Luk 6

Ebiiri mbɔʼ anji ku̧ru bɔ Juu

(Mat 12:1-8; Mak 2:23-28)

1À na anji ku̧ru bɔ Juu deʼ, Yeso mane bɔ bɛɛrɛ abwa mɔ ma fɔɔ efwɔ asɔmɔ ǹkùru deʼ, bɔ bɛɛrɛ abwa byɛ sa buʼu ǹkùru à ŋwɛʼrɛ à nde. 2Bɔ Farisii deʼ biiri kpe, “Mbɔn na le ebwa wɛ etsɛrɛ njɛɛ ne me tee kpe e le anji ku̧ru bo ngɛ mbɔʼ ayɛ?” 3Yeso gíì kpe, “Mbɔn ke shi zɔʼrɔ efwɔ aŋwɛʼrɛ Ngwe ebwa wɛ Devid à le èndzobo chɛ nchwɔrɔ ngɔ mane bɔ mɔ à ma gwɔ̀n ngɛ bo? 4Engɔ à nyii efwɔ ndɔngwe nè bɔ mɔ è nde ǹgoŋ yɛ â ma tɔ̧ɔrɔ Ngwe anyi ngɛ gɛ̀rɛ̀ ndɛʼ edeʼ ebe bɔ mɔ. Etsɛrɛ bɔ shi me tee kpe à nde ǹgoŋ yɛ ma ètɛ zhiri.” 5Éngɛ Yeso ngùdu kpe, “Ŋwɔ gho gɛrɛ na Masakɛ ene anji kuru.”

Egho wɛ abwo bi à me ku ngɛ

(Mat 12:9-14; Mak 3)

6À na anji tsɛrɛ yɛ a ma anji ku̧ru bɔ Juu ngɛ, Yeso ngɔɔ efwɔ ndɔ tee atsɛrɛ ma tee abwa. Anɔm deʼ à na aŋu abwo anɔm ngɔ me glaba. 7Bàtee atsɛrɛ mane bɔ Farisii sa kɔ̀bɔ̀ Yeso ma zɛʼ ǹjì é ge ebwa deʼ enji engɔ. Éngɛ e sa kede Yeso ene ampɛrɛ kpe ká è wa glì egho wɛ anji ku̧ru ngà. 8Éngɛ Yeso nɛɛ ezhuŋu angɔ è ga ebe àglaba abwo wɛ kpe, “Tam ekere è zeʼe embè anɔ.” Egho wɛ tam è fɔɔ ngɔɔ aŋu. 9Éngɛ Yeso gâ ebe angɔ kpe, “Mmɛ kpe amɔɔ, etsɛrɛ bɔ ne tee kpe ntsɔ le ene anji kuru? É le ǹchwɔ̀ kà é le e bɔɔbɔɔ. É ngwe ato gho kà é tsɔŋɔ etyê ngɔ?” 10Yeso kede angɔ bɔ gimkpaʼ shi ga ebe gho wɛ kpe, “Ndɛrɛ abwo njɛ.” È le éngɛ, abwo ngɔ wu bwada. Aŋu Yeso à le énde ngɛ, 11ńtara angɔ bɔɔ e sa zɛʼ aghɛʼ é le ebwa deʼ ekwa Yeso.

Yeso chidi bèmpwɔnɔntɔm wum ǹchwɔ̀ fyee

(Mat 10:1-4; Mak 3:13-19)

12Enyɛrɛ éngɛ, Yeso kwaʼ egu é tsàʼrà Ngwe. Engɔ à ko aŋu ma tsàʼrà Ngwe. 13Ese à kèʼ engɔ zɔʼ bɔ bɛɛrɛ abwa mɔ, e chidi bɔ wum ǹchwɔ̀ fyee abwaʼ angɔ, e zɔʼrɔ angɔ byɛ kpe bèmpwɔnɔntɔm. 14Shimun wɛ engɔ à zɔʼrɔ kpe Petoro ngɛ mane ghongwaanɔm mɔ Andere, Jems mane Eyɔɔ, Firiboʼ mane Batolomyo, 15Matyo mane Tɔmas. Jems ŋwɔ Alfiyɔs mane Shimun wɛ â ma zɔʼrɔ kpe Patriot ngɛ, 16Judas ŋwɔ Jems, mane Juda Iskariyɔd wɛ à ma ngo fɛ̀n engɔ ngɛ.

