Eleabwa 23

1Aŋu Paalo à nɔm aghɔɔ mɔ ene bɔ efwɔ ndɔ m̀pàrà ngɛ, è ga kpe, “Bwɔngwaanɔm mbu bɔ Israel, etaasɔn mfu fe pɛ ene aghɛʼnji yɛ mmɛ shi mwɔ efàarà Ngwe bwɛn ànchwɔ̀ ngɛ.” 2Aŋu Angwa zhiri Ananyas à zo ngɛ, è ga ebe abɔ byɛ â me tamma ebara Paalo ngɛ kpe e fɛ eklo ngɔ. 3Paalo gâ ebe angɔ kpe, “Ngwe gɛrɛ yà fɛ awɛ. Ngwo gho ndooro aghɔɔ wunɔ! Ngwo we tsɔmɔ angɛ ma sɛ̀ʼɛ angu ene etsɛrɛ, gɛrɛ ma wa gò etsɛrɛ kpe e fɛ angu.” 4Abɔ byɛ â me tamma ebara Paalo ngɛ gâ ebe engɔ kpe, “Ngwo ke ma bumu é ndwàʼ angwa zhiri Ngwe bo?” 5Paalo gíì kpe, “Bwɔngwa mbu, mmɛ a ke me nɛɛ kpe na angwa zhiri bo. Aŋwɛʼrɛ Ngwe ye ga kpe ‘Ke ebwa bɔɔbɔɔ ato gho wɛ mwɔ ato ebe bɔ mbyɛ ngɛ ga.’”

6Èndzobo chɛ Paalo à nɛɛ kpe abɔ byɛ adeʼ na bɔ Sadusii, adeʼ mwɔ bɔ Farisii ngɛ, engɔ flaba efwɔ ndɔ m̀pàrà yɛ kpe, “Bwɔngwa mbu, mmɛ na gho Farisii gɛrɛ mwɔ bu ndɔ. Mmɛ ne tama efàarà ndzɔn ene esɛʼ nɔ mbɔʼ ezhuŋu kɔʼɔ yɛ mmɛ me le aŋu bɔ ma ngo zhwɛm ene ewu ngɛ.” 7Èndzobo chɛ Paalo à ga énde ngɛ, àzhwɔ̀ nyii abwaʼ bɔ Farisii mane bɔ Sadusii, ndɔ gɛbbɛ. 8Egɛbɛ à nyii mbɔʼnga bɔ Sadusii à na ga kpe bɔ ke ma zhwɛm ene ewu bo, engere ne tsɛʼ bo, ezhwɛɛrɛ gɛrɛ me tsɛʼ bo. Bɛʼngɛ bɔ Farisii me bɛrɛ abwa tɛd zɔnɔ. 9Àzhwɔ̀ tsa, bàtee atsɛrɛ deʼ byɛ â ma bɛ̀rɛ nè bɔ Farisii ngɛ tam fɛ̀ɛrɛ ekamakama kpe, “Mbyɛɛ ke zɔ ebwa bɔɔbɔɔ deʼ egho wunɔ me le bo! Engá deʼ azhwɛɛrɛ kà angere deʼ we ga ebe engɔ.” 10Àzhwɔ̀ tsa ene aghɛʼ yɛ ato ebe bɔ ebiri a sa bumu kpe e ba tse é panna Paalo ngɛ. Éngɛ engɔ gâ ebe bɔ ebiri mɔ kpe angɔ ngɔɔ chi Paalo ngɔ̀ɔ shi ene afwɔ yɛ bɔ ebiri ma tsɔmɔ ngɛ. 11Efwɔ ǹklì yɛ, Masakɛ tam ebara Paalo, gâ ebe engɔ kpe, “Ka bum! Ngwo shi bɛrɛ antsɛ ngu a Jerusalɛm anɔ. Ndeere awɛ é bɛrɛ a Rom.”

E nde akɔɔ ato Paalo

12À tam enchwe aŋu, bɔ Juu deʼ sɔŋɔ é nde akɔɔ. Angɔ à wunu kpe mbɔɔ ba ka ala deʼ nde gɛ̀rɛ̀ ne ndim deʼ ŋwɔ, bwɛn èndzobo chɛ mbɔɔ shi zhudu Paalo ngɛ. 13Abɔ byɛ â wu̧ru ebwa wunɔ ngɛ â ne fɔɔ bɔ èsama fyee. 14Angɔ à ngɔɔ gà ebe m̀fɔ̀rɔ̀ zhiri mane eto kpe, “Mbyɛɛ a shi wu̧nu kanna afwɔbi kpe mbyɛɛ na ala deʼ nde bwɛn èndzobo chɛ mbyɛɛ shi zhudu Paalo ngɛ. 15Éngɛ ngwo mane ndɔ m̀pàrà tɔm ekɔn ebe ato bɔ ebiri a Rom kpe è saa Paalo engɛ̂. Ndooro kpe ngwo wa ke é wèe abwa deʼ mbɔʼ engɔ. Bɛʼngɛ mbyɛɛ be ndeere angbɛɛ é zhudu engɔ dye è sa bwɛn anɔ.”

