Eleabwa 17

Esɛʼ gli efwɔ abɛ Tesalonika

1Paalo mane Saylas â fɔɔ efwɔ entiri ebɛ Amfipolis mane Apoloniya, bwɛn efwɔ antiri abɛ Tesalonika. Ndɔ bɛ̀ɛrɛ abwa bɔ Juu deʼ à na afwɔ yɛ. 2Paalo ngɔɔ efwɔ ndɔ bɛ̀ɛrɛ abwa zɔnɔ aŋu à ma doʼo à ngɔɔ ngɛ. Engɔ tsɔmɔ nè angɔ efwɔ ǹkyɛ̀rɛ̀ tɛd ma sɛ̀ɛrɛ̀ abwa nè angɔ efwɔ enji je bɔ Juu. 3Engɔ à na chi abwa efwɔ aŋwɛʼrɛ Ngwe ma tòʼrò ebe angɔ. Engɔ à le angɔ nɛɛ kpe Ǹtɔmzhwaʼa à ne koʼro é zɔ ǹgoʼ gɛ̀rɛ̀ zhwɛm ene ewu. Paalo à ga kpe, “Yeso wunɔ mmɛ ma gà endɔn nɔ na Ǹtɔmzhwaʼa wɛ.” 4Abɔ deʼ abwaʼ angɔ à bɛrɛ ebwa wɛ Paalo à ma sɛ̀ɛrɛ̀ ngɛ gɛ̀rɛ̀ bùumu àmɔ̀ abwaʼ Paalo mane Saylas. Aye deʼ byɛ â mwɔ eto mane bɔ Grik byɛ â ma ghɔ Ngwe ngɛ kiri angɔ. 5Bɛʼngɛ bɔ Juu deʼ â ku aghɔʼ nyɛn, zhiri à pɛ̀dɛ̀ e tsɛddɛ bɔ deʼ ati ewu̧ e ti m̀bùʼ. Aŋu angɔ à ti esɛʼ ngɛ, e klada sa zhiri à zɛʼ Paalo mane Saylas é nu angɔ é ngɔ̀ɔ efàarà ebaŋabɔ. Aŋu â ma zhiri à ngɔɔ ngɛ, e nyii efwɔ ndɔ gho deʼ wɛ ekumu ngɔ à mwɔ Jasɔn ngɛ. 6Aŋu angɔ à ne zɔ Paalo mane Saylas bo ngɛ, e goo Jasɔn mane bɔ kristo tsɛrɛ byɛ â shi bɛrɛ ebwa Ngwe ngɛ ngɔɔ efàarà eto efwɔ abɛ sa flaba à ga kpe, “Abɔ bɔnɔ shi zhiri à ti abwa shi akwâ gimkpaʼ. Enjitsɔ angɔ shi zeʼe efwɔ abɛ bo. 7Jasɔn à shi nu angɔ shi efwɔ ndɔ mɔ. Angɔ bɔ gimkpaʼ shi go etsɛrɛ yɛ ato efwɔ abɛ Rom me shi ngɛ, sa ga kpe M̀fɔ̀ tsɛrɛ ya aŋu wɛ e ma zɔʼrɔ kpe Yeso ngɛ.” 8Èndzobo chɛ ebaŋabɔ mane eto efwɔ abɛ â zo abwa zɔnɔ ngɛ, e ndɛʼ ǹgoʼ ebe angɔ. 9Eto efwɔ abɛ ga Jasɔn mane abɔ abê ndɛʼ ekɛb deʼ e pweere angɔ sàa e ngɔɔ.

