Eleabwa 21

Paalo ngɔɔ a Jerusalɛm

1Mbyɛɛ à gamma ebe angɔ kpe e tsɔmɔ anchwɔnchwɔ gɛ̀rɛ̀ nyɛn. Aŋu mbyɛɛ à kpɛn ndim ngɛ, mbyɛɛ bwɛn a Kos, ese sa kèʼ mbyɛɛ bwɛn a Rodɛs, nyɛn aŋu ngɔɔ a Patara. 2Aŋu mbyɛɛ à bwɛn a Patara ngɛ, mbyɛɛ zɔ Àwùundim deʼ ma ngɔɔ a Foenisya, éngɛ mbyɛɛ kla angɔ gɛ̀rɛ̀ kpɛ̀n ngɔ̀ɔ. 3Mbyɛɛ à ngɔɔ bwɛn afwɔ yɛ mbyɛɛ à ma tama à zɔ Sayprɔs ngɛ. Mbyɛɛ nyɛn kpɛ̀n kwaʼ ngɔɔ a Sirya, gɛ̀rɛ̀ kpɛ̀n ngɔɔ a Taya, afwɔ yɛ â ma ngo chidi eku efwɔ àwùundim aŋu ngɛ. 4Aŋu mbyɛɛ à bwɛn aŋu ngɛ, mbyɛɛ zɔ bɔ deʼ byɛ â me bɛrɛ Ngwe ngɛ, tsɔmɔ nè angɔ efwɔ ǹkyɛ̀ ŋwaʼ. Azhwɛɛrɛ Ngwe le angɔ gâ ebe Paalo kpe è ke wu ngɔɔ a Jerusalɛm bo. 5Bɛʼngɛ èndzobo chɛ endzobo à shi bwɛrɛ endyɛɛ é ngɔ̀ɔ ngɛ, mbyɛɛ nyɛn sa ngɔɔ, angɔ bɔ gimkpaʼ, aye, anɔm mane bwɔ kiri angbɛɛ ngɔɔ sàa ewee eji. Angɔ bɔ gimkpaʼ chwɔn etongu amɔ a chwâ tsàʼrà Ngwe. 6Aŋu mbyɛɛ à mɛɛrɛ gà ebe angɔ kpe e tsɔmɔ anchwɔnchwɔ ngɛ, mbyɛɛ nyii efwɔ àwùundim sa kpɛ̀n à ngɔɔ, angɔ gɛrɛ sa ngɔɔ efwɔ ndɔrɔ àmɔ̀. 7Mbyɛɛ à ngɔɔ fɔɔ anji a Taya ngɔɔ a Ptolemays. A Ptolemays, mbyɛɛ gamma ebe bɔ kristo aŋu tsɔmɔ nè angɔ efwɔ anji bibi. 8Aŋu ese à sa keʼ ngɛ, mbyɛɛ bwɛn a Kaysarya, ngɔɔ tsɔmɔ a ndɔ Firiboʼ à sɛɛrɛ ega Ngwe wɛ à mwɔ egho bi abwaʼ abɔ sàambyɛ byɛ â pwɔnɔ é kpèdè a Jerusalɛm ngɛ. 9Engɔ à ne le bwɔaye kwɛ̀ byɛ â ne shi bwɛ anɔm bo byɛ â ma sɛ̀ɛrɛ̀ ega Ngwe ngɛ. 10Angɔ à tsɔmɔ aŋu efwɔ enji deʼ, àmɛnɛkɔn Ngwe deʼ wɛ ekumu ngɔ à mwɔ Agabus ngɛ me zeʼe a Judeya. 11Engɔ à zeʼe kla angbɛɛ, nu ekwo Paalo koro elo mane ebwo mɔ anyi gɛ̀rɛ̀ gà kpe, “Ewunɔ ne ebwa wɛ azhwɛɛrɛ pɛ Ngwe ma ga ngɛ. Egho wɛ me le ekwo wunɔ ngɛ, bɔ Juu ba ngo koro engɔ énde a Jerusalɛm, è ndɛʼ engɔ ebe ebɛbɔ.” 12Èndzobo chɛ mbyɛɛ à zo ebwa wunɔ ngɛ, mbyɛɛ mane abɔ abê bii Paalo kpe engɔ ka a Jerusalɛm ngɔɔ. 13Bɛʼngɛ engɔ gíì kpe, “Mbɔn na le ngɛ ma ayɛ? Mbɔn na ku̧u énde ma twɔ̀ɔrɔ etaa mfu. Ke e de ma ke é kɔd angu a Jerusalɛm, mmɛ a shi ndeere angu, ka de mwɔ ewu, mmɛ wa ku mbɔʼ ekumu Masakɛ Yeso Kristo.” 14Mbyɛɛ à ke né kobo etaa ngɔ bo, mbyɛɛ shi aŋu ga kpe, “Shi e gli aŋu Masakɛ me shi ngɛ.” 15Aŋu mbyɛɛ à shi tsɔmɔ aŋu efwɔ antiri endzobo deʼ ngɛ, mbyɛɛ bwɛ eku mbyɛɛ ngɔɔ a Jerusalɛm. 16Bɔ bɛɛrɛ abwa deʼ a Kaysarya â kiri angbɛɛ, nu angbɛɛ ngɔɔ efwɔ ndɔ egho wɛ mbyɛɛ à ma ngo tsɔmɔ nè engɔ ngɛ. Egho wunɔ à na Mnason wɛ à me zeʼe a Sayprɔs ngɛ. Engɔ à shi bɛrɛ ene Ngwe nyɛ̀rɛ̀ zèʼe efwɔ ekyɛ sam ngɛ.

