Eleabwa 11

Petoro toʼro ebwa wɛ à gli ngɛ ebe ndɔngwe a Jerusalɛm

1Bèmpwɔnɔntɔm mane abɔ tsɛrɛ byɛ â bɛrɛ ebwa Ngwe efwɔ abɛ Judeya gimkpaʼ ngɛ â zo kpe ebɛbɔ a gɛrɛ shi bɛrɛ ega Ngwe. 2Èndzobo chɛ Petoro à ngɔɔ a Jerusalɛm ngɛ, abɔ kristo byɛ â me ga àmɔ̀ kpe e ndee ebɛbɔ ke e shi mwɔ bɔ kristo ngɛ â kwɔnɔ Petoro ga kpe, 3“Ngwo a ne ngɔɔ efwɔ ndɔ ebɛbɔ byɛ e ne ndee angɔ bo ngɛ karadidi sa nde efwɔ ndɔ angɔ.” 4Éngɛ Petoro toʼro abwa gimkpaʼ yɛ â gli nyɛrɛ ene eklada ngɛ kpe 5“Aŋu mmɛ à ma tsàʼrà Ngwe efwɔ antiri abɛ Jopa ngɛ, mmɛ à le nklama nchi deʼ. Mmɛ zɔ ala deʼ na angwa abɛɛ ala deʼ na ǹdi nɔ kla zeʼe ezob, e me klini ene ǹdɔʼrɔ mɔ kwɛ̀ tam efàarà ndza. 6Mmɛ kɔʼ efwɔ, è zɔ m̀pèrè Nyɛmɛrɛ abɛ mane nyɛmɛrɛ ǹgɛ̀, nyɛmɛrɛ chɛ e ma gòo abum a chwâ ngɛ mane ènɔ̀n ezob. 7Mmɛ zo ega deʼ ga ena kpe ‘Petoro, tam ekere nyɛmɛrɛ tsɔnɔ na é zhu à nde.’ 8Bɛʼngɛ mmɛ gíì kpe ‘Afub ndza bli Masakɛ! Tsɛ̀ʼ ala deʼ yɛ etsɛrɛ Mose me tɔn kà ala deʼ yɛ a ne me pɛ efàarà Masakɛ ngɛ shi fɔɔ eklo ngu bo.’ 9Éngɛ ega wɛ wu ga ena nyɛ̀rɛ̀ zèʼe ezob kpe, ‘Ke kede ala deʼ yɛ Masakɛ shi ndeere a me pɛ ngɛ kpe a ke pɛ bo bo.’ 10Ebwa wunɔ à fɔɔ énde akyɛ tɛd. E sa ngùdù gɛrɛ wu gòo angwa abɛɛ ala yɛ ngɔɔ ezob. 11Endzobo ŋwaʼ yɛ bɔ deʼ tɛd, byɛ â me saa angɔ ena nyɛ̀rɛ̀ zèʼe a Kaysarya ngɛ bwɛn efwɔ ndɔ yɛ mmɛ à ma tsɔmɔ ngɛ. 12Azhwɛɛrɛ Ngwe ga ena kpe mmɛ zamma ngɔɔ nè angɔ ne ma toʼ awɛɛ deʼ ene angɔ nè mbyɛɛ bo. Bɔ mfo byɛ â me bɛrɛ ebwa Ngwe a Jopa ngɛ â kiri angu ngɔɔ a Kaysarya. Éngɛ mbyɛɛ bɔ gimkpaʼ ngɔɔ a ndɔ Konelyɔs. 13Konelyɔs wɛ à ga endyɛɛ na aŋu engɔ à zɔ angere me tama enduʼndɔ ngɔ gâ ebe engɔ kpe ‘Saa gho a Jopa ebe gho deʼ wɛ ekumu ngɔ mwɔ Shimun Petoro ngɛ. 14Engɔ wa ngo ga aga engɛ̂ yɛ à ma ngo pwèerè awɛ mane ekla ngwɛ gimkpaʼ ngɛ.’ 15Èndzobo chɛ mmɛ à klada sa ga ngɛ, azhwɛɛrɛ pɛ kla zeʼe ezob e shwe akwa angɔ na aŋu â shwe akwa bɔ nyɛ̀rɛ̀ zèʼe ene eklada ngɛ. 16Éngɛ mmɛ zhuŋu ebwa wɛ Masakɛ à shi ga ngɛ kpe, ‘Eyɔɔ à ndɛʼ me ndim, bɛʼngɛ mbɔn ba ngo nu ma azhwɛɛrɛ Ngwe.’ 17Mala Ngwe à ndɛʼɛ ebe ebɛbɔ, etɔ̧ɔrɔ ŋwaʼ yɛ engɔ à ndɛʼɛ ebe bɔ byɛ ntsɔ à bɛrɛ ene Masakɛ Yeso Kristo ngɛ, mmɛ shi mwɔ awɛ é kɔn kpe Ngwe ke le ebwa wɛ engɔ ma ke le ebe angɔ ngɛ bo?” 18Èndzobo chɛ angɔ à zo aŋu Petoro à toʼro énde nɔ, angɔ à ke wu kwɔ̀nɔ̀ engɔ bo. Â ba sa ghɔ ma Ngwe à ga kpe, “Éngɛ Ngwe shi ndɛʼ afwɔ ebe ebɛbɔ é waʼ abwa bɔɔbɔɔ àmɔ̀ mbɔʼtye e yaa nde etyê.”

