Ìfàʼì 1

Icheg ne ìfàʼì bədtɔm Kristo ya ko

1Wə̀d kyen Tìyofilùs, inga àmə àŋwàʼrì mbègtog ne mə̀ ya cha ine, mə̀ ya mə̀tì inug ijìm ne Yeso ya ko ni fàʼ fɔrɔ mbe ne wì yaya bə̀ chwìte abə bəd. 2Mə ya mə̀tì inug mbe anene ghò pè ane aneg ze ne Ŋwiye ya niŋi aməd ikaŋ àbɔ̀ŋɔ. Bɔŋ Yeso ya se ghò ikaŋ, wì ya fə bì chè anjìm Azwighi Ŋwiye nàʼ tikə abə bədtɔm mbe ne wì ya chɔʼi. 3Anyumə̀ ne wì ya zweme ane iwu, wì ya chwiti ìwi nyɔd inɔb kwàʼ tì ineni nɔʼ nɔʼ, ni chwi gha zìye we yi izɔm. Wì ya chughi tì inɔb ane ineg ìghum ikwè bə̀ ghàm inɔb imbə̀ʼ anug ìfɔ̀n Ŋwiye. 4Aneg mɔ̀ʼɔ, icheg ne wì ya yaʼi tì inɔb, wì ya pati awɔb gha, “Imbə̀ʼ mbə̰ nɔʼɔ awən a Jèrusalèm. Mbə̀ chughi aŋa ghɔ̀m ineʼi we ne mə̀ ya gha inən gha ìmə Mbaʼ ya kàʼ ni chà inən. 5Jɔn yaya nàʼà mənib inən, si ya gha, chəyi agha biri sà, Ŋwiye biri nàʼ àzi Azwighi inən.”

Ŋwiye niŋ Yeso ikaŋ àbɔ̀ŋɔ

(Mag 16:19-20; Lug 24:50-53)

6Anyumə̀ ne Yeso tì bədtɔm məd ya fete asiŋi mɔ̀ʼɔ, mbɔb ya biri ibo gha, “Anɔŋisəg, àghò wa biri chì məRom igun ina si nàʼ anug ìfɔ̀n ina mba mə̀Izre amad anìŋ?”

7Wì ya ywìtì inɔb gha, “Kayi àzən ati ni kyeri nyumə̀ fɔrɔ aneg ne Ŋwiye fə nɔ̀ŋì ane ìwi ika ni fàʼ inug. 8Si ya gha, mbə biri bèrì ika anyumə̀ ne Azwighi Ŋwiye yeʼe igun inən. Mbə̰ biri si dù ghò ane ika we si yaʼ bəd ne ghà inug imbə̀ʼ amə mà isiŋi ijìm. Mbə̰ biri ko a Jèrusalèm, ghò inga aba aben Jùdeyà ajìm tì inga aba aben Sàmarìyà ajìm fɔrɔ inga iben mbe ne yaʼi igun isəg ijìm.”

9Anyumə̀ ne wì ya màni ni ghàm ane, Ŋwiye ya niŋ aməd ikaŋ àbɔ̀ŋɔ kwàʼ imbìghè abə mə̀mə̀nənùg məd. Icheg ne mbɔb yaya nḛ̀ məd, pàʼ mɔ̀ʼɔ ya si kən awɔb ni gha imbə̀ʼ mbi ywiri bàd awɔb məd.

10Mbɔb yaya kiri nḛ ikaŋ icheg ne wì yaya ghò. Ane, mbaŋà mɔ̀ʼɔ tibe ne ya zi ndwi fu fu ya dù təm inɔb imbìghè. 11Mbaŋà te ya si ghà inɔb gha, “MəGalìli, aton ne mbə̀ təmi aŋa se nḛ̀ ikaŋ àbɔ̀ŋɔ àkə gha? Yeso gho̰ ne Ŋwiye niŋi aməd ikaŋ àbɔ̀ŋɔ biri ywiri bə̀ndi yeʼe kwàʼ icheg ne mbə̀ bari aməd we ghò ikaŋ àbɔ̀ŋɔ.”

