Luk 13

Mbɔn waʼ abwa bɔɔbɔɔ ndzɔn kà mbɔn kudu

1Èndzobo chɛ bɔ deʼ â ma aŋu ma tòʼrò ebe Yeso mbɔʼ abɔ Galilii deʼ byɛ Paylet à zhudu èndzobo chɛ angɔ a ma ndɛ̀ʼ etɔ̧ɔrɔ ebe Ngwe ngɛ. 2Yeso gíì ebe angɔ kpe, “Aŋu â zhudu abɔ Galilii deʼ ene aghɛʼ zɔnɔ ngɛ, mbɔn ne zhuŋu kpe e ne tee kpe angɔ à na bɔ bɔɔbɔɔ fɔɔ aŋu abɔ Galilii tsɛrɛ â mwɔ ngɛ? 3Keʼ! Mmɛ ga éŋwaʼa endɔn kpe mbɔn ne kobo eleabwa bɔɔbɔɔ ndzɔn bo, shi mbɔn bɔ gimkpaʼ ba ngo kudu ne angɔ nɔ. 4Â le ene nè abɔ wum ǹchwɔ̀ fwɔ̧ɔ byɛ â kudu efwɔ abɛ Siloam èndzobo chɛ antsɛn à go è tsɔŋɔ angɔ ngɛ? Mbɔn be zhuŋu kpe angɔ à ne bɔɔ fɔɔ abɔ byɛ â ma tsɔmɔ a Jerusalɛm ngɛ?” 5Keʼ! Mmɛ ga endɔn kpe ma mbɔn ne kobo eleabwa bɔɔbɔɔ ndzɔn bo shi mbɔn ba ngo kudu ne angɔ nɔ.

Nklama timi mbɔʼ azɔd akla yɛ a ne ma kla bo ngɛ

6Éngɛ Yeso sɛɛrɛ nklama timi fɔnɔ ebe angɔ kpe, “Gho deʼ à na aŋu wɛ à me le azɔd akla efwɔ ǹtsà mɔ. Engɔ ngɔɔ ma kɔʼrɔ akla edɔm aŋu, bɛʼngɛ è ne zɔ adeʼ bo. 7Éngɛ, engɔ à ga ebe gho afwɛʼ mɔ kpe ‘Kɔʼɔ anɔ, mmɛ shi zeʼe anɔ efwɔ enɔ̂m tɛd ma kɔ̀ʼ kpe mmɛ zɔ anta akla deʼ ekere azɔd akla zɔnɔ, mmɛ ke shi zɔ adeʼ bo. Gbɛ engɔ! A na tsɔŋɔ chwâ ene yɛ?’ 8Bɛʼngɛ gho afwɛʼ gii kpe, ‘Masa shi engɔ aŋu, efwɔ anɔ̂m tsɛrɛ aŋwaʼ, mmɛ wa ngo tɔ enji engɔ è ge ńgbaa elankɔn enji aŋu. 9Éngɛ mala azɔd zɔnɔ kla enta shi e wa ngo me nara, ne me éngɛ bo, ngwo gbɛ sàa a chwâ.’ ”