Ndɔngwe efwɔ abɛ Antyɔk

19Èndzobo chɛ a ma nyìi abɔ byɛ â me bɛrɛ ene Ngwe gɛrɛ zhudu Stefin ngɛ, abɔ deʼ byɛ â sam angɛ̀rɛ ngɛ â ngɔɔ bwɛn a Foenisya, Sayprɔs mane Antyɔk. Angɔ à na zhiri à sɛ̀ɛrɛ̀ ekɔn wɛ tyetye ebe bɔ Juu. 20Bɛʼngɛ angɔ byɛ â me bɛrɛ ene Ngwe me zeʼe a Sayprɔs mane Sirɛn ngɛ â ngɔɔ abɛ Antyɔk è sɛ̀ɛrɛ̀ ekɔn ǹchwɔ̀ wɛ mbɔʼ Yeso Kristo ngɛ ebe ebɛbɔ. 21Ekama Masakɛ à ne mwɔ nè angɔ. Bɔ akɛkɛ â bɛrɛ kobo ńtara àmɔ̀ zeʼe ebe Masakɛ. 22Bɔ ndɔngwe a Jerusalɛm â zo gɛ̀rɛ̀ sàa Banabas abɛ Antyɔk. 23Èndzobo chɛ Banabas à bwɛn aŋu ngɛ, è zɔ aŋu Ngwe shi ndɛʼ m̀bɔ̀nɔ ebe abɔ byɛ ngɛ, engɔ gɛnɛ amɔ, e twaʼra angɔ kpe ebɛrɛtaa angɔ ngɔɔ embè embè. Angɔ gɛrɛ tye ene éŋwaʼa nè Masakɛ ene ńtara angɔ gimkpaʼ. 24Banabas à na gho ǹchwɔ̀, azhwɛɛrɛ Ngwe me shwe ekwa ngɔ. Ebɛrɛtaa ngɔ à ne kama, éngɛ bɔ akɛkɛ bɛrɛ ene Masakɛ. 25Éngɛ Banabas à ngɔɔ é kɔʼrɔ Saalo abɛ Tasɔs. 26Èndzobo chɛ engɔ à zɔ Saalo ngɛ, è nu engɔ ngɔ̀ɔ a Antyɔk, è tsɔmɔ aŋu efwɔ anɔ̂m bibi ma sɔ̀ŋɔ̀ nè bɔ ndɔngwe efwɔ ǹtìmi gɛ̀rɛ̀ tee abwa ebe bɔ akɛkɛ. À ne efwɔ abɛ Antyɔk à dye zɔʼrɔ abɔ â me bɛrɛ Ngwe ngɛ kpe, “Bɔ kristo.” 27Endzobo ŋwaʼ yɛ, bàmɛnɛkɔn deʼ à nyɛn a Jerusalɛm ngɔɔ abɛ Antyɔk. 28Egho bi wɛ ekumu ngɔ à mwɔ Agabus ngɛ à tam ekere azhwɛɛrɛ le engɔ ga ebwa ke gli kpe jɛbo ya ngo nyii efwɔ abɛ. E jɛbo zɔnɔ à nyii èndzobo chɛ Klawdyus à mwɔ m̀fɔ̀ efwɔ abɛ Rom ngɛ. 29Bɔ bɛɛrɛ abwa ga è tsɛd egha àmɔ̀ kpe mbɔɔ ba fɔŋɔ ela aŋu mbɔɔ me né fɔŋɔ ngɛ é ndɛʼ na ekpede nɔ, ebe bwɔngwa bɔ achim kristo abɛ Judeya. 30Angɔ à fɔŋɔ ekɛb sàa Banabas mane Saalo kpe angɔ ngɔɔ ndɛʼ ebe eto efwɔ ndɔngwe aŋu.

Currently Selected:

Eleabwa 11: nbt

Highlight

Copy