Yeso tee abwa gɛ̀rɛ̀ gli bɔ aŋwan

(Mat 4:23-25)

17Èndzobo chɛ Yeso mane bɔ bɛɛrɛ abwa mɔ wum ǹchwɔ̀ fyee à kla egu ngɛ, e tam ene afwɔ nɔɔrɔ deʼ. Bɔ bɛɛrɛ abwa mwɔ akɛkɛ. Ebaŋagho à na aŋu nyɛ̀rɛ̀ zèʼe efwɔ ebɛ Judeya gimkpaʼ, nyɛrɛ a Jerusalɛm mane Taya nè Sidɔn. 18Angɔ à ne zeʼe é zo ega Ngwe ngɔ gɛrɛ kpe è gli eŋwan mbɔɔ. Abɔ byɛ ezhwɛɛrɛ bɔɔbɔɔ â ma gbɛɛrɛ angɔ ngɛ a gɛrɛ zeʼe è gli angɔ. 19Bɔ gimkpaʼ â na ke é mɔmɔ engɔ mbɔʼnga ekama â na gli ekwa ngɔ ma gli bɔ.

Egɛnɛ mane eju

(Mat 5:1-12)

20Yeso klada sa ga ebe bɔ bɛɛrɛ abwa mɔ kpe, “Ǹchwɔ̀ ne endɔn bɔ ndzaŋa mbɔʼnga ebwa m̀fɔ̀ Ngwe ne engɔ́n 21Ǹchwɔ̀ ne endɔn byɛ mbɔn ma gwɔ̀n chwɔ enjitsɔ mbɔʼnga mbɔn ma ngo nde e zo. Ǹchwɔ̀ ne endɔn byɛ mbɔn ma ku̧uru enjitsɔ ngɛ mbɔʼnga mbɔn ba ngo tsɔʼrɔ. 22Ǹchwɔ̀ ne endɔn, mbɔn byɛ bɔ ma gwè angɔn, e tɔn angɔn, e ndwaʼ angɔn, ndɛʼ ekumu bɔɔbɔɔ endɔn mbɔʼnga mbɔn ma kìrì Ŋwɔ Gho ngɛ! 23E gli enɔ, mbɔn gɛnɛ angɔn, è bin ene egɛnɛ mbɔʼnga ǹtsara kɛ́ ya kɔʼ angɔn ekere. Na aŋu ètɛ sam angɔ a gɛrɛ le abwa ŋwaʼ zɔnɔ ekwa bàmɛnɛkɔn Ngwe. 24Bɛʼngɛ ànkwɔ̀nɔ̀ kɛ endɔn byɛ mbɔn me le àfɔ̀n enjitsɔ ngɛ, engɔn wɛwɛ. 25Ànkwɔ̀nɔ̀ kɛ́ endɔn byɛ mbɔn ma nde à zo enjitsɔ ngɛ, jɛbo yà zhu angɔn. Ànkwɔ̀nɔ̀ endɔn, byɛ mbɔn ma tsɔʼɔ enjitsɔ ngɛ, mbɔn ba ngo kɔn gɛ̀rɛ̀ ku̧u. 26Ànkwɔ̀nɔ̀ endɔn, byɛ bɔ gimkpaʼ ma ga ǹchwɔ̀ mbɔʼ mbɔn ngɛ. Enga ètɛ sam angɔ à gɛrɛ na ga ǹchwɔ̀ mbɔʼ bàmɛnɛkɔn andɔɔ.”