Yeso gli aye deʼ wɛ a me glaba ngɛ

10À na anji ku̧ru bɔ Juu bi, Yeso ma tee abwa efwɔ ndɔ tsàʼrà Ngwe bi. 11Aye deʼ à na aŋu wɛ à me le azhwɛɛrɛ bɔɔbɔɔ deʼ yɛ à shi le engɔ glaba efwɔ enɔ̂m wum ǹchwɔ̀ fwɔ̧ɔ, engɔ shi guru ne ma too amɔ ekere bo. 12Èndzobo chɛ Yeso à zɔ engɔ ngɛ, Yeso zɔʼ engɔ kpe, “Aye! Aŋwan njɛ shi myɛ ekwa ngwɛ.” 13Yeso tɛʼ abwo mɔ ekwa ngɔ, egha ŋwaʼ engɔ ndɛdɛ todo ekwa mɔ gɛ̀rɛ̀ sa ghɔ Ngwe. 14Eto efwɔ ndɔngwe sa bɔɔ etaa kpe Yeso à gli gho anji ghɔ Ngwe. Éngɛ, engɔ ga eghɛʼɛ ebe bɔ kpe, “Ntsɔ be le enji mfo efwɔ ǹkyɛ̀ é fwɛ̀ʼ, éngɛ gho deʼ ma gwɔn è zeʼe efwɔ anji bɔnɔ ne ma anji ku̧ru bɔ Juu bo.” 15Masakɛ gii ebe angɔ kpe, “Mbɔn bɔ ndooro aghɔɔ, gho ŋwàʼaŋwàʼ abwaʼ ndzɔn ke ma zɛ̀ɛ azɛʼ m̀pwɔ̀ mɔ kà akɔb m̀pwɔ̀ bèʼebɔ mɔ ene afwɔ yɛ è ma tyɛ ngɛ ngɔɔ ndɛ̀ʼ ndim ebe angɔ anji ku̧ru bɔ Juu bo? 16Éngɛ aye wunɔ wɛ ma ŋwɔ ekla Abraham wɛ asatan à shi nyii engɔ efwɔ enɔ̂m wum ǹchwɔ̀ fwɔ̧ɔ ngɛ, e ke gli engɔ anji ku̧ru bɔ Juu bo ngà?” 17Egiiga ngɔ à le bɔ m̀pɛ̀ʼ sa ju efwɔ akwa amɔ, aŋu bɔ â sa gɛnɛ amɔ ene aghɛʼ yɛ engɔ à ma fwɛʼ abwa zodo zodo zɔnɔ ngɛ.

Nklama timi mbɔʼ sam digidigi

(Mat 13:31, 32; Mak 4:30-32)

18Yeso biiri kpe, “Ebwa m̀fɔ̀ Ngwe ne mwɔ ene ngà? Mmɛ na ngo moŋoro ene yɛ ngà? 19Ebwa m̀fɔ̀ Ngwe ne mwɔ na gho deʼ ma nu sam ǹku ka sam digidigi è ngɔɔ kɔn efwɔ esɔmɔ mɔ nɔ. Ala ngbèe yɛ tɛb gɛ̀rɛ̀ firi azɔd, éngɛ ènɔ̀n ekere sa byɛ ndɔrɔ amɔ ene atɔ azɔd zɔnɔ.”

Nklama timi mbɔʼ àfòo

(Mat 13:33)

20Yeso wu biiri ekyɛ tsɛrɛ kpe, “Mmɛ wa ngo moŋoro ebwa m̀fɔ̀ Ngwe ene yɛ ngà? 21E ne mwɔ énde, Aye deʼ wa nu àfòo deʼ gɛ̀rɛ̀ ghɛ̀ɛbɛ ene ènkàm ebun ǹgoŋ tɛd bwɛn èndzobo chɛ ànkàm ǹgoŋ gimkpaʼ à ma ngo kwaʼ ngɛ.”

Enduʼndɔ wɛ e me fɛrɛ ngɛ

(Mat 7:13, 14, 21-23)

