Eleabwa 19

Paalo efwɔ abɛ Efɛsɔs

1Aŋu Apolos à mwɔ efwɔ abɛ Kɔrɛn ngɛ, Paalo fɔɔ efwɔ ebɛɛ ebɛ ǹgɛ̀ ngɔ̀ɔ bwɛn efwɔ abɛ Efɛsɔs. Engɔ à dù zɔ bɔ bɛɛrɛ abwa deʼ aŋu. 2Paalo biiri ebe angɔ kpe, “Azhwɛɛrɛ pɛ à zeʼe akwa ndzɔn èndzobo chɛ mbɔn à bɛrɛ ene ebwa Ngwe ngɛ?” Angɔ gíì kpe, “Mbyɛɛ de ke shi zozo kpe ala deʼ ya aŋu ma azhwɛɛrɛ pɛ bo.” 3Paalo biiri ebe angɔ kpe, “Éngɛ mbɔn shi me nu ngɛ ma m̀pè ndim me?” Angɔ gii kpe, “Andim myɛ Eyɔɔ à ma ndɛʼ ngɛ.” 4Paalo gâ ebe angɔ kpe, “Eyɔɔ à na ndɛʼ ndim ebe abɔ byɛ â waʼ abwa bɔɔbɔɔ àmɔ̀ ngɛ, gɛ̀rɛ̀ gâ ebe bɔ Israel kpe e le ebɛrɛ ene egho wɛ ma ngo zeʼ achim ndze ngɛ, éngɛ me ga kpe e le ebɛrɛ ene Yeso.” 5Èndzobo chɛ angɔ à zo ebwa wunɔ ngɛ, angɔ nu ndim ene ekumu Masakɛ Yeso. 6Èndzobo chɛ Paalo à gɛrɛ tɛʼ abwo mɔ ene angɔ ngɛ, azhwɛɛrɛ pɛ nyii akwa angɔ e klada sa ga atsoʼ m̀pèrempèrè. Angɔ gɛrɛ sɛ̀ɛrɛ̀ ega Ngwe. 7Angɔ à ne mwɔ na bɔ wum ǹchwɔ̀ fyee nɔ. 8Paalo à nu ata tɛd ma ya ngɔ̀ɔ efwɔ ndɔ bɛ̀ɛrɛ abwa bɔ Juu ma ga nè bɔ ene ndzɛ̀rɛ̀. Engɔ à sɛɛrɛ abwa nè angɔ ma twàʼrà amɔ é le kpe angɔ nɛɛ mbɔʼ ebwa m̀fɔ̀ Ngwe. 9Bɛʼngɛ abɔ deʼ abwaʼ angɔ à kaama ńtara àmɔ̀, tamma efàarà ǹtìmi bɔ, sa ga abwa bɔɔbɔɔ mbɔʼ aghɛʼnji Masakɛ. Éngɛ Paalo bwɛ bɔ bɛɛrɛ abwa nyɛn afwɔ yɛ. Engɔ à na ngɔ̀ɔ efwɔ etsam abɛ efwɔ abɛ Tyranus enji gimkpaʼ ma sɛ̀ɛrɛ̀ gɛ̀rɛ̀ ma tee abwa. 10Engɔ à fwɛʼ énde efwɔ enɔ̂m fyee, mbɔʼtye ngɛ bɔ gimkpaʼ byɛ â ma tsɔmɔ efwɔ entiri ebɛ efwɔ abɛ Esya ngɛ zo ega Ngwe, ka de mwɔ gho Juu kà gho ebɛbɔ.

