Eleabwa 18

Paalo sɛɛrɛ ekɔn ǹchwɔ̀ efwɔ abɛ Kɔrɛn

1Aŋu abwa zɔnɔ â fɔɔ ngɛ, Paalo nyɛn efwɔ abɛ Atɛns ngɔɔ efwɔ abɛ Kɔrɛn. 2Engɔ dù kla gho Juu deʼ aŋu wɛ ekumu ngɔ à ma Akwila ngɛ. Â be engɔ efwɔ abɛ Pontus. Engɔ à ne bli à zeʼe zeʼe efwɔ abɛ Itali mane eye mɔ wɛ ekumu ngɔ à mwɔ Prisila ngɛ. Angɔ à klo mbɔʼnga egho wɛ à mwɔ ato efwɔ abɛ Rom, wɛ ekumu ngɔ à mwɔ Klawdyus ngɛ à ndɛʼ etsɛrɛ kpe bɔ Juu gimkpaʼ glini efwɔ abɛ Rom. 3Paalo à ngɔɔ abwaʼ angɔ mbɔʼnga angɔ à na le M̀pè abwo afwɛʼ ŋwaʼ. Angɔ à na àbyɛ enkpɛʼ. 4Paalo à na sɛ̀ɛrɛ̀ abwa efwɔ ndɔ bɛ̀ɛrɛ abwa bɔ Juu enji ku̧ru bɔ Juu gimkpaʼ, ma le kpe mbè kobo bɔ Juu mane ebɛbɔ e bɛrɛ ene Yeso Kristo. 5Endzobo Saylas mane Timatyɛ à ghɛɛbɛ zeʼe a Masedonya ngɛ, Paalo nu endzobo mɔ gimkpaʼ ma bɛ̀rɛ antsɛ ma ga apɛpɛ ebe bɔ Juu kpe Yeso na Ǹtɔmzhwaʼa. 6Aŋu angɔ à tam sa klàŋà ga abwa bɔɔbɔɔ mbɔʼ engɔ ngɛ, engɔ chidi amɔ efwɔ abwa yɛ gɛ̀rɛ̀ gà ebe angɔ kpe, “Mala mbɔn yaa nyim, mbɔn kwɔ̀nɔ̀ angɔn mbɔrɔmbɔn. Tsɛ̀ʼ esɛʼ ngu anyi bo. Enyɛrɛ enjitsɔ sa ngɔɔ embè, mmɛ wa ngɔɔ ebe ebɛbɔ.” 7Engɔ à nyɛn abwaʼ angɔ ngɔɔ tsɔmɔ efwɔ ndɔ gho ebɛbɔ deʼ wɛ ekumu ngɔ à mwɔ Taytɔs Justus ngɛ. Engɔ à na ghɔ Ngwe. Ndɔ ngɔ à ne ebara ndɔ bɛ̀ɛrɛ abwa bɔ Juu. 8Krispos wɛ à mwɔ ato efwɔ ndɔ bɛ̀ɛrɛ abwa bɔ Juu ngɛ, à le ebɛrɛ ene Ngwe nè ekla mɔ gimkpaʼ. Bɔ tsɛrɛ akɛkɛ efwɔ abɛ Kɔrɛn le ebɛrɛ gɛ̀rɛ̀ nu ndim. 9À shi ǹklì anji deʼ, nklama le Paalo. Masakɛ gâ ebe Paalo efwɔ nklama fɔnɔ kpe, “Ka bum, fɔɔ embè sa gàga gɛ̀rɛ̀ ne saara bo. 10Enga mmɛ we mwɔ nè ngwo. Tsɛ̀ʼ gho deʼ me né ndɛʼ abyɛ engɛ̂ bo mbɔʼnga bɔ akɛkɛ efwɔ abɛ zɔnɔ na bɔ mbu.” 11Éngɛ Paalo tsɔmɔ efwɔ abɛ Kɔrɛn efwɔ anɔ̂m bibi mane ata mfo, ma tee ega Ngwe ebe bɔ. 12Èndzobo chɛ â ge Galiyo ene ato ebe bɔ Rom efwɔ abɛ Akaya ngɛ, bɔ Juu byɛ aŋu ngɛ buumu àmɔ̀ afwɔbi bèrè Paalo, nu engɔ ngɔ̀ɔ efwɔ ndɔ m̀pàrà. 13Angɔ ga kpe, “Egho wunɔ wa ke é tiri bɔ shi e sa ghɔ Ngwe ene aghɛʼ deʼ yɛ etsɛrɛ ne me tee bo ngɛ.” 14Aŋu Paalo à kpe mbè sa gà ngɛ, Galiyo gâ ebe bɔ Juu kpe, “Mala esɛʼ wunɔ à mwɔ me ebwa bɔɔbɔɔ kà enyimebwa deʼ wɛ a me le ngɛ, shi azɔm a ne efwɔ e na é klini etaa nè mbɔn bɔ Juu. 15Bɛʼngɛ na aŋu a mwɔ me efɛɛrɛ mbɔʼ abwa, akumu mane atsɛrɛ ndzɔn ngɛ, mbɔn mbwo sɛʼ ebwa mɔmbwo. Mmɛ ke ma ngo mwɔ àsɛʼasɛʼɛ ene m̀pèrè abwa yɛngɛ bo!” 16Engɔ gɛrɛ fli angɔ efwɔ ndɔ m̀pàrà sàa ese. 17Angɔ bere Sostɛnɛs wɛ à mwɔ ato efwɔ ndɔ bɛ̀ɛrɛ abwa bɔ Juu ngɛ sɔm engɔ efàarà m̀pàrà. Bɛʼngɛ ebwa mɔmbwo à ke zɔ Galiyo ka mpiʼ nɔ bo.

