Luk 4

E kwa̧ʼra Yeso

(Mat 4:1-11; Mak 1:12, 13)

1Aŋu Yeso à ghɛ́ɛbɛ eji Joodan ngɛ, Azhwɛɛrɛ pɛ me shwe ekwa engɔ, éngɛ Azhwɛɛrɛ gbee engɔ ngɔ̀ɔ edɔm eguńked. 2Engɔ à tsɔmɔ efwɔ enji èsama fyee, asatan kwa̧ʼra engɔ. Engɔ a ke nde ala deʼ efwɔ enji bɔnɔ bo. Éngɛ aŋu enji bɔnɔ a sa ye ngùdu ngɛ, nchwɔrɔ ngɔ sa gwɔ̀n. 3Éngɛ asatan ga ebe Yeso kpe, “Mala ngwo mwɔ ŋwɔ Ngwe, ga ebe etye zɔnɔ shi e firi ǹgoŋ.” 4Éngɛ Yeso gíì kpe, “E be ŋwɛʼrɛ efwɔ aŋwɛʼrɛ Ngwe kpe, gho ke ma tsɔmɔ tye me ene ǹgoŋ bo.” 5Éngɛ asatan nu engɔ ngɔ̀ɔ edɔm egu à me tɛbɛ ngɔɔ ekere àkɛ ngɛ, è tam tee ebɛ gimkpaʼ byɛ â me mwɔ efwɔ ese ngɛ 6è gâ ebe engɔ kpe, “Mmɛ wa ndɛʼ ekama angɔ gimkpaʼ mane eghɔ kɛ́ angɔ engɛ̂ mbɔʼnga â shi ndɛʼ ela bɔnɔ gimkpaʼ ena, éngɛ mmɛ gɛrɛ wa ndɛʼ ebe gho wɛ mmɛ me ke ngɛ. 7Éngɛ mala ngwo ghɔ angu, shi ela bɔnɔ gimkpaʼ ba ngo mwɔ àmbyɛ” 8Yeso gíì kpe, “E be ŋwɛʼrɛ kpe ngà ghɔ Àsaase Ngwe njɛ gɛ̀rɛ̀ sa fwɛʼ tye ebe engɔ gho zhiʼ” 9Éngɛ asatan nu Yeso è ngɔɔ a Jerusalɛm, è ngɔɔ tam nè engɔ edɔm ndɔngwe kɛ̀, è ga ebe engɔ kpe, “Mala ngwo ma ŋwɔ Ngwe, enga nyɛrɛ ekere anɔ è chimmi a chwâ. 10Mbɔʼnga e be ŋwɛʼrɛ kpe ‘Ngwe yà ndɛʼ etsɛrɛ ebe engere kpe e kɔŋɔ awɛ 11angɔ ba ngo beʼ awɛ ekere mbɔʼtye ngwo ne duru alo njɛ ene etye bo.’ ” 12Yeso gíì kpe, “Aŋwɛʼrɛ Ngwe ye ga kpe ke sa kpèrè Àsaase Ngwe njɛ bo.” 13Èndzobo chɛ asatan à shi mɛ̀ɛrɛ èkwà̧ʼrà bɔnɔ gimkpaʼ ngɛ, engɔ saara Yeso, sa kɔʼɔ endzobo etsɛrɛ yɛ engɔ ma wu le ngɛ.

Yeso klada afwɛʼ mɔ a Galilii

(Mat 4:12-17; Mak 1:14, 15)

14Yeso à wu ngɔ̀ɔ a Galilii ene ekama Azhwɛɛrɛ. Ekɔn mbɔʼ engɔ sɛ̂ʼ efwɔ ebɛɛ ebɛ gimkpaʼ. 15Engɔ tee abwa efwɔ ndɔrɔngwe bɔ Israel, bɔ gimkpaʼ ma bɔ̀nɔ̀ engɔ.

E tɔn Yeso a Nazarɛd

(Mat 13:53-58; Mak 6:1-6)

