Luka 5

Yesu ayita awasambilizi wakwe awakutalika

(Mateyu 4:18-22; Marko 1:16-20)

1Pano Yesu wimilile pachituntu chakwe sumbi wakwe Genesareti iwumba alititichizyania pakwe weliwe kukwivwa izwi lyakwe Leza. 2Alola amato yawili yano yakwemezilwe kuchituntu; awalondo wafumile mwenemo awaya mukupwizya amakonde yawo. 3Yesu ayinjila muwato wumwi—uwakwe Simoni—amunena ukuti as ike uwato katichi wufume kuchituntu. Yesu ayikala muwato awasambilizya iwumba.

4Ala pane wamala ukuvwanga, anena Simoni ati, Sika uwato uleke wuye kunkolelo ukuzike, ngawewenye nawawuyo musumbile amakonde muvwime.

5Simoni atolelela ati, Tatakulu, twimvile wusiku wonsi nanti kulema yimwi. Ukuwa vino wavwanga, nandi nsumbile amakonde. 6Awasumbila amakonde awalema inswi mvule kutaluvile namakonde ayalonda ukulepuka. 7Achaleka awanena awawuye awamuwato wunji ukuti wakawavwe. Awaya awizuzya amato yonsi ninswi-pwi namato ayalonda ukusiwila. 8Ala Simoni Peter walola wonye-woo apona asokowala pankolelo pakwe Yesu ati, Funtuka pakwe nene, Mfumu! Amuno nemuwembu!

9E Simoni Peter nawawuye awazunguka kutaluvile kukuvula kwanswi zino walemile. 10Achizungusya nawawuyenye, e Jemusi nu Yohani, awanakwe Zebediya. Nga Yesu anena Simoni ati, Utize uwatina; amuno ukufumilila kanonzi wandi uwavwima awantu.

11Awakwemela amakonde kuchituntu, awasya vyonsi, awakonka Yesu.

Yesu apozya uwamambombo

(Mateyu 8:1-4; Marko 1:40-45)

12Uwanda wutalile kantu Yesu wayile mukaya kamwi kano umuntu wino walwile amambombo wikalanga mwenemo. Ala umuntunye weyo walola Yesu apona afukime amulambilizya ati, Mulali, ndi ukulonda, ungantelefya!

13Yesu atambalika ikasa lyakwe amulema. Ati, Nkulonda. Ale pola! Napaponapapo amambombo ayapola kumuntu. 14Yesu amukomelezya ati, Utize ukanene wumwi chonye-choo, ukuwa lungama kwesimapepo uleke akakulolechesya; ngapano ufime inzuwi, ndimuno Musa wakomelezizye, alyakuti wonsi wamanye kuno kanonzi wapola.

15Ukuwa ukulumbililwa kwakwe Yesu akukula nkaninye, namawumba yawantu awaya kukumwivwa nukuti wakapozwe indwala zyawo. 16Ukuwa weni atela ayongoloka aya mumayonde mukupepa.

Yesu apozya umuntu wino walwile ichintendya

(Mateyu 9:1-8; Marko 2:1-12)

17Wanda wumwi pane Yesu wasambilizyanga, awa Falisi wamwi nawasambilizya wamasundo wano wafumile mutwaya tonsi utwamwe Galileya nutwamwe Yuda wayile awikala paponye, nawano wafumile kwe Yerusalemu-nye. Yesu wizuzizwe namaka ya Mfumu e Leza ukupozya awalwale. 18Awantu wamwi wane wasenzile umuntu wino walwile ichintendya pachintamfu, awelezya ukuti wamwinjizye muno Yesu walinji. 19Ukuwa muno aliwumba, awapotwa apakupita. Achaleka awamukwezya pamusonje papela, awasansula umusonje, awamusolosezya nichitala chakwe mwiwumba lyawantu pankolelo pakwe Yesu. 20Ala Yesu walola isuwilo lyawo, anena umulwale ati, Wane, uluwembu lwako lwatetelwa.

21Awasambilizya wamusundo nawa Falisi awatalika ukuvwanzyania wakuti, Nga amuntu-chi wee wino akukwelengula Leza umwatanye woo? Pasi umuntu wumwi wino angatetela amawembuko; nkandi Leza wenganye-nsu!

22Yesu amanya amelengania yawo ati, Ngamuno chani chino mukwelengania ivintunye vyoo? 23Wuzye ichipepuke achani ukuti, Amawembuko yako yatetelwa, nanti akuti, Katuka uwapita? 24Ukuwa nandi mbapanichisizye mumanye, kuno Umwana Muntu ali namaka munsi ukutetela uluwembu. Achaleka anena wino walwile ichintendya ati, Nkukunena nkuti, Senda ichitala chako uwapita kumwinu!

25Napaponapapo umuntu akatuka paminso yawantu wonsi, asenda ichitala chakwe chino walalilanga, aya kumwawo, mbali akutumvya Leza. 26Wonsinye awazunguka kutaluvile! Nintete aziwalema, awatumvya Leza, wakuti, Ye avyakuzunguka wuli ivintu vino twalola ilelo!

Yesu ayita Levi

(Mateyu 9:9-13; Marko 2:13-17)

27Pansizi pakwe choo, Yesu afuma alola kasonchezya wamusonko wino izina lyakwe walinji we Levi, wisile mung'anda yakusonchezezya. Yesu amunena ati, Nkonka. 28Levi akatuka, asya vyonsi, amukonka.

29Ngapano Levi atewetela Yesu ivyakulya vivule mung'anda yakwe, yino yizwile nawakasonchezya wavule nawantu wanji wane walyanga apaliponga nawo. 30Awa Falisi wamwi nawasambilizya wamasundo wane walinji mwiwumbanye lyolyo awakwinuluka kuwasambilizi wakwe Yesu awati, Ngamuno chani chino mukulya nukung'wa nawakasonchezya wamusunko nawawembu?

31Yesu awatolelela ati, Awapuma watauga wawafwa nukulonda ing'anda, nkandi awalwale. 32Ntatunjila ukwita awalungamane ukuti watontolokwe, nkandi awawembu.

Iwuzyo kuvyakukana ukulya umwenzo

(Mateyu 9:14-17; Marko 2:18-22)

33Awantu wamwi awanena Yesu awati, Awasambilizi wakwe Yohani wasilya chiwiwi-chiwiwi ukuwa wakulanga wakupepa, nawasambilizi wawa Falisinye avino wakachita; ukuwa awasambilizi wako weni wakulanga wakulya nukung'wa.

34Yesu awatolelela ati, Wuzye ungawindika wane wisilwe kuwinga ukulya pano wachili wali nusiwinga? Awe, nanti katichitichi! 35Ukuwa impindi iliyiza pano siwinga alisendwa afume kwewoliwo, paponye apano walisolezya ukulya.

36Swinyanye Yesu awumila numulumbe woo ati, Pasi wumwi winoakasenda impatikwa yachizwalo chipya apatika kuchizwalo chikali. Ndi avino wachita, angatela wonona ichizwalo chi pya apavye patupu, nimpatikwa impya itanga iyane kuchizwalo chikali. 37Swinya pasi wumwi wino akuwikanga ipala-pya mumuwa wukali. Ukuwa ndi wachita wowonye, ipala-pya lingalepula umuwa, ipala Iyitike, numuwa wononeke. 38Nanti katichi-tichi! Ipala-pya lyazipila ukuwika mumuwa wupya! 39Pasi umuntu wino akalonda ukung'wa ipala-pya ndi watela wang'wa ikali. Ati, Ipala kali lyazipa lyalusya.

Currently Selected:

Luka 5: WWN82

Highlight

Copy