Eleabwa 12

Enyii tsa ngɔɔ embè embè

1Èndzobo chɛ m̀fɔ̀ Hɛrɔd klada sa nyii bɔ ndɔngwe deʼ. 2Engɔ à kɛmɛ Jems ghongwa Eyɔɔ zhudu. 3Engɔ éngɛ zɔ kpe bɔ Juu a ne gɛnɛ àmɔ̀ aŋu engɔ à kɛmɛ Jems ngɛ, è fɔɔ embè bere Petoro (Ezɔnɔ à ne endzobo antara ǹgoŋ ketsɛʼ àfòo) 4Èndzobo chɛ à shi bere Petoro ngɛ, è ge engɔ a ndɔdzɔm. Ǹtìmìri bɔ ebiri kwɛ̀ ma kɔʼ engɔ, ǹtìmi ŋwaʼ me le bɔ kwɛ̀. Hɛrɔd à ne shi kpe e ba sa sɛ̀ʼɛ angɔ èndzobo chɛ antara fɔɔ ekere shi fɔɔ ngɛ. 5Aŋu â me koo Petoro a ndɔdzɔm ngɛ, bɔ ndɔngwe ma zhii à tsàʼrà Ngwe ato engɔ.

Angere Ngwe pwèerè Petoro chi a ndɔdzɔm

6Efwɔ ǹklì yɛ Hɛrɔd à ma tama é nu engɔ é zeʼ ebe bɔ ngɛ, Petoro à ne bwɛrɛ aghɛɛghɛɛ bɔ ebiri fyee. Â ne koro engɔ ene anduʼ atɔrɔ fyee, bɔ ebiri gɛrɛ me tsɔmɔ enduʼnkɛmɛ ndɔdzɔm. 7E sa klikɔ̀ʼ, angere Masakɛ shi tama aŋu. Efwɔ ndɔ gimkpaʼ pɛ ne nchi nɔ. Angere wɛ njiʼri Petoro ambɔ̀ʼ abwo, è zɛɛmɛ engɔ gà ebe engɔ kpe, “Zamma, tam ekere!” Ekyɛ ŋwaʼ dzɔmɔrɔ chɛ zɛɛrɛ gli abwo Petoro. 8Éngɛ angere wɛ gâ ebe Petoro kpe, “Koro ekwo ngwɛ gɛ̀rɛ̀ gè ebla nchɛ.” Petoro le engɛ̂, angere wɛ gâ ebe engɔ kpe, “Ge ǹdi edɔ̀m njɛ kiri angu.” 9Petoro kiri engɔ glì a ndɔdzɔm ne nɛɛ kpe ebwa angere à ma le ngɛ ne ebwa éŋwaʼa bo. Engɔ à na zhùŋù kpe ne nklama a ma le angbe. 10Angɔ à fɔɔ bɔ ebiri mbèmbè ngɛ, è fɔɔ engɔ à mwɔ nùrù fyee ngɛ bwɛn ene enduʼnkɛmɛ atɔrɔ wɛ â ma nyii efwɔ abɛ ngɛ. Enduʼnkɛmɛ wɛ â fuʼu egha mɔ angɔ glini. Angɔ à bwɛn ene ato ǹjì deʼ, sa klikɔ̀ʼ, angere wɛ saara Petoro aŋu. 11Aghɔɔ Petoro pɛ, engɔ nɛɛ kpe ne ebwa éŋwaʼa, è ga kpe, “Mmɛ nɛɛ enjitsɔ kpe ne éŋwaʼa, Masakɛ a tɔm angere mɔ kpe è zeʼe chi angu eblabwo Hɛrɔd mane abwa gimkpaʼ yɛ bɔ Juu â ma kɔʼ kpe a gli ngɛ.” 12Aŋu engɔ à me nɛɛ kpe e ba ke ato ndze ngɛ, engɔ ngɔɔ a ndɔ Meri áʼɔ̧̀ Eyɔɔ Mak. Bɔ akɛkɛ â ne shunu ma tsàʼrà Ngwe aŋu. 13Petoro gbeʼre enduʼndɔ ese, aŋwɔ afwɛʼ deʼ wɛ ekumu ngɔ à mwɔ Roda ngɛ zeʼ é pànà. 14Engɔ nɛɛ etsoʼ Petoro, gɛnɛ amɔ dɔrɔ ngɔɔ a ndɔ de bli enduʼndɔ ke fuʼ, è ga kpe Petoro we tama enduʼndɔ ese. 15Angɔ gâ ebe aŋwɔaye wɛ kpe, “Ala njɛ ngɛ nyɛn!” Eŋwɔ wɛ twaʼra amɔ kpe ne éŋwaʼa. Angɔ gíì kpe, “Na angere ngɔ.” 16Éngɛ nɔ Petoro à ma fùumu à gbeʼre ndɔ gbeʼre. E mwɔ mwɔ fuʼ ndɔ. Aŋu angɔ à zɔ kpe na Petoro ngɛ â kɔ̂n. 17Petoro njiʼri abwo ebe angɔ kpe angɔ ba. Engɔ sɛɛrɛ ebe angɔ aŋu Masakɛ a chi engɔ a ndɔdzɔm ngɛ, shi gà ebe angɔ kpe, “Mbɔn toʼro ebe Jems mane abɔ kristo abɛ.” Engɔ à nyɛn ngɔɔ afwɔ tsɛrɛ. 18Ese à keʼ, abuguru shwe a ndɔdzɔm abwaʼ bɔ ebiri ngwo nɛɛ? E sa gà kpe Petoro wa awe? 19Hɛrɔd ndɛʼ etsɛrɛ kpe e ke engɔ ndɛ̀ʼ. Bɛʼngɛ â ke zɔ engɔ bo. Hɛrɔd bedde abɔ ebiri byɛ, biiri abwa ebe angɔ gɛ̀rɛ̀ tsɛd kpe e zhudu angɔ. Èndzobo chɛ ebwa wunɔ à fɔɔ ngɛ, Hɛrɔd nyɛn a Judeya ngɔ̀ɔ tsɔmɔ a Kaysarya efwɔ endzobo deʼ.

