Jɔn 21

Yeso dù ìwi ìfe abə mə̀mə̀nənùg ìsàmbe

1Nyùmə̀ mɔ̀ʼɔ ya chè, Yeso ywìrì dù ìwi ìfe abə mə̀mə̀nənùg iban igyi Tìberìyàs. Aŋa ya icheg ne anug ze ya du: 2Sayimùn Pità tì Tòmas we ne ya ànjiŋə tì Nàtanìyè we a Kanà inga Galìli tì bɔn ìmbi Zebedì, tì mə̀mə̀nənùg ndəŋ məbe ya yaʼ ane asiŋi afibì. 3Sayimùn Pità ya nɔ̀ʼ ghà abə mə̀mbin gha, “Mə ghò gweʼi mə”. Mə̀mbin ya ywìtì ibo gha, “Tì biri yeʼe abɔ̀ʼ ine”. Mbi ya nɔ̀ʼ nyi inga kànuʼ, ghò inga igyi. Si ya gha, mbi ya neghi neghi, chəyi mbi gwi aghi mɔ̀ʼɔ.

4Àsi isusu ne ituʼ we se chə̀ghə, Yeso ya yeʼe təm a ngò igyi. Si ya gha, chəyi mə̀mə̀nənùg ya kyeri gha à ya məd.

5Yeso ya kàrì awɔb, ghà inɔb gha, “Ìmbum mə̀sə̀ʼ, chəyi mbə̀ gwi su mɔ̀ʼɔ?”

Mbi ya ywìtì gha, “Chəyi.”

6Wì ya ghà inɔb gha, “Mbə̀ maʼa ìzən kyə̀ aba abo jəghi, mbə̰ biri gwì su.” Mbi ya màʼ kyə̀ icheg ne Yeso ya gha, gwì su nɔʼ nɔʼ. Su te ya nɔʼ se nìrè chè awɔb ni sìmì zì inga kànuʼ.

7Àmə̀nənùg we ne Yeso ya taŋ kɔ̀ŋ ya si ghà abə Sayimùn Pità gha, “À ya Anɔŋisəg.” Kwàʼ icheg ne Pità zughi gha à ya Anɔŋisəg, wì ya niŋ ìzi ndwi ze ne wì ya chi ibəm nɔ̀ŋì ni gweʼi, ywìrì zì, si təm nəg inga igyi. 8Mbin tì mə̀mə̀nənùg ya si yèʼe inga kànuʼ, pè sìmì kyə̀ ze ne su ya yaʼi inga iswighi ghò a ngò igyi. Chəyi agha ya sa ni nɔ̀ʼ asiŋi ze ne mbɔb ya yaʼi angu ghò pè a ngò igyi. Agha ze ya yaʼi icheg mə̀metà iki ifibì. 9Anyumə̀ ne mbi ya pè iban igyi we, mbi ya bàd iywid ne bère tì ikəʼì ne bàŋà chùm. Su ya yaʼ igun iywid we. Mbi ya bə bàd ngə̀ŋ mə̀kara mɔ̀ʼɔ angu.

10Yeso ya ghà inɔb gha, “Mbə̀ chiye su mɔ̀ʼɔ inga te ne mbə̀ cherè gwìyè, niŋ yeʼe.”

11Sayimùn Pità ya kɔʼ nyi abɔ̀ʼ mbin tì mə̀mə̀nənùg, sìmì kyə̀ ze chà asaŋ. Su kyen kyen ya sweg inga kyə̀ ze. Su te ya yaʼ iki tì ìghum ita̰ chɔ̀b itad. Si ya gha, ka ti ya jiʼì nɔʼ ane, chəyi kyə̀ ya sète. 12Yeso ya ghà inɔb gha, “Mbə̀ yeʼe sɔb anəd.” Chəyi wə̀d mɔ̀ʼɔ abɔ̀ʼ mə̀mə̀nənùg mbe ya beri fìŋ ni biri ibo gha, “Àghò kə we?” imbə̀ʼ icheg ne mbi ya kyeri gha à ya Anɔŋisəg. 13Yeso ya niŋ ngə̀ŋ ze fɔrɔ su tɔ̰ te nàʼ inɔb. 14Aŋa ya se aghəm ne pè ane itad ne Yeso ya du ìwi ìfe abə mə̀mə̀nənùg məd nɔ̀ʼ ane nyumə̀ ne Ŋwiye ya zwemni aməd ane iwu.

