Luka 7
7
Yesu apozya umuwomvi wakwe musika wawa Roma
(Mateyu 8:5-13)
1Ala Yesu wamala amazwi yakwe yonsi yano wanenanga awantu, aya ku Kapemahumi. 2Emusika wawa Roma walinji numuwomvi wakwe wumwi wino wakundisizye nkaninye; umuntunye weyo walwile kutaluvile awalonda nukufwa. 3Ala musikanye weyo wivwa ivyakwe Yesu, atuma wasongo wamwi awawa Yuda kwe Yesu ukuya mulambilizya ukuti aye akapozye umulwale wakwe. 4Awala wafika kwe Yesu awamulambilizya nkaninye, awati, Wazipila ukuti uyavwe umuntunye wee. 5Amuno wakunda umwiko witu swinya weliwenye awino watuzenjela ing'anda yitu iyakupepela.
6Nga Yesu apita nawo. Ala pano wapalamila pang'anda yakwe musikanye weyo atuma awawuye kwe Yesu ukumunena ukuti, Mulali, Utize uwayitamya nukwiza kwenene. Ntazipila ukuti ungiza mung'anda yane, 7swinya nanti anenenye ntazipila ukukolela pankolelo pakwe wewe. Ukuwa vwanga izwi tupu umulumendo wane apole. 8Amuno naninye nemuntu wino nalasikwa pawukankala wakwe wasongo, swinya indi nivita. Nkula nanena wumwi nati, Pita! apita; ndi nanena winji nati, Zanga! ayiza; ndi nanena umuzya wane nati chita choo! achita.
9Yesu ala wivwa wowonye azunguka;
apepetuka anena iwumba lino lyamukonsile ati, Nsitela ndole isuwilo kulu ndi-lyoo, nanti amwe Israeli-nye!
10Ngapano wane watumilwe awanyochela kung'anda yakwe musika awaya awazana umuwomvi wakwe apozile alichete.
Yesu akatusya umwana wamwanachi wino wafwizilwe umulume
11Pansizi pano patani pazimbe Yesu aya kukaya kano watanji Naini; wapisile nawasambilizi wakwenye nga niwumba kulu ilyawantu. 12Ala wapalamila pampongolo yakaya, alola iwumba lyakwe wane wanyamuzile ichala likufuma mukaya. Wino wafwile walinji amwanachonsi wamwanachi mufwilwe umulume, kwalinji niwumba kulu ilyawantu wamukaya. 13Ala Imfumu e Yesu wamulola ichilanda achimulema anena umwanachi ati, Utalosya. 14Apalamila alema ichintamfu, nawantu wane wanyamuzile ichala awimilila. Yesu ati, Mulumendo! Nkukunena nkuti, Katuka! 15Nga umufwe akatuka atalika ukuvwanga, nga amulemeka kwenyina.
16Intete azilema wonsi, awatumvya Leza, wakuti, Umutumwa mukulu waloleka mwakwe sweswe! nu Leza wiza mukutula awantu wakwe!
17Ukulumbililwa kwakwe Yesu akukwila insi yonsi ninsi zyamumbali.
Inktumi zyakwe Yohani kabatizya
(Mateyu 11:2-19)
18Awasambilizi wakwe Yohani awamulandila vyonsinye vyoo. Ayita wawili awakwe woliwo 19awatuma ku Mfumu e Yesu ukuti wakamuwuzye ukuti, Wuzye awemuntu Yohani watili ukwiza, pamwi tuwalolela winji?
20Awala waya kwe Yesu awati, E Yohani kabatizya atutumile kukwiza kuwuzya, Ndi awemuntu watili ukwiza, pamwi tuwalolela winji?
21Pampindinye yoyo Yesu apozya awantu wavule kundwala zyawo, namatenda, nimizimu miwipe, aleka nintonko azipochelela icheni aziwalola. 22Atolelela wano Yohani watumile ati, Nyokani muye mukalandile Yohani vino mwalola navino mwayivwila; mukati, Intonko zikulola, awalemale wakupita, awamambombombo wakutelefwa, wakutwi wakwivwa, awafwe wakuzyulupulwa, nilandwe zima likuwililwa kuwasaluke. 23Uwalongo awino asi nachimwi ichakuvwilika nani!
