Mateyu 2

Awapitanzila wano wafumilizile kapela

1Yesu akwatwa mukaya ka Bethlehemu, munsi yakwe Yudeya, pano Herodi walinji amfumu. Napaponapapo wano wamanyile ivyantanda awafumilila kapela awaya kwe Yerusalemu 2awawuzya awati, Alikwi wino akwasilwe imfumu ya wa Yuda? Twaweni ulutanda lwakwe kapela, twiza mufukamila.

3Ala Herodi imfumu wivwa chochonye atamika, nawamwe Yerusalemu wonsi. 4Awunganika apaliponga wasimapepo wakulu wonsi nawasambilizya wamasundo awawuzichisya ati. Wuzye Mesaya angakwatwa kwi?

5Awamunena awati, Mu Bethlehemu, mwe Yudeya, amuno yawalikwa awonye numutumwa yati,

6Wewenye Bethlehemu, munsi yakwe Yuda,

usi wemutichi mwakwe wakapa

nzya wa mwe Yuda;

amuno mwakwe wewe mulifuma kapanzya

wino aliwakolelela awantu wane awa Israeli.

7Herodi ayita awapitanzila wano wafumilizile kapela munkama kumbali amanyichisya impindi yino ulutanda lwalolesile. 8Awatuma ku Bethlehemu awatumilizya ati, Yanji mukivwichisye ivyakana kako, ndimwiza mwamuzana mwize munene, alyakuti naninye njize nkamufukamile.

9Awala wivwa awapita, awala pano wakupita awalola ulutanda lulyanye luno waluweni kapela—aluwakolelela alusuka aluya alwimilila pano akana kalinji. 10Ye, awawa nichimwemwe wuli pano walola ulutanda! 11Awinjila mung'anda awalola akana nu nyi na e Mariya. Awapona pansi awakafukamila; awasapula insawo zyawo awakafimila ivyawila: e golide, nuwusule, nuwubani.

12Leza awasochela muchilota ukuti watize wanyochele kwe Herodi; achaleka awanyoehela kumwawo inzila yinji.

Ukusamalila ku Ijeputi

13Awala pano wapita, umungeli wa Mfumu eLeza alolechela lozefu muchilota ati, Katuka, usende akanako nunyina musamalile ku Ijeputi, mukawange kokonye nsuke njize mbanene ukuti mufume. Herodi wandi awavwambisya ivyakana kakonye ukuti akakome.

14lozefu akatuka, asenda akana kako nunyina, afuma uwusiku aya ku Ijeputi, 15alanga ali kokonye asuka Herodi afwa. Chochonye chachisilwe alyakuti china Imfumu eLeza wavwanjizile mumulomo wamutumwa chifiswe; ichakuti, Nisile Umwanane inti afume mu Ijeputi.

Ukukomwa kwa wana

16Ngapano Herodi ala wal ola kuno awapitanzila wano wafumilizile kapela wamuchenjezya, avitwa. Akomelezya ukuti awanawonsi wonsi awa mu Bethlehemu namumbali monsi wano walinji nimyaka yiwili, nawano wachilinji, wakomwe—alingania nimpindi yino wivwizile kuwapitanzila yino ulutanda lwalolesile.

17Ngapano amazwi yano yavwanzilwe numutumwa Jeremiya ayafiswa, ayakuti,

18Izwi Iyivwisilwe mu Rama,

ukulila nukulosya kukulu.

Rakelo akulilila awanakwe;

akulosya atanga asansamuke,

amuno wonsi wafwa.

Ukunyoka ukufuma ku Ijeputi

19Walile pano Herodi wafwa, umungeli wa Mfumu eLeza alolechela Jozefu muchilota, mu Ijeputi ati, 20Katuka usende akana kako nunyina, unyochele munsi yakwe Israeli, amuno wano walondanga ukukoma akana wafwa. 21Achaleka lozefu akatuka asenda umuchi nakana, anyochela mwe Israeli.

22Walile wivwa kuno Arkelawo wapyana yisi e Herodi imfumu ya mwe Yudeya, atina ukuya kweneko. Wasochezilwe swinya muchilota, nga aya munsi ya mu Galileya 23aya ayikala mukayakakwe Nazareti. Alyakuti chino chavwanzilwe numutumwa chifiswe, ukuti, Aliwakwitwa amwina Nazareti.

Currently Selected:

Mateyu 2: WWN82

Highlight

Copy