22Yeso à zhiri efwɔ ebɛ kɛkɛ mane ebɛ kparakpara mà tee bɔ aŋu à ma ngɔɔ a Jerusalɛm ngɛ. 23Gho deʼ biiri ebe engɔ kpe, Masa, e ba ngo pwèerè chidi tye ma m̀pùru bɔ deʼ? Yeso gíì kpe. 24Mbɔn twaʼra angɔn kpe mbɔn nyii efwɔ ndɔ me fɔɔ ene a fɛrɛ enduʼndɔ, mbɔʼnga bɔ akɛkɛ ba ngo ma ke nyii. Bɛʼngɛ, mmɛ ga endɔn, angɔ shi ne me le aghɛʼ bo. 25Endzobo ya zeʼe yɛ àtɛ ndɔ ma ngo tam gɛ̀rɛ̀ gwɔb enduʼndɔ, èndzobo chɛ mbɔn ba ngo tamma ese sa gbeʼre enduʼndɔ sa ga kpe, “fuʼu enduʼndɔ endyɛɛ Masa!” Engɔ wa ngo gii kpe, “Mmɛ ke nɛɛ afwɔ yɛ mbɔn me zeʼe ngɛ bo!” 26Éngɛ mbɔn ba ngo ga kpe, “Mbyɛɛ à nde gɛ̀rɛ̀ ŋwɔ nè ngwo, ngwo gɛrɛ tee abwa efwɔ abɛ njɛɛ!” 27Bɛʼngɛ engɔ wa ngo gii ekyɛ tsɛrɛ kpe, “Mmɛ ke nɛɛ afwɔ yɛ mbɔn me zeʼe ngɛ bo. Mbɔn nyɛnnɛ ebara mfu mbɔn bɔ abwa bɔɔbɔɔ gimkpaʼ! 28Mbɔn ba ngo sa ku̧u gɛ̀rɛ̀ sa kwo ashwɔ ndzɔn èndzobo chɛ mbɔn ma zɔ Abraham, Ayzik mane Yakɔb mane Bàmɛnɛkɔn Ngwe gimkpaʼ efwɔ ebwa m̀fɔ̀ Ngwe aŋu a shi waʼ angɔn ese ngɛ! 29Bɔ ba ngo zeʼe abɛɛ gli etaranchwe mane abɛɛ turu etaranchwe, zeʼe abwo nde gli etaranchwe mane abwo mɔ gli etaranchwe gɛ̀rɛ̀ tsɔmɔ a chwâ sa nde antara ebwa m̀fɔ̀ Ngwe. 30Éngɛ èndzobo chɛ abɔ byɛ â mwɔ engudu ngɛ e ba ngo mwɔ embè, angɔ byɛ â mwɔ embè ngɛ e ba ngo ngùdù.”

Yeso tee edoʼ ene abɛ Jerusalɛm

(Mat 23:37-39)

31Endzobo ŋwaʼ yɛ bɔ Farisii deʼ â zeʼe ebe Yeso è ga ebe engɔ kpe, “Ngwo nyɛrɛ anɔ è ngɔɔ akwâ tsɛrɛ mbɔʼnga Hɛrɔd wa ke zhudu awɛ.” 32Yeso gíì ebe angɔ kpe, “Mbɔn ngɔɔ ga ebe àtsɔ̀b yɛ kpe mmɛ wa sàa ezhwɛɛrɛ bɔɔbɔɔ ese gɛ̀rɛ̀ ma gli eŋwan ànchwɔ̀ mane enchwe, a sa bwɛn enji tɛd mmɛ mɛɛrɛ afwɛʼ ndza. 33Éngɛ mmɛ wa ngo mwɔ ene aghɛʼ ndza ànchwɔ̀, enchwe mane achim ese keʼe, e ke me koʼro kpe é zhudu Àmɛnɛkɔn Ngwe afwɔ tsɛrɛ e fɔɔ Jerusalɛm bo. 34Jerusalɛm, ngwo wɛ ngwo à zhudu àmɛnɛkɔn Ngwe gɛ̀rɛ̀ ndwa atye è zhudu abɔ byɛ â tɔm endɔn ngɛ. Na akyɛ mò mmɛ shi kpe mmɛ shunu angɔn afwɔbi ne engwa ekwaʼa ma zobo bwɔkwaʼ mɔ enji eblaba mɔ nɔ, mbɔn shi ne ma ndɛ̀ʼ afwɔ ena bo. 35Éngɛ mbɔn ba ngo waʼ ndɔngwe ndzɔn. Mmɛ ga éŋwaʼa endɔn kpe mbɔn ke ma wu zɔ angu bo bwɛn èndzobo chɛ mbɔn ma ngo ga kpe ‘M̀bɔ̀nɔ ye ebe engɔ wɛ è me zeʼe ene ekumu Masakɛ ngɛ.’ ”

Currently Selected:

Luk 13: nbt

Highlight

Copy