Luk 7

Yeso gli gho afwɛʼ gho kɛ abɛ Rom

(Mat 8:5-13)

1Yeso à mɛɛrɛ é ga abwa zɔnɔ ebe bɔ gimkpaʼ è ngɔɔ a Kapɛnaum. 2Gho kɛ́ Rom deʼ aŋu à ne le gho afwɛʼ mɔ wɛ à me doʼo ghɛʼ ngɛ, egho afwɛʼ wɛ ma gwɔn sa kuku. 3Èndzobo chɛ gho kɛ́ wunɔ à zo mbɔʼ Yeso ngɛ, è saa eto bɔ Juu deʼ ebe engɔ kpe e zeʼe glì gho afwɛʼ ngbe. 4Abɔ byɛ zeʼ ebe Yeso è bii engɔ ene ńtara àmɔ̀ kpe, “Egho wunɔ we koʼro engɛ̂ é kpede. 5È we doʼo bɔ ghɛʼ, ne engɔ à byɛ ndɔngwe njɛɛ.” 6Éngɛ Yeso ngɔɔ nè angɔ. Enɔ sa zamma bwɛn a ndɔ nɔ, egho kɛ́ wɛ tɔm asɔrɔ mɔ è ga kpe, “Masakɛ, ka awɛ nyii, mmɛ ke me koʼro tye ngwo nyii a ndɔ ndza bo, 7ne ǹji yɛ mmɛ gɛ de ne koʼro é zeʼe mɔmbwo ngɛ bo. Ga me ega gho afwɛʼ ngu wa bwada. 8Mmɛ mɔ ne enji abɔ kɛ́ tsɛrɛ, mmɛ gɛrɛ me le bɔ ebiri enji ndza, mmɛ kpe ebe êwù ngɔ̀ɔ è ngɔɔ mmɛ kpe ebe êwù zeʼe è zèʼe, mmɛ kpe ebe gho afwɛʼ ngu le enɔ è le.” 9Yeso kɔn aŋu à zo éngɛ ngɛ, è ghɛ̀ɛbɛ amɔ è ga ebe ebaŋabɔ wɛ â ma kìrì engɔ ngɛ kpe, “Mmɛ ga endɔn mmɛ ke shi zɔ ebɛrɛtaa zɔnɔ bo, ka de mwɔ efwɔ Israel.” 10Àbɔntɔm byɛ â ghɛɛbɛ ngɔɔ a ndɔ àkɔʼ eko bɔ ebiri wɛ, è zɔ gho afwɛʼ mɔ ngɛ e shi bwada.

Yeso zhwɛɛmɛ ŋwɔanɔm eyeti

11Â ke ndada bo, Yeso nè bɔ bɛɛrɛ abwa mɔ mane ebaŋabɔ à ngɔɔ abɛ deʼ e ma zɔʼrɔ kpe Nayn. 12Aŋu angɔ à bwɛn ebara enduʼnkɛmɛ abɛ yɛ ngɛ, elabaku sa gli à zeʼe efwɔ. Gho deʼ à ne ku mwɔ ŋwɔanɔm chwɛ̀ʼ ebe eyeti, bɔ akɛkɛ ma kìrì angɔ. 13Èndzobo chɛ Àsaase à zɔ aye wɛ ngɛ è klasɔn ene engɔ è kpe ebe engɔ “Ka kuu.” 14Éngɛ è tini ngɔɔ mɔmɔ ekwɔb gho ku wɛ, anɔm byɛ â me beʼe ngɛ tam. Yeso kpe, “Eghobo, mmɛ ga engɛ̂ tam ekere!” 15Egho ku wɛ tam tsɔmɔ klada sa ga Yeso wu ndɛʼ engɔ ebe áʼɔ̧̀ mɔ. 16Èklɔ̀ à bere angɔ bɔ gimkpaʼ, angɔ gɛrɛ ghɔ Ngwe. Angɔ kpe, “Àmɛnɛkɔn Ngwe kɛ́ deʼ shi gli abwaʼ bɔ, gɛ̀rɛ̀ ga kpe Ngwe ya abwaʼ bɔ mɔ.” 17Ebwa mbɔʼ Yeso nɔ kɛɛrɛ abɛ Judeya sɔ mane abɛ ebara ngɛ.

