Eleabwa 14

Ebwa wɛ à gli abɛ Ikoniyɔm ngɛ

1Èndzobo chɛ Paalo mane Banabas â ngɔɔ efwɔ abɛ Ikoniyɔm ngɛ, angɔ à sɛɛrɛ ekɔn ŋwaʼ wunɔ, bɔ Juu mane ebɛbɔ bɛrɛ. Paalo mane Banabas ngɔɔ efwɔ ndɔ bɛ̀ɛrɛ abwa bɔ Juu gɛrɛ ga ene aghɛʼnji deʼ yɛ bɔ Juu mane ebɛbɔ akɛkɛ â firi shi bɔ kristo ngɛ. 2Bɛʼngɛ abɔ Juu byɛ â ne me bɛrɛ bo ngɛ, â buguru eto ebɛbɔ gɛrɛ le angɔ sa gwè bɔ kristo. 3Bèmpwɔnɔntɔm â tsɔmɔ aŋu efwɔ endzobo dɔɔdɔɔ, ma ga mbɔʼ Masakɛ ne me le ebum bo. Masakɛ à tee apɛpɛ kpe ekɔn wɛ angɔ ma sɛ̀ɛrɛ̀ mbɔʼ enarataa ndze ngɛ ne éŋwaʼa nyɛ̀rɛ̀ zèʼe ene ekama yɛ engɔ à ndɛʼ ebe angɔ é sa le enɛ̂ abwa mane abwa zodo zodo ngɛ. 4Bɔ efwɔ abɛ â gɛbbɛ, abɔ deʼ sa kìrì ma bɔ Juu, adeʼ sa kìrì ma bèmpwɔnɔntɔm. 5Éngɛ ebɛbɔ mane bɔ Juu deʼ â sɔŋɔ afwɔbi nè eto àmɔ̀ è kɛʼ é nyìi bèmpwɔnɔntɔm gɛrɛ ma ke é timmi angɔ ene atye. 6Èndzobo chɛ bèmpwɔnɔntɔm â nɛɛ éngɛ ngɛ, angɔ dɔrɔ ngɔɔ efwɔ abɛ Listra mane Dɛɛb byɛ â mwɔ efwɔ abɛɛ abɛ Lykaonya ngɛ, mane ebɛ byɛ â me kɛɛrɛ ebɛ bɔnɔ sɔ̀ ngɛ. 7Angɔ fɔɔ embè é sɛ̀ɛrɛ̀ ekɔn ǹchwɔ̀ aŋu.

Paalo mane Banabas efwɔ abɛ Listra mane Dɛɛb

8Gho deʼ à ne efwɔ abɛ Listra wɛ â be engɔ, elo ngɔ me buʼru è ne shi tama ekere ekyɛ deʼ bo ngɛ. 9Engɔ à tsɔmɔ aŋu gɛ̀rɛ̀ zhuru aga yɛ Paalo à ma ga ngɛ. Paalo zɔ kpe engɔ shi le ebɛrɛ yɛ e me koʼro kpe é gli engɔ ngɛ. Paalo nɔm aghɔɔ ene engɔ. 10Paalo ga ene etsoʼ kɛkɛ kpe, “Tam ekere ene elo mbyɛ!” Egho wɛ furu ekere, gɛ̀rɛ̀ klada sa zhinni aŋu. 11Èndzobo chɛ ebaŋabɔ â zɔ ebwa wɛ Paalo à le ngɛ, angɔ klada sa flaba akwâ ene atsoʼ Likaonya àmɔ̀ ga kpe, “Ngwere shi wu mwɔ na bɔ nɔ, gɛ̀rɛ̀ shi wu kla zeʼe abwaʼ bɔ.” 12Angɔ à ndɛʼ ekumu ebe Banabas kpe Zius, gɛ̀rɛ̀ ndɛʼ engɔ Paalo kpe Hɛms mbɔʼnga engɔ à na m̀fɔ̀ wɛ à ma ga ngɛ. 13Àtɛ zhiri ebe Ngwe Zius wɛ azhib ngɔ a me mwɔ ese ne me mwɔ efwɔ abɛ bo ngɛ, â zeʼe nè m̀pwɔ̀rɔ̀ mane sɔʼrɔ egɛ enduʼnkɛmɛ mbɔʼnga engɔ mane ebaŋabɔ â na ke é ndɛʼ etɔ̧ɔrɔ ebe bèmpwɔnɔntɔm. 14Èndzobo chɛ Banabas mane Paalo â zɔ ebwa wɛ angɔ à ma ke é le ngɛ, angɔ a panna ǹdiri àmɔ̀ dɔrɔ nyii efwɔ aghɛɛghɛɛ bɔ ma flaba gà kpe 15“Mbɔn na le énde kpe ayɛ? Mbyɛɛ mɔ na bɔ na mbɔn nɔ. Mbyɛɛ na anɔ é sɛ̀ɛrɛ̀ ekɔn ǹchwɔ̀ endɔn kpe mbɔn gli efwɔ m̀pèrè abwa bɔɔbɔɔ zɔnɔ kiri Ngwe yɛ è mwɔ ekɔʼɔ yɛ à ndèerè ezob nè chwâ, ebɔrɔndim mane ela gimkpaʼ byɛ e mwɔ efwɔ ngɛ. 16À ne endzobo mbèmbè, Ngwe ma shi bɔ gimkpaʼ ma ngɔɔ ene âmɔ̀ aghɛʼ. 17Bɛʼngɛ engɔ wa doʼo à tee kpe mbè wa aŋu ene abwa ǹchwɔ̀ yɛ engɔ ma le ngɛ. Engɔ wa sàa m̀bò endɔn yɛ è ma zeʼe ekere ngɛ. Engɔ gɛrɛ wa ndɛʼ eku byɛ mbɔn ma dzà ene endzobo yɛ e me koʼro ngɛ. Engɔ wa ndɛʼ ende endɔn gɛ̀rɛ̀ ma le ńtara ntsɔn shwe ene egɛnɛ.” 18Ka de mwɔ ene abwa zɔnɔ yɛ bèmpwɔnɔntɔm â ma ga ngɛ, â ne kɔrɔ ebe angɔ é tɔn kpe ebaŋabɔ ke etɔ̧ɔrɔ ebe angɔ ndɛʼɛ. 19Bɔ Juu deʼ â zèʼ efwɔ antiri abɛ Antyɔk, Pisidya mane Ikoniyɔm. Angɔ à bwɛ ebaŋabɔ sàa abɛɛ àmɔ̀. Â timi Paalo gɛ̀rɛ̀ gòo engɔ efwɔ abɛ ndwa ese ma zhuŋu kpe engɔ shi ku. 20Bɛʼngɛ èndzobo chɛ bɔ kristo â ngɔɔ kɛɛrɛ engɔ gè aghɛɛghɛɛ ngɛ, engɔ tam gɛrɛ wu ngɔɔ efwɔ abɛ. À ko enchwe aŋu, engɔ mane Banabas ngɔɔ abɛ Dɛɛb.

