Luk 15

Ǹglɔ̀ yɛ à nyɔɔ ngɛ

(Mat 18:12-14)

1À shi anji deʼ bàfɔ aŋwɛ akɛkɛ mane bɔ bɔɔbɔɔ zeʼe ebe Yeso é zhuru ega engɔ. 2Bɔ Farisii mane bàtee atsɛrɛ klada sa kumu gà kpe, “Egho wunɔ na zhiri nè bɔ bɔɔbɔɔ gɛ̀rɛ̀ nde né angɔ?” 3Éngɛ Yeso gà nklama timi fɔnɔ ebe angɔ kpe, 4“Nu kpe gho bi abwaʼ ndzɔn we le ǹglɔ̀rɔ̀ ekobi, ebi nyim. Engɔ wa le ene? Engɔ ke ma shi etse èsama kwɛ̀ tɛʼ wum ǹchwɔ̀ kɔɔ a ngɛ, è ngɔɔ zɛʼɛ engɔ yɛ à me nyim ngɛ bwɛn èndzobo chɛ è ma zɔ ngɛ bɔ? 5Èndzobo chɛ engɔ zɔ ngɛ, è gɛnɛ amɔ, nu beʼ ambɔ̀ʼ. 6Èndzobo chɛ engɔ klo ngɛ, è zɔʼ asɔrɔ mɔ mane bɔ eshimikwa mɔ gà ebe angɔ kpe “Mmɛ we gɛnɛ angu mbɔʼnga mmɛ shi zɔ ǹglɔ̀ ndza yɛ à me nyɔɔ ngɛ. Ntsɔ gɛnɛ abɔ.” 7Nkirinkin mmɛ ga endɔn, egɛnɛ kɛ́ ya ngo mwɔ ezob mbɔʼ gho abwa bɔɔbɔɔ ŋwaʼ wɛ è kobo etaa mɔ ngɛ fɔɔ engɔ yɛ e ma mwɔ mbɔʼ bɔ ǹchwɔ̀ èsama kwɛ̀ tɛʼ wum ǹchwɔ̀ kɔɔ byɛ â shi nara ngɛ.

Akapɛ wɛ à nyɔɔ ngɛ

8Kà, nu kpe aye deʼ we le ekapɛ mɔ wum, ebi nyɔɔ. È na le ene? È ke ma chɛ anâm è kuuru amɔ è zeʼe ndɔ mɔ bwɛn èndzobo chɛ è ma zɔ ngɛ bo? 9Engɔ zɔ, è zɔʼ asɔrɔ mɔ mane bɔ eshimikwa afwɔbi gà ebe angɔ kpe, “Mmɛ we gɛnɛ angu ghɛʼ, mmɛ shi zɔ akapɛ ngu à me nyɔɔ ngɛ. Ntsɔ gɛnɛ abɔ.” 10Nkirinkin, mmɛ ga endɔn, egɛnɛ kɛ́ ya ngo mwɔ ezob ebe engere mbɔʼ gho abwa bɔɔbɔɔ ŋwaʼ wɛ è kobo etaa mɔ è bɛ̀rɛ Ngwe ngɛ fɔɔ engɔ wɛ e mwɔ mbɔʼ bɔ ǹchwɔ̀ byɛ â shi nara ngɛ.

