Eleabwa 10

Petoro kla Konelyɔs, gho ebɛbɔ

1Gho deʼ à ne efwɔ abɛ Kaysarya wɛ ekumu ngɔ à ma Konelyɔs ngɛ. Engɔ à na ato ebe eko bɔ ebiri ebe ǹtìmi Itali efwɔ abɛ Rom. 2Engɔ à na gho deʼ wɛ à me shi etaa mɔ ene Ngwe ngɛ. Engɔ nè ekla mɔ gimkpaʼ â na ghɔ Ngwe. Engɔ à na kpèdè bɔ ndzaŋa gɛ̀rɛ̀ ma tsàʼrà Ngwe akyɛ gimkpaʼ. 3Â ne nchi anji deʼ, endzobo sa ngɔɔ ne enyɔ̀m tɛd nɔ, nklama nchi deʼ le engɔ. Efwɔ nklama fɔnɔ engɔ zɔ angere Ngwe gâ ebe engɔ kpe, “Konelyɔs.” 4Èklɔ̀ à bere engɔ. Engɔ biiri kpe, “Masakɛ ne ebwa yɛ?” Angere gíì ebe engɔ kpe, “Ngwe shi zo atsaʼra Ngwe njɛ gɛ̀rɛ̀ zɔ aŋu ngwo ma kpèdè bɔ ene ela ngɛ. 5Enjitsɔ, saa bɔ deʼ shi e ngɔɔ efwɔ abɛ Jopa enduʼndɔ gho deʼ wɛ ekumu ngɔ mwɔ Shimun Petoro ngɛ. 6Engɔ wa tsɔmɔ ne ègɔ̀n nɔ efwɔ ndɔ gho deʼ wɛ ma ndèerè ela ene goboro nyɛm, wɛ ekumu ngɔ mwɔ Shimun ngɛ. Ndɔ ngɔ ne ebara ebɔrɔndim. Engɔ wa tòʼrò ebwa ngwo ma ngo le ngɛ.” 7Èndzobo chɛ angere wɛ à shi ngɔɔ ngɛ, Konelyɔs zɔʼ bɔ afwɛʼ mɔ fyee mane gho ebiri deʼ wɛ à me shi etaa mɔ ene Ngwe ngɛ. 8Engɔ sɛɛrɛ abwa gimkpaʼ yɛ a gli ngɛ ebe angɔ, gɛrɛ shi tɔm angɔ efwɔ abɛ Jopa.

