Eleabwa 24

Fɛlikz sɛʼ Paalo

1Aŋu enji â fɔɔ etan ngɛ, angwa zhiri wɛ ekumu ngɔ à mwɔ Ananyas, eto deʼ mane àsɛʼasɛʼɛ deʼ wɛ ekumu ngɔ à mwɔ Tertulus ngɛ, à ngɔɔ abɛ Kaysarya. Angɔ à bwɛn efàarà gɔvɔnɔ Fɛlikz sa gà abwa yɛ â me le é ge enji Paalo ngɛ. 2Èndzobo chɛ angɔ à zɔʼ Paalo efwɔ ndɔ ngɛ, Tertulus klada sa gà abwa zɔnɔ ebe engɔ kpe, “Gho kɛ̀ Fɛlikz, aghɛʼnji ǹchwɔ̀ yɛ ngwo à ma klini angbɛɛ ngɛ shi zeʼe nè m̀bwarambwad Ngwe efwɔ endzobo dɔɔdɔɔ mane abwa tsɛrɛ akɛkɛ yɛ a me koʼro é mwɔ ngɛ shi zeʼe nè ǹchwɔ̀ efwɔ abɛ bɔ. 3Mbyɛɛ ba bɛ̀rɛ ebwa wunɔ akwâ gimkpaʼ, gho kɛ Fɛlikz, éngɛ mbyɛɛ ma gɛnɛ angbɛɛ nè mbɔn. 4Mmɛ ke doʼo é nyiimi endzobo njɛ gimkpaʼ bo, bɛʼngɛ mmɛ wa bùʼu ebwo engɛ̂ kpe ngwo nu endzobo njɛ zhuru abwa yɛ mbyɛɛ ma ngo biiri ebe engɔ ngɛ. 5Mbyɛɛ à zɔ egho wunɔ mwɔ na gho ma buguru eto bɔ nɔ. Engɔ à ti m̀bùʼ abwaʼ bɔ Juu efwɔ ese gimkpaʼ. Engɔ gɛrɛ mwɔ ato ebe abɔ byɛ â ma kìrì gho Nazarɛd ngɛ. 6Engɔ à gɛrɛ na ke é tsɔŋɔ enji ndɔngwe kɛ̀, éngɛ mbyɛɛ bere engɔ. 7#24:7Bɛʼngɛ ato ebe bɔ ebiri zeʼe shuʼ engɔ eblabwo njɛɛ 8 Ga kpe abɔ byɛ e me ge abwa enji ngɔ ngɛ zeʼe kla awɛ 8Mala ngwo biiri abwa ebe egho wunɔ, shi ngwo mbwo wa ngo nɛɛ abwa yɛ mbyɛɛ ma gà mbɔʼ engɔ ngɛ.” 9Bɔ Juu â buumu angɔ ma ga kpe abwa zɔnɔ gimkpaʼ ne éŋwaʼa.