Sa doʼo bɔ m̀pɛ̀ʼ mbyɛ

(Mat 5:38-48; 7:12a)

27Bɛʼngɛ mmɛ ga endɔn, mbɔn byɛ mbɔn ma zɔ angu enjitsɔ ngɛ. Doʼo bɔ m̀pɛ̀ʼ mbyɛ, le ǹchwɔ̀ ebe abɔ byɛ e ma gwe awɛ ngɛ. 28Ndɛʼ m̀bɔ̀nɔ ebe abɔ byɛ e ma ndwàʼ awɛ ngɛ, gɛ̀rɛ̀ tsàʼrà Ngwe ato abɔ byɛ e ma le abwa é ndɛʼ eju engɛ̂ ngɛ. 29Ma gho deʼ fɛ m̀pɛʼɛ njɛ, ghɛɛbɛ eze tee shi è fɛ, gho deʼ nu ǹdi ye ngwo me ge ese ngɛ, chi engɔ yɛ efwɔ ngɛ ndɛ̀ʼ ebe engɔ. 30Gho deʼ bii ala deʼ engɛ̂, ndɛʼ aŋu, gho deʼ fee ala deʼ njɛ saara, ka biiri, 31le ebe abɔ deʼ na ngwo ma ke kpe e le engɛ̂ ngɛ. 32Ngwo me doʼo ma abɔ byɛ e ma doʼo awɛ ngɛ, ngwo sa le ǹtsara ene? Ka de mwɔ bɔ abwa bɔɔbɔɔ, e na doʼo ma abɔ byɛ e ma doʼo angɔ ngɛ. 33Ma mbɔn le ǹchwɔ̀ tye ebe abɔ byɛ e ma le ǹchwɔ̀ endɔn ngɛ, ǹtsara sa zeʼe endɔn ngɛ ene? Bɔ abwa bɔɔbɔɔ gɛrɛ ba le engɛ̂. 34Éngɛ ma mbɔn fla ela ndɛʼ tye ebe abɔ byɛ mbɔn ma zhuŋu kpe angɔ gɛrɛ ba fla é ndɛ̀ʼ endɔn ngɛ mbɔn sa le ǹtsara ngɛ ene? Bɔ abwa bɔɔbɔɔ gɛrɛ ba fla ela ndɛʼ ebe abɔ byɛ e ma zhuŋu kpe e ba ngo fla ndɛʼ endɔɔ ngɛ. 35Keʼ, ngà doʼo bɔ m̀pɛ̀ʼ mbyɛ gɛ̀rɛ̀ le ǹchwɔ̀ ebe angɔ, fla ala ne ma ke ǹtsara deʼ bo. Ma mbɔn le énde, mbɔn ba ngo le etɔ̧ɔrɔ kɛ́ deʼ, e gɛrɛ ma ngo zɔʼrɔ angɔn kpe bwɔ Ngwe Angwanìm! Nɛɛ kpe Ngwe ya nara abwa ebe bɔ byɛ e ne ma bɛ̀rɛ engɔ ngɛ bo mane bɔ ǹchù. 36Mbɔn sa klasɔn na àtɛ ngɔn ma klasɔn ngɛ.

Ke sa sɛ̀ʼ abɔ tsɛrɛ bo

(Mat 7:1-5)

