Luk 14

Yeso gli gho aŋwan deʼ

1Â na anji ku̧ru bɔ Juu deʼ, Yeso ngɔɔ é nde a ndɔ gho kɛ̀ Farisii bi, éngɛ bɔ ma tsɔrɔ engɔ ghɛʼ. 2Anɔm deʼ à me le akɔ̂m zeʼe ebe engɔ. 3Yeso biiri ebe bàtee atsɛrɛ mane bɔ Farisii kpe, “Etsɛrɛ bɔ ye bɛrɛ kpe e gli gho anji ku̧ru kà keʼe?” 4Bɛʼngɛ angɔ à ke né ga ebwa deʼ bo. Yeso à klini anɔm wɛ è gli engɔ e saa engɔ ngɔɔ amɔ. 5Éngɛ è ga ebe angɔ kpe “Mala gho bi abwaʼ ndzɔn à me le ŋwɔanɔm kà azɛʼ m̀pwɔ̀ yɛ a tsana è turu efwɔ atim anji kuru, ngwo ke ma kumu é chi ka de mwɔ anji je bo?” 6Bɛʼngɛ angɔ à mo é gii ega tsɛ̀ʼ. 7Efwɔ ndɔ gho Farisii wɛ, Yeso à zɔ aŋu àgɔn byɛ adeʼ â ma chidi efwɔ kɛ é tsɔmɔ ngɛ. Éngɛ engɔ ga nklama timi fɔnɔ ebe angɔ bɔ gimkpaʼ kpe 8“Mala gho deʼ zɔʼɔ awɛ ene antara elô, kɛ chi afwɔ kɛ tsɔmɔ bo, ngà deʼ a ne zɔʼɔ egho tsɛrɛ wɛ è me fɔɔ awɛ ngɛ. 9Egho wɛ à me zɔʼɔ angɔn ngɛ gɛ zeʼe engɛ̂ ga kpe ‘Tam ndɛ̀ʼ afwɔ yɛngɛ ebe engɔ.’ Eju ya ngo bɛrɛ awɛ ngwo fɔɔ ngɔɔ abɛɛ achim. 10Ankɔmɔ ngɛ, mala e zɔʼɔ awɛ, ngɔɔ tsɔmɔ anjɛ abɛɛ achim mbɔʼtye gho me kɛʼɛ ebwa ngɛ zɔʼɔ awɛ kpe ‘Fɔɔ zeʼe embè anɔ esɔrɔ ngu ene atan kɛ́, ewunɔ wa ngo ndɛʼ eghɔ ebe engɔ efàarà bɔ gimkpaʼ.’ 11Éngɛ, mbɔn nɛɛ kpe abɔ byɛ e ma bèʼrè akwa amɔ ekere ngɛ Ngwe ya bwaara angɔ a chwâ, angɔ byɛ e ma bwaara akwa amɔ ngɛ Ngwe ya bèʼrè angɔ ekere.” 12Éngɛ Yeso shi ga ebe gho ndɔ ngɛ kpe, “Mala ngwo kɛʼ ebwa, ke zɔʼɔ ma asɔrɔ njɛ ka bwɔngwaanɔm mbyɛ, bwɔ ekla mbɔn kà bɔ kɛb ebara ngɛ bo, mbɔʼnga e yà shi anji deʼ angɔ zɔʼ awɛ gɛ̀rɛ̀ gii àflà njɛ. 13Bɛʼngɛ, ma ngwo kɛʼ ebwa, zɔʼɔ bɔ ndzaŋa, ebuʼru, aglaba mane àfò aghɔɔ. 14Ngwo wa le m̀bɔ̀nɔ mbɔʼnga angɔ ke ma ngo zɔʼ awɛ anji deʼ bo. Ngwe ya nɛ̀rɛ̀ awɛ anji yɛ abɔ byɛ e me koʼro efàarà Ngwe ma ngo zhwɛm ene ewu ngɛ.”

Nklama timi mbɔʼ antara kɛ̀

(Mat 22:1-10)

