Jɔn 19

Mbe sɔb isaʼi gha Yeso ku

1Payilèd ya si niŋ Yeso ghì mbi ywiri. 2Mə̀sogyì ya niŋ agyen njəŋ njəŋ, kad, zì ibo igun atog gha à ya aghi atog ifɔn. Mbi ya bə̀ zì ndwi ìfɔ̀n igun məd. 3Mbi ya se chàtà məd ghà gha, “Mbèè! Ifɔn mə̀Ju!” Mbi yaya ghàmà ane, nìbè məd ane atog. 4Payilèd ya ywìrì dù isəg, ghò ghà abə itog bəd mə̀Ju gha, “Mbə̀ zug, mə biri niŋ aməd yèʼe nàʼ inən, ni chwi gha, chəyi mə̀ beri anug mɔ̀ʼɔ ni chè igun zì isaʼi igun məd.” 5Anyumə̀ ne Yeso ya dù isəg tì aghi atog njəŋ njəŋ ze fɔrɔ ndwi ìfɔ̀n ze igun məd, Payilèd ya si gha, “Mbə̀ nḛ! Məd gho̰.”

6Kwàʼ anyumə̀ ne bəd àfàʼì ne chə̀ʼə̀ mbàn Ŋwiye tì itog bəd mbàn Ŋwiye ya bàd aməd, mbi ya ghàm ane gì ka ka gha, “Kɔ̀mbɔ aməd igun azed abaʼri! Kɔ̀mbɔ aməd igun azed abaʼri!”

Payilèd ya ywìtì abə itog bəd mbe gha, “Mbə̀ niŋ aməd ghò kɔ̀mbì mbə̰ mbə̰. Àsi mo, chəyi mə̀ beri anug mɔ̀ʼɔ ni chè igun zì isaʼi igun məd.”

7Itog bəd mə̀Ju ya ywìtì gha, “Tè bèrì nɔ̀ʼɔ̀ ne chwìye gha, wì mənyìʼ ku imbə̀ʼ icheg ne wè gha zìye ya Ŋwan Ŋwiye.”

8Anyumə̀ ne Payilèd ya zughi ane, ibɔ ya gwì aməd. 9Wì ya ywìrì nyi ghò inga ìtɔʼ, bìri abə Yeso gha, “Àghò kə nɔ̀ʼi aya?” Si ya gha, chəyi Yeso ya ywìtì anug mɔ̀ʼɔ. 10Payilèd ya biri ibo gha, “Àghò kə to̰ awe ni ghàm inum. Chəyi àghò kyèri gha mə bèrì ika ni sàŋì awe, kə̀ ni ghì gha mbe kɔ̀mbì awe azed abaʼri?”

11Yeso ya ywìtì gha, “Chəyi tì àghò ghi aghi mɔ̀ʼɔ inum ane chəyi Ŋwiye kə̀ nàʼi ika ine. Ane, wə̀d we ne nàʼi amə ine fə ghì anug tibɔ̀ŋ ne bə̀ chè.”

12Ni ko ane nyumə̀ ne Payilèd ya zug icheg ne Yeso ywìtì ìngam ibo, wì ya se kə̀bə̀ icheg ni sàŋì aməd. Si ya gha, itog bəd mə̀Ju ya kyen gha, “Àghò mə sàŋì mbaŋà izo̰, kyeri gha chəyi àghò ywiri yaʼ ìsə̀ʼ ìwi Kayisà. Wə̀d we ne nìŋə ìwi nyɔd gha zìye ya ifɔn, tengàŋ ya wə̀d ìpàb Kayisà.”

13Anyumə̀ ne Payilèd ya zughi ìngam gho̰, wì ya niŋ Yeso dù isəg, pè chùghi igun atən ze ne wì yaya chùghə igun sàʼa tisaʼi. Atən ze ya yaʼ ane asiŋi ze ne mbe kàrà ane, “Ikye ikam ateg”. Mbi ya kàrà ati ze ane ìngam Hibrù gha, “Gabatà”. 14À ya yaʼ icheg ane àngɔŋ tisi, ane aneg ze ne mə̀Ju mbe chùʼrə nyɔd ni jəg Iteri Chègun. Ane, Payilèd ya niŋ Yeso ghò abə itog bəd mə̀Ju pè ghà inɔb gha, “Mbə nḛ, aŋa ya ìwən ifɔn gho̰”

15Mbi ya kyen kwàʼ ane gì ka ka gha, “Zweti aməd! Zweti aməd! Kɔ̀mbɔ aməd igun azed abaʼri.” Payilèd ya biri gha, “Mə̀ kɔ̀mbɔ ìwən ifɔn igun azed abaʼri?”

Itog bəd Mbàn Ŋwiye ya ywìtì gha, “Chəyi tì beri ifɔn ndəŋ chèyi ane Kayisà!”

