Jɔn 20

Yeso fə zweme

(Mat 28:1-8; Mag 16:1-8; Lug 24:1-12)

1À yaya kwàʼ izimi izimi isusu Sɔndè ne Mèri Màdàlen ya ghò atog iseg ze ne mbi ya zi awu Yeso inga. Wì ya pè bàd gha mbe fə chì iteg we ne mbi ya kəndi ichug iseg angu. 2Wì ya bàd ane nòrò ghò abə Sayimùn Pità tì àmə̀nənùg we ne Yeso kɔ̀ŋi, ghà inɔb gha, “Mbe fə chì awu Anɔŋisəg inga iseg we. Chəyi tì kyeri asiŋi ne mbi nɔŋi awu məd angu!”

3Pità tì àmə̀nənùg mbin ya zug ane, nòrò ghò atog iseg we. 4Mbɔb mbe mə̀be yaya fɔrɔ nòtò, si ya gha, ìywin tì àmə̀nənùg ya nòtò chè Pità ghò bì pè atog iseg ze. 5Wì ya gundi nèn inga iseg we, bàd iba ndwi linèn mbe, si ya gha, chəyi wì ya nyi inga. 6Sayimùn Pità ne ya si yèʼe ibo anjìm ya pè nyi ghò inga iseg we. Wì ya bə̀ bàd iba ndwi linèn mbe inga angu. 7Wì ya bə̀ bàd ndwi iwu ze ne mbi ya nipi atog abə Yeso. Chəyi ndwi ìzo̰ ya yaʼi ifɔti tì iba ndwi linèn mbe. Wì ya bàd gha, ndwi ze kad yi zìyè zìyè chughi asiŋi afibì icha. 8Àmə̀nənùg we ne ya bi pè atog isèg, ya bə̀ si nyi inga iseg we. Wì ya bə̀ bàd, si bḛ gha Yeso fə zweme ane iwu. 9Chəyi ìmbɔb itog ya kiri zḛ imbə̀ʼ Ìngam Ŋwiye we ne gha, wì mənyìʼ zwème ane iwu.

Yeso dù ìwi ìfe abə Mèri Màdàlen

(Mat 28:9-10; Mag 16:9-11)

10Mə̀mə̀nənùg mbe ya bàd inug mbe ane, bə̀ndì ghò a asiŋi ze ne mbi yaya chùghə. 11Chəyi Mèri ya nyi inga iseg we. Wì ya təm yi yaʼ asaŋ se dèghè yi. Icheg ne wì yaya dèghè, wì ya nɔ̀ʼ gùndi aseg nèn inga iseg we. 12Wì ya nèn ane, bàd mbè angirə̀ məbe ne zì ndwi fu fu ichughi igun asiŋi ze ne mbi ya nɔŋi awu Yeso. Ìwi ifibì ya chughi ane asiŋi ze ne mbi ya bɔŋi awu Yeso nɔŋi atog angu. Ìywin si chùghi ane asiŋi ze ne ighog Yeso ya yaʼi angu.

13Mbè angirə̀ mbe ya biri ibo gha, “Àyi gho̰, àghò kə dèghè aghə?”

Wì ya ywìtì gha, “Mbe fə niŋ awu ìmə Anɔŋisəg. Chəyi mə̀ bə kyèri asiŋi ne mbi nɔŋi angu.” 14Wì ya ghà ane, ghàbri bàra Yeso itəmi angu. Si ya gha, chəyi wì ya kyeri gha à ya məd.

15Yeso ya biri ibo gha, “Àyi gho̰, àghò kə dèghè aghə. Àghò kə kə̀bə̀ we?” Mèri ya kɔndi àzi gha à ya wə̀d we ne beri mben ze. Ane, wì ya ghà ibo gha, “Masà, àmə yaʼ aghi ne, à ya àghò bèʼi awu məd chì, gha asiŋi ne àghò bèʼi ghò nɔ̀ŋì angu, mə̀ gho niŋ.”

16Yeso ya si kàrì aməd gha, “Mèri.”

Mèri ya ghabri nèn aməd, si ghàm ane ìngam Hibrù gha, “Ràbonì.” Ane ya ni gha, “Àchwitìnùg.”

17Yeso ya ghà ibo gha, “Imbə̀ʼ àghò bete awe awum imbə̀ʼ icheg ne chəyi mə̀ kiri bəndi ghò abə ìmə Mbaʼ. Ane, ndò ghò ghà abə ìmbum məfi gha, ‹Mə we bə̀ndə̀ ghò abə ìmə Mbaʼ ne ya bə̀ ìwən Mbaʼ. Məd ya ìmə Ŋwiye, bə̀ yaʼ ìwən Ŋwiye.›”

18Mèri Màdàlen ya ghò ghà ikən we abə mə̀mə̀nənùg mbe. Wì ya ghà inɔb gha, “Mə bàd Anɔŋisəg!” Wì ya bə̀ tòʼrì inɔb gha à ya Anɔŋisəg gha inug mbo̰ ibo.