Bwɔanɔm Skɛva

11Ngwe à na fwɛʼ abwa zodo zodo nyɛ̀rɛ̀ zèʼe achim Paalo. 12Â na bwɛ ka de mwɔ eparandi byɛ Paalo à shi gli ngɛ è gli bɔ aŋwan, akwa angɔ bwada ezhwɛɛrɛ bɔɔbɔɔ gɛrɛ dɔ̀d. 13Bɔ Juu deʼ byɛ â gɛrɛ ma fli ezhwɛɛrɛ bɔɔbɔɔ ngɛ gɛrɛ zhweʼre kpe mbɔɔ fli ezhwɛɛrɛ bɔɔbɔɔ bɔnɔ ene ekumu Yeso. Angɔ gâ ebe ezhwɛɛrɛ bɔɔbɔɔ kpe, “Mmɛ ga endɔn ene ekumu Yeso wɛ Paalo ma ga mbɔʼ engɔ ngɛ.” 14Bwɔanɔm sàambyɛ angwa zhiri wɛ ekumu ngɔ à mwɔ Skɛva ngɛ â na fwɛʼ ebwa wunɔ. 15Bɛʼngɛ azhwɛɛrɛ bɔɔbɔɔ ga ebe angɔ kpe, “Mmɛ we nɛɛ Yeso gɛ̀rɛ̀ me nɛɛ mbɔʼ Paalo, bɛʼngɛ mbɔn ngɛ, mbɔn shi ne ewɛ?” 16Egho wɛ à me le azhwɛɛrɛ bɔɔbɔɔ ngɛ à wu ke esɛʼ ebe angɔ me le ekama fɔɔ angɔ. Angɔ à gli efwɔ ndɔ aŋu ma zhiri à dɔrɔ. Angɔ à bɛ ebyɛ gɛ̀rɛ̀ panna ǹdiri angɔ. 17Bɔ Juu mane bɔ ebɛbɔ gimkpaʼ â zo mbɔʼ ebwa wunɔ, èklɔ̀ bere angɔ. E ndɛʼ eghɔ kɛ́ ene ekumu Masakɛ Yeso. 18Bɔ kristo akɛkɛ â zeʼe bɛrɛ apɛpɛ toʼro abwa yɛ angɔ shi fwɛʼ ngɛ. 19Bɔ akɛkɛ byɛ â ma tɛrɛ ǹgbara ngɛ bwɛ eŋwɛʼrɛ àmɔ̀ zeʼe twɔ̀n apɛpɛ efàarà bɔ. Angɔ à wu zhiiri ekɛb ene eŋwɛʼrɛ e kwaʼ bwɛn ebɛɛ esere èsama fyee tɛʼ wum. 20Ene aghɛʼnji kamakam zɔnɔ, ebwa Ngwe sa sɛ̀ʼ à ngɔɔ embè gɛ̀rɛ̀ sa tɛ̀bɛ ene ekama.

