Eleabwa 20

1Èndzobo chɛ ebwa à shi myɛ ngɛ, Paalo zɔʼ bɔ bɛɛrɛ abwa mɔ ngɛ sa twàʼrà angɔ. Èndzobo chɛ engɔ à mɛɛrɛ ngɛ, engɔ gamma ebe angɔ nyɛn sa ngɔɔ abɛ Masedonya. 2Paalo à ngɔɔ efwɔ abɛɛ abɛ zɔnɔ ma twàʼrà bɔ ene abwa akɛkɛ. Engɔ à ngɔɔ abɛ Griis. 3Engɔ tsɔmɔ efwɔ abɛ zɔnɔ efwɔ ata tɛd. Èndzobo chɛ engɔ à nyɛn ngɔ̀ɔ abɛ Sirya ngɛ, e zɔ kpe bɔ Juu ba ndèerè abwa enji ndze. Éngɛ engɔ wu ngɔ̀ɔ anji Masedonya. 4Sopata ŋwɔanɔm Payrus wɛ à me zeʼe abɛ Bɛriya, Aristakyus mane Sekundus abɛ Tesalonika, Geyɔs abɛ Dɛɛb, Taykikɔs mane Trofimus efwɔ abɛɛ abɛ Esya mane Timatyɛ â ngɔɔ nè engɔ. 5Angɔ à ngɔɔ embè sa kɔʼ angbɛɛ abɛ Troas. 6Bɛʼngɛ mbyɛɛ à nyɛn a Filipi èndzobo chɛ antara ǹgoŋ ketsɛʼ àfòo à fɔɔ ngɛ, mbyɛɛ nu enji tan kla angɔ abɛ Troas. Mbyɛɛ à tsɔmɔ aŋu efwɔ enji sàambyɛ. 7Efwɔ anji mbèmbè efwɔ ǹkyɛ̀, èndzobo chɛ akwâ à sa di endzobo etiʼdi ngɛ, mbyɛɛ sɔŋɔ afwɔbi é nde. Paalo klada sa gà, ma twàʼrà bɔ karadidi bwɛn aghɛɛghɛɛ ǹklì mbɔʼnga engɔ à ma ke é nyɛn enchwenchwe. 8Enâm â na pɛ̀ efwɔ atwɔndɔ yɛ mbyɛɛ à mwɔ efwɔ, efwɔ ndɔ ekere ngɛ. 9Eghobo deʼ à ne tsɔmɔ ene ekɛʼndɔ ekumu ngɔ mwɔ Yutikɔs. Aŋu Paalo à ma sɛ̀ɛrɛ̀ ega Ngwe ma ngɔɔ ngɔɔ ngɛ, Yutikɔs ku m̀bwɛrɛ, nyɛn ene akɛʼɛ ndɔ ekere turu a chwâ, bɔ sa zeʼe engɔ shi ku. 10Bɛʼngɛ Paalo nyɛn ngɔɔ a chwâ, go ekwa ngɔ, è bama engɔ, gà ebe abɔ byɛ kpe, “Mbɔn ka ki, engɔ ke shi ku bo, engɔ bli ekɔʼɔ!” 11Éngɛ Paalo wu kwaʼ ngɔ̀ɔ ekere, efwɔ atwɔndɔ yɛ â mwɔ efwɔ ngɛ, è nde etara. Engɔ fɔɔ embè è ga ebe angɔ efwɔ endzobo dɔɔdɔɔ bwɛn èndzobo chɛ enchwe à gli ngɛ. Éngɛ Paalo nyɛn aŋu. 12Â beʼ eghobo wunɔ ngɔɔ abɛ ekɔʼɔ, ńtara angɔ gɛrɛ shi kuru.