Eyɔɔ Andɛʼndim saa bɔntɔm

(Mat 11:2-19)

18Bɔ bɛɛrɛ abwa Eyɔɔ â ga ebe engɔ mbɔʼ abwa zɔnɔ yɛ Yeso à ma le ngɛ. 19Engɔ à zɔʼ bɔ fyee abwaʼ angɔ è tɔm ebe Masakɛ, é biiri kpe, “Ngwo ne engɔ wɛ Ngwe à kpe mbè wa sàa ngɛ kà mbyɛɛ kɔʼɔ etsɛrɛ?” 20Aŋu angɔ à bwɛn ebe Yeso ngɛ e kpe, “Eyɔɔ Andɛʼndim à me saa angbɛɛ é biiri engɛ̂ kpe ‘Ngwo ne engɔ wɛ Ngwe â kpe mbè wa sàa ngɛ, ka mbyɛɛ kɔʼɔ etsɛrɛ?’ ” 21À ne èndzobo chɛ Yeso gli bɔ akɛkɛ ene m̀pèrè eŋwan akɛkɛ mane m̀pèrè ǹgoʼ akɛkɛ mane ezhwɛɛrɛ bɔɔbɔɔ, è le àfò aghɔɔ akɛkɛ zɔ akwâ. 22Yeso gíì ebe bɔntɔm Eyɔɔ kpe, “Mbɔn ghɛɛbɛ è ngɔɔ ebe Eyɔɔ e ga mbɔʼ abwa yɛ mbɔn zɔ gɛ̀rɛ̀ zo ngɛ kpe ‘Àfò aghɔɔ sa zɔ, ebuʼru bɔ sa zhiri, bɔ akɔ̂m shi pɛ, bɔ kootimi sa zo, bɔ kudu sa zhwɛm gɛ̀rɛ̀ sa sɛ̀ɛrɛ̀ ǹtɔm ǹchwɔ̀ ebe bɔ ndzaŋa. 23Ǹchwɔ̀ na abɔ byɛ e ne ma di angu bo ngɛ.’ ” 24Aŋu bɔntɔm Eyɔɔ â nyɛrɛ ngɛ, Yeso klada sa biiri ebe ebaŋabɔ wɛ mbɔʼ engɔ kpe “Mbɔn à na ke é zɔ yɛ aŋu mbɔn angɔɔ ebe Eyɔɔ eguńked ngɛ? Efu agɛ deʼ efɔɔ â ma fudu? 25Mbɔn à ngɔɔ é zɔ yɛ? Gho deʼ à me shwɔnnɔ amɔ ene ǹdiri nchwɔnchwɔ? Abɔ e ma shwɔnnɔ amɔ ma mwɔ efwɔ àfɔ̀n ngɛ na tsɔmɔ tye ma a ǹtɔʼ. 26Mbɔn ga ena, mbɔn à ne gli é ngo ke ayɛ? Àmɛnɛkɔn Ngwe? Ɔ̧̀ɔɔ éŋwaʼa, bɛʼngɛ mbɔn à zɔ ala deʼ yɛ â me fɔɔ Àmɛnɛkɔn Ngwe ngɛ? 27Eyɔɔ ne egho wɛ ega Ngwe à ma ga mbɔʼ engɔ kpe ‘Mmɛ wa dye saa ghontɔm ngu embè njɛ, é ndèerè aghɛʼnji engɛ̂.’ ” 28Yeso zhiiri kpe, “Mmɛ ga endɔn, abwaʼ abɔ byɛ aye me be ngɛ, tsɛʼ edeʼ è me fɔɔ Eyɔɔ bo. Bɛʼngɛ egho wɛ e me kpɛɛ ghɛʼ efwɔ ebwa m̀fɔ̀ Ngwe ngɛ we fɔɔ Eyɔɔ.” 29Bɔ gimkpaʼ â zo engɔ, angɔ mane ndanda bàshuru aŋwɛ â bɛrɛ ega Ngwe nu ndim ebe Eyɔɔ. 30Bɛʼngɛ bɔ Farisii mane bàtee atsɛrɛ â bɛʼrɛ ebwa wɛ Ngwe â ma ke ebe angɔ ngɛ e tɔn é nu ndim ebe Eyɔɔ. 31Yeso fɔɔ embè kpe, “Enjitsɔ, mmɛ shi moŋoro bɔ anji bɔnɔ ene yɛ ngɛ? 32Angɔ ne na adɔ̀ e me tsɔmɔ ati ewu̧ nɔ, ǹtìmi zɔ flaba akwâ ebe eze. Mbyɛɛ chi ekɔm nu-aye endɔn, mbɔn tɔrɔ ke bin. Mbyɛɛ gɛ kwɔ̀rɔ̀kwɔrɔ me etsa ku mbɔn ke ku̧u bo. 33Eyɔɔ Andɛʼndim à zeʼ ma jè nde ne mɔm, mbɔn kpe ‘Engɔ we le azhwɛɛrɛ bɔɔbɔɔ ebûm mɔ.’ 34Ŋwɔ gho zeʼe ma nde gɛ̀rɛ̀ ŋwɔ mɔm, mbɔn kpe ‘Mbɔn kede, ewùnde na akùʼnde gɛ̀rɛ̀ mwɔ ashwaara, esɔrɔ bàshuru aŋwɛ mane bɔ bɔɔbɔɔ.’ 35Nɛŋɛ engɛ̂, bɔ gimkpaʼ byɛ e me bɛrɛ ngɛ na tee kpe azɔm Ngwe ne éŋwaʼa.”