16Angɔ nɔ ga éngɛ ngɛ, Ŋwɔ Ghongwaaye Paalo, endò mɔ zo, nyɛ̀n ngɔɔ sɛ̀ɛrɛ̀ ebe Paalo efwɔ ndɔ yɛ â me shi engɔ aŋu ngɛ. 17Éngɛ Paalo zɔʼ gho kɛ̀ bi è ga ebe engɔ kpe, “Nu eghobo wunɔ ngɔɔ ebe ato bɔ ebiri. Engɔ we le ebwa deʼ é ga ebe engɔ.” 18Egho kɛ̀ wɛ nu eghobo wɛ ngɔ̀ɔ ebe ato bɔ ebiri, è ga ebe engɔ kpe, “Paalo ghodzɔm à zɔʼ angu gà ena kpe mmɛ nu eghobo wunɔ zeʼe engɛ̂ mbɔʼnga engɔ we le ebwa deʼ é ga engɛ̂.” 19Ato yɛ klini abwo eghobo wɛ, tini ngɔɔ biiri ebe engɔ kpe, “Ngwo na ke é ga ena kpe ayɛ?” 20Eghobo wɛ gíì kpe, “Bɔ Juu a shi bɛrɛ kpe angɔ ga engɛ̂ kpe ngwo nu Paalo enchwe ngɔɔ a ndɔ m̀pàrà ndooro gà kpe e ba ke é nɛɛ abwa éŋwaʼa deʼ mbɔʼ esɛʼ engɔ. 21Bɛʼngɛ ke zo ebwa deʼ ebe angɔ bo mbɔʼnga angɔ be fɔɔ èsama fyee byɛ e me namma ma shwèe engɔ ngɛ. Angɔ shi kanna abwa kpe mbɔɔ na ala deʼ nde kà ŋwɔ bwɛn èndzobo chɛ angɔ shi zhudu Paalo ngɛ. Enjitsɔ angɔ shi ndeere àmɔ̀ é le éngɛ ma kɔʼ me etsɛrɛ njɛ.” 22Ato yɛ gâ kpe, “Ke sɛrɛ ebe gho deʼ kpe ngwo shi ga ebwa wunɔ ena bo.” È ga éngɛ sàa eghobo wɛ ngɔɔ amɔ.

E sàa Paalo ebe gho kɛ̀ Fɛlikz

23Ato yɛ zɔʼ bɔ kɛ́ mɔ fyee gà ebe angɔ kpe, “Ndeere bɔ ebiri ako fyee ngɔɔ a Kaysarya, bɔ m̀pwɔ̀rɔ̀ bèʼebɔ èsama tɛd tɛʼ wum, bɔ nè ŋwɔ ako fyee, mbɔn ndeere angɔn nyɛn ene enyɔ̀m kɔɔ etiʼdi ànchwɔ̀. 24Chi m̀pwɔ̀ bèʼebɔ deʼ shi Paalo kwaʼ edɔm. Mbɔn nyɛɛmɛ nu engɔ ngɔɔ ndɛʼ ebe gho kɛ Fɛlikz.” 25Ato yɛ ŋwɛʼrɛ aŋwɛʼrɛ saa ebe Fɛlikz. 26Engɔ à ŋwɛʼrɛ kpe, “Na mmɛ Klawdyus Lisyas me ŋwɛʼrɛ aŋwɛʼrɛ zɔnɔ engɛ̂ gho kɛ, gɔvɔnɔ Fɛlikz, mmɛ gamma. 27Bɔ Juu â goo egho wunɔ ma ke é zhudu engɔ, mmɛ zo kpe engɔ na gho Rom, éngɛ mmɛ ngɔɔ aŋu nè bɔ ebiri mbu e chi engɔ eblabwo angɔ. 28Aŋu mmɛ à ma ke é nɛɛ ebwa wɛ â me ge enji engɔ ngɛ, mmɛ nu engɔ ngɔɔ a ndɔ m̀pàrà angɔ. 29Mmɛ wèe nɛɛ kpe engɔ ke le ebwa deʼ tye e zhudu engɔ kà e ge engɔ a ndɔdzɔm bo. Abwa yɛ e me ge enji ngɔ ngɛ na abwa mbɔʼ atsɛrɛ àmɔ̀. 30Aŋu mmɛ à zo kpe â na nde akɔɔ ato ngɔ ngɛ, mmɛ zhuŋu kpe e we koʼro ena é sàa engɔ engɛ̂. Mmɛ shi ga ebe abɔ byɛ e ma ke engɔ ngɛ kpe angɔ zeʼ sɛɛrɛ ebwa wɛ engɔ me le ngɛ engɛ̂.” 31Bɔ ebiri â fwɛʼ aŋu â ga ebe angɔ ngɛ. Angɔ à nu Paalo zhiri nè engɔ ǹklì yɛ karadidi bwɛn abɛ Antipatris. 32Aŋu ese à keʼ, abɔ ebiri byɛ â me zhiri elo ngɛ ghɛɛbɛ, angɔ byɛ à mwɔ nè m̀pwɔ̀rɔ̀ bèʼebɔ ngɛ ngɔɔ nè Paalo. 33Â nu engɔ ngɔɔ a Kaysarya, ndɛʼ aŋwɛʼrɛ yɛ ebe ato, e saara Paalo ebe angɔ. 34Ato à zɔʼrɔ aŋwɛʼrɛ yɛ biiri abɛɛ abɛ yɛ engɔ à me zeʼe aŋu ngɛ. Èndzobo chɛ engɔ à zɔ kpe Paalo ne zeʼe a Silisya ngɛ, 35e gâ kpe, “Mmɛ wa zo ega ngwɛ, èndzobo chɛ abɔ e me ge abwa enji njɛ ma ngo zeʼ ngɛ.” Éngɛ è gâ kpe e shi Paalo enji ǹkɔʼ efwɔ etaa abɛ Hɛrɔd.

Currently Selected:

Eleabwa 23: nbt

Highlight

Copy