Paalo wu ngɔ̀ɔ efwɔ abɛ Antyɔk

18Aŋu Paalo à shi tsɔmɔ nè bɔ kristo efwɔ abɛ Kɔrɛn efwɔ enji kwɛ̀ ngɛ, engɔ nyɛn nè Prisila mane Akwila sa ngɔɔ abɛ Sirya. Paalo à mo ato mɔ de sa nyɛn abɛ Senkreae mbɔʼnga engɔ à shi kànna abwa. 19Èndzobo chɛ angɔ à bwɛn efwɔ abɛ Efɛsɔs ngɛ, Paalo shi Prisila mane Akwila aŋu. Paalo nyii ngɔ̀ɔ efwɔ ndɔ bɛ̀ɛrɛ abwa bɔ Juu sa sɛ̀ɛrɛ̀ abwa nè angɔ. 20Abɔ byɛ ga ebe engɔ kpe è tsɔmɔ nè mbɔɔ efwɔ endzobo deʼ, bɛʼngɛ engɔ ne bɛrɛ bo. 21Aŋu engɔ à sa nyɛn ngɛ, è ga ebe angɔ kpe, “Mala me eshi Ngwe, shi mmɛ wa wu zeʼ achim endɔn.” Éngɛ engɔ ngɔɔ efwɔ abɛ Efɛsɔs. 22Èndzobo chɛ angɔ à bwɛn efwɔ abɛ Kaysarya ngɛ, Paalo nyii ngɔ̀ɔ efwɔ abɛ Jerusalɛm gamma ebe eshunu bɔ Ngwe gɛ̀rɛ̀ nyɛn ngɔɔ abɛ Antyɔk. 23Aŋu engɔ à shi tsɔmɔ aŋu efwɔ antiri endzobo deʼ ngɛ, engɔ nyɛn ngɔɔ efwɔ abɛɛ abɛ Galasha mane Frigya, zhiri à twaʼra bɔ kristo gimkpaʼ.

Apolos sɛɛrɛ ega Ngwe efwɔ ebɛ Efɛsɔs mane Kɔrɛn

24À ne èndzobo chɛ, gho Juu deʼ wɛ ekumu ngɔ à mwɔ Apolos, e gɛrɛ me be engɔ efwɔ abɛ Alɛkzandrya ngɛ zeʼe efwɔ abɛ Efɛsɔs. Etsoʼ ngɔ à ne pɛ anchwɔnchwɔ, engɔ gɛrɛ me nɛɛ aŋwɛʼrɛ Ngwe ene ǹchwɔ̀. 25Â shi tɛ̀ʼɛ engɔ ene aghɛʼnji Masakɛ. Engɔ à tee gɛ̀rɛ̀ sɛ̀ɛrɛ̀ abwa mbɔʼ Yeso Kristo anchwɔnchwɔ. Engɔ à shi ne nɛɛ tyetye me ebwa aŋu Eyɔɔ à ma ndɛ̀ʼ ndim ngɛ. 26Engɔ à klada sa gà efwɔ ndɔ bɛ̀ɛrɛ abwa bɔ Juu ene ndzɛ̀rɛ̀. Èndzobo chɛ Prisila mane Akwila â zo aŋu engɔ à ma gà ngɛ, e nu engɔ ngɔ̀ɔ a ndɔ àmɔ̀. Â dù toʼro abwa tsɛrɛ akɛkɛ mbɔʼ Ngwe ebe engɔ ene aghɛʼ yɛ à me koʼro ngɛ. 27Éngɛ Apolos nu etsɛrɛ ngɔɔ efwɔ abɛ Akaya. Bɔ kristo efwɔ abɛ Efɛsɔs â kpede engɔ nyɛ̀rɛ̀ zèʼe ene aŋwɛʼrɛ yɛ engɔ à ŋwɛʼrɛ sàa ebe bɔ kristo efwɔ abɛ Akaya ngɛ. Â twaʼra àmɔ̀ ma ga ebe angɔ kpe e nu engɔ anchwɔnchwɔ. Èndzobo chɛ engɔ à bwɛn aŋu ngɛ, engɔ kpede abɔ byɛ â shi bɔ kristo nyɛ̀rɛ̀ zèʼe ene enarataa Ngwe ngɛ. 28Éngɛ nyɛ̀rɛ̀ zèʼe aŋu engɔ à ma fɛ̀ɛrɛ ebwa ene ekama ngɛ, engɔ à fɔɔ bɔ Juu ene M̀pè ǹkpàn yɛ angɔ à ma fɛ̀ɛrɛ anyi ngɛ, nyɛ̀rɛ̀ zèʼe aŋu engɔ à ma chi abwa efwɔ aŋwɛʼrɛ Ngwe é tee kpe Yeso na Ǹtɔmzhwaʼa ngɛ.

Currently Selected:

Eleabwa 18: nbt

Highlight

Copy