Eleabwa 13

Azhwɛɛrɛ Ngwe chi Banabas mane Paalo tɔm angɔ

1Bàmɛnɛkɔn Ngwe mane bàtee abwa deʼ â ne mwɔ efwɔ ndɔngwe a Antyɔk. Akumu angɔ à na Banabas, Shimyɔn wɛ â ma zɔʼrɔ kpe Blak ngɛ, Lukiyɔs gho Sirɛn, Manayen wɛ à tɛb a ndɔ m̀fɔ̀ Hɛrɔd ngɛ, mane Saalo. 2Aŋu angɔ à ma ghɔ Masakɛ gɛ̀rɛ̀ ma tsɔmɔ ene nchwɔrɔ ma tsàʼrà Ngwe ngɛ, azhwɛɛrɛ Ngwe gâ ebe angɔ kpe, “Mbɔn chi Banabas mane Saalo shi ene afwɛʼ yɛ mmɛ me zɔʼ angɔ anyi ngɛ.” 3Endzobo angɔ à shi mɛ̀ɛrɛ ene chwɔ atsaʼra Ngwe gɛ̀rɛ̀ tsàʼrà Ngwe ngɛ, angɔ tɛʼrɛ ebwo àmɔ̀ eto angɔ saara angɔ e ngɔɔ.

Bèmpwɔnɔntɔm sɛɛrɛ ega Ngwe abɛ Sayprɔs

4Aŋu azhwɛɛrɛ Ngwe à saa angɔ ngɛ, Banabas mane Saalo ngɔɔ abɛ Silesya, nyɛn aŋu kpɛ̀n ngɔɔ abɛ eklaba ndim Sayprɔs. 5Èndzobo chɛ angɔ à bwɛn a Salamis ngɛ, angɔ sɛɛrɛ ega Ngwe a ndɔ bɛ̀ɛrɛ abwa bɔ Juu. Eyɔɔ Mak à na abwaʼ angɔ ma kpèdè angɔ. 6Angɔ à zhiri efwɔ abɛ eklaba ndim yɛ karadidi ngɔ̀ɔ bwɛn a Pafɔs. A Pafɔs angɔ à kla Ba Yeso wɛ à mwɔ àtɛrɛ ǹgbara, gho amyɛnɛ abwa mane àmɛnɛkɔn Ngwe andɔɔ gɛ̀rɛ̀ mwɔ gho Juu ngɛ. 7Engɔ à ne esɔrɔ Sɛjɔs Paalus wɛ à mwɔ m̀fɔ̀ efwɔ abɛ yɛ ngɛ. Engɔ à na gho azɔm, è tɔm ekɔn ebe Banabas mane Saalo kpe angɔ zeʼ è zɔ angbe mbɔʼnga engɔ à na ke é zo ega Ngwe. 8Bɛʼngɛ àtɛrɛ ǹgbara wɛ bɔ Grik â ma zɔʼrɔ kpe Elimas ngɛ à ke bɛrɛ kpe Banabas mane Saalo zeʼe zɔ gho kɛ bo. Engɔ à na ke é tsɔŋɔ ebɛrɛtaa gho kɛ̀ mbɔʼtye engɔ ne bɛrɛ ebwa Ngwe bo. 9Azhwɛɛrɛ Ngwe à ne shwe ekwa Saalo wɛ â gɛrɛ ma zɔʼrɔ kpe Paalo ngɛ, è nɔm aghɔɔ ene Elimas. 10Engɔ gâ ebe Elimas kpe, “Ngwo ŋwɔ ezô, ngwo na gho m̀pɛ̀ʼ ene ela gimkpaʼ byɛ e me koʼro efàarà Ngwe ngɛ. Ngwo ne beʼe ebûm njɛ ma andɔɔ mane ǹchù. Akyɛ gimkpaʼ ngwo na ke le kpe éŋwaʼa Masakɛ mwɔ ma andɔɔ. 11Epan Masakɛ ya kla awɛ enjitsɔ nɔ. Aghɔɔ njɛ ya ngo fò. Efwɔ antiri endzobo deʼ ngwo wa ke etaranchwe zɔ.” Èndzobo chɛ èndzobo chɛ, aghɔɔ Elimas kwaʼ di, è sa ke gho é klini abwo ngɔ gbèe engɔ. 12Èndzobo chɛ ato abɛ yɛ â zo ebwa wɛ â gli ngɛ, engɔ bɛrɛ mbɔʼnga ega mbɔʼ Masakɛ wɛ Banabas mane Paalo â sɛɛrɛ ngɛ â mɔmɔ etaa ngɔ.