16Engɔ à ngɔɔ a Nazarɛd, afwɔ yɛ â kpee engɔ ngɛ, à shi anji ku̧ru bɔ Juu, engɔ ngɔɔ efwɔ etsam abɛ na aŋu à shi ma atiʼi ngɔ ngɛ. Éngɛ engɔ tam ekere, è zɔʼrɔ antiri afwɔ deʼ. 17Â ndɛʼ aŋwɛʼrɛ fudu Azaya, ghontɔm Ngwe ngɛ ebe Yeso. Aŋu engɔ à zɛɛrɛ ngɛ, engɔ zɔ afwɔ yɛ e me ŋwɛʼrɛ kpe 18“Azhwɛɛrɛ Masakɛ ye mwɔ nè mmɛ, mbɔʼnga engɔ shi zhwaʼa angu kpe mmɛ sa sɛ̀ɛrɛ̀ ekɔn ǹchwɔ̀ ebe bɔ ndzaŋa, engɔ shi saa angu kpe mmɛ toʼro ebe bɔ dzɔm kpe â shi pweere angɔ, gɛrɛ tòʼrò ebe àfò aghɔɔ kpe angɔ zɔ akwâ, gɛ̀rɛ̀ zɛɛrɛ abɔ ngɔ byɛ e ma ngbèdè angɔ ngɛ. 19E gɛrɛ tòʼrò ebe bɔ kpe endzobo a shi koʼo ebe Ngwe é tee eklasɔn mɔ.” 20Éngɛ engɔ fudu aŋwɛʼrɛ yɛ è ndɛʼ achim ebe abɔ byɛ à ma aŋu ngɛ, è tsɔmɔ a chwâ. Éngɛ bɔ gimkpaʼ byɛ a me efwɔ ndɔngwe ngɛ tɛʼ aghɔɔ tye ene engɔ. 21Engɔ klada sa ga ebe angɔ kpe, “Antiri aŋwɛʼrɛ Ngwe zɔnɔ mbɔn zo nɔ a shi gli éŋwaʼa ànchwɔ̀.” 22Bɔ gimkpaʼ â ga abwa ǹchwɔ̀ mbɔʼ engɔ gɛrɛ kɔ̀n ene abwa nchwɔnchwɔ yɛ â gli zeʼe aghoboklo engɔ ngɛ. Éngɛ angɔ sa biiri kpe, “Ewùnɔ ke ma ŋwɔ Yɔsɛf bo?” 23Yeso gâ ebe angɔ kpe, “Mmɛ we zhuŋu kpe mbɔn ba ngo sa gà nklama timi fɔnɔ ena kpe, ‘Ǹgàkyè, dye gli awɛ.’ Mbɔn gɛrɛ ba wu ga ena kpe mmɛ fwɛʼ efwɔ abɛ ndza nkirinkin ma abwa ŋwaʼ yɛ mbɔn à zo kpe mmɛ à fwɛʼ a Kapɛnaum ngɛ.” 24Yeso zhiiri kpe, “Mmɛ ga éŋwaʼa endɔn ghontɔm Ngwe deʼ ke shi nyii efwɔ abɛ mɔ, bɔ ngɔ nu engɔ anchwɔnchwɔ bo.” 25Mbɔn zhuru ena, ewunɔ ne éŋwaʼa kpe à ne efwɔ endzobo Elayja nɔ, eyeti me ghɛʼ efwɔ abɛ Israel. M̀bò à tɔn é kla ezob e ngwe efwɔ enɔ̂m tɛd mane abɛɛ, éngɛ ende me tsɛʼ bo, chwɔ kamakam me sɛ̀ʼ efwɔ chwâ yɛ gimkpaʼ. 26Éngɛ â ke tɔm Elayja ebe gho ŋwaʼ abɛ Israel bo. Bɛʼngɛ à tye me ebe eyeti deʼ a ma tsɔmɔ a Zarafad efwɔ antiri abɛ Sidɔn ngɛ. 27Éngɛ bɔ akɛkɛ byɛ â ma tsɔmɔ efwɔ abɛ Israel endzobo Elaysha, ghontɔm Ngwe ngɛ â na zɔ ǹgoʼ ene akɔ̂m, bɛʼngɛ â ke gli gho deʼ wɛ a me zeʼe efwɔ abɛ Israel ngɛ bo, à tye ma Naaman wɛ à me zeʼe efwɔ abɛ Sirya ngɛ. 28Èndzobo chɛ abɔ byɛ â me efwɔ ndɔ tsaʼra Ngwe bɔ Israel â zɔ ebwa wunɔ ngɛ, eboo angɔ kwaʼ. 29Angɔ à tam ekere e gòo Yeso efwɔ abɛ saa ese, gɛ̀rɛ̀ nu engɔ ngɔɔ edɔm egu deʼ wɛ â me byɛ abɛ àmɔ̀ ebara aŋu ngɛ. Angɔ a ne ke kpe mbɔɔ bɛʼɛ engɔ saa ene m̀bɛ̀rɛ̀. 30Bɛʼngɛ, engɔ zhiri efwɔ aghɛɛghɛɛ enɔrɔ bɔ gɛ̀rɛ̀ ngɔɔ ene amɔ aghɛʼ.