Paalo nyɛn a Troas ngɔɔ a Miletus

13Mbyɛɛ à nyɛn ngɔ̀ɔ a Asos, efwɔ àwùundim wɛ mbyɛɛ à me zhuŋu é ngɔ̀ɔ mane Paalo ngɛ. Engɔ gâ endyɛɛ é fwɛʼ énde mbɔʼnga â ma ngo ngɔɔ aŋu ma alo. 14Èndzobo chɛ engɔ à kla angbɛɛ a Asos ngɛ, mbyɛɛ nu engɔ ngɔ̀ɔ a Mitɛlɛn. 15Mbyɛɛ à kpɛn ndim aŋu bwɛn a Chios enchwenchwe è tsɔmɔ aŋu anji ŋwaʼ, è ngɔɔ a Samos tsɔmɔ aŋu anji ŋwaʼ, nyɛn ngɔɔ a Miletus. 16Paalo à shi shi kpe mbè wa ngo kpɛ̀n ndim efwɔ abɛ Efɛsɔs mbɔʼtye e ne nyiimi endzobo abɛɛ abɛ Esya bo. Engɔ à na ngwè é bwɛn a Jerusalɛm anji azhwɛɛrɛ Ngwe mala e me zamma.

Engudu ga Paalo ebe eto efwɔ ndɔngwe abɛ Efɛsɔs

17Èndzobo chɛ Paalo à mwɔ a Miletus ngɛ, engɔ saa ekɔn efwɔ ndɔrɔngwe a Efɛsɔs kpe angɔ sɔŋɔ nè eto gimkpaʼ. 18Èndzobo chɛ angɔ à bwɛn ngɛ, Paalo gâ ebe angɔ kpe, “Mbɔn be nɛɛ aŋu mmɛ à nyiimi endzobo nè mbɔn enyɛrɛ anji mbèmbè yɛ mmɛ à bwɛn abɛɛ abɛ Esya ngɛ. 19Mmɛ à na fwɛʼ afwɛʼ ndza ebe Masakɛ ma bwaara ekwa ngu nè endɛrɛ aghɔɔ ndza èndzobo chɛ ǹgoʼ à kla angu mbɔʼ ebwa wɛ bɔ Juu â ge enji ndza ngɛ. 20Mbɔn be nɛɛ kpe mmɛ à ke tɔn é sɛ̀ɛrɛ̀ kà é tee abwa apɛpɛ mane efwɔ ndɔrɔ ntsɔn é kpèdè angɔn bo. 21Mmɛ à ga ebe bɔ Juu mane bɔ ebɛbɔ ma gbeʼre eto angɔ kpe e kobo eleabwa àmɔ̀ ngɔ̀ɔ ebe Ngwe gɛ̀rɛ̀ le ebɛrɛtaa ene Yeso Masakɛ. 22Éngɛ mmɛ shi zo ega azhwɛɛrɛ pɛ. Mmɛ shi anji é ngɔ̀ɔ a Jerusalɛm. Mmɛ ke nɛɛ ebwa wɛ e ma ngo gli ekwa ngu aŋu ngɛ bo. 23Ebwa mmɛ me nɛɛ ngɛ ne ga kpe, azhwɛɛrɛ pɛ shi gbeʼre ato ndza kpe e ba ngo koo angu a ndɔdzɔm, mmɛ gɛrɛ ma ngo zɔ ǹgoʼ efwɔ antiri abɛ Jerusalɛm. 