Luka 3

Ukuwizya kwakwe Yohani kabatizya

(Mateyu 3:1-12; Marko 1:1-8; Yohani 1:19-28)

1Pamwaka wachitikumi nayisano uwawufumu wakwe Tiberia; pano Pontiyo Pilato walinji amulasi mwe Yudeya, paponye Herodi walinji amfumu ya mu Galileya, numunyina e Filipu walinji amfumu ya mwe Ituria ninsi ya Trakoniti; nu Lisania walinji amfumu ya mu Abilene, 2nawe Anasi nu Kayafasi walinji awasimapepo wakulu. Paponye apano izwi lyakwe Leza lyayile kwe Yohani, umwanakwe Zakariya, mulumpalang'ang'a. 3Achaleka Yohani aya munsi yonsi iya mwe Yordani. Ati, Tontolokwani kuluwembu lwinu mubatizwe, nga Leza awatetele amawembuko yinu. 4Ndivino chawalikwa mwekalata wamutumwa Ayizeya ukuti,

Wumwi wapundanga mulumpalang'ang'a:

akuti, Yaniani ekumba wa Mfumu e Leza;

molole inzila!

5Yizuzyani imikonko yonsi,

muwulumule nimyamba nimilundu vitambalale.

Ninzila nyongane zyololoke, ninzila mbipe zitelepe.

6Awalawa wonsi walilola itulwa lyakwe Leza!

7Amawumba yawantu ayaya kwe Yohani mukubatizwa nawe. Yohani awanena ati, Mwenzoka-mwe! Nga weweni wawanena wati mungasamala uwukali wakwe Leza wuno wukwiza? 8Fwandi aleni chitanji ivintu vino vingalanjizya ukutontolokwa kuluwembu lwinu. Mutize muwafwa nukuyinena muwati, Tuli nutatakulu e Abrahamu. Nenji nkuwanena nkuti, Leza angasenda amawenye yaa ayapilule yawe alikwata lyakwe Abrahamu! 9Impasa yazunzulwa kukukoma umuti mwisika; achaleka umuti wonsi wuno wusinakukoma ivikomwa wukaputulwa awusumbilwa mumulilo.

10Amawumba ayamuwuzichisya ayati Ngafwandi tuchite chani?

11Awatolelela ati, Wino ali namalaya yawili ape lyonga kwewino asi nalimwi, nawino alinichakulya achite wowonye.

12Nawakasonchezya wamwi awamusonko awaya kukubatizwa, awamuwuzya awati, Musambilizya, nga tuchite wuli?

13Awanena ati, Mutize muwapochelela mukulusya pane mwanenelwa. 14Nawavitanye wamwi awamuwuzya awati ngaswenji? Ngatwazipila atuchita chani?

Awanena ati, Mutize muwapoka wamwi indalama kumaka nanti akuwipizya mutize muwapizya wumwi. Mwenji timanji nichilambu chinu ampela.

15Imyezo yawantu ikatuchila mupela, awatalika ukwelengania ivyakwe Yohani, awamukolania wakuti, Sivyo wenye-wee awili Mesaya. 16Yohani awanena wonsi ati, Nenji nkuwabatizya naminzi, ukuwa kukwiza winji wino wakula wandusya. Wino ntanga nzipile ukusapula indyatu zyakwe. Weyonye aliwabatizya nu Muzimu Mwimichile numulilo. 17Ali nulupe lwakwelela, kukwela impumba zyonsi: nga alonge inkumba munkoma yakwe; ukuwa ilyelelo alyoche mumulilo wuntazima.

18Wowonye Yohani awilila awantu Ilandwezima, ayonjeleza navinji vivule. 19Ukuwa Yohani akalipila Herodi imfumu, amuno watwazile e Herodiya emuka munyina, amukalipila nakwakwe vyonsi iviwipe vino wachisile. 20Herodi wachisile ichiwipe alutilizya muno wiyalizile Yohani mung'anda yavingololo.

Yesu abatizwa

(Mateyu 3:13-17; Marko 1:9-11)

21Walile awantu wonsi wabatizwa, nu Yesu-nye abatizwa. Ala vino akupepa, kwiyulu akwiyuka, 22e Muzimu Mwimichile ayika peweliwe, walolekanga ngati ankunda. Nizwi alifuma mwiyulu aliti, Wewe wemwanane umukundwe. Nkusechela nawe nkani.

Ivyankwatwa yakwe Yesu Klistu

(Mateyu 1:1-17)

23Walile pano Yesu wamala imyaka amakumi yatatu iyankulo yakwe atalika ukuwomba umulimo wakwe; awantu awakwelengania wakuti, amwanakwe Jozefu, wino walinji amwanakwe Heli, 24umwanakwe Matati, umwanakwe Levi, umwanakwe Meleki, umwanakwe Janayi, umwanakwe Jozefu, 25e Jozefu umwanakwe Matatiya, umwanakwe Amosi, umwanakwe Nahumi, umwanakwe Eseli, umwanakwe Nagai, 26umwanakwe Maata, umwanakwe Matatiya, umwanakwe Semeini, umwanakwe Joseki, umwanakwe Joda, 27umwanakwe Joanani, umwanakwe Resa, umwanakwe Zerubabeli, umwanakwe Shealtieli, umwanakwe Neri, 28umwanakwe Meleki, umwanakwe Adi, umwanakwe Kosamu, umwanakwe Elimadamu, umwanakwe Eri, 29umwanakwe Joshua, umwanakwe Eliezara, umwanakwe Jorimu, umwanakwe Matati, umwanakwe Levi, 30umwanakwe Simeoni, umwanakwe Yuda, umwanakwe Jozefu, umwanakwe Yonamu, umwanakwe Eliakimu, 31Eliakimu umwanakwe Melea, umwanakwe Mena, umwanakwe Matata, umwanakwe Nathani, umwanakwe Davidi, 32umwanakwe Jese, umwanakwe Obedi, umwanakwe Boazi, umwanakwe Salimoni, umwanakwe Nashoni, 33umwanakwe Aminadabu, umwanakwe Adimini, umwanakwe Arini, umwanakwe Hezroni, umwanakwe Perezi, umwanakwe Yuda, 34umwanakwe Jekapu, umwanakwe Ayizeki, umwanakwe Abrahamu, umwanakwe Tera, umwanakwe Nahori, 35umwanakwe Seruga, umwanakwe Reu, umwanakwe Pelegi, umwanakwe Hebar, umwanakwe Shela, 36umwanakwe Kayinani, umwanakweArifakasadi, umwanakwe Shemu, umwanakwe Nowa, umwanakwe Lameki, 37umwanakwe Metusela, umwanakwe Enoki, umwanakwe Yaredi, umwanakwe Mahalaleli, umwanakwe Kayinani, 38umwanakwe Enosi, umwanakwe Seti, umwanakwe Adamu, umwanakwe Leza.

Currently Selected:

Luka 3: WWN82

Highlight

Copy