9E tam enchwe, angɔ gli sa ngɔɔ eghɛb zɔnɔ. Aŋu angɔ à sa zamma bwɛn efwɔ abɛ Jopa ngɛ, endzobo à shi na aghɛɛghɛɛ nchi nɔ, Petoro shi kwaʼ ngɔɔ efwɔ atwɔndɔ deʼ ekere é tsàʼrà Ngwe. 10À shi éngɛ nɔ nchwɔrɔ Petoro sa gwɔn, è ma ke ala deʼ é nde. Aŋu â ma bli à ndèerè ende ngɛ, âfwɔ m̀bwɛrɛ deʼ bere engɔ, è le nklama nchi. 11Efwɔ nklama fɔnɔ, Petoro zɔ ezob fuʼ, ala deʼ kla zeʼe na abɛɛ ala nɔ efàarà ngɔ a chwâ, e me chwee ene ǹdɔʼrɔ kwɛ̀. 12M̀pèrè nyɛmɛrɛ gimkpaʼ chɛ e me le elo kwɛ̀ ngɛ, engamala, nyɛmɛrɛ ǹgɛ̀ mane ènɔ̀n efwɔ ese me shwe efwɔ aŋu. 13Éngɛ etsoʼ deʼ gâ ebe engɔ kpe, “Petoro, tam ekere, zhu gɛ̀rɛ̀ nde.” 14Petoro gíì kpe, “Keʼ Masakɛ mmɛ de ke shi nde ala deʼ yɛ etsɛrɛ Mose ne tee kà a ne me pɛ efàarà Ngwe ngɛ bo.” 15Etsoʼ wɛ gɛrɛ wu ga egha tsɛrɛ kpe, “Ngà ke sa zɔʼrɔ ala deʼ yɛ Ngwe me ndeere ngɛ kpe a ye di bo.” 16Ebwa wunɔ à gli énde, e bwɛn ene agha tɛd. Éngɛ, e gɛrɛ beʼ ala yɛ ngɔɔ achim ekere. 17Aŋu Petoro à ma bli à zhùŋù à di amɔ ene nklama nchi fɔnɔ ngɛ, abɔ byɛ Konelyɔs à me tɔm ngɛ shi zɛʼɛ ndɔ Shimun zɔ tamma efàarà enduʼnkɛmɛ. 18Angɔ à zɔʼ biiri kpe ka Shimun wɛ ekumu ngɔ ebi mwɔ Petoro ngɛ wa tsɔmɔ aŋu. 19Aŋu Petoro à ma bli à zhuŋu amɔ ene nklama nchi fɔnɔ ngɛ, azhwɛɛrɛ Ngwe ga ebe engɔ kpe, “Zhuru, bɔ tɛd ba kɔʼrɔ awɛ ese. 20Ndeere awɛ, kla ngɔɔ a chwâ ngɔ̀ɔ nè angɔ. Ke sa di ebwa deʼ bo, mbɔʼnga na mmɛ à tɔmɔ angɔ.” 21Éngɛ Petoro kla ngɔ̀ɔ kla abɔ byɛ Konelyɔs à me saa ngɛ. Petoro gâ ebe angɔ kpe, “Mmɛ ne egho wɛ mbɔn ma zɛʼ ngɛ. Mbɔn ne zeʼe ebwa yɛ?” 22Angɔ gâ kpe, “Na Konelyɔs, ato ebe bɔ ebiri a saa angbɛɛ. Engɔ na gho wɛ è ma le abwa yɛ a me koʼro efàarà Ngwe gɛrɛ me le ebum ene Ngwe ngɛ. Bɔ Juu ba ndɛ̀ʼ eghɔ ebe engɔ. Ngwe à tɔm angere pɛ ebe engɔ kpe engɔ zɔʼ awɛ ngwo zeʼ enduʼndɔ ngɔ. Engɔ gɛrɛ zo ebwa wɛ ngwo ma ngo ga ebe engɔ ngɛ.” 23Éngɛ Petoro nu angɔ efwɔ ndɔ mɔ gà ebe angɔ kpe angɔ ko, à tam enchwe mbè ngɔɔ nè angɔ. Bɔ kristo deʼ efwɔ abɛ Jopa â ngɔɔ nè Petoro. 24Angɔ à zhiri efwɔ anji bibi bwɛn efwɔ abɛ Kaysarya. Konelyɔs à shi zɔʼɔ asɔrɔ mɔ mane abɔ byɛ â ma tsɔmɔ ebara ngɔ ngɛ, e shi tsɔmɔ sa kɔʼ angɔ. 25Aŋu Petoro à nyii efwɔ ndɔ ngɛ, Konelyɔs kla ngɔ̀ɔ gò enji elo ngɔ ndɛ̀ʼ eghɔ ebe engɔ. 26Bɛʼngɛ Petoro klini abwo ngo gà ebe engɔ kpe, “Tam ekere, mmɛ mɔ gɛrɛ na gho.” 27Aŋu angɔ à ma sɛ̀ɛrɛ̀ abwa ma nyii à ngɔ̀ɔ efwɔ ndɔ ngɛ, Petoro zɔ bɔ shi ba ndɔ. 28Petoro gâ ebe engɔ kpe, “Mbɔn be nɛɛ kpe etsɛrɛ ye tee kpe bɔ Juu ke sa tsɔmɔ afwɔbi nè ebɛbɔ bo, kà sa ngɔ̀ɔ na àgɔn efwɔ ndɔrɔ angɔ nɔ bo. Bɛʼngɛ Ngwe a shi tee ena kpe mmɛ ke zɔʼrɔ gho deʼ kpe e ke koʼro kà e ke pɛ efàarà Ngwe bo bo. 29Éngɛ èndzobo chɛ mbɔn a tɔm gho ena ngɛ, mmɛ a zeʼe ne le efɛɛrɛ deʼ bo. Mbɔn a shi ne zɔʼɔ angu ngɛ kpe ayɛ?” 30Konelyɔs gíì kpe, “Enji shi fɔɔ ètɛd, wɛ mmɛ à me tsɔmɔ efwɔ ndɔ mbu ma tsàʼrà Ngwe ene enyɔ̀m tɛd nchi. Sa klikɔ̀ʼ gho deʼ wɛ à me ge ǹdiri nɛŋɛrɛ nɛŋɛrɛ ngɛ tam efàarà ndza.” 31Éngɛ gɛrɛ ga kpe, “Konelyɔs Ngwe shi zo atsaʼra Ngwe njɛ gɛrɛ zhuŋu ela byɛ ngwo ma ndɛ̀ʼ ebe bɔ ndzaŋa ngɛ. 32Tɔm gho efwɔ abɛ Jopa ebe Shimun wɛ e ma zɔʼrɔ kpe Petoro ngɛ. Engɔ ne ègɔ̀n efwɔ ndɔ Shimun wɛ ma ndèerè ela ene goboro nyɛm ngɛ. Ndɔ ngɔ na ewee ebɔrɔndim. 33Éngɛ mmɛ gɛrɛ sàa gho engɛ̂ ekyɛ ŋwaʼ. E gɛrɛ me nara kpe ngwo a zeʼe. Enjitsɔ ntsɔ bɔ gimkpaʼ ba anɔ efàarà Ngwe ma ke é zo abwa gimkpaʼ yɛ Masakɛ a shi tsɛrɛ engɛ̂ kpe ngwo ga endyɛɛ ngɛ.”