24Awala pano wane Yohani watumile wapita, Yesu atalika ukunena amawumba ivyakwe Yohani, ati, Wuzye pano mwayile mukulola Yohani mulumpalang'ang'a, mwayile lola chani? Wuzye alisote lino likayinganwa numuza? 25Nga fwandi mwayile lola chani? Wuzye mwayile mukulola umuntu wino wazwite ivizwalo vinji? Lolani wane wakayitopwa mbali nu kuzwala ivizwalo vyamwatanye wowo wakwikalanga mumasano! 26Ngafwandi mwayanga mukulola chani? Wuzye amutumwa? Molimonye, nkuwanena nkuti—mwayile amulola wino walusizye numutumwanye. 27Amuno e Yohani-nye awino amawaliko matele yataka yati, Leza wavwanga wati, Wenye-wee awili ntumi yane yino natuma pankolelo pakwe wewe kukukwiyulila inzila. 28Yesu ayonjelezya avwanga ati, Yohani wakula walusya wonsi wano wakwatwa; ukuwa wino wachepesya mu Wufumu wakwe Leza wakula wamulusya.
29Awantu wonsi nawakasonchezya wamusonkonye awamwivwa; wawonye awano watontezile ukulonda kwakwe Leza awabatizwa nukubatizwa nu Yohani. 30Ukuwa Awa Falisi weni nawasambilizya wamasundo awayikanila ukulonda kwakwe Leza, awakana ukubatizwa nu Yohani.
31Aleni, ngafwandi inkulonye yoo iyilelo ingayikolania nachani? Ngayakolana nachani? 32Yakolana nawana watichi wano wisile mumasyo yakukazizya, Wano iwumba lyonga likulanga likupunda awawuye likuti, Twawimbilizile indwimbo zyawinga, ukuwa nanti kuti muwachina! Twawimbilizile indwimbo zyamalosyo, ukuwa nanti kuti muwalosya! 33E Yohani kabatizya wizile, ayiza awakana ukulya nanti akung'wa ipala, amuti, Ali numuzimu wuwipe! 34UMwana Muntu wizile awalya nukung'wa, amuti, Sitelani mulole umuntu wee! Amumilichisye echakolwanye umwenecho, echiwuza wakwe wakasonchezya wamusonko nawawembu! 35Ukuwa naponye, injelu zyakwe Leza zikapanichiswa nawano wakazipochelela.
E Yesu kumwawo kwakwe Simoni umuFalisi
36UmuFalisi wisile Yesu kuchakulya chamanguzi ukuti akalye nawe. Yesu ayakweneko ayikala awalya. 37Mukayanye kako mwalinji umwanachi umuwembu. Ayivwa kuno Yesu walyanga ichakulya mung'anda ya muFalisi, asenda umusazi wamafuta yifungo nunchile 38aya ayimilila mupipipipi nu Yesu lwakumanama yakwe, awalila anyesya amanama yakwe Yesu naminsonzi yakwe. Ngapano awachumula amanama yakwe Yesu ninyele zyakwe, afyompa amanama, ayapaka namafuta yifungo nunchile. 39Ala umuFalisi wino wisile Yesu walola wowonye, avwanga mumwezo wakwe ati, Ndachino umuntunye wee wanga alange amutumwa, wanga amanye umwanachinye wee wino akumulemalema; wanga amumanye uluwembu luno akachita!
40Yesu asimpuka amunena ati, Simoni, nkasi nkunene chimwi.
Nawe ati, Eta, ne-waa, Musambilizya. 41Yesu ati, Kwalinji awantu wawili wane wakofile indalama kwe wino wakopesyanga; wumwi uwakwe wanyewaa akopa indalama imyanda yisano (500) numuwuye in dalama amakumi yasano. 42Muno wonsinye wowili waposilwe ukulipa, awatetela. Ngafwandi weweni pakwe woliwo wino angamukunda alusye umuwuye?
43Simoni atolelela ati, Nkwelengania wino angamukunda alusye aweyo wino atetezilwe ivivule nkani.
Yesu ati, Watolelela molimonye. 44Ngapano apiluluchila kumwanachi anena Simoni ati, Wuzye ukulola umwanachi wee? Pano njizizile mung'anda yako, utatezile umpe aminzi yakusamba kumanama yane, ukuwa weni wapwizya amanama yane naminsozi yakwe wayachumula ninyele zyakwe. 45Ukuwa wenji utamfyomfile, pano weni atatezile alechelezye ukufyompa amanama yane. 46Utatezile upake umutwe wane namafuta, ukuwa weni apasile amanama yane namafuta yifungo nunchile. 47Achaleka nkukunena nkuti, muno alukundo lwakwe luno wachita achimanyilo chakulanjizya kuno uluwembu lwakwe lonsi uluvule lwatetelwa. Achaleka wensi wino watetelwa katichi, awino akulanga ali nukulundo lutichi.
48Ngapano Yesu asimpuka anena
umwanachi ati, Uluwembu lwako lwatetelwa.
49Awantu wanji wano wisile pachakulya awatalika ukunenana wakuti, Nga nawe wenye-wee weweni wino akatetela amawembuko?
50Ukuwa Yesu weni anena umwanachi ati, Isuwilo lyako lyakutula; pita umutende.
A wanachi wano wasuchilizile Yesu
Currently Selected:
Luka 7: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