Paalo mane Banabas efwɔ Antyɔk abɛ Pisidya

13Paalo mane azhɛmbyɛ mɔ â nyɛnnɛ a Pafɔs kpɛ̀n gli efwɔ antiri abɛ Pɛga abɛ Pamfilya. Eyɔɔ Mak à waʼ angɔ aŋu wu ghɛɛbɛ ngɔ̀ɔ amɔ a Jerusalɛm. 14Paalo angɔ à nyɛnnɛ a Pɛga bwɛn efwɔ antiri abɛ Antyɔk efwɔ abɛ Pisidya. À shi anji ku̧ru bɔ Juu, angɔ ngɔɔ a ndɔ bɛ̀ɛrɛ abwa bɔ Juu tsɔmɔ a chwâ. 15Èndzobo chɛ â shi zɔʼrɔ atsɛrɛ Mose mane abwa yɛ bàmɛnɛkɔn Ngwe â ŋwɛʼrɛ ngɛ, eto saa ekɔn ebe angɔ kpe, “Bwɔngwa, mala mbɔn me le ega deʼ é bwaara ńtara bɔ anyi mbɔn ga.” 16Paalo tam ekere, beʼ ebwo mɔ, klada sa gà kpe, “Bwɔngwa mbu bɔ Israel mane abɔ tsɛrɛ byɛ e ma bumu Ngwe ngɛ mbɔn zhuru. 17Ngwe bɔ Israel à chi ètɛ sam bɔ è le angɔ e me ghɛʼ endzobo angɔ à mwɔ abɛ Ejip ngɛ. E ne ekama mɔ, engɔ gbèe chi angɔ abɛ Ejip. 18Ngwe à klini etaa mɔ ene eleabwa angɔ efwɔ enɔ̂m èsama fyee efwɔ ebɔrɔńked. 19Ngwe à saama ebɛ sàambyɛ efwɔ chwâ Kanan è ndɛʼ afwɔ chwâ yɛ ebe bɔ Israel na etiʼi angɔ nɔ. 20Abwa zɔnɔ à nu ne enɔ̂m ako kwɛ̀ nè èsama fyee tɛʼ wum nɔ. Èndzobo chɛ abwa zɔnɔ â gli ngɛ, Ngwe le angɔ le bàsɛʼasɛʼɛ bwɛn endzobo Samwɛl àmɛnɛkɔn Ngwe. 21Èndzobo chɛ angɔ à ke m̀fɔ̀ ngɛ, Ngwe ndɛʼ Saalo ŋwɔ Kish wɛ me gli efwɔ ekla Bɛnjamin ngɛ ebe angɔ. Saalo à nde m̀fɔ̀ efwɔ enɔ̂m èsama fyee. 22E nɔ chi Saalo ene m̀fɔ̀ ngɛ, e ge Devid. Ngwe à ga mbɔʼ Devid kpe ‘Mmɛ we zɔ kpe Devid ŋwɔ Jese ne egho wɛ mmɛ me doʼo ngɛ, engɔ wa ngo le abwa gimkpaʼ yɛ mmɛ ma ke ngɛ.’ 23Efwɔ ekla Devid wunɔ, Ngwe à ndɛʼ Yeso m̀pwèerèse ebe bɔ Israel aŋu engɔ à shi tɔ̧ɔrɔ ngɛ. 24Eyɔɔ à shi sɛɛrɛ ebe bɔ Juu kpe angɔ kobo eleabwa àmɔ̀ nu ndim de Yeso sa zeʼe.” 25Aŋu Eyɔɔ à sa mɛ̀ɛrɛ̀ afwɛʼ mɔ ngɛ, è biiri ebe bɔ kpe, “Mbɔn ne buʼu kpe mmɛ na awɛ? Mmɛ ke mwɔ egho wɛ mbɔn ma kɔʼ ngɛ bo. Bɛʼngɛ gho deʼ wa zeʼe achim ndza wɛ mmɛ de ne me koʼro é zɛ̀ɛ anduʼ ebla ngɔ bo ngɛ.” 26Bwɔngwa mbu, bɔ Israel, bwɔ ekla Abraham mane ebɛbɔ byɛ e ma ghɔ Ngwe ngɛ, e ne tɔm ekɔn pwèere bɔ wunɔ ebe bɔ. 27Bɔ Jerusalɛm mane eto àmɔ̀ â ke nɛɛ Yeso kpe na m̀pwèerèse bo. Angɔ à gɛrɛ ke nɛɛ ǹji ene abwa yɛ bàmɛnɛkɔn Ngwe â ŋwɛʼrɛ e ma zɔʼrɔ efwɔ enji ku̧ru bɔ Juu gimkpaʼ ngɛ bo. Ka de mwɔ énde nɔ, angɔ à le énde é le kpe ebwa wɛ bàmɛnɛkɔn Ngwe â ga ngɛ gli éŋwaʼa. 28Ka de mwɔ aŋu angɔ à ne zɔ ǹji deʼ é zhudu engɔ bo ngɛ, angɔ à da ga ebe Paylet kpe è zhudu engɔ. 29Angɔ nɔ shi mɛ̀ɛrɛ ŋwɛʼrɛ abwa yɛ â me ŋwɛʼrɛ mbɔʼ engɔ ngɛ, e chwee engɔ ene azɔd baʼra naa efwɔ eshe. 30Bɛʼngɛ Ngwe à zhwɛɛmɛ engɔ ene ewu. 31Engɔ tee amɔ efwɔ enji akɛkɛ ebe abɔ byɛ â zhiri nè engɔ e nyɛrɛ a Galilii ngɔ̀ɔ bwɛn a Jerusalɛm ngɛ. Enjitsɔ nɔ, abɔ bɔnɔ ne entsɛ ebe bɔ Israel. 32Mbyɛɛ na sɛ̀ɛrɛ̀ ekɔn ǹchwɔ̀ wɛ endɔn kpe ala yɛ Ngwe à tɔ̧ɔrɔ ebe ètɛ sam bɔ ngɛ, 33engɔ shi ndɛʼ ebe bɔ, ntsɔ bwɔ angɔ aŋu engɔ à zhwɛɛmɛ Yeso ene ewu ngɛ. E be ŋwɛʼrɛ efwɔ aŋwɛʼrɛ Mban Yawe, ebɔʼ fyee kpe