M̀bùʼ efwɔ abɛ Efɛsɔs

21Aŋu abwa zɔnɔ à fɔɔ ngɛ, Paalo ndeere etaa mɔ é fɔɔ efwɔ abɛ Masedonya mane Akaya é ngɔ̀ɔ efwɔ abɛ Jerusalɛm. Engɔ gâ kpe, “Mmɛ wa de ngɔɔ aŋu mmɛ gɛrɛ wa ngo zɔ abɛ Rom.” 22Éngɛ engɔ saa Timatyɛ mane Erastus byɛ â ma fwɛʼ nè engɔ ngɛ efwɔ abɛ Masedonya, è tsɔmɔ mɔ efwɔ abɛɛ abɛ Esya efwɔ antiri endzobo deʼ. 23À ne efwɔ endzobo zɔnɔ yɛ esɛʼ à gli efwɔ abɛ Efɛsɔs mbɔʼ ebwa Masakɛ ngɛ. 24Àti ela deʼ à na aŋu ekumu ngɔ mwɔ Demetriyɔs. Engɔ à ndeere ela ge efwɔ ndɔngwe kɛ̀ yɛ â ma ghɔ Ngwere bli aŋu ngɛ. Ekumu Ngwe zɔnɔ à na Atɛmis. Afwɛʼ zɔnɔ à na ndɛʼ ǹtsara ebe bɔ afwɛʼ ghɛʼ. 25Àti ela wunɔ zɔʼ bɔ afwɛʼ mɔ mane abɔ tsɛrɛ byɛ â ma ti ela ngɛ afwɔbi gâ ebe angɔ kpe, “Asɔrɔ ndza, mbɔn be nɛɛ kpe àfɔ̀n bɔ na zeʼe ene ela bɔnɔ ntsɔ ma ti nɔ? 26Enjitsɔ mbɔn shi zo gɛ̀rɛ̀ zɔ mbɔn mbwo ebwa wɛ e Paalo wunɔ ma fwɛʼ ngɛ. Engɔ ga kpe Ngwere chɛ bɔ ma ndèerè ngɛ ke ma ngwere deʼ bo. Engɔ ke me le énde tyetye efwɔ abɛ Efɛsɔs bo, ene le efwɔ abɛɛ abɛ Esya gimkpaʼ, è le bɔ gimkpaʼ shi bɛrɛ ene engɔ. 27Éngɛ e wa ngo bɔɔ mbɔʼnga afwɛʼ bo ma ngo le ekumu bɔɔbɔɔ. À ke tye me éngɛ bo, ngwere Atɛmis gɛrɛ ba ngo mwɔ ma ela bli. Eghɔ yɛ bɔ efwɔ Esya mane ese gimkpaʼ à ma ndɛʼ anyi ngɛ ne bli bo.” 28Èndzobo chɛ ebaŋabɔ à zo abwa zɔnɔ ngɛ, ńtara angɔ twa, e sa flaba gà kpe, “Ngwe Atɛmis efwɔ abɛ Efɛsɔs ye klo ghɛʼ.” 29Ebwa wunɔ à sɛ̂ʼ efwɔ abɛ gimkpaʼ. Ebyɛdɛ bɔ m̀bùʼ bere Geyɔs mane Aristakyus byɛ â mwɔ bɔ Masedonya byɛ â ma zhiri nè Paalo ngɛ, ngɔ̀ɔ efwɔ ndɔ èntsara azɔm. 30Paalo mɔmbwo ga kpe mbè dye ngɔɔ embè ebaŋabɔ, bɔ bɛɛrɛ abwa shi ne bɛrɛ é sàa engɔ bo. 31Eto deʼ efwɔ abɛ byɛ â mwɔ asɔrɔ Paalo ngɛ sàa ekɔn ebe engɔ kpe e ke tee amɔ efwɔ ndɔ èntsara azɔm bo. 32Aŋu bɔ â shi buumu afwɔbi ngɛ, abɔ bɔ sa flaba ga ebwa wu, abɔ be sa ga ma abwa tsɛrɛ mbɔʼnga bɔ akɛkɛ abwaʼ angɔ à de ke me nɛɛ ebwa wɛ à mwɔ ngɛ bo. 33Èndzobo chɛ bɔ Juu à le Alɛkzanda gli tam embè ngɛ, bɔ bwaʼ kpe engɔ a me ti ebwa. Engɔ sa kpe mbè bwaara bɔ aŋu à sàa ebwo mɔ ekere ngɛ, kpe mbè sa tòʼrò ebwa deʼ ebe ebaŋabɔ. 34Èndzobo chɛ angɔ à nɛɛ kpe engɔ na gho Juu ngɛ e sa wa mɛ̀ɛ flaba akwâ tyetye mwɔ enyɔ̀m fyee nɔ ma ga kpe, “Atɛmis na Ngwe kɛ efwɔ abɛ Efɛsɔs.” 35Èndzobo chɛ ekara efwɔ abɛ à shi bwaara bɔ ngɛ, è shi gâ kpe, “Bɔ Efɛsɔs, bɔ gimkpaʼ be nɛɛ kpe Ngwe Atɛmis na Ngwe kɛ̀ yɛ à turu à zeʼe ekere ngɛ. 36Tsɛ̀ʼ gho deʼ ma tɔrɔ abwa zɔnɔ bo. Mbɔn kuuru angɔn ne sa byɛdɛ bo. 37Mbɔn shi bwɛ abɔ bɔnɔ zeʼe anɔ wɛ angɔ ne me ji efwɔ ndɔngwe kà ga ebwa bɔɔbɔɔ deʼ mbɔʼ ngwere bɔ bo ngɛ. 38Mala Demetriyɔs mane bɔ afwɛʼ mɔ â me le ebwa nè gho deʼ, ntsɔ be le eto mane enji byɛ ntsɔ ma sɛ̀ʼɛ m̀pàrà ngɛ. Angɔ nu zeʼe aŋu. 39Bɛʼngɛ mala ebwa tsɛrɛ mwɔ shi e ba ngo sɛʼ afwɔ yɛ e ma tsɛrɛ asɛʼ ngɛ. 40Enga ene ebwa wunɔ à gli ànchwɔ̀ nɔ, e ba ngo ke abɔ kpe ntsɔ a ti m̀bùʼ. Ntsɔ ke le ǹji deʼ é ndɛʼ ene abwa zɔnɔ bo.” 41Aŋu engɔ à ga abwa zɔnɔ ngɛ e saa bɔ kpe angɔ klo.

Currently Selected:

Eleabwa 19: nbt

Highlight

Copy