16Payilèd ya ghì ane nàʼ Yeso inɔb gha mbe ghò kɔ̀mbì igun azed abaʼri.

Mbe kɔ̀mbì Yeso igun azed abaʼri

(Mat 27:32-44; Mag 15:21-32; Lug 23:26-43)

Mə̀sogyì mbe ya niŋ Yeso ghò tì məd. 17Yeso ya bèʼì àzi azed abaʼri zìye zìye, mbi dù ghò pè asiŋi ze ne mbe kàrà ane Tìngəʼ Atog. Mbi yaya kàrà asiŋi ze ane ìngam Hibrù gha Golgotà. 18Mbi ya kɔ̀mbì aməd angu. Mbi ya bə̀ kɔ̀mbì mbaŋà mɔ̀ʼɔ tibe iban məd. Mbaŋà imɔ̀ʼ, aba abo jəghi, ìzin, aba abo atəŋ. Yeso ya si yaʼ inga fìghàra.

19Payilèd ya ŋwàʼrì àŋwàʼrì mɔ̀ʼɔ, kɔ̀mbì ane atog azed abaʼri ze. Wì ya ŋwàʼrì igun gha, “Yeso we a Nazarèd, ifɔn mə̀Ju”. 20Mə̀Ju nɔʼ nɔʼ ya fɔŋ àŋwàʼrì ze imbə̀ʼ icheg ne, asiŋi ze ne mbi ya kɔ̀mbi Yeso angu ya yaʼ iban ikye aben. Ane, mbi ya ŋwàʼrì àŋwàʼrì ze ane achug ìngam atad: ichug Àràmayìg, tì ichug Latìn fɔrɔ ichug Grig. 21Itog bəd mbàn Ŋwiye ya ghà abə Payilèd gha, “Imbə̀ʼ àghò ŋwàʼra awe gha, ‹À ya ifɔn mə̀Ju›. Ŋwàʼra gha, ‹Wì gha, zìye ya ifɔn mə̀Ju.›”

22Payilèd ya ywìtì gha, “Anug ze ne mə̀ ŋwàʼri, mə fə ŋwàʼrì.”

23Anyumə̀ ne mə̀sogyì ya fə kɔ̀mbi Yeso igun azed abaʼri, mbi ya niŋ ndwi məd ghàpì isiŋi ikwè. Wə̀d ifibì ya niŋ asiŋi afibì. Mbi ya bə̀ niŋ ndwi sèsè məd ze ne we zìyè anjìm inga. À ya ndwi ne mbi ya baʼi baʼi, ko atog ghò pè aton ne chəyi ka ìnàni.

24Mbi ya niŋ ndwi ze ghàm mbɔb mbɔb gha, “Imbə̀ʼ tì sete awa ndwi izo̰. Tè buʼ tikaʼì ni kyeri wə̀d ne biri niŋ.” Inug mbo̰ ya dù ni ghì gha, Ìngam Ŋwiye we ne mbi ya ŋwàʼri, we duwə ane tesiʼ. Ìngam we ya gha,

“Mbi ya ghàpì ìtum ndwi àzɔb aghi,

bə̀ buʼ tikaʼì ni niŋ ìmə ndwi ze ne mə zìyè anjìm inga.”

À ya anug ne mə̀sogyì mbe ya ghi.

25Ngɔb Yeso tì ifi ngɔb Yeso, tì Mèri, iweg Klopàs fɔrɔ Mèri Màdàlen ya bə̀ təm iban azed abaʼri ze. 26Anyumə̀ ne Yeso ya bàri icheg ne ìwi ngɔb tì àmə̀nənùg we ne wì kɔ̀ŋi ya təmi iban azed abaʼri ze, wì ghà abə ìwi ngɔb gha, “Aŋa ya ìwe ŋwan gho̰.” 27Wì ya bə̀ si ghà abə àmə̀nənùg we gha, “Aŋa ya ìwe ngɔb gho̰.” Ni ko ane nyumə̀ we, àmə̀nənùg we ya niŋ ngɔb Yeso ghò inga àzi achan.

Icheg ne Yeso ya ku

(Mat 27:45-56; Mag 15:33-41; Lug 23:44-49)

28Yeso ya kyeri àzi aghi gha, inug ijìm fə mèg yi. Ane, ni bə ghì gha, anug ze ne mbi ya ŋwàʼri inga Àŋwàʼrì Ŋwiye ze duwə ane tesiʼ, wì ya gha, “Adɔʼ mənib ze ko amə.” 29Aghi mənoʼ mɔ̀ʼɔ ya yaʼ angu tì mənoʼ ŋwàŋi ŋwàŋi inga. Mbi ya chùb juʼ inga mənoʼ ŋwàŋi mbe, fùm ane atog fized hysɔb, si zì ichug abə Yeso gha wì sɔri. 30Anyumə̀ ne Yeso ya sɔri mənoʼ ŋwàŋi mbe, wì ya gha, “Ze fə mèg.”