Paalo twaʼra amɔ efàarà Fɛlikz

10Èndzobo chɛ Gho kɛ̀ à le abwo ebe Paalo kpe è ga ngɛ, Paalo gâ kpe, “Mmɛ we nɛɛ kpe ngwo à shi mwɔ àsɛʼasɛʼɛ efwɔ abɛ zɔnɔ efwɔ enɔ̂m akɛkɛ, éngɛ mmɛ we gɛnɛ angu é gii aga efàarà njɛ. 11Ngwo mɔmbwo we né ebiiri, enji ke shi fɔɔ ne wum ǹchwɔ̀ fyee nɔ wɛ mmɛ à me ngɔɔ a Jerusalɛm é ghɔ Ngwe ngɛ bo. 12Bɔ Juu â ke zɔ mmɛ ma fɛ̀ɛrɛ nè gho deʼ efwɔ ndɔngwe kɛ̀ bo. Angɔ à ke zɔ mmɛ ma ti m̀bùʼ nè bɔ, ka de mwɔ efwɔ etsam abɛ kà afwɔ tsɛrɛ deʼ efwɔ abɛ bo. 13Angɔ gɛrɛ ke le antsɛ deʼ é tee mbɔʼ abwa zɔnɔ angɔ ma gè enji ndza nɔ bo. 14Mmɛ we bɛrɛ ewunɔ ngɛ kpe mmɛ wa ghɔ Ngwe ètɛ sam mbu ma kìrì eghɛʼnji byɛ angɔ à ma gà kpe e ke koʼro bo ngɛ. Bɛʼngɛ mmɛ gɛrɛ we bɛrɛ ene abwa gimkpaʼ yɛ e me ŋwɛʼrɛ efwɔ atsɛrɛ Mose mane eŋwɛʼrɛ bàmɛnɛkɔn Ngwe ngɛ. 15Mmɛ we le ezhuŋu kɔʼɔ ene Ngwe. Angɔ gɛrɛ me bɛrɛ ene ezhuŋu kɔʼɔ zɔnɔ. Ezhuŋu kɔʼɔ zɔnɔ ne ga kpe bɔ gimkpaʼ ba ngo zhwɛm ene ewu, ka mwɔ bɔ ǹchwɔ̀ kà bɔ bɔɔbɔɔ. 16Éngɛ mmɛ ma twàʼrà angu akyɛ gimkpaʼ é zɔ kpe etaasɔn mfu me pɛ efàarà Ngwe mane bɔ. 17Aŋu mmɛ à shi tsɔmɔ efwɔ enɔ̂m akɛkɛ ne ngɔɔ a Jerusalɛm bo ngɛ, mmɛ ngɔɔ aŋu nè ekɛb deʼ é ndɛʼ ebe bɔ mbu gɛ̀rɛ̀ ndɛʼ etɔ̧ɔrɔ ndza ebe Ngwe. 18Ne èndzobo chɛ mmɛ à ma fwɛʼ abwa zɔnɔ ngɛ, wɛ angɔ à zɔ angu a ndɔngwe kɛ̀, angɔ à zɔ angu aŋu mmɛ à sa mɛ̀ɛrɛ̀ sò abwa bɔɔbɔɔ ndza na à mwɔ atiʼi ngɛ. Ebaŋabɔ à ne tsɛʼ abwaʼ ndza èndzobo chɛ bo, ebuguru ato deʼ me tsɛʼ aŋu bo. 19Bɛʼngɛ bɔ Juu deʼ â ne zeʼe abɛɛ abɛ Esya. Mala mmɛ à me le ebwa bɔɔbɔɔ deʼ, shi angɔ mɔmbwo à ne tyetye e zeʼe efàarà njɛ e ga abwa yɛ â me le é ga mbɔʼ mmɛ ngɛ. 20Kà shi angɔ byɛ e mwɔ anɔ ngɛ, toʼro ebwa wɛ angɔ à zɔ mmɛ me go èndzobo chɛ mmɛ à mwɔ efwɔ ndɔ m̀pàrà ngɛ. 21À tye me ebwa Ngwe wɛ mmɛ à ga èndzobo chɛ mmɛ à me tama efàarà angɔ ngɛ kpe ‘Mbɔn na sɛ̀ʼɛ angu ànchwɔ̀ nɔ mbɔʼnga mmɛ à ga kpe bɔ ba ngo zhwɛm ene ewu?’ ” 22Gɔvɔnɔ Fɛlikz wɛ à shi dye nɛɛ aghɛʼnji éŋwaʼa ngɛ ge engudu ene m̀pàrà ma ga ebe angɔ kpe, “Èndzobo chɛ Lisyas, ato ebe bɔ ebiri ma bwɛn ngɛ, mmɛ wa ngo tsɛrɛ esɛʼ ngɔ.” 23Engɔ gâ ebe gho ebiri wɛ à ma kɔʼ Paalo ngɛ kpe è sa kɔʼ engɔ bɛʼngɛ engɔ saa engɔ shi è zhiri gɛ̀rɛ̀ sàa asɔrɔ ngɔ ndɛ̀ʼ ela byɛ engɔ ma ke ngɛ.

Fɛlikz mane Drusila sɛʼ Paalo

24Aŋu enji deʼ â shi fɔɔ ngɛ, Fɛlikz mane eye mɔ Drusila wɛ à mwɔ ŋwɔ Juu ngɛ zeʼe. Engɔ gâ e nu Paalo zeʼe. Engɔ sa zhuru aŋu Paalo à ma ga mbɔʼ ebɛrɛtaa ene Yeso Kristo ngɛ. 25Aŋu Paalo à fɔɔ embè mà gà mbɔʼ é le ǹchwɔ̀, eklini ekwa mane anji tsɛrɛ esɛʼ yɛ a ma zeʼe ngɛ, èklɔ̀ à bere Fɛlikz, engɔ gâ kpe, “Ngwo we né ngɔ̀ɔ enjitsɔ. Mmɛ wa de shi wu le endzobo, mmɛ shi zɔʼ awɛ.” 26Ene endzobo ŋwaʼ zɔnɔ, engɔ à na zhuŋu kpe Paalo wa ndɛʼ ekɛb deʼ ebe engɔ. Ene aghɛʼ zɔnɔ, engɔ wa sa zɔʼ engɔ sa sɛ̀ɛrɛ̀ abwa nè engɔ. 27Enɔ̂m à fɔɔ fyee Pɔɔkyus Fɛstus nu atan ebe Fɛlikz na gho kɛ̀ nɔ. Fɛlikz à na ke kpe bɔ Juu sa doʼo angbe, éngɛ engɔ shi Paalo tye a ndɔdzɔm.

Currently Selected:

Eleabwa 24: nbt

Highlight

Copy