Luk 17

Abwa bɔɔbɔɔ

(Mat 18:6, 7, 21, 22; Mak 9:42)

1Yeso ga ebe bɔ bɛɛrɛ abwa mɔ kpe, “Abwa yɛ à ma le bɔ sa le abwa bɔɔbɔɔ ngɛ a ya ngo zeʼe. Bɛʼngɛ ǹgoʼ ebe gho wɛ è ma ngo le abwa bɔɔbɔɔ zɔnɔ a gli ngɛ. 2E wa ngo me nara kpe e koro embɔɔ etye adwɔ ngɔ gɛ̀rɛ̀ ndwa engɔ efwɔ eji fɔɔ na aŋu engɔ me né le kpe adɔ̀kpara deʼ nyim ebwa ngɛ. 3Éngɛ mbɔn nu azɔm ene abwa yɛ mbɔn ma le ngɛ. Mala ghongwa ngwɛ le ebwa bɔɔbɔɔ, bwe ebe engɔ, mala engɔ kobo, dzɛrɛ anyimabwa ngɔ. 4Mala engɔ le ebwa bɔɔbɔɔ deʼ ekwa ngwɛ akyɛ sàambyɛ efwɔ anji, gɛ̀rɛ̀ wu zeʼe achim akyɛ sàambyɛ gà kpe ‘Mmɛ kobo’ ngwo dzɛrɛ anyimabwa ngɔ.” 5Bèmpwɔnɔntɔm ga ebe Masakɛ kpe, “Zhiiri ebɛrɛtaa njɛɛ.” 6Masakɛ gíì kpe, “Mala ngwo me le ebɛrɛtaa, ke me kpɛɛ na sam digidigi nɔ, ngwo we né ga ebe azɔd kɛkɛ zɔnɔ kpe ‘Ngà gli a chwâ ngɛ ngɔɔ kɔrɔ awɛ ebɔrɔndim’, a ya ngo zo awɛ. 7Ga kpe gho deʼ abwaʼ ndzɔn me le gho afwɛʼ è ma fwɛʼ ekwa kà kɔʼ ǹglɔ̀rɔ̀. Èndzobo chɛ engɔ klo ngɛ, ngwo wa ga ebe engɔ kpe engɔ zamma nde ende mɔ? 8Keʼ! Ke mwɔ éngɛ bo, ngwo wa ngo ga ebe engɔ kpe ‘Ndeere ende ngu, è ndèerè awɛ, è ge ǹdiri nchɛ sa kɔʼ angu aŋu mmɛ ma nde gɛ̀rɛ̀ ma ŋwɔ ngɛ. Èndzobo chɛ mmɛ mɛɛrɛ ngɛ ngwo zeʼe nde.’ 9Engɔ wa ngo ndɛ̀ʼ ebɛrɛ ebe gho afwɛʼ mɔ mbɔʼnga engɔ à fwɛʼ ebwa wɛ à mɛnɛ kpe engɔ fwɛʼ ngɛ? 10Ne nkirinkin nè ngwo èndzobo chɛ ngwo shi fwɛʼ ebwa wɛ e me ga engɛ̂ kpe fwɛʼ ngɛ, ngwo ga kpe mbyɛɛ nana ma bɔ afwɛʼ, mbyɛɛ shi fwɛʼ afwɛʼ njɛɛ.”

Yeso gli bɔ aŋwan wum

11Aŋu Yeso à sa ngɔɔ a Jerusalɛm ngɛ, engɔ à na zhiri ene ànglɔ̀ ene abɛ Samariya mane Galilii. 12Aŋu à sa ngɔɔ efwɔ abɛ ngɛ, bɔ akɔ̂m deʼ wum kla engɔ. 13Angɔ tamma ezhin dɔɔdɔɔ è tsɛɛ zɔʼ kpe, “Yeso, Masa klasɔn ene mbyɛɛ!” 14Èndzobo chɛ Yeso à zɔ angɔ ngɛ, è ga kpe, “Mbɔn ngɔɔ tee angɔn ebe ètɛ zhiri.” Angɔ sa ngɔɔ, è bwɛrɛ anji akwa angɔ pɛ. 15Èndzobo chɛ gho ŋwaʼ abwaʼ abɔ bɔnɔ à zɔ kpe ekwa ngɔ shi bwada ngɛ, engɔ à ghɛɛbɛ zeʼe achim sa flaba akwâ zodo Ngwe. 16Egho wunɔ zeʼe gò a chwâ efàarà Yeso sa bɛ̀rɛ engɔ. Engɔ à na gho Samariya. 17Yeso biiri kpe, “Abɔ byɛ engɔ à le angɔ pɛ ngɛ â ne wum, abɔ abê kɔɔ e be?” 18Ayɛ me le kpe na gho ebɛbɔ me zeʼe é ndɛʼ eghɔ ebe Ngwe? 19Yeso ga kpe enga tam è ngɔɔ anjɛ, ebɛrɛtaa njɛ shi gli awɛ.

