Eleabwa 22

1Paalo gâ kpe, “Bɔ Israel, bwɔngwa mbu achim kristo, mbɔn zhuru aŋu mmɛ ma ke é ngwè ato ndza efàarà ndzɔn ngɛ!” 2Èndzobo chɛ â zo Paalo ma ga ebe angɔ ene atsoʼ Hibru ngɛ, angɔ ba tuuu. Paalo ngɔɔ embè è ga kpe 3“Mmɛ na gho Juu wɛ e me be angu a Tasɔs efwɔ Silisya ngɛ. Bɛʼngɛ mmɛ à tɛb a Jerusalɛm ma bɛ̀ɛrɛ abwa enji Gamaliyɛl. Mmɛ à na shi atsɛrɛ ètɛ sam bɔ anchwɔnchwɔ, gɛrɛ me ndɛʼ etaa mfu ebe Ngwe aŋu mbɔn bɔ akɛkɛ abwaʼ ndzɔn anɔ mwɔ ànchwɔ̀ ngɛ. 4Mmɛ à na nyìi abɔ byɛ â ma kìrì aghɛʼnji yɛ Yeso à tee ngɛ bwɛn ene aghɛʼ yɛ mmɛ à ma zɛʼɛ aghɛʼnji é zhudu adeʼ ngɛ. Mmɛ à na bèdde anɔm mane aye koo angɔ a ndɔdzɔm. 5Angwa zhiri mane eto efwɔ ndɔ m̀pàrà gimkpaʼ be né bɛrɛ antsɛ kpe mmɛ na gà éŋwaʼa. Angɔ à ndɛʼ eŋwɛʼrɛ ena é ngɔ̀ɔ a Damaskɔs è tee ebe bɔ Juu byɛ â mwɔ aŋu ngɛ, e zɛʼ abɔ byɛ â me bɛrɛ ene Yeso ngɛ bèddè angɔ bwɛ zeʼe a Jerusalɛm shi e koo angɔ na bɔ dzɔm nɔ gɛ̀rɛ̀ nyii angɔ.”

Paalo toʼro aŋu engɔ à kobo eleabwa mɔ ngɛ

6“Aŋu mmɛ à ma ngɔɔ a Damaskɔs a ghɛɛghɛɛ nchi ngɛ, sa klikɔ̀ʼ ekɛʼ pɛ efàarà ndza na m̀bò ghɔbɔ deʼ nɔ nyɛ̀rɛ̀ zèʼe ezob. 7Mmɛ go a chwâ gɛ̀rɛ̀ zo etsoʼ deʼ ma gà ena kpe ‘Saalo! Saalo! Ngwo na nyii angu ene ebwa yɛ?’ 8Mmɛ gii biiri kpe ‘Na ngwo wɛ Masakɛ?’ Engɔ gii ena kpe ‘Mmɛ na Yeso gho Nazarɛd wɛ ngwo ma nyii ngɛ’ 9Abɔ byɛ â mwɔ nè mmɛ ngɛ â zɔ anâm, e zo etsoʼ wɛ, shi ne nɛɛ ebwa wɛ a ma ga ngɛ bo. 10Mmɛ biiri kpe ‘Masakɛ, mmɛ shi le ene ngà?’ Éngɛ Masakɛ gà ena kpe ‘Ngà tam ngɔ̀ɔ efwɔ antiri abɛ Damaskɔs, e ba ngo tòʼrò ebwa wɛ Ngwe a shi shi engɛ̂ é fwɛʼ ngɛ’ 11Aghɔɔ ndza à fo mbɔʼnga anâm yɛ a ndɛɛrɛ aghɔɔ ndza. Éngɛ abɔ byɛ â mwɔ nè mmɛ ngɛ klini angu ene abwo ngɔɔ a Damaskɔs. 12Gho deʼ à ne efwɔ antiri abɛ Damaskɔs ekumu ngɔ mwɔ Ananyas. Egho wɛ à na shi atsɛrɛ gimkpaʼ. Abɔ Juu byɛ â ma tsɔmɔ aŋu ngɛ ma ndɛʼ eghɔ ebe engɔ. 13Engɔ à nyɛn zeʼe tam ebara mfu, gà ena kpe ‘Saalo ghongwaanɔm, ngà wu sa zɔ akwâ!’ Aghɔɔ ndza pɛ me èndzobo chɛ, mmɛ klada sa zɔ akwâ gɛ̀rɛ̀ kede engɔ. 14Engɔ ga ena kpe ‘Ngwe ètɛ sam bɔ shi chi awɛ, e wa ngo tee ebwa wɛ e ma ke kpe ngwo fwɛʼɛ ngɛ. Engɔ shi le ngwo zɔ egho wɛ ma lè abwa yɛ a me koʼro efàarà Ngwe ngɛ gɛ̀rɛ̀ zo etsoʼ ngɔ. 15Ngwo wa ngo mwɔ antsɛ ngɔ ebe bɔ gimkpaʼ ene abwa yɛ ngwo shi zɔ gɛ̀rɛ̀ zo ngɛ. 16Éngɛ, enjitsɔ ke nyiimi endzobo bo. Tam ngɔɔ nu ndim é sò abwa bɔɔbɔɔ njɛ, nyɛn zeʼe aŋu e ma ngo tsàʼrà Ngwe ato njɛ ngɛ.’ ”