“Ngwo na ŋwɔ ngu,

ànchwɔ̀ mmɛ shi àtɛ ngwɛ.”

34Ngwe à zhwɛɛmɛ engɔ, engɔ ne tye a chwâ é fwe bo, aŋu Ngwe à shi ga kpe

“Mmɛ wa ngo ndɛʼ awɛ m̀pè etɔ̧ɔrɔ mane m̀bɔ̀nɔ yɛ mmɛ à kanna tɔ̧ɔrɔ ebe Devid ngɛ.”

35Éngɛ e be wu ŋwɛʼrɛ efwɔ aŋwɛʼrɛ Mban Yawe tsɛrɛ kpe

“Ngwo ke ma ngo bɛrɛ ŋwɔ pɛ Ngwe fwe efwɔ eshe bo.”

36Enjitsɔ aŋu m̀fɔ̀ Devid à shi fwɛʼɛ ebwa wɛ Ngwe à me shi ene èmɔ ekyɛ ngɛ, engɔ à ku, e kpa engɔ abwaʼ ètɛ sam mɔ ekwa ngɔ fwe. 37Bɛʼngɛ engɔ wɛ Ngwe à zhwɛɛmɛ ene ewu ngɛ à ke fwe bo. 38Éngɛ, asɔrɔ ndza, mmɛ we ke kpe mbɔn nɛɛ kpe achim Yeso e shi dzɛrɛ abwa bɔɔbɔɔ ndzɔn aŋu etsɛrɛ Mose me ga ngɛ. 39Achim Yeso, gho ŋwàʼaŋwàʼ wɛ e me bɛrɛ ene engɔ ngɛ, e shi pwèere engɔ. Ne ebwa éŋwaʼa deʼ wɛ gho deʼ à ne me né le zeʼe achim etsɛrɛ Mose bo ngɛ. 40Mbɔn nu azɔm kpe ebwa wɛ bàmɛnɛkɔn Ngwe â ga ngɛ ke gli ekwa ngɔn bo. 41Â ga kpe