24Bɛʼngɛ mmɛ ne kede etsɔmɔ ndza na ala deʼ nɔ bo. Mmɛ na ke é mɛ̀ɛrɛ̀ tye ebwa wɛ Masakɛ Yeso me ndɛʼ ena é fwɛʼ ngɛ. Ebwa wunɔ me é sɛ̀ɛrɛ̀ ekɔn ǹchwɔ̀ mbɔʼ enarataa Ngwe. 25Mmɛ shi zhiri abwaʼ ndzɔn ma sɛ̀ɛrɛ̀ tye me ebwa m̀fɔ̀ Ngwe. Enjitsɔ mmɛ we nɛɛ kpe mbɔn ke ma wu zɔ angu ekyɛ tsɛrɛ bo. 26Éngɛ mmɛ gâ éŋwaʼa endɔn kpe, mala gho deʼ abwaʼ ndzɔn yaa nyim, mbɔn nyim egha ndzɔn, ke mwɔ egha ndza bo. 27Mmɛ ke waʼa ebwa deʼ é mɛ̀nɛ̀ endɔn mbɔʼ ǹji abwa Ngwe bo. 28Éngɛ mbɔn kɔʼɔ akwa ndzɔn gɛ̀rɛ̀ kɔʼ abɔ angɔ byɛ azhwɛɛrɛ pɛ me le angɔn é mwɔ ǹkɔʼ ebe angɔ ngɛ. Mbɔn mwɔ ǹkɔʼ efwɔ ndɔngwe yɛ Ngwe à le è mwɔ engɔ ngɔ nyɛ̀n zeʼe ene anɔm ŋwɔ ngɔ ngɛ. 29Mmɛ we nɛɛ kpe èndzobo chɛ mmɛ ma ngo nyɛn ngɛ, bɔ m̀pɛ̀ʼ ba ngo zeʼ abwaʼ ndzɔn. Angɔ ke ma ngo shi ǹtsara nè mbɔn bo. 30Éngɛ endzobo ya ngo zeʼe yɛ abɔ byɛ e me bɛrɛ Ngwe nè mbɔn ngɛ ma ngo ga andɔɔ é gbèe bɔ bɛɛrɛ abwa é sàa abɛɛ tsɛrɛ. 31Éngɛ mbɔn zɔmmɔ angɔn, zhuŋu kpe efwɔ enɔ̂m tɛd mmɛ à na chwɛɛrɛ endɛrɛ ǹklì mane nchi é tee angɔn. 32Éngɛ enjitsɔ mmɛ ge angɔn eblabwo Ngwe mane ekɔn enarataa ngɔ. Ekɔn wɛ e me né le mbɔn nde etiʼi wɛ abɔ byɛ e me pɛ e ma ngo nde ngɛ. 33Mmɛ à ke ma ke atɔrɔ asere kà aklibi àfɔ̀n kà ǹdiri ebe gho deʼ abwaʼ ndzɔn bo. 34Mbɔn be nɛɛ kpe mmɛ shi fwɛʼɛ anchwɔnchwɔ ene ebwo mbu é le kpe abɔ byɛ mmɛ ma fwɛʼ nè angɔ mane mmɛ mɔmbwo le ela byɛ mbyɛɛ ma ke ngɛ. 35Mmɛ shi tee abwa gimkpaʼ endɔn aŋu mmɛ ma fwɛʼ ngɛ kpe aŋu mbɔn ma ngo ma fwɛʼ anchwɔnchwɔ ngɛ, mbɔn kpede abɔ byɛ e ne me le ekama é fwɛʼ bo ngɛ, ma zhuŋu ega wɛ Yeso Masakɛ mɔmbwo à ga ngɛ kpe ‘M̀bɔ̀nɔ kɛ ye mwɔ ebe abɔ byɛ e ma ndɛʼ ngɛ fɔɔ angɔ byɛ e ma nu ngɛ.’ ” 36Èndzobo chɛ Paalo à mɛɛrɛ ngɛ, engɔ chwɔn etongu mɔ a chwâ nè angɔ, tsàʼrà Ngwe. 37Angɔ à na ku̧u aŋu â ma bàa gɛ̀rɛ̀ ma shwàara eghɛɛ ngɔ ma ga kpe engɔ zhiri anchwɔnchwɔ ngɛ. 38Angɔ à ne ju ghɛʼ mbɔʼnga engɔ à shi ga ebe angɔ kpe e yà ne wu zɔ engɔ bo. Éngɛ e kiri engɔ ngɔ̀ɔ sàa engɔ efwɔ àwùundim.

Currently Selected:

Eleabwa 20: nbt

Highlight

Copy