Luka 6

Iwuzyo kuvyawanda wakusolezya

(Mateyu 12:1-8; Marko 2:23-28)

1Pawanda wumwi uwakusolezya Yesu wapitanga muvyalo vyankumba. Awasambilizi wakwe awatalika ukufyanula imitwe yankumba, awapukusa, wakulya. 2Awa Falisi wamwi awati, Ngachani chino mukuchita chino isundo lyitu lyakana ukuchita wowonye pawanda wakusolezya?

3Yesu atolelela ati, Wuzye mutawazya chino Davidi wachisile pano inzala yamulumile iluma nawantu wakwe? 4Winjizile mung'anda yakwe Leza, asenda ichakulya chamuzilo ichakwe Leza, alya, apa nawano walinji nawo awalya. Chino mwisundo amwiko ukulya nkandi wasimapepo watupu.

5Yesu apelelechezya namazwi yakuti, Umwana Muntu awili Mfumu yawanda wakusolezya.

Umuntu wikasa kwinyane

(Mateyu 12:9-14; Marko 3:1-6)

6Ukuti pawanda wakusolezya wunji Yesu aya mung'anda yakupepela awasambilizya. Momonye mwalinji numuntu wino ikasa lyakwe ilyandilo lyakwinyine. 7Awasambilizya wamasundo wamwi nawa Falisi awalonda umwakumulemela uluwi; awamutesya ukuti walole ndi angapozya pawanda wakusolezya. 8Ukuwa weni amanya amelengania yawo anena umukwinyane ikasa ati, Katuka uyize uyimilile pankolelo. Umuntu akatuka ayimilila. 9Ngapano Yesu asimpuka awanena ati, Nkuwawuzya: Wuzye achani chino isundo litu lyatuzumilizya ukuchita pawanda wakusolezya? Ukwavwa pamwi ukonona? Ukupunga uwumi pamwi ukulovya? 10Atalangania awalolechesya,

anena umulwale ati, Kunzulula ikasa lyako. Achita wowonye, ikasa lyakwe alipola.

11Ukuwa weni awavitwa awatalika ukuvwanzyania chino wangachita Yesu.

Yesu asola awasambilizi ikumi nawawili

(Mateyu 10:1-4; Marko 3:13-19)

12Pampindinye yoyo Yesu aya kumwamba mukupepa, wapepanga uwusiku wonsi kwe Leza. 13Akula kwacha ayita awasambilizi wakwe asola ikumi nawawili, wane wawisile ati, Awasolwa: 14e Simoni (wino swinya wamwisile ilyakwe Peter) numunyina e Andreya; e Jemusi nu Yohani, e Filipu nu Bartolomeyo, 15Mateyu nu Tomasi, e Jemusi, umwanakwe Alifeyu, nu Simoni (wino witwanga ilya wukaya, 16e Yuda, umwanakwe Jemusi, nu Yuda Iskarioti, ekakutilila.

Yesu awasambilizya nukupozya

(Mateyu 4:23-25)

17Yesu atantamuka apaliponga nawasambilizi wakwe, aya ayimilila pawandansi niwumba kulu ilyawasambilizi wakwe. Niwumba kulu ilyawantu wane walinji kweneko wano wafumile mwe Yudeya monsi, na mwe Yerusalemu, namutwaya twakwe Ture nu Sidoni, utwamumbali yakwe sumbi; 18wayile kukumwivwa nakukupozwa indwala zyawo. Nawano watamikanga nindwala zyamizimu miwipe nawonye awapozwa. 19Awantu wonsi walondanga ukumukumvya, amuno amaka yafumanga mwakwe weliwe ayapozya wonsi.

Ichimwemwe nichilanda

(Mateyu 5:1-12)

20Yesu ayinuka alola awasambilizi wakwe ati,

Awalongo amwemwenye mwewalanda;

amuno uwufumu wamwiyulu awinu!

21Awalongo amwemwenye mwewantu mukulumwa ninzala kanonzi,

amuno muliyikuta!

Awalongo amwemwenye mwewantu mukulosya;

amuno muliwasechela!

22Awalongo amwemwenye muno awantu wakuwapata, nukuwapantula, nukuwakwelengula, awati mwewawembu, muno aMwana Muntu! 23Mwize muwazewela ndivyovyonye viza vyawaponela, muwachina mbali nukulafya nichimwemwe, amuno mwasengulilwa ichilambu chikulu mwiyulu. Amuno avino nawayisikulunye wachisile ivyamwatanye WOO kuwatumwa.

24Ye akalanda wuli kwakwe mwemwe mwewawotoke;

amuno mwenji mwatela mwatoma imyikalile mizima kali!

25Ye akalanda wuli mwewantu mukwikuta kanonzi;

amuno muliwalumwa ninzala!

Ye akalanda wuli mwewantu mukuseka kanonzi;

amuno muliwalosya muwalila nukulila!

26Ye akalanda wuli mwewantu wonsi wakawawanzya; amuno avino nawayisikulunye wachitanga kuwatumwa wawufi.