Paalo ngɔɔ é sɛ̀ɛrɛ̀ ega Ngwe ebe ebɛbɔ

17“Enyɛrɛ éngɛ, mmɛ nyɛn aŋu, wu ngɔɔ a Jerusalɛm, nyii efwɔ ndɔngwe kɛ̀ sa tsàʼrà Ngwe, è zɔ nklama nchi. 18Efwɔ nklama nchi fyɛ mmɛ zɔ Masakɛ ga ena kpe ‘Ngà zamma nyɛn a Jerusalɛm mbɔʼnga angɔ ke ma ngo bɛrɛ ebwa wɛ ngwo ma bɛ̀rɛ antsɛ anyi mbɔʼ mmɛ ngɛ bo’ 19Mmɛ gíì kpe ‘Masakɛ, angɔ be nɛɛ éŋwaʼaŋwâʼ kpe mmɛ à nyii efwɔ ndɔ tsaʼra Ngwe bɔ Juu bèddè abɔ byɛ â me le ebɛrɛ ene ngwo ngɛ, è koo angɔ gɛ̀rɛ̀ sɔm angɔ. 20Èndzobo chɛ â bere Stefin wɛ a ma ga ega ngwɛ ma zhudu ngɛ, mmɛ à na aŋu me bɛrɛ kpe e zhudu engɔ, gɛ̀rɛ̀ mwɔ egho wɛ à me bere ǹdiri abɔ byɛ â zhudu engɔ ngɛ.’ 21Masakɛ gâ ena kpe ‘Ngɔɔ, mmɛ wa ngo sàa awɛ ezhin dɔɔdɔɔ abwaʼ ebɛbɔ.’ ” 22Abɔ byɛ zhuru ebe Paalo bwɛn èndzobo chɛ engɔ à mɛ̀ɛrɛ̀ ga ngɛ. Bɛʼngɛ e klada sa flaba akwâ eghɛʼ kpe, “Mbɔn nu engɔ ngɔɔ. Mbɔn zhudu engɔ! Mbɔn zhudu engɔ. M̀pè gho zɔnɔ ke koʼro é nɔ ekɔʼɔ efwɔ ese bo.” 23Angɔ à na flaba akwâ me bere ǹdiri àmɔ̀ abwo, sa zɔɔ ebun ma sɛ̀ʼ efwɔ efɔɔ é tee kpe angɔ be bɔɔ etaa ghɛʼ. 24Gho kɛ̀ wɛ gâ ebe bɔ ebiri mɔ kpe e bere engɔ ngɔɔ ge a ndɔdzɔm. È gɛrɛ ga ebe angɔ kpe e wuru engɔ anchwɔnchwɔ, shi mbè biiri ebe ebɛbɔ ǹji yɛ angɔ a zhwara akwâ mbɔʼ engɔ ngɛ. 25Bɛʼngɛ èndzobo chɛ â shi koro Paalo ene anduʼ ma ke é sa wuru engɔ ngɛ, è ga ebe ato ebe eko bɔ ebiri kpe, “Etsɛrɛ ke me tee kpe mbɔn wuru gho Rom wɛ mbɔn ne shi zɛʼɛ ǹji ene ebwa wɛ engɔ me fwɛʼɛ ngɛ bo.” 26Èndzobo chɛ ato yɛ à zo ebwa wunɔ ngɛ, e nyɛn ngɔɔ biiri ebe gho kɛ̀ angɔ kpe, “Ngwo na ke é le ene ekwa egho wunɔ? Engɔ na gho Rom.” 27Éngɛ egho kɛ̀ wɛ ngɔɔ ebara Paalo gà ebe engɔ kpe, “Toʼro ena, ngwo na gho Rom?” Paalo gii kpe, “Ɔ̧̀ɔɔ.” 28Gho kɛ̀ wɛ gâ ebe Paalo kpe, “Mmɛ à nɛrɛ bɔ ndɛʼ ekɛb dye e sa mwɔ gho Rom.” Paalo gii ebe engɔ kpe, “E ne be angu aŋu.” 29Abɔ byɛ â ma ngɔɔ é sɛʼ Paalo ngɛ gooro àmɔ̀ achim egha ŋwaʼ. Èklɔ̀ bere gho kɛ̀ èndzobo chɛ engɔ à nɛɛ kpe Paalo ne zeʼe a Rom, engɔ gɛrɛ shi ge dzɔm ene engɔ ngɛ.

Paalo efàarà m̀pàrà

30Egho kɛ̀ wunɔ à na ke é sɛʼ é nɛɛ éŋwaʼa wɛ bɔ Juu â me ge enji Paalo ngɛ. Éngɛ engɔ tam enchwenchwe zɔʼ m̀fɔ̀rɔ̀ zhiri mane eto ndɔ m̀pàrà gimkpaʼ angɔ sɔŋɔ. E chi Paalo a ndɔdzɔm gɛ̀rɛ̀ chi dzɔmɔrɔ elo ngɔ ngɔ̀ɔ too engɔ efàarà bɔ m̀pàrà.

Currently Selected:

Eleabwa 22: nbt

Highlight

Copy