Paalo ngɔɔ é gamma ebe Jems

17Èndzobo chɛ mbyɛɛ à bwɛn a Jerusalɛm ngɛ, abɔ byɛ â me bɛrɛ ene Ngwe ngɛ nu angbɛɛ anchwɔnchwɔ ene etaa àmɔ̀ gimkpaʼ. 18Mbyɛɛ ko, e tam enchwenchwe Paalo gɛrɛ nyɛn nè mbyɛɛ é ngɔ̀ɔ zɔ Jems mane eto efwɔ ndɔngwe gimkpaʼ. 19Paalo à gamma ebe angɔ, gà abwa gimkpaʼ yɛ Ngwe me le abwaʼ ebɛbɔ nyɛ̀rɛ̀ zèʼe ene afwɛʼ ngɔ ngɛ. 20Èndzobo chɛ abɔ byɛ â zo engɔ ngɛ, angɔ zodo Ngwe. Éngɛ angɔ gâ kpe, “Paalo, ghongwa, ngwo we zo kpe bɔ Juu byɛ â shi bɛrɛ Ngwe ngɛ shi fɔɔ eko tɔɔshin, gɛ̀rɛ̀ zo aŋu angɔ me ga egha àmɔ̀ é shi etsɛrɛ ngɛ. 21E shi ga ebe angɔ kpe engɔ a shi zhiri à tee abɔ Juu byɛ e ma tsɔmɔ efwɔ ebɛ ebɛbɔ ngɛ, kpe e waʼ etsɛrɛ Mose yɛ e me ga kpe e ka ŋwɔ ndee gɛ̀rɛ̀ ne kiri eleabwa bɔ Juu bo ngɛ. 22Angɔ shi nɛɛ éŋwaʼaŋwâʼ kpe ngwo shi zeʼe. Ntsɔ shi le ene enjitsɔ? 23Ebwa wɛ mbyɛɛ ma ke kpe ngwo fwɛʼɛ ngɛ ne ga kpe, bɔ kwɛ̀ deʼ be anɔ byɛ a shi tsɛrɛ é ndɛʼ ala deʼ ngɛ. 24Mbɔn ngɔɔ nè angɔ, gɛ̀rɛ̀ bùumu angɔ é sò epan wunɔ gɛ̀rɛ̀ nɛ̀rɛ̀ angɔ mbɔʼtye angɔ me né mò eto àmɔ̀. Éngɛ angɔ ba ngo nɛɛ kpe éŋwaʼa deʼ ne tsɛʼ ene abwa yɛ â ma ga mbɔʼ mbɔn ngɛ bo. Bɛʼngɛ e gɛrɛ ba ngo nɛɛ kpe mbɔn ba shi atsɛrɛ Mose. 25Bɛʼngɛ ebe ebɛbɔ byɛ â shi bɛrɛ ene Ngwe ngɛ, mbyɛɛ shi ŋwɛʼrɛ aŋwɛʼrɛ sàa ebe angɔ tsɛrɛ kpe angɔ ke nde nyɛm yɛ e me zhu é ghɔ ngwere bli anyi ngɛ bo. Ka de mwɔ anɔm kà nyɛm ǹgɛ̀ yɛ è me ku ngɛ, gɛ̀rɛ̀ ga kpe e shi akwa àmɔ̀ ne ma yɛrɛ nde ese bo.” 26Éngɛ Paalo nu angɔ. Ese sa kèʼ engɔ ngɔ̀ɔ sò amɔ. Éngɛ engɔ nyii efwɔ ndɔngwe kɛ̀, toʼro enji byɛ è ma ngo mwɔ bwɛn anji yɛ ebwa ma ngo ngùdù ngɛ. Anji yɛ e ma ngo zhu ala ndɛ̀ʼ ato gho ŋwàʼaŋwàʼ ngɛ.