Ukukunda awalwani

(Mateyu 5:38-48; 7:12a)

27Ukuwa nkuwanena mwemwenye mwewantu mukwivwa: nkuti, Kundanji awalwani winu, muwachitila wane wawapata ivizima, 28pepelanji wane wakawatipa, muwapepela nawano wakuwayimvya. 29Ndiwumwi wakuma kwitama umupa niwuyenye, akuma nawino wakupoka ichizwalo, uleka asenda nilaya lyakonye. 30Uwapa wensi wino akukulenga, nawino wasenda insawo yako, utize uwalandula. 31Vino mukalonda wanji wawachitila avino namwenye wachitilanji.

32Ndimukukunda wane wawakunda, ngafwandi mungapepwa wuli? Amuno nawawembunye wakakunda wane wawakunda! 33Ndi mukuchitila ichete wano wakawachitila ichete, ngafwandi mungapepwa wuli? Amuno avino nawawembunye wakachita! 34Ndimwapavya wane mwasuwila kuno wangawanyosezya, ngafwandi mungapepwa wuli? Amuno avino nawawembunye wakapavya awawembu wawuye, alyakuti wize wapochelele vyonsi pano vyawela! 35Ng'o! Nenji nkuti kundanji awalwani winu muwawachitila vino viyine; muwawapavya nanti kupechela ukunyosezwa. Mulipochelela ichilambu chikulu, mwize muwe mwe wana wawamwilewelewe e Leza. Amuno weni amuzima kumintatima nakuwawipe. 36Muwawa ninkumbu ndivino uMonsi winu ali ninkumbu,

Ukupanzya wanji

(Mateyu 7:1-5)

37Mutize muwapanzya wanji, apano namwenye Leza ataliwapanzya; mutize muwavililichila wanji, apano namwenye Leza ataliwavililichila; tetelanji wanji, apano namwenye Leza aliwatetela. 38Panji wanji, apano namwenye Leza ayize awape: mulipochelela mulutilizye, nukwavwa kwankumbu kulipungulilwa mumakasa yinu—vyonsi vino amakasa yinu yangafumbata. Enamwezyo wino mukwelelezezya awino namwenye Leza alimwelelezezya.

39Yesu awumila umulumbe ati, Intonko itanga ikolelele intonko mbuye; amuno ndi yakolelela imbuye, zyonsinye zyowili zingaponela muchizinji. 40Umusambilizi atalusya umusambilizya wakwe; ukuwa umusambilizi ndiwamanyichisya, pano wamala amasambililo yakwe, angawa ndivino umusambilizya wakwe,

41Ngamuno chani chino ukulola akaswaswa kano kali mwilinso lyamunyonko, ukuwa nanti kupechela ichimuti chino chili mwilinso lyako? 42Nga unganena umunyonko wuli uti, Mwanawitu, leka nkufule akaswaswa kano kali mwilinso lyako, pano nawe ichimuti chili mwilinso lyako? Wekachenjezyawe! Pakutalika tela ufumye ichimuti chino chili mwilinso lyako, apano uwalola ichete pakufula umunyonko akaswaswa kano kali mwilinso lyakwe.

Umuti nivikomwa vyakwe woliwo

(Mateyu 7:16-20; 12:33-35)

43Umuti wuzima wusikoma ivikomwa viwipe, swinya pasi umuti wuwipe wuno wukakoma ivikomwa vizima. 44Umuti wonsi wukamanyichilwa kuvikomwa vyakwe; awantu wasikuntula amaku kwenkololwe, nanti akukuntula ivikomwa vino wakasuta ipala kumyunga, 45Umuntu muzima akafumya ivintu vizima ivyansawo yamumwezo wakwe; nawe umuntu muwipe akufumyanga iviwipe ivyamunsawo yakwe imbipe. Amuno vino vikafuma mumulomo wamuntu avino vikuwanga mumwezo wakwe.

Wakezenga wang'anda wawili

(Mateyu 7:24-27)

46Ngamuno chani chino mukunjita mukuti, Mfumu, Mfumu, nanti kuchita vino nkuwanena? 47Wensi wino akwiza kwenene, akwivwa amazwi yane, akuyatontela nukuyatontela—weyonye awino nandi mbasontele wino wakolana nawe. 48Wakolana numuntu wino wazenzile ing'anda: ayimba ulufula luzike afisya napiwe. Imilamba iwatantala iwakuma pang'andanye yo yo ukuwa nanti kuyingana, amuno yazenzilwe ichete. 49Ukuwa wino akwivwa amazwi yane nanti kuyatontela wakolana numuntu wino wazenzile ing'anda pamusili wavye, nanti kwimba ulufula; ila imilamba yati iwatantala yakuma ing'andanye yoyo ipona nanti kusinchilila—ye ukupona kwakwe yoliyo kwawifile wuli!

Currently Selected:

Luka 6: WWN82

Highlight

Copy