Luk 16

Abidi gho afwɛʼ

1Yeso gâ ebe bɔ bɛɛrɛ abwa mɔ kpe, “Gho ekɛb deʼ à ne le gho kɛ̀ ene bɔ afwɛʼ mɔ wɛ â ma kɔʼ ela ngɔ ngɛ. Gho ekɛb wɛ zo kpe gho afwɛʼ ngɔ wa tsɔŋɔ ekɛb ngɔ. 2Éngɛ engɔ zɔʼ engɔ è ga ebe engɔ kpe ‘Ne m̀pèrè abwa tse mmɛ ma zo mbɔʼ ngwo nɔ? Ndɛʼ egiiga ene ela mbu byɛ ngwo ma kɔʼ ngɛ mbɔʼnga ngwo ke ma wu é kɔʼ ela mbu bo’ 3Gho kɛ̀ wɛ ga efwɔ etaa mɔ kpe ‘Masa ngu wa ngo chi angu ene afwɛʼ, mmɛ wa shi le ene ngà? Mmɛ ke le ekama é tɔ akwâ bo gɛrɛ me eju ena é yɛrɛ bii. 4Enjitsɔ mmɛ we nɛɛ ebwa é le! Èndzobo chɛ mmɛ nyiimi afwɛʼ ndza ngɛ, mmɛ wa ngo le asɔrɔ yɛ à ma ngo shi angu efwɔ ndɔrɔ amɔ ngɛ.’ 5Éngɛ engɔ zɔʼrɔ akumu abɔ byɛ à me klini ekɛb Masa mɔ ngɛ. Engɔ biiri ebe gho mbèmbè kpe ‘Ngwo ne klini ekɛb mɔ ebe Masa ngu?’ 6Egho wɛ gii kpe ‘Mbè we klini ekarashim ngud olif ako fwɔ̧ɔ.’ Gho afwɛʼ ga ebe engɔ kpe ‘tsɔmɔ a chwâ è ŋwɛʼrɛ kpe ako kwɛ̀.’ 7Gho afwɛʼ wɛ wu biiri ebe egho tsɛrɛ kpe ‘Ngwo ne klini ayɛ? Engɔ gii kpe mbè we klini ǹdeʼre ǹgoŋ tɔɔshin bibi’ Gho afwɛʼ wɛ wu gii ebe engɔ kpe enga nu eŋwɛʼrɛ ako fwɔ̧ɔ. 8Masa wɛ nu etsɛrɛ edɔm gho kɛ̀ àndɔɔ ebe bɔ afwɛʼ mɔ mbɔʼnga engɔ à ma fwɛʼ andɔɔ andɔɔ na bɔ edɔm ese e ma ga andɔɔ abwaʼ àmɔ̀ àmɔ̀ fɔɔ abɔ byɛ e mwɔ efwɔ ekɛʼ ngɛ. 9Mmɛ ga endɔn kpe mbɔn nu àfɔ̀n andɔɔ edɔm ese é bàrà asɔrɔ ndzɔn anyi mbɔʼtye èndzobo chɛ àfɔ̀n shi myɛ ngɛ, e ba chɛdɛ angɔn efwɔ etyê kengudu. 10Egho wɛ ma gà éŋwaʼa ene ala kparakpara ngɛ, è wa ngo gà éŋwaʼa ene ela kɛkɛ. Egho wɛ gɛrɛ ne me le ebɛrɛ ene ala kparakpara bo ngɛ, gɛrɛ ke ma ngɔɔ le ebɛrɛ ene ala kɛkɛ bo. 11Éngɛ mala ngwo ne ma ga éŋwaʼa é klini ela edɔm ese bo, e ba da é ndɛʼ àfɔ̀n éŋwaʼa engɛ̂ ene? 12Ngwo gɛrɛ ne ga éŋwaʼa ene ela abɔ tsɛrɛ bo, awɛ ma ngo gà éŋwaʼa é ndɛʼ anjɛ engɛ̂? 13Gho afwɛʼ deʼ ke né fwɛʼ ebe èmasa fyee ekyɛ ŋwaʼ bo. Mala engɔ ma le engɛ̂, è wa ngo doʼo gho bi, è gwe egho wɛ. Ngwo ke né ghɔ Ngwe mane ekɛb bo.”

