Mateyu 4
4
Ukwelezwa kwakwe Yesu
(Marko 1:12-13; Luka 4:1-13)
1Ngapano Yesu, akolelelwa nu Muzimu mulumpalang'ang'a kukuya kwelezwa nu Satana. 2Ala pano Yesu wikala nanti kulya amanda amakumi yani ayamusanya nuwusiku, inzala imuluma. 3Satana afika amunena ati, Ndi wemwanakwe Leza nena amawenye yaa yawe achakulya.
4Ukuwa Yesu atolelela ati, Amawaliko matele yavwanga yati, Umuntu atanga awe nuwumi kuchakulya chitupu, nkandi kwizwi lyonsi lino likafuma mumulomo wakwe Leza.
5Nga Satana amutwala kukaya kimichile, afika amwimika pansongo yang'anda yakupepela, 6amunena ati, Ndi wemwanakwe Leza, yiponie pansi; amuno amawaliko matele yawalikwa yati,
Leza alisundila awangeli wakwe ivyakwe wewe;
walikwanka mumakasa yawo,
alyakuti utize uchisike amanama yako kumawe.
7Yesu atolelela ati, Nayo amawaliko matele yavwanga yati, Kusikwezya ukwelezya Imfumu eLeza wako.
8Swinya Satana amutwala pamwamba wutali nkaninye amulanjizya amawufumu yonsi ayamulisi, nuwukulu wakwe yoliyo. 9Satana ati, Ivintunye vyoo nandi nkupe, ndiwapona pansi wamfukamila.
10Ngapano Yesu atolelela ati, Tina paa, Satana! Amuno amawaliko matele yavwanga yati, Uwafukamila Imfumu eLeza wako wenganye-nsu awino uwamupakata!
11Ngapano Satana amusya; awangeli awiza awapyunjila Yesu.
Yesu atalichila ukuwomba umulimo mu Galileya
(Marko 1:14-15; Luka 4:14-15)
12Ala pano Yesu wivwa ukuti Yohani wiyalilwa muvingololo, aya mu Galileya. 13Atisile mwe Nazareti, wayile ayikala mwe Kapernahumi, akaya kano kali mumbali yakwe sumbi wakwe Galileya, munsi yakwe Zebuloni nu Nafutali. 14Chonye-choo chachisilwe alyakuti chino chavwanzilwe numutumwa Ayizeya chifiswe, ichakuti,
15Wensi yakwe Zebuloni, ninsi yakwe Nafutali,
wulunga nusumbi, kumba lama kwe Yordani,
Galileya wamakandi!
16Awantu wano wikala mumfinzi
walilola ukuwala kukulu nkani!
Kwakwe wano wikala munsi yawafwe
ukuswepa kuliwawalila!
17Ukufumilila pampindinye yoyo Yesu atalika ukuwila amazwi yakwe awati, Fumani kumawembuko yinu, amuno Uwufumu wamwiyulu wapalamila!
Yesu ayita awalondo wani
(Marko 1:16-20; Luka 5:1-11)
18Ala vino Yesu akupita mumbali yakwe sumbi wakwe Galileya, alola awang'anda yonga wawili wano walinji awalondo, e Simoni (wino witwanga ilyakwe Peter) nu Andreya umunyina, walemanga inswi mwesumbi nikonde. 19Yesu awanena ati, Nkonkani nandi njize mbasambilizye uwulondo wakulema awantu. 20Napaponapapo awasya amakonde awamukonka.
21Ala vino akupita alola swinya awang'anda yonga wawili, e lemusi nu Yohani, awanakwe Zebediya. Walinji muwato wawo nuyisi e Zebediya wakuyania amakonde. Yesu awita; 22napaponapapo awasya uwato nuyisi, awamukonka.
Yesu awasambilizya, nukuwizya nukupozya
(Luka 6:17-19)
23Yesu awapitapita mwe Galileya monsi, akusambilizya mung'anda zyawo izyakupepela, akuwila Ilandwe Zima ilya Wufumu, mbali nukupozya indwala zyamisangomisango zyonsi. 24Amazwi yakulumbililwa kwakwe ayakwila munsi ya Siria yonsi, achaleka awantu awamutwalila wonsi wano walwile indwala zyamisangomisango, nawano watamikanga nukulumwa kwamisangomisango: awamizimu miwipe, nawakwe sinsa, nawandwala zyachintendya—Yesu awapozya wonsi. 25Amawumba makulu ayamukonka, ayafuma mwe Galileya namutwaya ikumi, mwe Yerusalemu na mwe Yudeya, namumbalama mwe Yordani.
Currently Selected:
Mateyu 4: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.