Luka 4

Ukwelezwa kwakwe Yesu

(Mateyu 4:1-11; Marko 1:12-13)

1Yesu wizwile nu Muzimu Mwimichile pano wafumanga kwe Yordani, nga akolezwa nu Muzimu aya mulumpalang'ang'a, 2kokonye welezwanga nu Satan a kumanda amakumi yani. Pampindinye yoyo yonsi iyakwelezwa kwakwe atalyanga kamwi, achaleka pane ukwelezwa kwasizile inzala yamulumile nkaninye.

3Satana amunena ati, Ndi we Mwanakwe Leza, nena iwenye lyoo liwe achakulya.

4Yesu atolelela ati, Amawaliko Matele yawalikwa yati, Umuntu atanga awe nuwumi kuchakulya chitupu,

5Satana anyoka amusenda amutwala mupela amusontela mu kapindi katichi uwufumu wonsi uwamunsi. 6Ati nandi nkupe amaka yonsi, ninsawo yonsi yoo. Napilwe vyonsinye vyoo, nani ingapa wensinye wino nkulonda. 7Vyonsinye vyoo nandi nkupe viwe avyako, ndi achino wapona pansi wansokowalila.

8Yesu atolelela ati, Amawaliko Matele yawalikwa yati, Uwafukamila Imfumu e Leza wako weliwenye wenga-nsu awino uwamupakata.

9Satana amukolezya kwe Yerusalemu amutwala pantonje pang'anda yakwe Leza, amunena ati, Ndi wemwanakwe Leza tampuka paa ukayiponie pansi. 10Amuno Amawaliko Matele yawalikwa yati, Leza alisunda awangeli wakwe wize mukukusunga. 11Swinya yati, Walikwanka mumakasa yawo alyakuti utize upunule nanti alitamba lyako kumawe uchisike.

12Yesu atolelela ati, Amawaliko Matele yawalikwa yati, Utakwelezya Imfumu e Leza wako.

13Walile pano Satana wamala ukwelezya Yesu mwakwe vyonsi, atela amusya.

Yesu atalichila ukuwomba umulimo mu Galileya

(Mateyu 4:12-17; Marko 1:14-15)

14Ngapano Yesu anyochela ku Galileya ayizwile namaka ya Muzimu Mwimichile. Nulumbili lwakwe alusatila insi yonsi. 15Awasambilizya mung'anda zyawo izyakupepela nawonsi awamuwanzya.

Awakana Yesu pa Nazareti

(Mateyu 13:53-58; Marko 6:1-6)

16Ngapano Yesu aya kwe Nazareti, kuno wakwatizilwe, ngukuti pawanda wakusolezya aya kung'anda yakupepela ndivino wachitanga pe. Yesu ayimilila alyakuti awuzye Amawaliko Matele, 17awamupa nukalata wamutumwa Ayizeya. Avunguluka kalata azana pane yawalikwa yati,

18Umuzimu wa Mfumu e Leza wuli pakwe nene,

amuno wansola ukuti ndawizizya awalanda Ilandwe Zima.

Wantuma ukunena intapwa ivyikomolwa,

nukuti intonko ziwalola;

nukupulumusya wane wavindilichizwa,

19nukumila wantu imbila yamwaka wakwe Leza

pano alitula awantu wakwe.

20Ngapano Yesu avunga kalata, apa kayamwite, ayikala pansi. Awantu wonsi wane walinji mung'anda yakupepela awamupanga naminso awati-mpa. 21Atalika ukuwanena ukuti, Ilelo, amazwinye amatele yafiswa kwakwe mwemwe, ndimuno mwivwila pano yakuwazwa.

22Wonsi awamupanichisya, awazunguka kumazwi mazima yano wavwanzile. Awati, Wuzye wenye-wee asi amwanakwe Jozefu?