Yeso mùg tì Pità

15Anyumə̀ ne mbi ya fə jəghi mànì, Yeso ya biri abə Pità gha, “Sayimùn, ŋwan Jɔn, àghò kɔ̀ŋ amə chè icheg ne bəd mbo̰ kɔŋi amə?”

Pità ya ywìtì gha, “E! Anɔŋisəg, àghò kyeri gha mə kɔ̀ŋ awe.”

Yeso ya ywìtì ibo gha, “Àghò jə ìmbum bɔn njə̀g”

16Yeso ya ywìrì bìri ibo gha, “Sayimùn, ŋwan Jɔn, àghò taŋ kɔ̀ŋ amə?”

Wì ya ywìtì gha, “E! Anɔŋisəg, àghò kyèri gha mə kɔ̀ŋ awe.”

Yeso ya si ghà ibo gha, “Àghò kyeʼre ìtum njə̀g”

17Wì ya ywìrì bìri ibo ane ighə̀m ne pè ane itad gha, “Sayimùn, ŋwan Jɔn, àghò kɔ̀ŋ amə?”

Pità ya gaŋ gha Yeso ywìrì bìri ane ighə̀m ne pè ane itad gha, “Àghò kɔ̀ŋ amə?” Wì ya si ywìtì gha, “Anɔŋisəg, àghò kyèri inug ijìm. Àghò kyèri gha mə kɔ̀ŋ awe.” Yeso ya bə̀ si ghà ibo gha, “Àghò jə ìtum njə̀g 18Mə ghà tesiʼ ine gha, anyumə̀ ne àghò yaya kiri ŋwan ajɔŋ, à yaya zìyè ìte ndwi ghò a asiŋi ne àghò kɔ̀ŋi. Àsi anyumə̀ ne àghò nṵ, àghò biri se sèmbè ibo chwìye, bəd ndəŋ zìyè ndwi igun ine, nìŋə awe ghò a asiŋi ne chəyi àghò kɔ̀ŋi ni ghò.” 19Yeso ya ghàm ane ni chwi iku iwu ne Pità biri ku ni nàʼ ighumni abə Ŋwiye. Wì ya ghàm ane, si ghà ibo gha, “Bene abɔ̀ʼ inum!”

20Pità ya ghabri bàd àmə̀nənùg we ne Yeso ya kɔ̀ŋi ne we bène inɔb anjìm. Àmə̀nənùg gho̰ ya we ne yaya zə̀ʼrə igun Yeso anyumə̀ ne mbi yaya jə̀ghə̀ iteri. À ya məd ya bə bìri gha, “Anɔŋisəg, wə̀d ne biri fḛ awe àkə we?” 21Anyumə̀ ne Pità ya bàri aməd, wì ya biri abə Yeso gha, “Anɔŋisəg, àsi gho̰ tì wə̀d?”

22Yeso ya ywìtì gha, “Mə kə mə̀ kə̀b gha wì chughi izɔm pè ane nyumə̀ ne mə̀ biri ywiri yeʼe, àze inga àkə aghə? Àghò bèni abɔ̀ʼ inum” 23Bəd ya chètè anug azo̰ anene bəd məjìm ne ya bḛ Yeso ya zug gha, chəyi àmə̀nənùg gho̰ biri ku. Si ya gha, kayi anug ne Yeso ya gha aze. Chəyi wì ya gha, chəyi wì biri ku. Wì ya gha, “Mə kə mə kə̀b gha wì chughi izɔm pè ane nyumə̀ ne mə̀ biri ywiri yeʼe, àze inga àkə aghə?”

24Aŋa ya àmə̀nənùg we ne ya gha inug mbo̰ ijìm. À ya məd bə ŋwàʼrì inug mbo̰. Ane, tè kyèri gha anug ne wì gha ya tesiʼ.

25Yeso ya fàʼ iyeti inug nɔʼ nɔʼ ndəŋ. Àkə aghə ne mbi kə bèrì ni ŋwàʼrì inug mbo̰ ijìm, nji chəyi igun isəg gho̰ ijìm biri kòʼ ane asiŋi ni nɔ̀ŋì ìŋwàʼrì mbe inga.

Currently Selected:

Jɔn 21: MBTP

Highlight

Copy