Paalo sɛɛrɛ ega Ngwe efwɔ abɛ Bereya

10Aŋu etiʼi à di ngɛ, abɔ byɛ â me le ebɛrɛ ngɛ saa Paalo mane Saylas a Bereya. Èndzobo chɛ angɔ à bwɛn aŋu ngɛ, e nyii ngɔɔ efwɔ ndɔ bɛ̀ɛrɛ abwa bɔ Juu. 11Abɔ Juu byɛ a mwɔ a Bereya ngɛ â ne fuʼu ńtara àmɔ̀ fɔɔ abɔ ngɔ byɛ a Tesalonika ngɛ. Angɔ à tɛʼɛ ètimi àmɔ̀ zhuru ega wɛ ene egɛnɛ. Angɔ à na zɔʼrɔ aŋwɛʼrɛ Ngwe enji gimkpaʼ, é zɔ ka ebwa wɛ Paalo à ga ngɛ ne éŋwaʼa ngà. 12Bɔ akɛkɛ abwaʼ angɔ à le ebɛrɛ. Âye mane ânɔm deʼ byɛ â mwɔ bɔ kɛ́ efwɔ abɛ ngɛ â le ebɛrɛ. 13Bɛʼngɛ èndzobo chɛ bɔ Juu efwɔ abɛ Tesalonika â zo kpe Paalo à shi sɛɛrɛ ega Ngwe efwɔ abɛ Bereya gɛrɛ ngɛ, angɔ nyɛn zeʼe aŋu dù shwàʼrà bɔ klada sa ti esɛʼ. 14Egha ŋwaʼ, abɔ â me le ebɛrɛ ene Ngwe ngɛ saa Paalo efwɔ abɛ deʼ eba eji. Bɛʼngɛ Saylas mane Timatyɛ nɔ aŋu. 15Abɔ byɛ à ngɔɔ é sàa Paalo ngɛ à ngɔɔ bwɛn efwɔ antiri abɛ Atɛns, gɛ̀rɛ̀ shi wu ngɔɔ achim a Bereya. Èndzobo chɛ angɔ à sa ghɛɛbɛ zeʼe achim abɛ Bereya ngɛ, Paalo mɛ̀nɛ̀ ekɔn kpe Saylas mane Timatyɛ kla angbe aŋu mbè ma ga nɔ.