Paalo angɔ ghɛ̀ɛbɛ ngɔɔ abɛ Antyɔk efwɔ abɛɛ abɛ Sirya

21Paalo mane Banabas â sɛɛrɛ ekɔn ǹchwɔ̀ efwɔ abɛ Dɛɛb gɛ̀rɛ̀ le bɔ bɛɛrɛ abwa akɛkɛ. Éngɛ angɔ ngɔɔ achim abɛ Listra, nyɛrɛ aŋu ngɔɔ a Ikoniyɔm, gɛ̀rɛ̀ nyɛrɛ aŋu ngɔɔ a Antyɔk yɛ a mwɔ efwɔ abɛɛ abɛ Pisidya ngɛ. 22Angɔ à ndɛʼ ekama gɛ̀rɛ̀ twàʼrà bɔ Ngwe é nɔ ene ebɛrɛtaa. É tee ebe angɔ kpe, “Ntsɔ be koʼro é fɔɔ efwɔ enyii akɛkɛ dye shi nyii efwɔ ebwa m̀fɔ̀ Ngwe.” 23Angɔ à chidi eto efwɔ ndɔngwe ŋwàʼaŋwàʼ, sa tsɔmɔ ene chwɔ tsàʼrà Ngwe sa tsàʼrà Ngwe shi gè angɔ eblabwo Masakɛ wɛ angɔ shi bɛrɛ anyi ngɛ. 24Aŋu angɔ à shi zhiri efwɔ abɛ Pisidya gimkpaʼ ngɛ, angɔ zeʼ efwɔ abɛ Pamfilya. 25Aŋu, angɔ à sɛɛrɛ ekɔn ǹchwɔ̀ efwɔ antiri ebɛ Pɛga gɛ̀rɛ̀ ngɔɔ efwɔ antiri abɛ Atalya. 26Nyɛrɛ ngɛ, angɔ à kpɛn ngɔɔ achim abɛ Antyɔk afwɔ yɛ angɔ à shi tsaʼra Ngwe kpe enarataa Ngwe tse embè ebe angɔ ngɛ. 27Èndzobo chɛ angɔ à bwɛn abɛ Antyɔk ngɛ, angɔ shunu bɔ ndɔngwe gimkpaʼ afwɔbi gɛ̀rɛ̀ tòʼrò ebe angɔ mbɔʼ abwa gimkpaʼ yɛ Ngwe shi fwɛʼ ene angɔ ngɛ, mane aŋu engɔ shi fuʼu aghɛʼ ebe ebɛbɔ é bɛrɛ ene Ngwe ngɛ. 28Éngɛ angɔ à tsɔmɔ aŋu ene endzobo dɔɔdɔɔ nè bɔ Ngwe.

Currently Selected:

Eleabwa 14: nbt

Highlight

Copy