Aŋu Hɛrɔd à ku ngɛ

20Hɛrɔd à ne bɔɔ etaa ekwa bɔ Taya mane bɔ Sidɔn. Éngɛ abɔ byɛ ngɔɔ na ǹtìmi nɔ é zɔ engɔ. Angɔ à dye bii Blastus wɛ à ma kɔʼ ǹtɔʼ ngɛ kpe è kpede angɔɔ. Angɔ shi nyɛn ngɔɔ ebe Hɛrɔd é buʼ ebwo ebe engɔ kpe mbɔɔ wu tsɔmɔ ene ebwa ŋwaʼ, mbɔʼnga ebɛ angɔ à na nu ande àmɔ̀ ebe Hɛrɔd. 21À shi anji deʼ, Hɛrɔd nɔɔ amɔ ene ǹdiri m̀fɔ̀, tsɔmɔ edɔm atan m̀fɔ̀, klada sa gà ebe bɔ mɔ. 22Bɔ ngɔ flaba akwâ ga kpe, “Na Ngwe a ma ga, ke ma gho bo!” 23Ekyɛ ŋwaʼ angere Ngwe wuru Hɛrɔd sàa a chwâ mbɔʼnga engɔ à ke ghɔ Ngwe bo. Anyɔ à tsɛd ekwa engɔ, è ku. 24Ebwa Ngwe à ma sɛ̀ʼ à ngɔ̀ɔ embè embè. 25Banabas mane Saalo â mɛɛrɛ afwɛʼ àmɔ̀, è nu Eyɔɔ Mak a Jerusalɛm ghɛɛbɛ nè engɔ.

Currently Selected:

Eleabwa 12: nbt

Highlight

Copy