Etsɛrɛ mane ebwa m̀fɔ̀ Ngwe

(Mat 11:12, 13; 5:31, 32; Mak 10:11, 12)

14Bɔ Farisii byɛ â ma aŋu me doʼo ekɛb ngɛ â zɔ ebwa wunɔ ngɛ kede Yeso ene aghɔɔ bɔɔbɔɔ. 15Éngɛ engɔ ga ebe angɔ kpe “Na mbɔn à ma tee angɔn efàarà abɔ tsɛrɛ kpe mbɔn na bɔ ǹchwɔ̀. Bɛʼngɛ Ngwe ye nɛɛ ńtara ntsɔn. Ala yɛ bɔ me doʼo ghɛʼ ngɛ a ke ma nara efàarà Ngwe bo. 16Â na shi atsɛrɛ Mose mane abwa yɛ bàmɛnɛkɔn Ngwe â ŋwɛʼrɛ ngɛ bwɛn èndzobo chɛ Eyɔɔ Andɛʼndim à zeʼe ngɛ, enyɛrɛ èndzobo chɛ e ba sɛ̀ɛrɛ̀ ekɔn ǹchwɔ̀ mbɔʼ ebwa m̀fɔ̀ Ngwe. Gho ŋwàʼaŋwàʼ ma twàʼrà amɔ é nyii efwɔ. 17E we zamma ebe ezob mane chwâ é nyɔɔ fɔɔ na aŋu ebwa wɛ e me tɛŋɛ kpɛɛ efwɔ etsɛrɛ e me né nyɔɔ ngɛ. 18Egho wɛ è ma tɔrɔ eye mɔ è ngɔɔ nu aye tsɛrɛ ngɛ, è we le andɔb. Egho wɛ gɛrɛ ma nu aye wɛ è me tɔrɔ enɔm mɔ ngɛ gɛrɛ we le andɔb.”

Gho ekɛb mane Natsoro

19Gho deʼ à na aŋu me le ekɛb ma ge ǹdiri kama ekɛb, ma nde ela nchwɔnchwɔ enji gimkpaʼ. 20Gho ndzaŋa deʼ à na tsɔmɔ enduʼnkɛmɛ ngɔ ekumu ngɔ mwɔ Natsoro. Ebyɛ â ne shwe ekwa ngɔ. 21À na tsɔmɔ aŋu ma ke mà nde ntsɔbɔ nde myɛ à ma turu à zeʼe edɔm echud gho ekɛb wunɔ ngɛ. Boro â na zeʼe ndɛ̀rɛ ebyɛ ngɔ. 22Endzobo à koʼo gho ndzaŋa wunɔ ku. Engere Ngwe beʼ engɔ ngɔɔ shi ebara Abraham ekere è sa nde antara. Gho ekɛb gɛrɛ ku e nu engɔ ngɔɔ kpa. 23Aŋu engɔ à ma zɔ ǹgoʼ efwɔ edzɔwu ngɛ, engɔ kɔʼ ekere è zɔ Abraham ezhin dɔɔdɔɔ nè Natsoro ebara mɔ. 24Éngɛ, engɔ zɔʼ kpe, “Àtɛ, Abraham! Klasɔn ene mmɛ, è saa Natsoro shi è ngɔɔ tuʼu etoobwo mɔ efwɔ ndim zeʼ mɔmɔ enɛmɛ ndza anyi, mbɔʼnga mmɛ we efwɔ ǹgoʼ efwɔ edzɔwu zɔnɔ.” 25Bɛʼngɛ Abraham gii ebe engɔ kpe, “Enga zhuŋu kpe efwɔ endzobo njɛ edɔm ese ngwo à ne le ela nchwɔnchwɔ gimkpaʼ Natsoro me le ela bɔɔbɔɔ. Bɛʼngɛ enjitsɔ, engɔ wa gɛnɛ amɔ anɔ ngwo ma zɔ ǹgoʼ. 26Gɛgɛ engwa ebla deʼ yɛ aghɛɛghɛɛ bɔ, gho deʼ ke né kpɛ̀n anɔ é zeʼe angɛ bo, gho gɛrɛ ke né kpɛ̀n angɛ é zeʼe anɔ bo.” 27Gho ekɛb wɛ gii kpe ebe engɔ “Baba Abraham, mala e mwɔ engɛ̂, mmɛ buʼ ebwo engɛ̂, ngà saa Natsoro efwɔ ndɔ àtɛ ngu. 28Mmɛ we le bwɔngwaanɔm mbu tan, engɔ ngɔɔ gbeʼre eto angɔ shi angɔ gɛrɛ ne zeʼe è nyii efwɔ afwɔ ǹgoʼ zɔnɔ bo.” 29Abraham wu gii ebe engɔ kpe, “Bwɔngwaanɔm mbyɛ be le Mose mane bàmɛnɛkɔn Ngwe é gbeʼre eto angɔ. Angɔ zhuru ega wɛ angɔ ma ga ngɛ.” 30Gho ekɛb gii kpe, “Baba Abraham, ewɛ ngɛ ke koʼo bo. Bɛʼngɛ mala gho deʼ è me né zhwɛm ene ewu è ngɔɔ ebe angɔ shi e ba ngɔɔ kobo ńtara amɔ.” 31Abraham ga kpe, “Mala angɔ ne me né zhuru ebe Mose mane bàmɛnɛkɔn Ngwe bo, ka gho deʼ zhwɛm ene ewu, angɔ gɛrɛ ke ma ngo zhuru ebe engɔ bo.”

Currently Selected:

Luk 16: nbt

Highlight

Copy