Paalo sɛɛrɛ ega Ngwe efwɔ abɛ Atɛns

16Aŋu Paalo à ma kɔʼ Saylas mane Timatyɛ efwɔ antiri abɛ ngɛ, etaa ngɔ à twa èndzobo chɛ engɔ à zɔ kpe ngwere bli â ne shwe efwɔ antiri abɛ Atɛns ngɛ. 17Éngɛ engɔ sɛɛrɛ abwa nè bɔ Juu mane ebɛbɔ byɛ â ma ghɔ Ngwe ngɛ efwɔ ndɔ bɛ̀ɛrɛ abwa bɔ Juu. Engɔ à gɛrɛ sɛ̀ɛrɛ̀ abwa nè abɔ byɛ â ma fɔɔrɔ etonji ngɛ. 18Bɔ deʼ byɛ â me nɛɛ abwa ghɛʼ byɛ a ma zɔʼrɔ kpe Epikurɛn mane Stɔyiks ngɛ, â na fɛ̀ɛrɛ nè engɔ. Abɔ deʼ abwaʼ angɔ biiri kpe, “Egho wunɔ ma tee kpe mbè we nɛɛ ngɛ na ga kpe ayɛ?” Adeʼ gii kpe, “E na angu na è ma ga mbɔʼ ngwere fe deʼ nɔ.” Angɔ à ga éngɛ mbɔʼnga Paalo à ma sɛ̀ɛrɛ̀ mbɔʼ Yeso mane ezhwɛm ene ewu. 19Éngɛ angɔ nu Paalo ngɔ̀ɔ efwɔ ndɔ m̀pàrà efwɔ abɛ yɛ â ma zɔʼrɔ kpe Ariyopagus ngɛ. E ga ebe engɔ kpe, “Mbyɛɛ ba ke é nɛɛ ǹji ene abwa fe zɔnɔ ngwo ma tee nɔ. 20Abwa deʼ abwaʼ abwa yɛ ngwo ma tee ngɛ na abwa fe endyɛɛ, mbyɛɛ ma ke é nɛɛ ǹji anyi.” 21Enga bɔ gimkpaʼ mane àgɔn byɛ â ma tsɔmɔ efwɔ abɛ Atɛns ngɛ â ne doʼo nyiimi endzobo àmɔ̀ gimkpaʼ é ma sɛ̀ɛrɛ̀ kà zhuru abwa fe yɛ â ma gli ngɛ. 22Paalo tam efàarà m̀pàrà abɛ gɛ̀rɛ̀ ga kpe, “Mmɛ shi zɔ kpe mbɔn bɔ Atɛns, mbɔn be nɛɛ Ngwe. 23Enga aŋu mmɛ à zhiri efwɔ abɛ ndzɔn ngɛ, mmɛ kede akwâ yɛ mbɔn à ma ghɔ Ngwe aŋu ngɛ, mmɛ zɔ echud, e me ŋwɛʼrɛ anyi kpe ‘Ebe Ngwe yɛ e ne me nɛɛ bo ngɛ.’ Engwe yɛ mbɔn ma ghɔ ne me nɛɛ bo ngɛ ne engɔ zɔ mmɛ ma tòʼrò endɔn nɔ. 24Engɔ na Ngwe à ndeere ese mane ela gimkpaʼ efwɔ ngɛ. Engɔ na Masakɛ ekere mane a chwâ. Engɔ ke ma mwɔ efwɔ ndɔrɔngwe kɛ́ chɛ à me byɛ ma bɔ ngɛ bo. 25Engɔ ke ma ke kpe ntsɔ fwɛʼɛ é ndɛʼ ala deʼ énde ne engɔ ma ke ala deʼ nɔ bo. Éngɛ engɔ mɔmbwo a ma ndɛʼ etyê, azhwɛɛrɛ mane ela gimkpaʼ ebe gho ŋwàʼaŋwàʼ. 26Enyɛrɛ ene gho ŋwaʼ, engɔ à ndeere bɔ gimkpaʼ efwɔ ese, è le angɔ tsɔmɔ edɔm chwâ gimkpaʼ. Engɔ à shi dye ndèerè endzobo mane afwɔ yɛ gho ŋwàʼaŋwàʼ ma ngo tsɔmɔ ngɛ. 27Engɔ à le énde mbɔʼtye e sa zɛʼ kpe ngadeʼ e zɔ engɔ aŋu angɔ ma zhuŋu mbɔʼ engɔ ngɛ, éngɛ Ngwe à da ne me dɔɔ ezhin ebe gho deʼ abwaʼ bɔ bo. 28Na aŋu gho deʼ à shi ga kpe ‘Ntsɔ na tsɔmɔ ma zhiri gɛ̀rɛ̀ ma mwɔ efwɔ engɔ.’ Na aŋu abɔ mbɔn adeʼ byɛ â ma ŋwɛ̀ʼrɛ̀ eŋwɛʼrɛ ngɛ â ga kpe ‘Ntsɔ gɛrɛ na bwɔ ngɔ.’ 29Aŋu ntsɔ mwɔ bwɔ Ngwe ngɛ, e ke koʼro é sa bwaʼ kpe Ngwe na aklibi àfɔ̀n, kà atɔrɔ asere, kà etye deʼ yɛ gho me ndeere ngɛ bo. 30Ngwe à shi waʼ abwa yɛ bɔ â ma fwɛʼ èndzobo chɛ â ne shi nɛɛ engɔ bo ngɛ. Bɛʼngɛ enjitsɔ engɔ shi ndɛʼ etsɛrɛ akwâ gimkpaʼ ebe bɔ gimkpaʼ kpe e kobo eleabwa bɔɔbɔɔ àmɔ̀. 31Enga engɔ à shi ndèere anji yɛ engɔ ma ngo sɛʼ ese gimkpaʼ ene éŋwaʼa nyɛ̀rɛ̀ zeʼe ene egho wɛ engɔ à shi chi ngɛ. Engɔ shi tee ebwa wunɔ apɛpɛ ebe gho ŋwàʼaŋwàʼ nyɛ̀rɛ̀ zeʼe aŋu engɔ à zhwɛɛmɛ egho wunɔ ene ewu ngɛ.” 32Aŋu angɔ à zo Paalo sa ga mbɔʼ é zhwɛɛmɛ bɔ kudu ngɛ, abɔ deʼ sa tsɔʼɔ à sèrè engɔ. Abɔ deʼ ga kpe, “Mbyɛɛ be doʼo kpe ngwo wu gà mbɔʼ ebwa wunɔ ekyɛ tsɛrɛ.” 33Éngɛ Paalo nyɛn efwɔ eshunu wɛ. 34Abɔ deʼ â le ebɛrɛ gɛ̀rɛ̀ buumu engɔ. Abɔ bɔnɔ adeʼ â na Dionysyus, wɛ à mwɔ egho bi abwaʼ bɔ m̀pàrà ngɛ, aye deʼ wɛ ekumu ngɔ à mwɔ Damaris ngɛ mane abɔ tsɛrɛ.

Currently Selected:

Eleabwa 17: nbt

Highlight

Copy