Luk 3

Eyɔɔ Andɛʼndim sɛɛrɛ ega Ngwe

(Mat 3:1-12; Mak 1:1-8; Eyɔ 1:19-28)

1Efwɔ anɔ̂m nùrù wum ǹchwɔ̀ tan yɛ Tiberyɔs à shi mwɔ Kaasa efwɔ abɛ Rom ngɛ, Ngwe saa Eyɔɔ ŋwɔ Zakariya nè ekɔn edɔm eguńked aŋu engɔ à mwɔ ngɛ. Endzobo ŋwaʼ zɔnɔ Pontyɔs Paylet à gɛrɛ na ato efwɔ abɛɛ abɛ Judeya, Hɛrɔd mwɔ ato abɛ Galilii, ghongwaanɔm ngɔ Firiboʼ gɛrɛ mwɔ ato efwɔ abɛ Ituraeya mane Trakonitis, Lisanyas gɛrɛ mwɔ ato abɛ Abilɛnɛ. 2Endzobo ŋwaʼ zɔnɔ Anas mane Kayfas mwɔ èngwa zhiri, Ngwe sàa ekɔn mɔ ebe Eyɔɔ ŋwɔ Zakariya. 3Éngɛ Eyɔɔ kɛɛrɛ ebɛ byɛ eba eji Joodan ngɛ sɔ̀, zhìn à sɛ̀ɛrɛ̀ ega Ngwe kpe, “Mbɔn waʼ abwa bɔɔbɔɔ è nu ndim é tee kpe mbɔn shi kobo eleabwa ndzɔn mbɔʼtye Ngwe dzɛd abwa bɔɔbɔɔ ndzɔn.” 4Ebwa wunɔ Eyɔɔ à ga nɔ â koʼokoʼo ene engɔ wɛ Àmɛnɛkɔn Ngwe Azaya à me ŋwɛʼrɛ kpe, “Ega deʼ wa gli à zeʼe eguńked! Ndeere akwâ ebe Masakɛ, todo ǹjìri ebe engɔ é zhiri anyi! 5Soo m̀blìʼrì akwâ gimkpaʼ, è nɔɔrɔ agu kpara mane àkɛ. Todo ǹjìri chɛ e me gudu ngɛ, è ndɔ̀ɔrɔ etonji 6mbɔʼtye bɔ gimkpaʼ yà ngɔɔ zɔ etyê Ngwe.” 7Ebaŋabɔ zeʼe ebe Eyɔɔ kpe è ndɛʼ ndim endɔɔ. Engɔ gâ ebe angɔ kpe, “Efee bɔnɔ, awɛ ga endɔn kpe mbɔn be né pɛ enyii yɛ Ngwe ma ngo sàa ngɛ? 8Mbɔn le abwa yɛ a ma tee kpe mbɔn shi waʼa abwa bɔɔbɔɔ ngɛ, ankɔmɔ e sa tsɔmɔ gà kpe ayɛʼyɛʼ mbyɛɛ na bwɔ Abraham wɛ enyii Ngwe ne me né zeʼ akwa njɛɛ bo ngɛ. Shi me toʼro endɔn kpe Ngwe ye né ndèerè bwɔ ebe Abraham ene atye zɔnɔ. 9Edzaa shi enji azɔd, azɔd yɛ a ne ma kla enta ǹchwɔ̀ bo ngɛ, e yà gbɛ̀ egha è ndwa efwɔ edzɔwu.” 10Ebaŋabɔ wɛ biiri ebe engɔ kpe, “E shi mwɔ enɔ, mbyɛɛ le ene ngà?” 11Eyɔɔ gíì ebe angɔ kpe, “Egho wɛ me le ǹdiri fyee ngɛ, è ndɛʼ ebi ebe egho wɛ ne me le bo ngɛ, egho wɛ gɛrɛ me le ende ngɛ, è gɛ̀bbɛ̀ nè abɔ byɛ e ne me le bo ngɛ.” 12Bàshuru aŋwɛ deʼ à zeʼ é nu ndim è biiri ebe engɔ kpe, “Àtee abwa, mbyɛɛ le ene?” 13È gâ ebe angɔ kpe, “Mbɔn ke shuru aŋwɛ fɔɔ aŋu e me tsɛrɛ ngɛ bo.” 14Abɔ ebiri deʼ biiri ebe engɔ kpe, “Mbyɛɛ mɔ mbyɛɛ le ene?” Engɔ gíì kpe, “Ke nu ekɛb gho deʼ bli bo, gɛ̀rɛ̀ ne sa gà andɔɔ mbɔʼ bɔ bo, ankɔmɔ ngɛ ngà gɛnɛ awɛ ene ala e ma nɛ̀rɛ̀ awɛ anyi ngɛ.” 15Enyɛrɛ ene abwa yɛ Eyɔɔ à ga ngɛ, bɔ klada sa bùʼu sa zhuŋu kpe ke engɔ ba na Ǹtɔmzhwaʼa yɛ ntsɔ ma kɔʼ ngɛ. 16Eyɔɔ gíì ebe angɔ bɔ gimkpaʼ kpe, “Mmɛ na gè angɔn enjitsɔ me eji ene nu ndim, gho tsɛrɛ wa zeʼe me fɔɔ angu, wɛ mmɛ ke koʼro é zɛɛ anduʼbla ngɔ bo, engɔ wa zeʼe é ndɛʼ endɔn ma Azhwɛɛrɛ Ngwe mane ewu. 17Engɔ we bere akye mɔ abwo é kùurù elankɔn é tɛʼ aba, è twɔ̀n eghob efwɔ edzɔwu kenyim.” 18Eyɔɔ à ndɛʼ atɛʼɛ ebe angɔ ene eghɛʼnji akɛkɛ gɛ̀rɛ̀ sɛ̀ɛrɛ̀ ǹtɔm ǹchwɔ̀ ebe angɔ. 19Eyɔɔ à gɛrɛ kwɔ̀nɔ̀ Hɛrɔd wɛ à mwɔ ato efwɔ abɛ ngɛ mbɔʼnga à nu Hɛrɔdyas eye ghongwaanɔm mɔ ene aye mane abwa bɔɔbɔɔ tsɛrɛ yɛ engɔ à ma le ngɛ. 20Ebwa bɔɔbɔɔ tsɛrɛ wɛ Hɛrɔd à le ngɛ na aŋu à saa Eyɔɔ a ndɔdzɔm ngɛ.

