Mateyu 3

Imbila yakwe Yohani ekabatizya

(Marko 1:1-8; Luka 3:1-18; Yohani 1:19-28)

1Pampindinye yoyo Yohani Kabatizya atunka awawila mulumpalang'ang'a lwamwe Yudeya, awavwanga akuti, 2Tontolokwani kuluwembu lwinu, amuno Uwufumu wamwiyulu wapalamila! 3Wenye-wee e Yohaniawino umutumwa Ayizeya wavwanzile ivyakwe weliwe ati,

Wumwi aku punda mulumpalang'ang'a, akuti,

Yaniani inzila ya Mfumu eLeza;

yololani ekumba wakwe!

4Ivizwalo vyakwe Yohani vyalinji avya meya yangamila; wazwalanga umupango wamukowa mumutembeleko wakwe, swinya walyanga makanta nuwuchi wamulonde. 5Awantu wakwe Yerusalemu awaya kweweliwe, nawamunsi yakwe Yudeya wonsi, nawamunsi yonsi yino yaliwilizya uluzi e Yordani. 6Awazumila amawembuko yawo ngapano awabatizwa mwe Yordani.

7Ukuwa ala pano Yohani walola awa-Falisi na wa Saduki wakuya kweweliwe kukubatizwa, awanena ati, Mwenzoka-mwe—ngaweni wawanenile ukuti mungapusuka uwukali wakwe Leza wuno wukwiza? 8Fwandi aleni chitanji vino vingalanjizya kuno mwatontolokwa kuluwembu lwinu. 9Mutize muwe nakapemezyo muwati, Swelikwata lyakwe Abrahamu. Nkuwanena nkuti Leza ali namaka yakukatusizya Abrahamu ikwata kumawenye yaa! 10Nakanonzinye impasa yazunzulwa kukukoma imiti mwisika; umuti wonsi wuno wusinakukoma ivikomwa vizima wulikomwa wusumbilwe mumulilo. 11Nachawuzimanye nenji nkubatizya naminzi kukulanjizya ukutontolokwa kwinu; ukuwa weni wino akwiza pansizi penene aliwabatizya nu Muzimu Mwimichile mbali numulilo. Weyonye wakula wandusya; wino ntazipila nanti akusenda indyatu zyakwe. 12Ali nulupe lwakwelela, aliyela amalezi yonsi palwano; alonge inkumba munkoma, ukuwa ayoche ilyelelo mumulilo wuntazima.

Yesu abatizwa

(Marko 1:9-11; Luka 3:1-22)

13Pampindinye yoyo Yesu afuma ku Galileya aya kwe Yordani, aya kukubatizwa nu Yohani. 14Ukuwa Yohani awamukania akuti, Nenenye anemuntu nazipila ukubatizwa nawe, ngamuno chani chino nawe ungiza kwenene!

15Yesu amutolelela ati, Kanonzi leka chiwe awowonye. Amuno mumwatanyewoo apano tungawomba vyonsi vino Leza akalonda. Ngapano Yohani azumila. 16Ala vino Yesu wabatizwa, afuma muminzi. Nga mwiyulu amumwiyuchila, alola Muzimu wakwe Leza akwika ngati ankunda awupona pakwe weliwe. 17Izwi alifuma mwiyulu aliti, Wee aMwanane umukundwe, nkusechela mwakwe weliwe.

Currently Selected:

Mateyu 3: WWN82

Highlight

Copy