Luka 8

1Pansizi pane patani pazimbe, Yesu apita mutwaya tukulu namutumizi-mpunda, alanga akuwila Ilandwe Zima ilya Wufumu wakwe Leza. Walinji nawasambilizi ikumi nawawili, 2apaliponga nawanachinye wamwi wano wawapozizye imizimu miwipe: ndivino e Mariya (wino witwanga ilyakwe Magadala), mwakwe wino Yesu wawinzile imizimu miwipe munenulambali; 3nu Joana emuka Chuza wino walinji ankombe yamwipembo lyakwe Herodi; nu Susana, nga nawanachi wanji awavule wano wapyunjilanga Yesu nawasambilizi wakwe ninsawo yawo.

Umulumbe wakwe katanda wambeyu

(Mateyu 13:1-9; Marko 4:1-9)

4Awantu awalanga wakuya kwe Yesu ukufuma mutwaya natwaya; nga alila iwumba kulu lyawungana, Yesu awumila umulumbe ati,

5Umuntu wayile mukutanda imbeyu yakwe. Ala vino akusumba imbeyu muchalo, yimwi iponela munzila, ilyatanjilwa, ninyunyi aziyisola. 6Yimwi iponela pemfuzi, nga ila imbeyu yatunzya ifoka, amuno umusili wutalinji numunyezi. 7Imbeyu yimwi iponela mumyunga, ikulila apaliponga nimyunga; imyunga iyititichizya, 8Imbeyu yimwi iponela pamuvundo; imbeyu ikula icha nukucha, yimwi umwanda.

Yesu apelelechezya namazwi yakuti, Aleni, ndimuli namakutwi, yivwani!

Chino Yesu wumilanga imilumbe

(Mateyu 13:10-17; Marko 4:10-12)

9Awasambilizi wakwe Yesu awamuwuzichisya chino umulumbenye woo wasulanga. 10Yesu awatolelela ati, Mwenji chapwa ukumanya ivyankama vya Wufumu wakwe Leza; ukuwa kwakwe wanji amumilumbe, alyakuti ukulola kweni walola ukuwa walange wakulola ichitumbula mpanzi, walange wakuteyelezya ukuwa nanti kwivwa.

Yesu alondolola umulumbe wakwe katanda

(Mateyu 13:18-23; Marko 4:13-20)

11Umulumbe wonye-woo wuli awoo; imbeyu amazwi yakwe Leza. 12Imbeyu yino yaponezile munzila ikusula wano wakula wivwa; ukuwa Satana afika asenda amazwi ayafumya mumyezo yawo awalesya ukusuwila ukuti watize watulwe. 13Imbeyu yino yaponezile pemfuzi chikusula awano wakula wivwa amazwi awayapochelela nichimwemwe. Ukuwa nanti kuwa nimisisi mwakwe woliwo; Wakasuwila mukapindi kamwi ukuwa ndi ukwelezwa kwawizila awapona. 14Imbeyu yino yaponezile mumyunga awali wano wakula wivwa mazwi; ukusaya kwampindinye yoyo nukukundisya insawo aviwawunganila aviwafina, awasowa nichakuchita. 15Imbeyu yino yaponezile pamuvundo awali wano wakula wivwa mazwi awiluka mbali nukuyatontela; awalandalila awasuka awafika pakafiko.

Inyale nkupikwe

(Marko 4:21-25)

16Pasi wumwi wino akula wakozya inyale ayikupika mulweso nanti akuyiwika mwivungululu lyachitala. Ukuwa akayiwika pachilemelo, alyakuti ndi awantu wakwinjila awalanga wakulola ukuswepa. 17Chonsi chino chafiswa chililetwa palwenze, nachonsinye chino chavwimbwa chilivwimbulwa chiwe palwenze.

18Achaleka chenjelani, muno mukwivwila; ukuwa wensi wino alinachimwi aliyonjelezwa ivivule, na wensi wino asi nanti chimwi chilipokwa kweweliwe nanti achitichinye chino alinacho.

Enyina wakwe Yesu nawanyina

(Mateyu 12:46-50; Marko 3:31-35)

19Enyina wakwe Yesu nawanyina awaya kweweliwe, ukuwa muno aliwumba awapotwa ukumupalamila. 20Wumwi anena Yesu ati, Enyoko nawanyonko wimilile palonde wakulonda ukukulola.

21Yesu awanena wonsi ati, Emayo nawanawitu awano wakwivwa amazwi yakwe Leza mbali nukuyatontela.

Yesu amyalalika ichipunga

(Mateyu 8:23-27; Marko 4:35-41)

22Uwanda wumwi Yesu ayinjila muwato nawasambilizi wakwe awanena ati, Tuyani tulambe tuye mumbalama zinji izyakwesumbi, Achaleka awapita. 23Awala pane wakupita muwato, Yesu aponechela. Ichipunga chikulu achiwapupa pesumbi, naminzi ayatalika ukwinjila muwato, awawa muwulwani nkaninye. 24Awasambilizi awaya kwe Yesu awafika awamuziwusya awati, Mulali, Mulali! Twati tuwafwa!

Yesu aziwuka akalipila ichipunga namang'wimbi; avitekana akumyalala akuti-mya, 25Ngapano anena awasambilizi ati, Nga isuwilo linu lilikwi?

Ukuwa awazunguka mbali nintete, awanenana wakuti, Nga umuntunye wee amuntu-chi? Wino akukalipila umuza namang'wimbi, avimutontela!