Aŋwɔanɔm wɛ à nyɔɔ ngɛ

11Yeso fɔɔ embè gà kpe, “Gho deʼ à na aŋu me le bwɔanɔm fyee. 12Anji deʼ, ekparakpara ngɛ ga kpe ‘Àtɛ, ndɛʼ engu eklo etiʼi.’ Éngɛ àtɛ wɛ gɛbbɛ etiʼi mɔ gimkpaʼ ebe bwɔanɔm mɔ fyee ngɛ. 13Enji deʼ sa fɔɔ, eŋwɔ wɛ fɛ̀nnɛ àmɔ ela ngɛ, è nyɔɔ nè ekɛb wɛ. Engɔ à ngɔɔ abɛ deʼ ezhin dɔɔdɔɔ, tsɔmɔ aŋu, è nde ekɛb wɛ gimkpaʼ ene aghɛʼnji bɔɔbɔɔ. 14Aŋu à tsɔŋɔ ekɛb wɛ gimkpaʼ ngɛ, azaa nyii abɛ yɛ ndzaŋa bere engɔ. 15Éngɛ engɔ nyɛrɛ ngɔɔ é fwɛʼ ebe gho abɛ yɛ bi. Egho wɛ saa engɔ ekwa mɔ é sa ndee kurunyɛm ngɔ. 16Eŋwɔ wɛ ma ke aghɛʼnji é pèʼrè etsɛ̀ʼela byɛ kurunyɛm â ma nde ngɛ é nde, me tsɛʼ gho é ndɛʼ ebe engɔ bo.” 17É ngùdù, azɔm ngɔ zeʼe, è ga egha mɔ kpe, “Bɔ afwɛʼ àtɛ ngu be ghɛʼ, e ba le ende é nde e zo, è tɔnnɔ, mmɛ wa anɔ ma ku ene chwɔ. 18Mmɛ wa ghɛ̀ɛbɛ ngɔɔ ebe àtɛ ngu gà ebe engɔ kpe, ‘Àtɛ, mmɛ shi nyim ebwa ebe Ngwe mane engɛ̂. 19Mmɛ ke wu koʼro ebe bɔ é zɔʼrɔ angu ene ŋwɔ ngwɛ bo. Nu angu ka de mwɔ na gho afwɛʼ ngwɛ bi nɔ.’ 20Éngɛ, à tam nu ǹjì è ngɔɔ ebe àtɛ mɔ. À bli abɛɛ tsɛrɛ, àtɛ zɔ engɔ, sɔn shwe efwɔ etaa engɔ, è dɔrɔ bàa ŋwɔ mɔ. 21Eŋwɔ wɛ kpe ‘Àtɛ, mmɛ shi nyim ebwa efàarà Ngwe mane engɛ̂, mmɛ ke me wu koʼro ebe bɔ é zɔʼrɔ angu ene ŋwɔ ngwɛ bo.’ ” 22Bɛʼngɛ àtɛ wɛ zɔʼ bɔ afwɛʼ mɔ gà ebe angɔ kpe, “Mbɔn zamma chi ǹdi yɛ è me nara fɔɔ etse gimkpaʼ ngɛ zeʼe nɔ̀ɔ engɔ anyi, è ge fingara ene etoobwo ngɔ, è ge ebla elo ngɔ, 23shi ngɔɔ chi azɛʼ m̀pwɔ̀ yɛ ntsɔ me shi ngɛ zhu, ntsɔ nde gɛnɛ abɔ. 24Eŋwɔ ngu nɔ à ne ku, è shi wu zhwɛm, à ne nyimi e wu a wu zeʼe.” Ekɔm fɔɔ embè. 25Abwa zɔnɔ â na fɔɔ ngɛ eŋwɔ tɛbɛ ngɛ mwɔ ekwa. È sa klo, éngɛ sa zamma bwɛrɛ a ndɔ ngɛ, è zɔ e ma kwɔrɔ ma biri. 26Éngɛ engɔ zɔʼ gho afwɛʼ bi biiri kpe ne ebwa yɛ e enduʼndɔ? 27Egho afwɛʼ wɛ gii kpe, “Eghongwa ngwɛ ngɛ shi ghɛɛbɛ zeʼe, àtɛ ngwɛ chi azɛʼ m̀pwɔ̀ yɛ è zhu ebe engɔ mbɔʼnga eŋwɔ wɛ à zeʼe anchwɔnchwɔ gɛ̀rɛ̀ ma kama.” 28Aŋu engɔ à zo ngɛ nɔ, eŋwɔ tɛbɛ wɛ bɔɔ etaa è kyee amɔ anji aŋu, àtɛ mɔ zeʼe kla engɔ bii kpe è zeʼe a ndɔ. 29Bɛʼngɛ, è gii ebe àtɛ mɔ kpe, “Kɔʼɔ anɔ, efwɔ enɔ̂m akɛkɛ byɛ mmɛ shi tsoro é fwɛʼ engɛ̂ ene etaa mfu gimkpaʼ, mmɛ ke shi le kèzobwa engɛ̂ bo. Ngwo ke shi ndɛʼ ala deʼ ena bo, ka de mwɔ ábu kpe mmɛ gɛnɛ angu nè asɔrɔ ndza bo. 30Bɛʼngɛ, eŋwɔanɔm etaa ngwɛ wunɔ à nu etiʼi ngwɛ ngɔɔ tsɔŋɔ nè àndese, è shi ghɛɛbɛ zeʼe enjitsɔ, ngwo shi chi azɛʼ m̀pwɔ̀ zhu ebe ngɔ.” 31Àtɛ wɛ gii kpe, “Ŋwɔ ngu, ngwo wa anɔ nè mmɛ akyɛ gimkpaʼ, ela gimkpaʼ byɛ mmɛ me le ngɛ gɛrɛ mwɔ àmbyɛ. 32Bɛʼngɛ ntsɔ aye kɛʼ ekɔm ma gɛnɛ abɔ mbɔʼnga ghongwa ngwɛ wunɔ à shi ku è shi wu zhwɛm, à ne nyim ebɔ ntsɔ shi wu zɔ.”

Currently Selected:

Luk 15: nbt

Highlight

Copy