Wì ya gha ane, si gùndi atog aseg, Ŋwiye niŋ azwighi məd.

31Itog bəd mə̀Ju ya ghà abə Payilèd gha wì saŋa mbe buʼri ighog abə bəd mbe ne mbi ya kɔ̀mbì awɔb igun azed abaʼri imbə̀ʼ swi ìmbɔb iwu chì. Wì ya ghà ane imbə̀ʼ icheg ne à yaya aneg ne mbe chùʼrə nyɔd ni nyi inga aneg Àzwètì. Aneg abɔ̀ʼ yaya kwàʼ aneg àzwètì kyen. Mbi ya kə̀b ni swi iwu bəd mbe chì imbə̀ʼ icheg ne chəyi mbi ya kə̀bi gha, aneg àzwètì pe ne iwu bəd mbe kiri biri igun azed abaʼri. Mbi yaya kə̀bə̀ ni ghì ane imbə̀ʼ icheg ne aneg àzwètì ze yaya kwàʼ aneg àzwètì kyen abə mə̀Ju. 32Mbi ya biri ane Payilèd bḛ, mbi chà mə̀sogyì, mbi ghò buʼri ighog abə wə̀d mbègtog bə̀ buʼri ighog abə ìywin tì wə̀d we ne mbi ya bə̀ kɔ̀mbì awɔb iban Yeso. 33Si ya gha, anyumə̀ ne mbi ya pè igun Yeso si bàd gha wì fə kə ku, chəyi mbi ya buʼri aghog məd. 34Si ya gha, sogyì mɔ̀ʼɔ inga mə̀sogyì mbe, ya zùm iban ìbèn məd ane ighɔŋ. Wì ya zùm ane, anəm fɔrɔ mənib dù ane məd. 35Wə̀d ne ya bàri anug azo̰ fə ghà àzewən ni ghì gha mbə̀ bə bḛ. Məd zìye fə kyeri yi gha, anug ze ne wì ya ghà ya tesiʼ. 36Inug mbo̰ ya du ni ghì gha, anug ze ne mbi ya ŋwàʼri inga Àŋwàʼrì Ŋwiye duwə ane tesiʼ gha, “Chəyi mbi biri buʼ awu məd mɔ̀ʼɔ ka amɔʼ.” 37Asiŋi ndəŋ inga Àŋwàʼrì Ŋwiye bə̀ gha, “Bəd biri nèn aməd we ne mbi ya zùmi.”

Icheg ne mbi twəŋi Yeso

(Mat 27:57-61; Mag 15:42-47; Lug 23:50-56)

38Anyumə̀ ne anug azo̰ ya fə chè, Jòseb we a Àrimàtiyà ya ghò ghà abə Payilèd gha wì saŋa zìye swi awu Yeso ghò twə̀ŋi. Payilèd ya bḛ, wì ghò niŋ awu Yeso ghò tì àzewən. Jòseb ya yaʼ àmə̀nənùg Yeso. Si ya gha, wì ya yaʼ yi inə̀mbi imbə̀ʼ icheg ne wì yaya bɔ itog bəd mə̀Ju. 39Nìkòdemòs we ne ya kweʼì ghò abə Yeso izimi, ya bene abɔ̀ʼ Jòseb. Nìkòdemòs ya niŋ məwud mɔ̀ʼɔ ne mbe kàrà ane Mər, nyàmbì tì mbi ndəŋ ne mbe kàrà ane alò ghò tì mbiwən. Məwud mbe ya yaʼ icheg Mə̀kirə̀ ìghum itad. 40Mbi ya niŋ awu Yeso, nib ane ndwi linèn ze. Mbi yaya nìpe nè zɔ̀ʼɔ ane məwud mbe. Mbi ya ghì ane icheg ne mə̀nɔ̀ʼɔ̀ mə̀Ju chwi gha mbe ghiyə tì awu wə̀d, bɔŋ twəŋi. 41Mben mɔ̀ʼɔ ya yaʼ iban asiŋi ze ne mbi ya kɔ̀mbi Yeso igun azed abaʼri. Iseg feg mɔ̀ʼɔ ne mbi ya to inga igho ya yaʼ inga mben ze. Chəyi mbi ya kiri kweʼì twə̀ŋi wə̀d mɔ̀ʼɔ inga iseg we. 42Icheg ne à yaya aneg ne mə̀Ju yaya chùʼrə nyɔd ni nyi inga aneg àzwètì, fɔrɔ icheg ne iseg we ya yaʼi iban angu, mbi ya niŋ awu Yeso zì inga iseg we.

Currently Selected:

Jɔn 19: MBTP

Highlight

Copy