Yeso a ndɔ Shimun gho Farisii

36Gho Farisii deʼ à zɔʼ Yeso kpe è zeʼe mbɔɔ nde, Yeso ngɔɔ dù tsɔmɔ a chwâ sa nde. 37Aye deʼ wɛ à ma le abwa bɔɔbɔɔ ngɛ à ne efwɔ abɛ yɛ. È zo kpe Yeso wa nde a ndɔ gho Farisii deʼ, è zèʼe nè akɔʼ alabasta e shwe ene ngud mbì nchwɔnchwɔ. 38Engɔ tsɔmɔ ebara elo Yeso, sa ku̧u à jùuru elo ngɔ ene ndɛrɛ mɔ, sa fla elo ngɔ ene nyɔrɔ ato mɔ, mà shwàara elo ngɔ é tee eghɔ, è shìrì elo byɛ ene ngud mbì myɛ. 39Aŋu gho Farisii wunɔ à zɔ ngɛ è zhuŋu efwɔ ebûm mɔ kpe, “Mala egho wunɔ à mwɔ Àmɛnɛkɔn Ngwe éŋwaʼa shi a nɛɛ m̀pè gho yɛ aye wunɔ e ma mɔmɔ engɔ nɔ mwɔ ngɛ, shi a nɛɛ eleabwa bɔɔbɔɔ engɔ.” 40Yeso ga apɛpɛ kpe, “Shimun, mmɛ we le ebwa deʼ é ga engɛ̂.” Gho Farisii wɛ gii kpe, “Ɔ̧̀ɔɔ àtee abwa, ga.” 41Yeso kpe, “Bɔ deʼ fyee a ne nde ekɛb gho deʼ wɛ à ma flàdà ekɛb ndɛʼ ebe bɔ ngɛ. Egho bi à ne klini egɛʼrɛ èsama fyee tɛʼ wum, êwè klini egɛʼrɛ tan. 42À ne tsɛʼ gho deʼ abwaʼ angɔ à me le ekɛb tye è gwɔm ǹjwè mɔ bo. Éngɛ egho wɛ dzɛrɛ ǹjwère angɔ. Enjitsɔ, êwè abwaʼ ànde ǹjwè byɛ à doʼo eghokɛb wɛ ghɛʼ?” 43Shimun gii kpe, “Mmɛ we buʼ kpe ne engɔ wɛ â dzɛrɛ ǹjwè engɔ yɛ à me dìdi ngɛ.” Yeso gíì kpe, “Ngwo ga éŋwaʼa.” 44Éngɛ Yeso sa kede aye wɛ è ga ebe Shimun kpe, “Ngwo zɔ aye wunɔ, mmɛ a nyii a ndɔ njɛ, ngwo ne ndɛʼɛ ndim so elo ena bo, bɛʼngɛ engɔ shi so elo mbu ene ndɛrɛ mɔ è fla ene nyɔrɔ ato mɔ. 45Ngwo ke bama angu kpe mmɛ shi zeʼe bo. Edzoro mmɛ à bwɛrɛ anɔ engɔ à da wa shiri elo mbu shiri? 46Ngwo ke zhwaʼa ato ndza ene ngud bo. Bɛʼngɛ engɔ shi zhwaʼa elo mbu ene ngud mbì. 47Mmɛ ga engɛ̂ kpe, edoʼ kɛ́ yɛ engɔ me le ngɛ ne tee kpe Ngwe shi dzɛrɛ abwa bɔɔbɔɔ ngɔ, enga egho wɛ e me dzɛrɛ abwa bɔɔbɔɔ ngɔ amiimii ngɛ na tee me ampiʼ edoʼ.” 48Yeso shi ga ebe aye wɛ kpe, “E shi dzɛrɛ abwa bɔɔbɔɔ njɛ.” 49Abɔ byɛ â ma nde nè angɔ ngɛ sa ga àmɔ̀ àmɔ̀ kpe, “Ewu na wɛ è me le ekama é dzɛrɛ abwa bɔɔbɔɔ?” 50Bɛʼngɛ Yeso ga ebe aye wɛ kpe, “Ebɛrɛtaa njɛ shi chi awɛ efwɔ enyii, ngɔɔ ene m̀bwarambwad.”

Currently Selected:

Luk 7: nbt

Highlight

Copy