Yeso nu ndim

(Mat 3:13-17; Mak 1:9-11)

21Èndzobo chɛ bɔ gimkpaʼ à shi nu ndim ebe Eyɔɔ ngɛ, Yeso gɛrɛ zeʼe mɔ̀ nu ndim. Aŋu Yeso à nu ndim ngɛ, è klada sa tsàʼrà Ngwe. Aŋu engɔ à ma tsàʼra Ngwe ngɛ ezob fuʼ. 22Azhwɛɛrɛ Ngwe kla ne ḿblɔ̂m nɔ, è bara edɔm ato ngɔ, ega gli zeʼe ekere gà kpe, “Ngwo na ŋwɔ etaa ngu, mmɛ we gɛnɛ angu ene ngwo.”

Ètɛ sam Yeso

(Mat 1:1-17)

23Yeso à klada afwɛʼ mɔ èndzobo chɛ à mwɔ ne enɔ̂m asamabi tɛʼ wum nɔ. Bɔ à na bwaʼ kpe engɔ na ŋwɔ Yɔsɛf, Yɔsɛf wɛ a ma ŋwɔ Hɛli ngɛ, 24Hɛli wɛ à ma ŋwɔ Malthad ngɛ, Malthad wɛ à ma ŋwɔ Lɛvi ngɛ, Lɛvi wɛ à ma ŋwɔ Mɛlchi ngɛ, Mɛlchi wɛ à ma ŋwɔ Jannay ngɛ, Jannay wɛ à ma ŋwɔ Yɔsɛf ngɛ, 25Yɔsɛf wɛ à ma ŋwɔ Matatyas ngɛ, Matatyas wɛ à ma ŋwɔ Emɔs ngɛ. Emɔs wɛ à ma ŋwɔ Nahum ngɛ. Nahum wɛ à ma ŋwɔ Esli ngɛ. Esli wɛ à ma ŋwɔ Nagay ngɛ. 26Nagay wɛ à ma ŋwɔ Maat ngɛ. Maat wɛ à ma ŋwɔ Matatyas ngɛ. Matatyas wɛ à ma ŋwɔ Sɛmɛn ngɛ, Sɛmɛn wɛ à ma ŋwɔ Josɛk ngɛ. Josɛk wɛ à ma ŋwɔ Joda ngɛ. 27Joda wɛ à ma ŋwɔ Joanan ngɛ. Joanan wɛ à ma ŋwɔ Rɛsa ngɛ. Rɛsa wɛ à ma ŋwɔ Zerubabɛl ngɛ, Zerubabɛl wɛ à ma ŋwɔ Shɛltyɛl ngɛ. Shɛltyɛl wɛ à ma ŋwɔ Nɛri ngɛ. 28Nɛri wɛ à ma ŋwɔ Mɛlchi ngɛ, Mɛlchi wɛ à ma ŋwɔ Adi ngɛ. Adi wɛ à ma ŋwɔ Kosam ngɛ. Kosam wɛ à ma ŋwɔ Elmadam ngɛ. Elmadam wɛ à ma ŋwɔ Er ngɛ. 29Er wɛ à ma ŋwɔ Yashwa ngɛ. Yashwa wɛ à ma ŋwɔ Elieza ngɛ. Elieza wɛ à ma ŋwɔ Jorim ngɛ. Jorim wɛ à ma ŋwɔ Matat ngɛ. Matat wɛ à