E sɛɛrɛ ekɔn ǹchwɔ̀ ebe ebɛbɔ

34Éngɛ Petoro klada sa gà kpe, “Mmɛ shi zɔ éŋwaʼaŋwâʼ kpe Ngwe ke ma toʼ awɛɛ bo. 35Bɛʼngɛ engɔ na bwɛ bɔ byɛ e me zeʼe efwɔ ebɛ gimkpaʼ byɛ e ma ghɔ engɔ gɛrɛ ma le abwa yɛ a me tama efàarà ngɔ ngɛ. 36Mbɔn be nɛɛ ekɔn wɛ Ngwe à saa ebe bɔ Israel ma sɛ̀ɛrɛ̀ ekɔn ǹchwɔ̀ wɛ e ma zeʼe nè m̀bwarambwad nyɛ̀rɛ̀ zèʼe achim Yeso Kristo wɛ mwɔ Masakɛ ebe bɔ gimkpaʼ ngɛ. 37Mbɔn be nɛɛ ebwa wɛ à gli efwɔ abɛ Judeya gimkpaʼ, e klada efwɔ abɛ Galilii èndzobo chɛ Eyɔɔ à shi sɛ̀ɛrɛ mbɔʼ enu ndim ngɛ. 38Mbɔn be nɛɛ aŋu Ngwe à zhwaʼ Yeso gho Nazarɛd ene azhwɛɛrɛ pɛ mane ekama ngɛ. Mbɔn gɛrɛ be nɛɛ aŋu Yeso à ma yɛrɛ zhiri à fwɛʼ abwa nchwɔnchwɔ gɛ̀rɛ̀ ma gli abɔ byɛ ekama azhwɛɛrɛ asatan à ma nyii angɔ ngɛ mbɔʼnga Ngwe à me mwɔ nè engɔ. 39Ntsɔ ne entsɛ ene abwa gimkpaʼ yɛ engɔ à fwɛʼ efwɔ akwâ yɛ bɔ Juu â ma tsɔmɔ mane a Jerusalɛm ngɛ. E zhudu engɔ me kɔmmɔ engɔ me ekere azɔd baʼra. 40Bɛʼngɛ enji â sa bwɛn ètɛd, Ngwe zhwɛɛmɛ engɔ ene ewu è le e zɔ engɔ. 41Bɔ gimkpaʼ â ke zɔ engɔ bo, bɛʼngɛ à zɔ engɔ me entsɛ, entsɛ byɛ Ngwe à shi chidi ngɛ, ntsɔ byɛ ntsɔ à nde gɛ̀rɛ̀ ŋwɔ nè engɔ aŋu engɔ à shi zhwɛm ene ewu ngɛ. 42Éngɛ engɔ à ga ebe bɔ kpe ntsɔ sa sɛ̀ɛrɛ̀ gɛ̀rɛ̀ bɛ̀rɛ entsɛ ebe bɔ kpe Yeso ne egho wɛ Ngwe à shi chi é mwɔ àsɛʼasɛʼɛ ebe bɔ kɔʼɔ mane bɔ kudu ngɛ. 43Bàmɛnɛkɔn Ngwe gimkpaʼ à toʼro apɛpɛ kpe egho wɛ me le ebɛrɛ ene Yeso ngɛ, e ba ngo dzɛ̀d abwa bɔɔbɔɔ ngɔ nyɛ̀rɛ̀ zèʼe ene ekumu ngɔ.”

Ngwe ndɛ̀ʼ azhwɛɛrɛ pɛ ebe ebɛbɔ

44Aŋu Petoro à ma bli à ga abwa zɔnɔ ngɛ, azhwɛɛrɛ pɛ nyii akwa bɔ gimkpaʼ byɛ â zo ekɔn wunɔ ngɛ. 45Abɔ kristo byɛ â me zhiri nè Petoro ngɛ kɔ̂n kpe etɔ̧ɔrɔ azhwɛɛrɛ pɛ à gɛrɛ nyii ekwa ebɛbɔ. 46Angɔ à zo ebɛbɔ sa gà atsoʼ m̀pèrempèrè gɛrɛ sa zodo Ngwe. Éngɛ Petoro gâ kpe, 47“Gho deʼ we né tɔn kpe e ke ndɛʼ ndim ebe abɔ bɔnɔ bo ngà? Angɔ gɛrɛ shi le azhwɛɛrɛ pɛ nkirinkin na ntsɔ nɔ.” 48Éngɛ Petoro gâ kpe e ndɛʼ ndim ebe angɔ ene ekumu Yeso Kristo. Éngɛ angɔ bii Petoro kpe è tsɔmɔ nè mbɔɔ efwɔ enji deʼ.

Currently Selected:

Eleabwa 10: nbt

Highlight

Copy