Yesu apozya umuntu wino walwile imizimu miwipe

(Mateyu 8:28-34; Marko 5:1-20)

26Awapita muwato awaya munsi yawa Gergese, yino ili wulunga ninsi ya Galileya. 27Ala vino Yesu wafumila pachituntu, asunkana numuntu wa mukaya wino walwile imizimu miwipe. Umuntunye weyo wikalanga tupu kumyaka mivule, swinya atikalanga pakaya, ukuwa wikalanga kumalalo. 28Ala walola Yesu akuta apongomoka, ayapona peweliwe ichikazile, avwanga nizwi kulu ati, We Yesu, Mwana wawamwilewelewe e Leza! Nga ukasi uchite nani chani? Nkukulambilizya utize unsunde! 29Wavwanjizile choo muno waweni kuno Yesu wawinzile umuzimu wuwipe mweweliwe. Penye umuzimu wuwipe wamulemanga, chingatenga mpindi zimwi wanyepwanga kumakasa nakumanama niminyololo. Waputulanianga iminyololo awingwa numuzimu wuwipe asamalila mulumpalang'ang'a.

30Yesu amuwuzya ukuti amunene izina lyakwe.

Nawe amutolelela ati, Izina lyane ne Chiliwumba-amuno imizimu miwipe imivule yalinji mweweliwe. 31Imizimu miwipe ilambilizya Yesu ukuti atize aleke ikaponele mumuyenje.

32Paponye palinji uwufyo wukulu uwakwe wakapoli, walyanga mumbali yamwamba. Imizimu miwipe ilambilizya Yesu ukuti aleke ikinjile mwewakapoli, Yesu achita wowonye. 33Achaleka imizimu miwipe ifuma mumuntu iya mwakwe wakapoli; nga uwufyo awufuma kwemfuzi awutelemuchila mwesumbi awung'wela.

34A wantu wane wachemanga wakapoli awalola chino chaponile, awasamala awaya awasasya amazwi akaya konsi namuzyampunda. 35Awantu awaya kweneko mukulola chino chaponile. Awaya kwe Yesu awazana umuntu wino imizimu miwipe yafumile mweweliwe ayisile pamanama yakwe Yesu, azwite, swinya ali namano yakwe yonsi; wonsi awatina. 36Wano waweni awalandila awawuye muno umuntunye weyo wapolezile. 37Nga awantu wonsi awamunsi ya wa Gergese awalambilizya Yesu ukuti apite, amuno in tete zyawalemile kutaluvile. Yesu ayinjila muwato apita. 38Umuntu wino imizimu miwipe yafumile mweweliwe alambilizya Yesu ati, Nkulonda mpite nawe.

Ukuwa Yesu amukania ati, 39Yanga kumwinu ukanenange wanji chino Leza wakuchitila.

Umuntu awapita mukaya konsi akulandila awantu chino Yesu wamuchitizile.

Umwanamukazyana wakwe Jailosi nga numwanachi wino walemile umwinjilo wakwe Yesu

(Mateyu 9:18-26; Marko 5:21-43)

40Ala Yesu walambila mbalama zinji izyakwe sumbi iwumba alimupochelela, amuno awantu wonsi wamulindililanga, 41Ngapano umuntu wino witwanga izina lyakwe Jailosi afika, weyonye walinji wesongo wamung'anda yakupepela mumasyonye yayo. Apona pamanama yakwe Yesu amulambilizya ukuti aye kung'anda yakwe, 42muno umwanakwe wenganye-nsu umukazyana, wamyaka ikumi nayiwili, watezile wat'awafwa.

Ala pane Yesu akupita, iwumba alimufininchizya. 43Mwiwumbanye lyoIyo mwalinji numwanachi wino wapitilizile kutaluvile kumyaka ikumi nayiwili; wasumvile vyonsi vino walinji navyo kwewasing'anga, kuwa wumwi atatela amupozye. 44Aya mwiwumba asochelela Yesu kunsizi aya akumvya umuko wamwinjilo wakwe, nanti kuzimbanye ukupitilila kwakwe akuputuka. 45Yesu awuzya ati, Ngaweni wankumya?

Awantu wonsi awakana, achaleka Peter ati, Tatakulu, ngavino awantu wonsinye wakuliwilizizye wakutitichizizye.

46Ukuwa Yesu ati, Wumwi ankumizye, amuno nalola kuno amaka yafuma mwenene. 47Umwanachi alola kuno walemenchezwa, aya, mbali akuzakaza, afika apona pamanama yakwe Yesu. Paponye, pankolelo pakwe wonsi, anena Yesu chino wamukumizizye navino wapozile nanti ntazi. 48—Yesu anena umwanachi ati, Mwanane, isuwilo lyako lyakupozya. Pita umutende.

49Ala pane Yesu achili akuvwanga, wumwi wino watumilwe afuma kung'anda yakwe songo afika amunena ati, Umwanako wafwa, achaleka utize uwafwa nukutamya umusambilizya.

50Ukuwa Yesu ayivwa wowonye, anena Jailosi ati, Utize uwatina; suwila awowo, umwanako wandi awe ichete.

51Ala Yesu wafika pang'anda alesya wanji wonsi ukuti winjile nawe mung'anda suka ndi we Peter, nu Yohani nu Jemusi, nga nuyisi wamwana nunyina, 52Wonsi wano walinjipo walosyanga umwana. Yesu awanena ati, Mutize muwalosya; umwana atafwile—aponechile awowo!

53Wonsi awamuseka, amuno wamanyile kuno umwana wafwile. 54Ukuwa Yesu amulema ikasa amwita ati, Mwana, katuka! 55Azyulupuka akatuka nati kuzimba; Yesu akomelezya ukuti wamupe kamwi alye, 56Awakwasi wamwana awazunguka, ukuwa Yesu weni awachinyintizya ukuti watize wanena wumwi chino chachisilwe.

Currently Selected:

Luka 8: WWN82

Highlight

Copy