Yeso ya dù ìwi ìfe abə ìmbi mə̀mə̀nənùg

(Mat 28:16-20; Mag 16:14-18; Lug 24:36-49)

19Àsi ikwikwiri Sɔndè we, mə̀mə̀nənùg ya yaʼ asiŋi afibì, inga nəb iwùbi imbə̀ʼ icheg ne mbi yaya bɔ itog bəd mə̀Ju. Mbi ŋa zə̰, mbi si bàra Yeso itəmi abɔ̀ʼ inɔb. Yeso ya si ghà inɔb gha, “Mbə̀ chughi ane àbɔrɔ̀bɔd”. 20Anyumə̀ ne wì ya ghàmi ane, wì ya chwi ìmbi ibo fɔrɔ ìwi iban ìbèn inɔb. Igyendi ya sweg inga ìtɔb fìŋ icheg ne mbi ya bàri Anɔŋisəg.

21Yeso ya ywìrì gha, “Mbə̀ chughi ane àbɔrɔ̀bɔd! Icheg ne ìmə Mbaʼ ya cha, mə̀ ya anìŋ bə̀ chà awən.” 22Wì ya ghàm ane si zwèg igun inɔb, ghà inɔb gha, “Azwighi Ŋwiye yeʼe igun inən. 23Mbə̰ mə̀ waʼ inug tibɔ̀ŋ wə̀d Ŋwiye biri bə waʼ. Àmə chəyi mbə̀ waʼi inug tibɔ̀ŋ wə̀d chəyi Ŋwiye biri bə waʼ inug tibɔ̀ŋ ìmbi tengàŋ.”

Yeso dù ìwi ìfe abə Tòmas

24Chəyi Tòmas, àmə̀nənùg mɔ̀ʼɔ inga mə̀mə̀nənùg ìghum chɔ̀b ibe mbe abə Yeso ya yaʼi abɔ̀ʼ mə̀mbin anyumə̀ ne Yeso ya du ìwi ìfe inɔb. Mbi yaya bə̀ kàrà aməd ane “Ànjiŋə”. 25Mə̀mə̀nənùg mbin ya ghà ibo gha, “Tè bàd Anɔŋisəg!”

Si ya gha, Tòmas ya ghà inɔb gha, “Àmə chəyi mə̀ bari ipabi ina mbe ne mbi ya kɔ̀mbi ibo məd ane mban, bə̀ bètì ipabi ina mbe, bə̀ zì àmə abo inga asiŋi ze ne mbi ya zùmi ibo iban ìbèn, nji chəyi mə̀ biri bḛ.”

26Ìkàb ya chè ifibì, mə̀mə̀nənùg ywìrì fète chùghi inga nəb. Tòmas ya yaʼ tì inɔb. Mbi ya fə feni tinuʼ nəb. Si ya gha, Mbi ŋa zə̰, Yeso kiri nyi təm abɔ̀ʼ inɔb, ghà inɔb gha, “Mbə̀ chughi ane àbɔrɔ̀bɔd.” 27Wì ya chàʼrì awɔb ane, si ghà abə Tòmas gha, “Nḛ ìmbum ibo. Bète ìmə ikye abo, bə̀ bètì ìmə iban ìbèn. Imbə̀ʼ àghò jəmə awe. Àghò bere ibḛfiŋ.”

28Tòmas ya si ghà ibo gha, “Ìmə Anɔŋisəg, ìmə Ŋwiye!”

29Yeso ya si ghà ibo gha, “Àghò ya anìŋ kə zìyè ibḛfiŋ igun inum imbə̀ʼ icheg ne àghò bàd amə. Ŋwiye zì àbɔrɔ̀bɔd igun bəd mbe ne zi ìwɔb ibḛfiŋ igun inum ne chəyi mbi bàd amə.”

Aton ane Àŋwàʼrì azo̰

30Yeso ya ghì iyeti inug nɔʼ nɔʼ, mə̀mə̀nənùg məd bàd, ne chəyi inga àŋwàʼrì azo̰. 31Inùg mbo̰ ne yaʼi inga ŋwaʼri azo̰ ya ni ghì gha mbə̀ bḛ gha Yeso ya Wə̀d we ne Ŋwiye zɔ̀ʼi, bə̀ yaʼ Ŋwan Ŋwiye. Mbə̰ mə̀ bḛ, mbə biri jəg ìtḛ̀ ighə̀m imɔʼ.

Currently Selected:

Jɔn 20: MBTP

Highlight

Copy