15Èndzobo chɛ egho bi abwaʼ abɔ byɛ â me tsɔmɔ nè Yeso ma nde, à zo aŋu Yeso à ga ngɛ, è ga ebe Yeso kpe, “M̀bɔ̀nɔ na abɔ byɛ e ma ngo tsɔmɔ ma nde antara efwɔ ebwa m̀fɔ̀ Ngwe ngɛ.” 16Yeso gà ebe angɔ kpe, “Gho deʼ à kɛʼ ebwa kɛ́ mɔ, è zɔʼ bɔ akɛkɛ. 17Endzobo à koʼ è saa gho afwɛʼ mɔ ebe angɔ kpe ‘Mbɔn zeʼe, ela gimkpaʼ â shi aŋu.’ 18Bɛʼngɛ, angɔ klada sa kùdù amɔ eŋwàʼaŋwàʼ. Gho mbèmbè kpe ebe gho afwɛʼ wɛ ‘Mmɛ à kwɔ zɔn anam deʼ mmɛ wa ngo kede. Mmɛ we ju, mmɛ wa ka zeʼe.’ 19Etsɛrɛ kpe ‘Mmɛ we kwɔ â zɔn m̀pwɔ̀rɔ̀ é kìrì esɔmɔ wum mmɛ na ngɔ̀ɔ é zhweʼre, Mmɛ we ju, mmɛ wa ka zeʼe.’ 20Etsɛrɛ kpe ‘Mmɛ we nu aye fe ngu mmɛ ke né zeʼe bo.’ 21Egho afwɛʼ wɛ ghɛɛbɛ ngɔɔ è ga abwa gimkpaʼ ebe gho kɛ̀ mɔ. Etaa gho kɛ́ wɛ twa è ga ebe gho afwɛʼ mɔ kpe ‘Ngɔɔ aŋu mmɛ ga nɔ anjirikɛ mane etonji gimkpaʼ, zɔʼɔ bɔ ndzaŋa, ebuʼru, àfò aghɔɔ mane eglaba bɔ.’ 22Afwɔ sa ndada egho afwɛʼ wɛ kpe ‘Masa, mmɛ shi le aŋu ngwo à ga ngɛ, ndɔ ne shi shwe bo.’ 23Éngɛ Masa wɛ ga ebe gho afwɛʼ mɔ kpe ‘Ngɔɔ efwɔ njirikɛ mane bwo eghɛʼnji gimkpaʼ è le bɔ zeʼe akɛkɛ mbɔʼtye ndɔ ndza shwe. 24Mmɛ ga éŋwaʼa engɛ̂, tsɛʼ gho deʼ abwaʼ abɔ byɛ â me zɔʼɔ ngɛ è ma zhweʼre ende deʼ ngu bo.’ ”

Ala yɛ ngwo ma nyimi é mwɔ gho bɛ̀ɛrɛ abwa ngɛ

(Mat 10:37, 38)

25Anji deʼ ebaŋabɔ ma kìrì Yeso, engɔ ghɛɛbɛ amɔ e ga ebe angɔ kpe, 26Egho wɛ è ma zeʼe ena ngɛ ke né mwɔ gho bɛ̀ɛrɛ abwa ngu bo, kɔʼtye engɔ doʼo angu fɔɔ àtɛ, áʼɔ̧̀, eye mane bwɔ, bwɔngwaanɔm mane bwɔngwaaye mane etsɔmɔ mɔ mɔmbwo bo. 27Egho wɛ è ne ma beʼ azɔd baʼra mɔ é kìrì angu bo ngɛ ke koʼro é mwɔ gho bɛ̀ɛrɛ abwa ngu bo. 28Awɛ abwaʼ ndzɔn ma ke é byɛ ndɔ nè antsɛn deʼ, ne tsɔmɔ a chwâ kede kpe e na nu ekɛb mò kà mbè we le ekɛb é mɛ̀ɛrɛ̀ afwɛʼ anyi bo? 29Mala ngwo ne dye zhuŋu bo, shi ngwo ke ma ngo mɛ̀ɛrɛ̀ bo. Endzobo ngwo shi chi etirindɔ ngɛ bɔ zɔ e sa pèʼ awɛ tsɔʼɔ. 30E sa ga kpe, “Egho deʼ à klada ndɔ shi ne me né mɛɛrɛ bo.” 31“Ma m̀fɔ̀ deʼ nè bɔ mɔ ètɔɔshin wum chwɛ̀ʼ mà ke ngwè m̀fɔ̀ tsɛrɛ nè bɔ ètɔɔshin asamabi, è dye tsɔmɔ zhùŋù ato mɔ kpe mbè we né ngwè m̀fɔ̀ ze ngà. 32Mala è zɔ kpe mbè ke nɛɛ tye mbè ngwe bo, engɔ tɔm ekumu ebe m̀fɔ̀ ze kpe ‘Ntsɔ wee a m̀bwarambwad’ de bli abɛɛ tsɛrɛ.” 33Yeso ngùdu ga kpe, “Nkirinkin, gho deʼ ke né mwɔ gho bɛ̀ɛrɛ abwa ngu kɔʼtye ngwo waʼ ela gimkpaʼ bo.”

Ńgbaa fyɛ shi sodo ngɛ

(Mat 5:13; Mak 9:50)

34“Ńgbaa fe nara, bɛʼngɛ e shi ne ma bli à nàm bo, tsɛʼ aghɛʼnji deʼ é le e wu nàm bo. 35Ńgbaa fɔnɔ ke wu le ebwa deʼ é fwɛʼ anyi bo à tye é tù a chwâ. Ma ngwo me le ètimi ngà zhuru.”

Currently Selected:

Luk 14: nbt

Highlight

Copy