Aŋu â bere Paalo efwɔ ndɔngwe kɛ̀ ngɛ

27Aŋu enji sàambyɛ byɛ â ma ngùdù ngɛ, bɔ Juu deʼ abɛɛ abɛ Esya zɔ Paalo efwɔ ndɔngwe kɛ̀. Angɔ nyii efwɔ ndɔngwe kɛ̀, ngwè bɔ fèe Paalo. 28Abɔ byɛ sa flaba ga kpe, “Bɔ Israel, mbɔn kpede angbɛɛ! Egho wɛ e ma zhìrì à tee abwa efwɔ akwâ gimkpaʼ ebe bɔ gimkpaʼ wɛ e ne ma tee abwa yɛ bɔ Israel mane atsɛrɛ Mose ma ga ngɛ bo, engɔ wa zhìrì à ga abwa mbɔʼ ndɔngwe kɛ̀ zɔnɔ. Enjitsɔ engɔ shi bwɛ ebɛbɔ nyii efwɔ etsam wunɔ é tsɔŋɔ afwɔ pɛ Ngwe!” 29Angɔ à na ga énde mbɔʼnga angɔ à shi Paalo mane Trofimus wɛ à me zeʼe abɛ Efɛsɔs ngɛ abɛ kɛ́. Angɔ ma bwaʼ kpe Paalo shi nu engɔ ngɔ̀ɔ efwɔ ndɔngwe kɛ̀. 30Abwa à fanna efwɔ abɛ kɛ́ yɛ, bɔ dɔrɔ ngɔɔ fèe Paalo nu ngɔɔ ese, e gwɔb enduʼndɔ ekyɛ ŋwaʼ. 31Abɔ byɛ â na ke é zhudu Paalo. Èndzobo chɛ e sàa ekɔn ebe gho kɛ̀ ebe bɔ ebiri a Rom kpe ebwa deʼ wa fɔɔ efwɔ abɛ Jerusalɛm. 32Egho kɛ̀ wɛ nu eto byɛ à ma fwɛʼ nè angɔ ngɛ mane bɔ ebiri, kla ngɔɔ afwɔ yɛ ebaŋagho à mwɔ ngɛ. Èndzobo chɛ abɔ byɛ â ma sɔmɔ Paalo â zɔ angɔ ngɛ, e gɛ̀rɛ̀ sàarà Paalo. 33Egho kɛ̀ wɛ ngɔɔ ebara Paalo, gɛ̀rɛ̀ ga kpe e koro engɔ ene anduʼ atɔrɔ fyee. Engɔ shi biiri kpe, “Egho wunɔ na awɛ? Engɔ ne le ebwa yɛ?” 34Abɔ deʼ efwɔ ebaŋabɔ gâ ngɔ̀ɔ âmɔ̀ abɛɛ, abɔ tsɛrɛ gâ ma abwa tsɛrɛ. Angɔ ne ga ega ŋwaʼ bo. Éngɛ gho kɛ̀ wɛ ne kli é nɛɛ ebwa wɛ Paalo me fwɛʼɛ ngɛ bo. Éngɛ engɔ gâ ebe bɔ afwɛʼ mɔ kpe angɔ bere Paalo ngɔ̀ɔ koo. 35E bwɛn ene m̀bɛ̀rɛ̀, angɔ beʼ engɔ sa ngɔ̀ɔ, ebaŋagho wɛ kɔrɔ angɔ, e ne me né wu zhiri nè engɔ bo. E beʼ engɔ mbɔʼnga ebaŋagho à me nɛɛ tye e zhudu engɔ. 36Angɔ à na kìrì engɔ ma flaba akwâ ga kpe, “Zhudu engɔ.” 37Aŋu abɔ ebiri byɛ â sa nyii é koo engɔ ngɛ, Paalo gâ ebe gho kɛ̀ wɛ kpe, “Mmɛ we né ga ebwa deʼ engɛ̂?” Gho kɛ̀ wɛ gíì kpe, “Ngwo we né ga atsoʼ Grik? 38Ngwo ke mwɔ gho Ejip wɛ à klada é ngwè ebiri gbèe bɔ tu-anɔm ètɔɔshin kwɛ̀ sàa efwɔ eguńked ngɛ bo?” 39Paalo gíì kpe, “Mmɛ na Paalo wɛ mmɛ mwɔ gho Juu me zeʼe a Tasɔs efwɔ Silisya, afwɔ be ndza, gho e me zeʼe efwɔ abɛɛ abɛ yɛ eghɔ mwɔ aŋu ngɛ, mmɛ buʼ ebwo engɛ̂ saa angu mmɛ ga ebe abɔ bɔnɔ.” 40Egho kɛ̀ wɛ ndɛʼ afwɔ ebe Paalo kpe engɔ ga, Paalo tam ene akɔ yɛ ngbeʼre amɔ ga kpe bɔ ba. Èndzobo chɛ angɔ à shi ba ngɛ Paalo ga ebe angɔ ene atsoʼ Hibru.

Currently Selected:

Eleabwa 21: nbt

Highlight

Copy