ma ŋwɔ Lɛvi ngɛ. 30Lɛvi wɛ à ma ŋwɔ Shimyɔn ngɛ. Shimyɔn wɛ à ma ŋwɔ Juda ngɛ. Juda wɛ à ma ŋwɔ Yɔsɛf ngɛ, Yɔsɛf wɛ à ma ŋwɔ Jonam ngɛ. Jonam wɛ ma ŋwɔ Elyakim ngɛ. 31Elyakim wɛ ma ŋwɔ Mɛlea ngɛ. Mɛlea wɛ ma ŋwɔ Mɛnna ngɛ, Mɛnna wɛ à ma ŋwɔ Matata ngɛ. Matata wɛ à ma ŋwɔ Natan ngɛ. Natan wɛ à ma ŋwɔ Devid ngɛ. 32Devid wɛ à ma ŋwɔ Jese ngɛ, Jese wɛ à ma ŋwɔ Obɛd ngɛ. Obɛd wɛ à ma ŋwɔ Boaz ngɛ, Boaz wɛ à ma ŋwɔ Salmɔn ngɛ. Salmɔn wɛ à ma ŋwɔ Nashɔn ngɛ. 33Nashɔn wɛ à ma ŋwɔ Aminadab ngɛ, Aminadab wɛ à ma ŋwɔ Admin ngɛ. Admin wɛ à ma ŋwɔ Arni ngɛ. Arni wɛ à ma ŋwɔ Hɛzrɔn ngɛ. Hɛzrɔn wɛ à ma ŋwɔ Pɛrɛz ngɛ. Pɛrɛz wɛ à ma ŋwɔ Juda ngɛ. 34Juda wɛ à ma ŋwɔ Yakɔb ngɛ, Yakɔb wɛ à ma ŋwɔ Ayzik ngɛ. Ayzik wɛ à ma ŋwɔ Abraham ngɛ. Abraham wɛ à ma ŋwɔ Tɛra ngɛ. Tɛra wɛ à ma ŋwɔ Nahɔɔ ngɛ. 35Nahɔɔ wɛ à ma ŋwɔ Sɛrug ngɛ. Sɛrug wɛ à ma ŋwɔ Reu ngɛ. Reu wɛ à ma ŋwɔ Pɛlɛg ngɛ. Pɛlɛg wɛ à ma ŋwɔ Eba ngɛ. Eba wɛ à ma ŋwɔ Shɛla ngɛ. 36Shɛla wɛ à ma ŋwɔ Kaynan ngɛ. Kaynan wɛ à ma ŋwɔ Arfazad ngɛ. Arfazad wɛ à ma ŋwɔ Shɛm ngɛ. Shɛm wɛ à ma ŋwɔ Noa ngɛ. Noa wɛ à ma ŋwɔ Lamɛk ngɛ. 37Lamɛk wɛ à ma ŋwɔ Mɛtusɛla ngɛ. Mɛtusɛla wɛ à ma ŋwɔ Enɔk ngɛ. Enɔk wɛ à ma ŋwɔ Jarɛd ngɛ. Jarɛd wɛ à ma ŋwɔ Mahalaleel ngɛ. Mahalaleel wɛ à ma ŋwɔ Kenan ngɛ. 38Kenan wɛ à ma ŋwɔ Enɔsh ngɛ. Enɔsh wɛ à ma ŋwɔ Sɛt ngɛ, Sɛt wɛ à ma ŋwɔ Adam ngɛ. Adam wɛ à ma ŋwɔ Ngwe ngɛ.

Currently Selected:

Luk 3: nbt

Highlight

Copy