23Awanena ati, Mwasuka munene umulumbenye woo muti, Sale vino we sing'anga, yipozye, Swinyanye mwanyoka munene muti, chita namonye-moo mukaya kinu ivintunye vyoo vino watunena ndi vyatela avichitwa mwe Kapemahumi. 24Yesu anyoka ayonjelezya avwanga ati, Umutumwa asipochelelwa mukaya kawo. 25Aleni nteyelezyani: awenche nkuwanena nkuti mwe Israeli mwalinji awanachi wavule awafwilwe awalume pampindi yakwe Eliya, pane imvula yalesile ukutonya kumyaka yitatu nimyezi mutanda akuwa ichinkumbili chikulu munsi yonsi. 26Ukuwa naponye Eliya atatela atumwe kwewumwi suka nd'akumwanachi mufwilwe umulume uwa mu Zarefati, munsi ya Sidoni. 27Swinya pampindinye yoyo iyamutumwa Elisha kwalinji awamambombo wavule; lelo wumwi atatela apozwe, suka ndi we Naamani umu Siria.

28Walile awantu wane walinji mung'anda yakupepela wivwa wonye-woo achiwapantila awavitwa nkaninye. 29Awavundumuchila mupela, awakwemela Yesu kunzi, awamutwala pamwamba papela pane wazenzile akaya kawo, ukuti wamuvwintile pemfuzi. 30Ukuwa weni afota piwumba pakasi awapita.

Umuntu wino walinji nu muzimu wuwipe

(Marko 1:21-28)

31Ngapano Yesu aya ku Kapemahumi akaya ka mu Galileya, awasambilizya awantu wamwenemo pawanda wakusolezya. 32Wonsi wazungukanga kumisambilizizye yakwe, amuno amazwi yakwe yalinji nuwukankala. 33Mung'anda yakupepela mwalinji umuntu wino walinji numuzimu wuwipe; apunda nkaninye nizwi kulu ati, 34Ala! Nga ukasi utuchite chani, we Yesu wa mwe Nazareti? Wuzye wizila koo kukwiza tulovya? Nkumanyile vino uli: wentumi ntele iyakwe Leza!

35Yesu akalipila umuzimu ati, Myalala, fuma mumuntu! Umuzimu awuzangula umuntu pankolelo pawantu awufuma mumuntu nanti kumuchisa.

36Wonsinye awazunguka awanenana wakuti, Nga nayo yaa amazwichi? Yano akuvwanjila nuwukankala namaka akalipila imizimu miwipe, ifuma! 37Ukulumbililwa kwakwe Yesu akukwila mumasyonye yayo yonsi munsi yoyonye.

Yesu apozya awantu wavule

(Mateyu 8:14-17; Marko 1:29-34)

38Yesu afuma mung'anda yakupepela aya kung'anda yakwe Simoni. Enyinavyala Simoni walwile inzekema kutaluvile, awaya awanena Yesu ivyandwala yoyonye, 39Yesu aya ayimilila pano umulwale walazile, akalipila inzekema. Apola, akatuka nanti kuzimba awawapyunjila.

40Alila ilanzi Iyinjila, wonsi wane walinji nawalwale wandwala zyamisango-misango awawatwala kwe Yesu; awika amakasa yakwe pakwe wonsi awapozya. 41Nimizimu miwipenye yafumile muwantu wavule, mbali nukupunda wakuti, We Mwanakwe Leza!

Awakalipila awalesya ukuvwanga, amuno wamumanyile kuno walinji we Mesaya.

Yesu awawizya mung'anda zyakupepela

(Marko 1:35-39)

42Akula kwacha Yesu afuma mukaya aya mumayonde. Awantu awatalika ukumuvwamba, nga awala wamuzana awamuwachilila ukuti atize awasye. 43Ukuwa awanena ati, Nazipila ukuyawila Ilandwe Zima ilya Wufumu wakwe Leza namutwaya tunjinye, amuno chonye choo achino Leza wantumizile.

44Achaleka aya awawila mung'anda zyakupepela munsi yonsi.

Currently Selected:

Luka 4: WWN82

Highlight

Copy