Mə̀mə̀nənùg chɔʼ Màtiyàs zì ane asiŋi Judàs

(Mat 27:3-10)

12Bədtɔm ìmbi Yeso ya swiʼi ikaŋ iwum mə̀Olìf bə̀ndì ghò a Jèrusalèm. Agha ni nɔ̀ʼ ane asiŋi ze ghò a Jèrusalèm ya icheg kìlometà imɔʼ. 13Anyumə̀ ne mbɔb ya pe a Jèrusalèm, mbi ya kɔʼ ghò inga atog nəb ze igun. À ya asiŋi ne mbɔb yaya chùghə angu ane nyumə̀ we. Mbɔb yaya: Pità tì Jɔn tì Jem fɔrɔ Andrò tì Filib fɔrɔ Tòmas tì Bàtòlomìyò fɔrɔ Matìyò tì Jem we ne ya ŋwan ìwi Afòs fɔrɔ Sayimùn we ne mbi yaya kàrà ane Zilɔ̀d fɔrɔ Judàs, ŋwan Jem. 14Mbɔb məjìm yaya kə fète asiŋi afibì chàʼrà Ŋwiye ane fìŋ ifibì. Məfi ìmbi Yeso tì Mèri we ne yaʼi ngɔb məd fɔrɔ mə̀yi ndəŋ yaya bə̀ chàʼrà Ŋwiye abɔ̀ʼ inɔb.

15Anyumə̀ we, Pità ya nɔ̀ʼ təm titighe inga fìghàra bəd mbe ne ya nɔŋi ibḛfiŋ igun Yeso. Mbi ya yaʼ ka bəd iki ifibì tì ìghum ibe. 16Wì ya ghà inɔb gha, “Ìmbum məfi fɔrɔ ìtum njàbi, Ìngam Ŋwiye we ne Azwighi Ŋwiye ya ghi ifɔn Dèvid ŋwàʼrì kwàʼ aneg aneg imbə̀ʼ Judàs we ne ya fḛ Yeso abə bəd mbe ne ya gwìye Yeso fə dù ane tesiʼ. 17Judàs yaya kwàʼ wə̀d abɔ̀ʼ ina ane àfàʼì ni chètì inug imbə̀ʼ Yeso.”

18Judàs ya niŋ ikab we ne wì ya fḛ Yeso ghò zon asiŋi ìseg mɔ̀ʼɔ angu. Wì ya fen ituŋə inga asiŋi ìseg ze, fibum tòʼò, məto ibo dù sàkà. 19Wə̀d ijìm ne ya yaʼi a Jèrusalèm ya zug anug ze. Ane, mbi ya se kàrà asiŋi ze inga ìwɔb ìngam aben ane Àkedamà. Ane ya mbi gha, “Asiŋi ìseg anəm”.

20Pità ya ghàm ane si gha, “A ze inga Àŋwàʼrì Mə̀Sam gha,

‹Kwàʼ nəb məd chughi ìzi zɔbi!

Imbə̀ʼ wə̀d mɔ̀ʼɔ nɔ̀ʼ chùghə yi inga nəb məd.›

Wì ya bə̀ ywìrì gha:

‹Kwàʼ ineg məd aŋa igun isəg mbe kə!

Wə̀d ndəŋ niŋ àfàʼì məd.›

21Ane, ze bɔ̀ŋ gha tì chɔʼ mbaŋà ndəŋ ne ya yaʼi abɔ̀ʼ ina mà nyumə̀ ijìm ne Anɔŋisəg Yeso yaya yḛ̀ tì ina, 22ni ko ane nyùmə̀ we abə Jɔn we ne yaya nàʼà mənib ghò pè ane aneg ze ne Ŋwiye ya niŋi Yeso ikaŋ àbɔ̀ŋɔ. Ze bɔ̀ŋ gha wə̀d mɔ̀ʼɔ abɔ̀ʼ bəd mbo̰ fɔti abɔ̀ʼ ina si yaʼ wə̀d ne ghà inug imbə̀ʼ icheg ne Yeso zweme ane iwu.”

23Icheg ne Pità ya ghàmi ane, mbi ya nàʼ tikum abə mbaŋà tibe. Wə̀d ifibì ya Jòseb we ne mbi yaya kàrà ane Basabàs. Mbi yaya bə̀ kàrà aməd ane Jostùs. Ìywin tì wə̀d yaya Màtiyàs. 24Mbɔb ya si chàʼra Ŋwiye gha, “Anɔŋisəg, àghò kyèri fìŋ abə wə̀d ijìm. Chwi wə̀d ne àghò chɔ̀ʼi inga mbaŋà ìto̰ tibe 25ne biri niŋ àfàʼì àze Judàs ne ya yaʼi wə̀dtɔm icheg ne məd ya waʼi àze àfàʼì si ghò yi ane asiŋi ne wì ya kòʼi ni ghò angu.” 26Mbɔb ya mànì ni chàʼra Ŋwiye si bùʼri tikaʼì, chɔʼ wə̀d ifibì. Wə̀d ne mbi ya chɔʼi ya Màtiyàs. Mbi ya niŋ aməd zì abɔ̀ʼ bədtɔm Kristo mbe ìghum chɔ̀b imɔʼ.

Currently Selected:

Ìfàʼì 1: MBTP

Highlight

Copy