37Ka abɔ tsɛrɛ sɛʼ mbɔʼtye Ngwe gɛrɛ na awɛ sɛʼ. Ke nyɛ è bɛ̀ʼrɛ̀ abɔ tsɛrɛ bo mbɔʼtye Ngwe gɛrɛ na awɛ nyɛ è bɛ̀ʼrɛ̀, dzɛrɛ abwa bɔɔbɔɔ abɔ abê Ngwe ya dzɛrɛ ànjɛ̂ abwa bɔɔbɔɔ. 38Ndɛʼ ebe abɔ be, Ngwe ya ndɛʼ engɛ̂ gɛrɛ. Éŋwaʼa Ngwe ye ngo ndɛʼ engɛ̂ a me shwe sa tu. Ngwe wa mò anjɛ efwɔ ala yɛ ngwo mo abɔ abê ngɛ. 39Éngɛ Yeso ga nklama timi fɔnɔ ebe angɔ kpe, “Àfò aghɔɔ ke né tee ǹjì ebe àfò aghɔɔ tsɛrɛ bo, mala è tse embè, shi angɔ bɔ fyee ba turu efwɔ ebla. 40Tsɛ̀ʼ gho bɛ̀ɛrɛ abwa deʼ me fɔɔ àtee abwa mɔ bo. Bɛʼngɛ, gho bɛ̀ɛrɛ abwa shi mɛ̀ɛrɛ afwɛʼ mɔ, è wa ngo mwɔ na àtee abwa engɔ nɔ. 41Enji yɛ ngwo ma zamma zɔ anyɛʼ ńchiri aghɔɔ ghongwa ngwɛ shi ne ma zɔ aklibi chwâ ènjɛ̂ eghɔɔ bo ngɛ ne ga kpe ayɛ? 42Ngwo we né ga ebe ghongwa ngwɛ kpe ‘Àgho, shi mmɛ chi chwâ aghɔɔ njɛ’ shi ne me zɔ aklibi chwâ efwɔ ènjɛ̂ eghɔɔ bo ene? Mbɔn bɔ ndooro aghɔɔ, dye chi aklibi chwâ ènjɛ̂ aghɔɔ mbɔʼtye ngwo kli zɔ ńchiri eghɔɔ ghongwa ngwɛ anchwɔnchwɔ dye sa chi.”

Azɔd mane enta mɔ

(Mat 7:16-20; 12:33-35)

43Azɔd ǹchwɔ̀ ke né kla enta bɔɔbɔɔ bo. Azɔd bɔɔbɔɔ gɛrɛ ke né kla enta ǹchwɔ̀ bo. 44E na nɛɛ azɔd ene enta byɛ a ma kla ngɛ. Ngwo ke ma hlò akla ene ńtwɔn bo. Ngwo gɛrɛ ke né dù olonji ene azɔd bwɔ andwɔb bo. 45Gho ǹchwɔ̀ na ga ma ǹchwɔ̀ nyɛ̀rɛ̀ zèʼe ene atim ǹchwɔ̀ yɛ efwɔ etaa ngɔ ngɛ mbɔʼnga eklo na ga me engɔ wɛ e me shwe efwɔ etaa ngɛ.

Bàbyɛ ndɔrɔ fyee

(Mat 7:24-27)

46Enji yɛ mbɔn ma zɔʼrɔ angu kpe Masakɛ shi ne ma le aŋu mmɛ ma ga ngɛ bo ne ga kpe ayɛ? 47Egho wɛ e ma zeʼe ena ma zhuru ega ngu gɛ̀rɛ̀ ma le ngɛ, mmɛ wa tee endɔn m̀pè gho wɛ engɔ mwɔ ngɛ. 48Engɔ ne mwɔ ne egho wɛ a ma ke byɛ ndɔ mɔ, e tɔ afwɔ a nyii a chwâ, e chi etirindɔ mɔ edɔm ekob ngɛ. Ndim shwe nyii efwɔ ndɔ yɛ, è ne ma njiʼri amɔ afwɔ yɛ bo mbɔʼnga â ne byɛ anchwɔnchwɔ. 49Bɛʼngɛ egho wɛ e ma zo ega ngu ne ma le bo ngɛ ne egho wɛ à byɛ ndɔ mɔ ne me chi etirindɔ bo ngɛ, awurɔmbò nyii efwɔ, è mu ekyɛ ŋwaʼ, è kla a chwâ wuuu.

Currently Selected:

Luk 6: nbt

Highlight

Copy