Yeso fli Azhwɛɛrɛ bɔɔbɔɔ deʼ saa ese

(Mak 1:21-28; Mak 1:21-28)

31Éngɛ Yeso nyɛrɛ kla ngɔ̀ɔ a Kapɛnaum efwɔ antiri abɛ Galilii, engɔ klada sa tee abwa ebe bɔ anji ku̧ru bɔ Ju. 32Angɔ à kɔn ghɛʼ ene aghɛʼ yɛ engɔ à ma tee abwa ngɛ, mbɔʼnga ekɔn wɛ engɔ à ma tee ngɛ ekama à na anyi. 33Gho deʼ à ne efwɔ ndɔ tsaʼra Ngwe, aŋu engɔ à ma tee abwa ngɛ, wɛ azhwɛɛrɛ bɔɔbɔɔ à me mwɔ efwɔ ekwa engɔ ngɛ. Egho wɛ ku̧u ene etsoʼ mɔ gimkpaʼ kpe, 34“Wa mmɛ ngà, Yeso gho Nazarɛd, ngwo na ke yɛ endyɛɛ? Ngwo ne zeʼe é nyiimi angbɛɛ? Mmɛ we nɛɛ m̀pè gho yɛ ngwo mwɔ ngɛ. Ngwo ne engɔ wɛ è me pɛ à me saa ma Ngwe ngɛ.” 35Éngɛ Yeso gâ ebe azhwɛɛrɛ yɛ ene ekama kpe, “Ngà ba. Enga gli ekwa engɔ!” Éngɛ Azhwɛɛrɛ bɔɔbɔɔ yɛ bɛʼ egho wunɔ ndwa a chwâ efàarà angɔ bɔ gimkpaʼ, gɛ̀rɛ̀ gli ese ne ge abyɛ deʼ ene engɔ bo. 36Bɔ gimkpaʼ à kɔn, sa gà àmɔ̀ àmɔ̀ kpe, “Ne m̀pèrè aga tse tsɔnɔ! È na gà ebe ezhwɛɛrɛ bɔɔbɔɔ ene ekama, e glini!” 37Éngɛ ekɔn mbɔʼ Yeso sɛ̂ʼ kɛɛrɛ efwɔ antiri afwɔ abɛ yɛ gimkpaʼ mbɔʼ abwa yɛ engɔ à ma fwɛʼ ngɛ.

Yeso gli bɔ akɛkɛ

(Mat 8:14-17; Mak 1:29-34)

38Éngɛ Yeso nyɛrɛ a ndɔ tsaʼra Ngwe gɛ̀rɛ̀ ngɔɔ a ndɔ Shimun. Enjitsɔ, efɔɔ kamakam deʼ à na ndɛʼ ǹgoʼ ebe aghoo Shimun, éngɛ engɔ bii Yeso kpe è le shi ekwa ngɔ bwada. 39Yeso gunu amɔ edɔm aye wunɔ è bwe ebe efɔɔ wɛ, éngɛ efɔɔ wɛ tsɛddɛ ekwa ngɔ. Engɔ tam ekere ekyɛ ŋwaʼ gɛ̀rɛ̀ klada sa fwɛʼ ebe angɔ. 40Èndzobo chɛ etaranchwe à sa turu ngɛ, abɔ byɛ bwɛ bɔ gimkpaʼ byɛ â ma gwɔ̀n m̀pèrè eŋwan akɛkɛ ngɛ zeʼe ebe Yeso. Aŋu Yeso à tɛʼ ebwo mɔ ekwa gho ŋwàʼaŋwàʼ abwaʼ angɔ ngɛ, è gli angɔ. 41Ezhwɛɛrɛ bɔɔbɔɔ â gli akwa bɔ akɛkɛ, gɛ̀rɛ̀ sa flaba akwâ ga kpe, “Ngwo na ŋwɔ Ngwe!” Bɛʼngɛ, engɔ bwe ebe angɔ gɛ̀rɛ̀ ne ndɛʼɛ afwɔ kpe angɔ ga bo mbɔʼnga angɔ à ne nɛɛ kpe engɔ na Ǹtɔmzhwaʼa.

Yeso sɛɛrɛ ega Ngwe efwɔ ndɔngwe

(Mak 1:35-39)

42Èndzobo chɛ ese à sa kèʼ ngɛ, Yeso gli ngɔ̀ɔ ese ene afwɔ deʼ yɛ engɔ à ma aŋu gho zhiʼ ngɛ. Abɔ byɛ sa zhiri à zɛʼ engɔ. Èndzobo chɛ angɔ à bwɛn ene afwɔ yɛ Yeso à mwɔ ngɛ, angɔ à ke ndɛʼ afwɔ ebe engɔ kpe è nyɛrɛ abwaʼ angɔ bo. 43Éngɛ Yeso gâ kpe mmɛ wara sɛ̀ɛrɛ̀ ekɔn ǹchwɔ̀ efwɔ ebɛ tsɛrɛ mbɔʼtye mmɛ gɛrɛ sɛ̀ɛrɛ̀ ebe angɔ mbɔʼ ebwa m̀fɔ̀ Ngwe. Ne ebwa wɛ Ngwe à saa angu ngɛ. 44Éngɛ engɔ fɔɔ embè é sa sɛ̀ɛrɛ̀ ekɔn wunɔ efwɔ ndɔrɔ tsaʼra Ngwe abɛ Judeya.

Currently Selected:

Luk 4: nbt

Highlight

Copy