâʼ, mala anɔm ndɔ me nɛɛ èndzobo chɛ ejii ma ngo zeʼe ngɛ, engɔ wa ngo tsɔmɔ ekere, è ke ma ngo sàarà ejii kpe è sanna ndɔ ngɔ bo. 40Mbɔn gɛrɛ ndèerè angɔn mbɔʼnga Ŋwɔ Gho wa ngo zeʼ èndzobo chɛ mbɔn ne ma zhuŋu bo ngɛ.

Gho afwɛʼ éŋwaʼa mane gho afwɛʼ andɔɔ

(Mat 24:45-51)

41Petoro biiri kpe, “Masakɛ, nklama timi fɔnɔ ngwo ne ga endyɛɛ ka ebe bɔ gimkpaʼ?” 42Masakɛ gii kpe, “Éngɛ gho afwɛʼ wɛ è ma ga éŋwaʼa gɛ̀rɛ̀ me le azɔm ngɛ na awɛ? Ne engɔ wɛ Masa ma shi na gho kɛ̀ nɔ, me klini abwa gimkpaʼ efwɔ ndɔ gɛ̀rɛ̀ ma ndɛʼ ekɛb nde ebe abɔ afwɛʼ abê ene èndzobo chɛ e me koʼo ngɛ. 43Egho afwɛʼ wunɔ wa ngo ma gɛnɛ amɔ èndzobo chɛ Masa ma ghɛ̀ɛbɛ gɛ̀rɛ̀ kla engɔ ma fwɛʼ ngɛ. 44Éŋwaʼa mmɛ ga endɔn kpe è wa ngo shi gho afwɛʼ wunɔ ene ato ene eku mɔ gimkpaʼ. 45Bɛʼngɛ mala gho afwɛʼ wunɔ ga egha mɔ kpe ‘Masa ngu wa ngo tsɔmɔ ese endzobo dɔɔdɔɔ’ è klada sa sɔmɔ abɔ afwɛʼ abê, anɔm mane aye, sa nde gɛ̀rɛ̀ sa ŋwɔ mɔm à ku. 46Éngɛ Masa wa ngo ghɛ̀ɛbɛ zeʼe achim anji deʼ èndzobo chɛ egho afwɛʼ wunɔ è ne ma ngo nɛɛ bo ngɛ. Masa wa ngo gbɛdɛ engɔ ene entirintiri gɛ̀rɛ̀ le kpe engɔ zɔ ǹgoʼ ene kè lè ebɛrɛ nkirinkin na abɔ abê nɔ. 47Egho afwɛʼ wɛ è me nɛɛ ebwa wɛ Masa mɔ ma ke kpe engɔ fwɛʼ, engɔ gɛrɛ shi ne me ndeere amɔ é fwɛʼ bo ngɛ, e ba ngo timi endu akɛkɛ ene engɔ. 48Bɛʼngɛ, egho afwɛʼ wɛ è ne me nɛɛ ebwa bo gɛ̀rɛ̀ ma fwɛʼ me nɛɛ kpe enyii ya ngo mwɔ ekwa ngbe ngɛ è ba ngo ndɛʼ endu ebe engɔ amiimii, éngɛ egho wɛ è ma biiri abwa akɛkɛ ngɛ e ba biiri ebe engɔ akɛkɛ.”

Yeso à zeʼ é gɛ̀bbɛ̀ bɔ

(Mat 10:34-36)

49Mmɛ à zeʼe é ge éwu edɔm chwâ. À mwɔ ezhuŋu ndza, shi éwu wɛ a shi fe mɛ̀ɛrɛ̀. 50Bɛʼngɛ mmɛ wa ngo nu ndim myɛ è ma ngo me diri ena karadidi bwɛn èndzobo chɛ e ma ngo fɔɔ ngɛ. 51Mbɔn ne zhuŋu kpe mmɛ à zeʼe é ndɛʼ m̀bwarambwad edɔm ese? Keʼ, ke me m̀bwarambwad bo, tye me egɛbɛ mmɛ me nu zeʼe. 52Enyɛrɛ enjitsɔ sa ngɔɔ embè, e ndɔ yɛ me le bɔ tan ngɛ ya gɛ̀bbɛ̀ agha fyee, bɔ tɛd sa ga mbɔʼ bɔ fyee, bɔ fyee sa ga mbɔʼ bɔ tɛd. 53Ndɔrɔ tsa ngo gɛ̀bbɛ̀ agha fyee ètɛ ba ngo sa ga mbɔʼ bwɔanɔm amɔ, bwɔanɔm gɛrɛ sa ga mbɔʼ ètɛ amɔ. Áʼɔ̧̀ ba ngo sa ga mbɔʼ bwɔaye amɔ, bwɔaye gɛrɛ sa ga mbɔʼ áʼɔ̧̀ amɔ, èngwandu e ba sa ga mbɔʼ aye bwɔ amɔ, bwɔaye sa ga mbɔʼ èngwandu amɔ.

É nɛɛ endzobo

(Mat 16:2, 3)

54Yeso gɛrɛ wu ga ebe abɔ byɛ kpe, “Èndzobo chɛ mbɔn zɔ m̀bɛ̀ʼ ma zeʼe abɛɛ turu etaranchwe ngɛ, mbɔn nɛɛ kpe m̀bò ya ngo ngwe éngɛ è ngwe. 55Éngɛ èndzobo chɛ efùu zeʼe sa fùdù ngɛ mbɔn ga kpe akwâ ya ngo twɔrɔ, e gli engɛ̂. 56Mbɔn bɔ ndooro aghɔɔ, aŋu mbɔn me né kede ezob mane chwâ nɛɛ ngɛ, ayɛ le mbɔn me nɛɛ ǹji ene abwa yɛ à ma gli enjitsɔ ngɛ tsɛ̀ʼ?”

Ntsɔ ke sa bwɛ abɔ ngɔɔ a ndɔ m̀pàrà bo

(Mat 5:25, 26)

57Ayɛ me le mbɔn mo sɛʼ akwa ndzɔn mbɔrɔmbɔn nɛɛ abwa yɛ à me koʼro ngɛ tsɛ̀ʼ 58Mala gho deʼ fɛrɛ awɛ a ndɔ m̀pàrà, le kpe mbɔn mɛɛrɛ ebwa mɔmbwo achim dye sa ngo nyii a ndɔ m̀pàrà. Mala ngwo ne mɛɛrɛ bo, angɔ ba ngo gòo awɛ nu ngɔɔ efàarà àsɛʼasɛʼɛ wɛ è ma ngo nu awɛ é ndɛʼ ebe purushi, purushi gɛrɛ ge awɛ a ndɔdzɔm. 59Mmɛ ga éŋwaʼa engɛ̂ kpe, ngwo wa ka gli, ngwo wa ngo tsɔmɔ aŋu bwɛrɛ anji yɛ ngwo ma gwɔm ala yɛ â me tsɛrɛ engɛ̂ ngɛ ka mwɔ anini.

Currently Selected:

Luk 12: nbt

Highlight

Copy