“Kɔʼɔ anɔ, mbɔn byɛ mbɔn ma tsɔʼɔ Ngwe ngɛ! Mbɔn di angɔ kudu,

mbɔʼnga mmɛ wa ngo le m̀pè ebwa deʼ anji bɔnɔ wɛ ka gho deʼ de toʼro endɔn mbɔn ba ka bɛ̀rɛ.”

42Aŋu Paalo mane Banabas â sa nyɛnnɛ efwɔ ndɔ bɛ̀ɛrɛ abwa abɛ yɛ ngɛ, abɔ byɛ zɔʼ angɔ kpe e wu zeʼe ankyɛ̀ è sɛ̀ɛrɛ̀ abwa mbɔʼ ebwa wunɔ. 43Aŋu angɔ à gli a ndɔ bɛ̀ɛrɛ abwa bɔ Juu ngɛ, bɔ Juu akɛkɛ mane bɔ fe tsɛrɛ akɛkɛ byɛ â bɛrɛ ebwa Ngwe bɔ Juu ngɛ kiri Paalo mane Banabas. Angɔ ga ebe angɔ kpe e fɔɔ embè ene enarataa Ngwe. 44À shi ankyɛ̀ abɛɛ bɔ akɛkɛ efwɔ abɛ zeʼ é zo ega Masakɛ. 45Èndzobo chɛ bɔ Juu à zɔ ebaŋabɔ wɛ ngɛ, angɔ sa ku m̀bog, klada sa ga kpe ebwa wɛ Paalo à ma sɛ̀ɛrɛ̀ ngɛ na andɔɔ, sa ndwàʼ engɔ. 46Éngɛ Paalo mane Banabas gâ ebe angɔ ene ebum kpe, “Mbyɛɛ à ye ma dye sɛɛrɛ ebwa Ngwe endɔn, aŋu mbɔn tɔrɔ andzɔn, è kede kpe mbɔn ke koʼro é nyii efwɔ etyê Ngwe bo ngɛ, mbyɛɛ ba sɛ̀ɛrɛ̀ ebe ebɛbɔ. 47Masakɛ a shi ga endyɛɛ kpe

‘Mmɛ shi le angɔn é mwɔ ekɛʼ ebe ebɛbɔ

mbɔʼtye mbɔn pweere bɔ gimkpaʼ efwɔ ese.’ ”

48Aŋu ebɛbɔ à zo ebwa wunɔ ngɛ, angɔ gɛnɛ àmɔ̀ ngwo nɛɛ, è ghɔ ega Masakɛ. Bɔ gimkpaʼ byɛ â shi chidi angɔ ene etyê kemyɛ Ngwe ngɛ bɛrɛ ene Masakɛ Yeso. 49Ega Ngwe sɛ̂ʼ efwɔ abɛɛ abɛ yɛ gimkpaʼ. 50Bɛʼngɛ eto bɔ Juu ge abwa ebûm âye byɛ â ma bumu Ngwe gɛrɛ mwɔ aye kamakam mane anɔm kamakam efwɔ antiri abɛ yɛ ngɛ. Angɔ klada sa nyii Paalo mane Banabas, è fli angɔ efwɔ abɛɛ abɛ mɔ. 51Éngɛ angɔ à kudu ebun elo àmɔ̀, gbeʼre eto angɔ nyɛrɛ ngɔɔ àmɔ̀ a Ikoniyɔm. 52Azhwɛɛrɛ Ngwe mane egɛnɛ â shwe ekwa bɔ bɛɛrɛ abwa byɛ a Antyɔk ngɛ.

Currently Selected:

Eleabwa 13: nbt

Highlight

Copy