Aŋu ebwa m̀fɔ̀ Ngwe ma ngo zeʼ ngɛ

(Mat 24:23-28, 37-41)

20Bɔ Farisii deʼ biiri ebe Yeso kpe ebwa m̀fɔ̀ Ngwe wa zeʼ endzobo tse? Yeso gíì kpe, “Ebwa m̀fɔ̀ Ngwe ke ma zeʼe ene aghɛʼnji yɛ bɔ me nɛɛ ngɛ bo. 21Gho deʼ ke ma ga kpe kede, è wû kà è wê bo, mbɔʼnga ebwa m̀fɔ̀ Ngwe wa abwaʼ ndzɔn.” 22Éngɛ engɔ ga ebe bɔ bɛɛrɛ abwa mɔ kpe, “Endzobo ya zeʼe yɛ ngwo ma ke zɔ anji bi efwɔ enji Ŋwɔ Gho, bɛʼngɛ ngwo ke ma ngo zɔ bo. 23Bɔ ba ngo ga endɔn kpe mbɔn kede engɔ we kà kede engɔ wu, mbɔn ka aŋu kɔʼ. 24Ŋwɔ gho wa ngo mwɔ efwɔ anji mɔ na m̀bò ghɔbɔ nɔ, ma pɛ zeʼe ekere ma pɛɛ akwâ anɔ ngɔɔ bwɛn abɛɛ ze nɔ. 25Bɛʼngɛ, engɔ wa klada é zɔ ǹgoʼ ene abwa akɛkɛ. Bɔ efwɔ ekyɛ zɔnɔ gɛrɛ ma ngo tɔn engɔ. 26Na aŋu â mwɔ efwɔ endzobo Noa ngɛ, ne éngɛ é ma ngo mwɔ efwɔ anji Ŋwɔ Gho. 27Bɔ gimkpaʼ â na nde ma ŋwɔ gɛ̀rɛ̀ ma le ebwa nu-aye ngɔɔ bwɛn anji yɛ Noa à nyii efwɔ ekpe ngɛ. Éngɛ m̀bò zeʼe gɛ̀rɛ̀ tsɔŋɔ angɔ bɔ gimkpaʼ. 28Â gɛrɛ ne éngɛ endzobo Lɔd. Bɔ gimkpaʼ â na nde gɛ̀rɛ̀ ma ŋwɔ, adeʼ ma zɔnɔ gɛ̀rɛ̀ ma fɛ̀nnɛ̀ ela, adeʼ gɛrɛ ma kɔrɔ ma byɛ. 29Anji yɛ Lɔd à nyɛrɛ a Sodɔm ngɛ, éwu mɛɛrɛ twɔ̀n akwâ me nyɛrɛ zeʼe ekere è tsɔŋɔ bɔ gimkpaʼ. 30Ne éngɛ é ma ngo mwɔ anji yɛ Ŋwɔ Gho ma ngo tee amɔ apɛpɛ ngɛ. 31Anji yɛ, gho deʼ mwɔ edɔm ndɔ mɔ, è ke ma kla engɔ efwɔ ndɔ é bwɛ ela mɔ bo. Gho wɛ gɛrɛ me mwɔ ekwa ngɛ, è ke ma klo e ngɔɔ a ndɔ mɔ nu ala deʼ bo. 32Zhuŋu eye Lɔd. 33Abɔ byɛ e ma ke shi etyê amɔ ngɛ, e ba ngo nyiimi. Abɔ byɛ e ma nyimi etyê amɔ ngɛ, e ba ngo le etyê. 34Mmɛ ga engɛ̂, efwɔ ǹklì yɛ bɔ fyee ba ngo mwɔ edɔm etan ŋwaʼ, e ba ngɔɔ nu gho bi, è waʼ êwè. 35Aye fyee ba ngo ma gwo ǹkùru afwɔbi, e nu eŋwàʼ êwè tye.” 36#17:36 Eŋwɛʼrɛ sam deʼ ke ge 36 bo.

37Bɔ bɛɛrɛ abwa ngɔ biiri kpe, “Masakɛ, Awe?” Yeso gíì kpe afwɔ yɛ akudugho mwɔ ngɛ ènɔ̀n ba ngo ghara akwâ.”

Currently Selected:

Luk 17: nbt

Highlight

Copy